ಭಾರತದಲ್ಲಿ ಫಿಯೆಟ್-ಟಾಟಾ ಆದಿತೇ ಜೋಡಿ ನಂ.1 ?

ಟಾಟಾ ಜೊತೆಗಿನ ಪಾಲುದಾರಿಕೆಯೊಂದಿಗೆ ದೇಶದಲ್ಲಿ ಫಿಯೆಟ್ ಜೀಪ್ ಬ್ರಾಂಡ್ ಮತ್ತಷ್ಟು ಸ್ಪರ್ಧಾತ್ಮಕ ಬೆಲೆಗಳಲ್ಲಿ ಬಿಡುಗಡೆ ಮಾಡಲು ನೆರವಾಗಲಿದೆ.

By Nagaraja

Published: Saturday, November 19, 2016, 15:32 [IST]

ಭಾರತದ ಅತಿ ದೊಡ್ಡ ವಾಹನ ಸಂಸ್ಥೆ ಟಾಟಾ ಮೋಟಾರ್ಸ್ ಜೊತೆಗಾರಿಕೆಯೊಂದಿಗೆ ವ್ಯಾಪಾರ ವಹಿವಾಟು ಕುದುರಿಸಿಕೊಳ್ಳುವ ಯೋಜನೆಯಲ್ಲಿರುವ ಇಟಲಿಯ ಮೂಲದ ಫಿಯೆಟ್ ಕ್ಲೈಸ್ಲರ್ ಆಟೋಮೊಬೈಲ್ಸ್ ತಂತ್ರಜ್ಞಾನವನ್ನು ಹಂಚಿಕೊಳ್ಳಲು ಅತೀವ ಆಸಕ್ತಿಯನ್ನು ವ್ಯಕ್ತಪಡಿಸಿದೆ. ಇದು ಭಾರತದಲ್ಲಿರುವ ತನ್ನ ಸಾನಿಧ್ಯವನ್ನು ಮತ್ತಷ್ಟು ವೃದ್ಧಿಸಿಕೊಳ್ಳಲು ಫಿಯೆಟ್ ಗೆ ನೆರವಾಗಲಿದೆ.

ಎಂಜಿನ್, ಗೇರ್ ಬಾಕ್ಸ್ ಜೊತೆಗೆ ಟಾಟಾ ಘಟಕದಲ್ಲಿ ಐಕಾನಿಕ್ ಜೀಪ್ ಕ್ರೀಡಾ ಬಳಕೆಯ ವಾಹನಗಳನ್ನು ಸ್ಥಳೀಯವಾಗಿ ನಿರ್ಮಿಸುವುದರ ಕುರಿತಂತೆ ಫಿಯೆಟ್ ಹೆಚ್ಚಿನ ಒಲವನ್ನು ತೋರಿದೆ.

ಭವಿಷ್ಯದಲ್ಲಿ ಹೆಚ್ಚಿನ ಮಾದರಿಗಳನ್ನು ಪರಿಚಯಿಸಲು ಉತ್ಸುಕತೆಯನ್ನು ತೋರಲಾಗಿದೆ. ಒಂದೇ ಘಟಕದಿಂದ ಎಂಜಿನ್, ಗೇರ್ ಬಾಕ್ಸ್ ಹಂಚಿಕೊಳ್ಳುವ ಮೂಲಕ ವೆಚ್ಚ ಕಡಿತವನ್ನು ಗುರಿಯಿರಿಸಲಾಗಿದೆ.

2 ಲೀಟರ್ ಡೀಸೆಲ್ ಎಂಜಿನ್ ಹಂಚಿಕೊಳ್ಳುವುದರ ಬಗ್ಗೆಯೂ ಟಾಟಾ ಮತ್ತು ಫಿಯೆಟ್ ಸಂಸ್ಥೆಗಳ ನಡುವೆ ಚರ್ಚೆಗಳು ನಡೆಯುತ್ತಿದೆ. ಇದು ಫಿಯೆಂಟ್ ಸಿ ಸೆಗ್ಮೆಂಟ್ (ಕೋಡ್ 556) ಮತ್ತು ಟಾಟಾ ಪ್ರೀಮಿಯಂ ಎಸ್ ಯುವಿಗಳಲ್ಲಿ (ಕೋಡ್ ಕ್ಯೂ5) ಬಳಕೆಯಾಗಲಿದೆ.

ವಾಹನ ಘಟಕಗಳಲ್ಲಿ ಸಾಧ್ಯವಾದಷ್ಟು ತಂತ್ರಜ್ಞಾನವನ್ನು ಹಂಚಿಕೊಳ್ಳುವುದು ಫಿಯೆಟ್ ಗುರಿಯಾಗಿದೆ. ಈ ನೂತನ ಜುಗಲ್ ಬಂಧಿಯು ವಾಹನ ಕ್ಷೇತ್ರದಲ್ಲಿ ಹೊಸ ಕ್ರಾಂತಿಕಾರಿ ಬದಲಾವಣೆಗಳಿಗೆ ಸಾಕ್ಷಿಯಾಗಲಿದೆ.

ಭಾರತಕ್ಕೆ ಈಗಾಗಲೇ ಜೀಪ್ ಬ್ರಾಂಡ್ ಲಗ್ಗೆಯಿಟ್ಟಿದೆ. ಈಗ ಮತ್ತಷ್ಟು ಉತ್ತಷ್ಟು ಉತ್ಪನ್ನಗಳನ್ನು ದೇಶಕ್ಕೆ ಪರಿಚಯಿಸಲಿದೆ. ದೇಶದಲ್ಲಿ ಬೆಲೆ ನಿರ್ಣಾಯಕ ಘಟಕವೆನಿಸಲಿರುವುದರಿಂದ ಟಾಟಾ ನೆರವನ್ನು ಪಡೆಯಲಿದೆ.