ಅಬ್ಬಬ್ಬಾ ಬಂದೇ ಬಿಡ್ತು ನಿಸ್ಸಾನ್ 'ಗಾಡ್ಜಿಲ್ಲಾ'; ಬೆಲೆ 1.99 ಕೋಟಿ ರು.

ನಿಸ್ಸಾನ್ ಜಿಟಿಆರ್ ಕ್ರೀಡಾ ಕಾರು ಭಾರತದಲ್ಲಿ ಭರ್ಜರಿ ಬಿಡುಗಡೆ ಕಂಡಿದೆ.

By Manoj B.k

Updated: Sunday, July 25, 2021, 14:50 [IST]

ವಿಶ್ವದೆಲ್ಲೆಡೆ 'ಗಾಡ್ಜಿಲ್ಲಾ' ಖ್ಯಾತಿಯ ನಿಸ್ಸಾನ್ ಜಿಟಿಆರ್ ಕ್ರೀಡಾ ಕಾರು ಭಾರತೀಯ ಮಾರುಕಟ್ಟೆಗೆ ಭರ್ಜರಿ ಪ್ರವೇಶ ಪಡೆದಿದೆ. ನೂತನ ನಿಸ್ಸಾನ್ ಜಿಟಿಆರ್ ಸ್ಪೋರ್ಟ್ಸ್ ಕಾರು ಭಾರತದಲ್ಲಿ ದೆಹಲಿ ಎಕ್ಸ್ ಶೋ ರೂಂ ಬೆಲೆಯ ಪ್ರಕಾರ 1.99 ಕೋಟಿ ರುಪಾಯಿಗಳಷ್ಟು ದುಬಾರಿಯೆನಿಸಲಿದೆ.

ಅಬ್ಬಬ್ಬಾ ಬಂದೇ ಬಿಡ್ತು ನಿಸ್ಸಾನ್ 'ಗಾಡ್ಜಿಲ್ಲಾ'; ಬೆಲೆ 1.99 ಕೋಟಿ ರು.

2016 ಆಟೋ ಎಕ್ಸ್ ಪೋದಲ್ಲಿ ಮೊದಲ ಬಾರಿಗೆ ಪ್ರದರ್ಶನ ಕಂಡಿರುವ ನಿಸ್ಸಾನ್ ಜಿಟಿಆರ್ ಆಗಮನಕ್ಕಾಗಿ ವಾಹನ ಪ್ರೇಮಿಗಳು ಕಾತರದಿಂದ ಕಾದು ಕುಳಿತಿದ್ದರು. ಕೊನೆಗೂ ಈ ಸುವರ್ಣ ನಿಮಿಷ ಆಗಮನವಾಗಿದೆ.

ನಿಸ್ಸಾನ್ ಜಿಟಿಆರ್ ಕಾರಿನಡಿಯಲ್ಲಿರುವ ಅತ್ಯಂತ ಶಕ್ತಿಶಾಲಿ ವಿ6 ಎಂಜಿನ್ 637 ಎನ್ ಎಂ ತಿರುಗುಬಲದಲ್ಲಿ ಗರಿಷ್ಠ 562 ಅಶ್ವಶಕ್ತಿಯನ್ನು ಉತ್ಪಾದಿಸಲಿದೆ. ಆರು ಸ್ಪೀಡ್ ಡ್ಯುಯಲ್ ಕ್ಲಚ್ ಆಟೋಮ್ಯಾಟಿಕ್ ಗೇರ್ ಬಾಕ್ಸ್ ಇದರಲ್ಲಿರುತ್ತದೆ.

1752 ಕೆ.ಜಿ. ತೂಕ ಹೊಂದಿರುವ ಹೊರತಾಗಿಯೂ ನಿಸ್ಸಾನ್ ಜಿಟಿಆರ್ ಕೇವಲ ಮೂರು ಸೆಕೆಂಡುಗಳಲ್ಲೇ ಗಂಟೆಗೆ 0-100 ಕೀ.ಮೀ. ವೇಗವರ್ಧನೆ ಮತ್ತು ಗಂಟೆಗೆ ಗರಿಷ್ಠ 315 ಕೀ.ಮೀ. ವೇಗದಲ್ಲಿ ಸಂಚರಿಸಲಿದೆ.

