ಮಹೀಂದ್ರದಿಂದ ಇನ್ನೋವಾ ಪ್ರತಿಸ್ಪರ್ಧಿ ಸಿದ್ಧ; ಭರದಿಂದ ಸಾಗುತ್ತಿದೆ ಟೆಸ್ಟಿಂಗ್!

ಕಳೆದ ತಿಂಗಳಿನಲ್ಲಷ್ಟೇ ಮಹೀಂದ್ರ ನೂತನ ಎಂಪಿವಿ ಟೆಸ್ಟಿಂಗ್ ಪ್ರಕ್ರಿಯೆ ಆರಂಭಿಸಿರುವುದರ ಬಗ್ಗೆ ಸುದ್ದಿ ಹರಡಿತ್ತು. ಈಗ ನಿರ್ಮಾಣ ಸಿದ್ಧ ವಾಹನದ ಪರೀಕ್ಷಾರ್ಥ ಚಾಲನೆಯ ವೇಳೆ ಚಿತ್ರಗಳನ್ನು ಸೆರೆ ಹಿಡಿಯಲಾಗಿದೆ.

ಏಳು ಸೀಟುಗಳ ಮಹೀಂದ್ರ ನೂತನ ಎಂಪಿವಿ ನೇರವಾಗಿ ಟೊಯೊಟಾ ಇನ್ನೋವಾ ಕ್ರೈಸ್ಟಾಗೆ ಸೆಡ್ಡು ಹೊಡೆಯಲಿದೆ. ಇದು ಪ್ರೊಜೆಕ್ಟರ್ ಹೆಡ್ ಲ್ಯಾಂಪ್, ಹೊರಗಿನ ರಿಯರ್ ವ್ಯೂ ಮಿರರ್ ಹಾಗೂ ಟೈಲ್ ಲ್ಯಾಂಪ್ ಗಳನ್ನು ಗಿಟ್ಟಿಸಿಕೊಂಡಿದೆ.

ಸದ್ಯಕ್ಕೆ ಹೆಚ್ಚಿನ ವಿವರಗಳು ಅಲಭ್ಯವಾಗಿದೆ. ಬಹುಶ: ಇದು ಮುಂದಿನ ತಲೆಮಾರಿನ ಕ್ಸೈಲೋ ಕೂಡಾ ಆಗಿರಬಹುದು. ಇದು ಅಲ್ಲದಿದ್ದರೆ ಸಂಪೂರ್ಣವಾಗಿ ಹೊಸ ತಳಹದಿಯಲ್ಲಿ ನಿರ್ಮಾಣವಾಗುತ್ತಿರುವ ಎಕ್ಸ್ ಯುವಿ300 ಎಂದು ಹೆಸರಿಸಿಕೊಳ್ಳಬಹುದು.

ಕ್ಸೈಲೋ ಹಾಗೂ ಎಕ್ಸ್ ಯುವಿ500 ಜೊತೆಗೆ ಸಾಮತ್ಯತೆಯನ್ನು ಹೊಂದಿರುವ ಹೊಸ ಕಾರು ಬೃಹತ್ ಗಾತ್ರವನ್ನು ಪಡೆದಿದೆ.

ಇನ್ನು ದೆಹಲಿಯಲ್ಲಿ ಡೀಸೆಲ್ ಕಾರುಗಳಿಗೆ ನಿಷೇಧಗಳಂತಹ ತೊಡಕು ಎದುರಾಗಿದ್ದರ ಹಿನ್ನಲೆಯಲ್ಲಿ 2.2 ಲೀಟರ್ ಎಂಹಾಕ್ ಡೀಸೆಲ್ ಎಂಜಿನ್ ಬಳಕೆಯಾಗಲಿದೆಯೇ ಎಂಬುದನ್ನು ಕಾದು ನೋಡಬೇಕಿದೆ. ಅಲ್ಲದೆ ಹೊಸತಾದ 1.5 ಲೀಟರ್ ಪೆಟ್ರೋಲ್ ಎಂಜಿನ್ ಸಹ ಇರುವ ಸಾಧ್ಯತೆಯಿದೆ.

ಅಂದ ಹಾಗೆ ಬಿಡುಗಡೆ ಬಗ್ಗೆಯೂ ಯಾವುದೇ ಸ್ಪಷ್ಟ ಮಾಹಿತಿಗಳಿಲ್ಲ. ಆದರೂ ಬಲ್ಲ ಮೂಲಗಳ ಪ್ರಕಾರ 2017ನೇ ಸಾಲಿನ ದ್ವಿತಿಯಾರ್ಧದಲ್ಲಷ್ಟೇ ಮಾರುಕಟ್ಟೆ ಪ್ರವೇಶಿಸುವ ಸಾಧ್ಯತೆಯಿದೆ.