ಇನ್ನು ಮುಂದೆ ಜನಪ್ರಿಯ ಕ್ವಿಡ್ ಸೇರಿದಂತೆ ರೆನೊ ಕಾರುಗಳು ದುಬಾರಿ

By Nagaraja

Published: Wednesday, October 12, 2016, 13:25 [IST]

ಪ್ರಿಯ ಗ್ರಾಹಕರೇ, ನೀವೇನಾದರೂ ರೆನೊ ಕಾರುಗಳನ್ನು ಖರೀದಿಸುವ ಯೋಚನೆಯಲ್ಲಿದ್ದರೆ ಇನ್ನು ತಡ ಮಾಡದಿರಿ. ಯಾಕೆಂದರೆ ಫ್ರಾನ್ಸ್ ಮೂಲದ ಈ ದೈತ್ಯ ಸಂಸ್ಥೆಯು ಸದ್ಯದಲ್ಲೇ ಬೆಲೆ ಏರಿಕೆ ಪ್ರಕಟಿಸಲಿದೆ. ನಿಮ್ಮ ಮಾಹಿತಿಗಾಗಿ, ಮಾರುಕಟ್ಟೆಯಲ್ಲಿ 'ಹಾಟ್ ಕೇಕ್' ತರಹನೇ ಮಾರಾಟವಾಗುತ್ತಿರುವ ರೆನೊ ಕ್ವಿಡ್ ಸಣ್ಣ ಕಾರಿಗೂ ಬೆಲೆ ಏರಿಕೆ ಬಿಸಿ ಮುಟ್ಟಲಿದೆ.

ಡಸ್ಟರ್ ಬಳಿಕ ಕ್ವಿಡ್ ಸಣ್ಣ ಕಾರಿನ ಬಿಡುಗಡೆ ಮೂಲಕ ದೇಶದಲ್ಲಿ ಅತಿ ಹೆಚ್ಚು ಜನಪ್ರಿಯತೆ ಸಾಧಿಸಿರುವ ರೆನೊ ಇಂಡಿಯಾ, ದೇಶದಲ್ಲಿರುವ ತನ್ನ ಶ್ರೇಣಿಯ ಕಾರುಗಳಿಗೆ ಶೇಕಡಾ 2ರಷ್ಟು ಬೆಲೆ ಏರಿಕೆಗೊಳಿಸಲು ನಿರ್ಧರಿಸಿದೆ.

ಇನ್ನು ಮುಂದೆ ಜನಪ್ರಿಯ ಕ್ವಿಡ್ ಸೇರಿದಂತೆ ರೆನೊ ಕಾರುಗಳು ದುಬಾರಿ

ನಿರ್ಮಾಣ ವೆಚ್ಚ ಹೆಚ್ಚಾಗಿರುವುದೇ ರೆನೊ ಕಾರುಗಳು ದುಬಾರಿಯಾಗಲು ಕಾರಣವಾಗಿದೆ. ಇದು ಹಬ್ಬದ ಸಂಭ್ರಮದಲ್ಲಿರುವ ಗ್ರಾಹಕರಿಗೆ ಸ್ವಲ್ಪ ನಿರಾಸೆ ತಂದಿದೆ.

"ಹೌದು, ನಿರ್ಮಾಣ ವೆಚ್ಚ ಹೆಚ್ಚಾಗಿರುವುದರಿಂದ ಬೆಲೆ ಏರಿಕೆಗೊಳಿಸಲು ನಿರ್ಧರಿಸಲಾಗಿದೆ. ಯಾವಾಗ ಬೆಲೆ ಏರಿಕೆ ಪ್ರಕಟಿಸಬೇಕು ಎಂಬುದರ ಬಗ್ಗೆ ಅವಲೋಕನ ನಡೆಸುತ್ತಿದ್ದೇವೆ" ಎಂದು ರೆನೊ ಇಂಡಿಯಾದ ಸಿಇಒ ಮತ್ತು ಎಂಡಿ ಸಮಿತ್ ಶೆನೋಯ್ ಸ್ಪಷ್ಟಪಡಿಸಿದ್ದಾರೆ.

ಭಾರತದಲ್ಲಿ ಐದು ಮಾದರಿಗಳನ್ನು ರೆನೊ ಇಂಡಿಯಾ ಮಾಡುತ್ತಿದೆ. ಅವುಗಳೆಂದರೆ,

ಹ್ಯಾಚ್ ಬ್ಯಾಕ್: ಕ್ವಿಡ್ ಮತ್ತು ಪಲ್ಸ್,

ಸೆಡಾನ್: ಸ್ಕಾಲಾ,

ಎಂಪಿವಿ: ಲೊಡ್ಜಿ,

ಎಸ್ ಯುವಿ: ಡಸ್ಟರ್.

ರೆನೊ ಶ್ರೇಣಿಯ ಕಾರುಗಳು ದೇಶದಲ್ಲಿ ದೆಹಲಿ ಎಕ್ಸ್ ಶೋ ರೂಂ ಬೆಲೆಯ ಪ್ರಕಾರ 2.64 ಲಕ್ಷ ರು.ಗಳಿಂದ ಆರಂಭವಾಗಿ 13.77 ಲಕ್ಷ ರು.ಗಳ ವರೆಗೆ ದುಬಾರಿಯೆನಿಸುತ್ತದೆ.

ಇನ್ನೊಂದೆಡೆ ನಿರ್ಮಾಣ ವೆಚ್ಚ ಹೆಚ್ಚಾಗಿರುವ ಹಿನ್ನಲೆಯಲ್ಲಿ ದೇಶದ ಅತಿ ದೊಡ್ಡ ಟಾಟಾ ಮೋಟಾರ್ಸ್ ಸಂಸ್ಥೆಯು ಸಹ ಬೆಲೆ ಏರಿಕೆಗೊಳಿಸಲು ನಿರ್ಧರಿಸಿದೆ.

ಅತ್ತ ಎಸ್ ಯುವಿ ದೈತ್ಯ ಮಹೀಂದ್ರ ಆಂಡ್ ಮಹೀಂದ್ರ ಸಂಸ್ಥೆಯು ಆಗಲೇ ಶೇಕಡಾ 1ರಷ್ಟು ಬೆಲೆ ಏರಿಕೆಯನ್ನು ಘೋಷಿಸಿದೆ.

ಇನ್ನು ದೇಶದ ಅಗ್ರಗಣ್ಯ ಕಾರು ಸಂಸ್ಥೆಗಳಾಗಿರುವ ಮಾರುತಿ ಸುಜುಕಿ ಮತ್ತು ಹ್ಯುಂಡೈ ಇಂಡಿಯಾ ಸಂಸ್ಥೆಯು ಈಗಾಗಲೇ ತನ್ನ ಶ್ರೇಣಿಯ ಕಾರುಗಳಿಗೆ ಗರಿಷ್ಠ 20,000 ರು.ಗಳ ವರೆಗೆ ಬೆಲೆ ಏರಿಕೆಗೊಳಿಸಿದೆ.