1969ನೇ ಇಸವಿಯಲ್ಲಿ ಸ್ಕೈಲೈನ್ ಶ್ರೇಣಿಯ ಟಾಪ್ ಎಂಡ್ ರೂಪದಲ್ಲಿ ಎಂಟ್ರಿ ಕೊಟ್ಟಿರುವ ನಿಸ್ಸಾನ್ ಜಿಟಿಆರ್ ಕಳೆದ ಐದು ದಶಕಗಳಿಂದ ಹಲವಾರು ಬದಲಾವಣೆಗಳನ್ನು ಗಿಟ್ಟಿಸಿಕೊಂಡಿದೆ.

ಕಳೆದ ಮಾರ್ಚ್ ತಿಂಗಳಲ್ಲಿ ನಡೆದ ನ್ಯೂಯಾರ್ಕ್ ಶೋದಲ್ಲಿ ಆರನೇ ತಲೆಮಾರಿನ ನಿಸ್ಸಾನ್ ಜಿಟಿಆರ್ ಪಾದಾರ್ಪಣೆಗೈದಿತ್ತು. ಇದು ನೈಜ ಕ್ರೀಡಾ ಕಾರಿನ ಪ್ರತಿಬಿಂಬವಾಗಿದೆ.

ಎರಡು ಡೋರ್ ಗಳ ಕೂಪೆ ಶೈಲಿಯ ನಿಸ್ಸಾನ್ ಜಿಟಿಆರ್ ಕ್ರೀಡಾ ಕಾರಿನಲ್ಲಿ ನಾಲ್ಕು ಮಂದಿಗೆ ಆರಾಮದಾಯಕವಾಗಿ ಕುಳಿತುಕೊಳ್ಳಬಹುದಾಗಿದೆ.

ನವೀಕೃತ ವಿನ್ಯಾಸ, ಹೊಸತಾದ ಬಂಪರ್, ಗ್ರಿಲ್, ಎಲ್ ಇಡಿ ಡೇಟೈಮ್ ರನ್ನಿಂಗ್ ಲೈಟ್ಸ್ ಸೇರಿದಂತೆ ಪ್ರತಿಯೊಂದು ಘಟಕಗಳನ್ನು ವಿಶ್ವದರ್ಜೆಯ ಮಟ್ಟದಲ್ಲಿ ರೂಪಿಸಲಾಗಿದೆ.

ಏಳು ಆಕರ್ಷಕ ಬಣ್ಣಗಳು

ಕ್ಯಾಟಾಸುರಾ ಆರಂಜ್,

ಪಿಯರ್ಲ್ ಬ್ಲ್ಯಾಕ್,

ಗನ್ ಮೆಟ್ಯಾಲಿಕ್,

ಅಲ್ಟಿಮೇಟ್ ಸಿಲ್ವರ್,

ಡೇಟೋನಾ ಬ್ಲೂ,

ವೈಬ್ರಂಟ್ ರೆಡ್,

ಸ್ಟೋರ್ಮ್ ವೈಟ್

ಕಾರಿನೊಳಗೆ ಗರಿಷ್ಠ ಗುಣಮಟ್ಟದ ಲೆಥರ್ ಸೀಟು, ಪ್ರೀಮಿಯಂ ವೈಶಿಷ್ಟ್ಯ, ಸೆಂಟರ್ ಕನ್ಸಾಲ್, ಡೋರ್ ಪ್ಯಾನೆಲ್, ಮಾರ್ಪಾಡುಗೊಳಿಸಬಹುದಾದ ಇನ್ಪೋಟೈನ್ಮೆಂಟ್ ಸಿಸ್ಟ್, ಬಹು ಕ್ರಿಯಾತ್ಮಕ ಸ್ಟೀರಿಂಗ್ ವೀಲ್, ರಿಯರ್ ವ್ಯೂ ಕ್ಮಾರಾ ಮತ್ತು ಬೋಸ್ 11 ಸ್ಪೀಕರ್ ಆಡಿಯೋ ಸಿಸ್ಟಂಗಳಿರಲಿದೆ.