ಜಾದೂ ಮಾಡಿದ ಕ್ರೆಟಾ; 8 ತಿಂಗಳಲ್ಲೇ 1 ಲಕ್ಷ ಬುಕ್ಕಿಂಗ್ಸ್

By Nagaraja

Published: Wednesday, March 16, 2016, 11:38 [IST]

ಭಾರತದ ಕ್ರೀಡಾ ಬಳಕೆಯ ವಾಹನ (ಎಸ್‌ಯುವಿ) ವಿಭಾಗದಲ್ಲಿ ಜಾದೂ ಮಾಡಿರುವ ಹ್ಯುಂಡೈ ಕ್ರೆಟಾ ಬಿಡುಗಡೆಯಾದ ಎಂಟು ತಿಂಗಳೊಳಗೆ ಒಂದು ಲಕ್ಷಕ್ಕೂ ಹೆಚ್ಚು ಮುಂಗಡ ಬುಕ್ಕಿಂಗ್ಸ್ ದಾಖಲಿಸಿದೆ.

ಈ ನಡುವೆ ಭಾರಿ ಪ್ರಮಾಣದಲ್ಲಿ ದಾಖಲಾಗುತ್ತಿರುವ ಬುಕ್ಕಿಂಗ್ ಪ್ರಕ್ರಿಯೆಯಿಂದಾಗಿ ಬೇಡಿಕೆಯನ್ನು ಈಡೇರಿಸಲು ಹ್ಯುಂಡೈ ಕ್ರೆಟಾ ನಿರ್ಮಾಣ ಸಾಮರ್ಥ್ಯವನ್ನು ಶೇಕಡಾ 30ರಷ್ಟು ಅಂದರೆ ಪ್ರತಿ ತಿಂಗಳಲ್ಲಿ 13,000 ಯುನಿಟ್ ಗಳ ವರೆಗೆ ಹೆಚ್ಚಿಸಲು ನಿರ್ಧರಿಸಿದೆ.

ಜಾದೂ ಮಾಡಿದ ಕ್ರೆಟಾ; 8 ತಿಂಗಳಲ್ಲೇ 1 ಲಕ್ಷ ಬುಕ್ಕಿಂಗ್ಸ್

ಕಳೆದ ವರ್ಷ ಬಿಡುಗಡೆಯಾದ ಹ್ಯುಂಡೈ ಕ್ರೆಟಾ ಕಾರನ್ನು ಖರೀದಿಸಲು ಐದು ಲಕ್ಷಕ್ಕೂ ಹೆಚ್ಚು ಮಂದಿ ಉತ್ಸುಕತೆ ತೋರಿದ್ದಾರೆ. ಅಲ್ಲದೆ ಬುಕ್ಕಿಂಗ್ ಸಂಖ್ಯೆ ಒಂದು ಲಕ್ಷ ದಾಟಿದ್ದು, 56,000 ಯುನಿಟ್ ಗಳನ್ನು ಗ್ರಾಹಕರಿಗೆ ಹಂಚಿಕೊಳ್ಳಲಾಗಿದೆ.

ಹ್ಯುಂಡೈ ಯೋಜನೆಯಂತೆ ಪ್ರತಿ ತಿಂಗಳು 10,000 ಯುನಿಟ್ ಗಳನ್ನು ದೇಶೀಯ ಮಾರುಕಟ್ಟೆಗೂ ಹಾಗೂ 3,000 ಯುನಿಟ್ ಗಳನ್ನು ರಫ್ತು ಮಾಡಲಾಗುವುದು. ಜಾಗತಿಕ ಮಾರುಕಟ್ಟೆಯಿಂದ 28,000 ಯುನಿಟ್ ಗಿಂತಲೂ ಹೆಚ್ಚು ಬುಕ್ಕಿಂಗ್ಸ್ ದಾಖಲಾಗಿದೆ.

ಭಾರತೀಯ ಮಾರುಕಟ್ಟೆಯಲ್ಲಿ ಹ್ಯುಂಡೈ ಕ್ರೆಟಾ ಮೂರು ಎಂಜಿನ್ ಆಯ್ಕೆಗಳಲ್ಲಿ ಲಭ್ಯವಿರುತ್ತದೆ. 1.6 ಲೀಟರ್ ಪೆಟ್ರೋಲ್ ಗಮ್ಮಾ ಡ್ಯುಯಲ್ ವಿಟಿವಿಟಿ, 1.4 ಲೀಟರ್ ಯು2 ಸಿಆರ್ ಡಿಐ ಮತ್ತು 1.6 ಲೀಟರ್ ಯು2 ಸಿಆರ್ ಡಿಐ ಡೀಸೆಲ್ ಎಂಜಿನ್ ಜೊತೆಗೆ ಮ್ಯಾನುವಲ್ ಹಾಗೂ ಆಟೋಮ್ಯಾಟಿಕ್ ಗೇರ್ ಬಾಕ್ಸ್ ಗಳನ್ನು ಹೊಂದಿರುತ್ತದೆ.

ವಿನ್ಯಾಸ ಸ್ಪೂರ್ತಿ

ಹ್ಯುಂಡೈ ಫ್ಲೂಯಿಡಿಕ್ 2.0 ಡಿಸೈನ್ ತಂತ್ರಗಾರಿಕೆಯಿಂದ ಸ್ಪೂರ್ತಿ ಪಡೆದಿರುವ ಹ್ಯುಂಡೈ ಕ್ರೆಟಾ, ದೇಶದ ಅತ್ಯಂತ ಜನಪ್ರಿಯ ಐ20 ಹ್ಯಾಚ್ ಬ್ಯಾಕ್ ಕಾರಿನ ತಳಹದಿಯಲ್ಲಿ ನಿರ್ಮಾಣವಾಗಿದೆ.

ಆಯಾಮ

4270 ಎಂಎಂ ಉದ್ದ, 1780 ಎಂಎಂ ಅಗಲ, 1630 ಎಂಎಂ ಎತ್ತರ ಹಾಗೂ 2590 ಎಂಎಂ ಚಕ್ರಾಂತರವನ್ನು ಹೊಂದಿರುವ ಹ್ಯುಂಡೈ ಕ್ರೆಟಾ, ರೆನೊ ಡಸ್ಟರ್ ಹಾಗೂ ನಿಸ್ಸಾನ್ ಟೆರನೊಗಿಂತಲೂ ಹೆಚ್ಚು ಸ್ಥಳಾವಕಾಶವನ್ನು ಪಡೆದುಕೊಂಡಿದೆ.