ತೆರೆಮರೆಯಲ್ಲಿ ಸಜ್ಜಾಗುತ್ತಿರುವ 'ಟಾಟಾ ನೆಕ್ಸನ್' ಮಿನಿ ಎಸ್‌ಯುವಿ

By Nagaraja

Published: Friday, May 6, 2016, 12:20 [IST]

ಈಗಷ್ಟೇ ಟಿಯಾಗೊ ಹ್ಯಾಚ್ ಬ್ಯಾಕ್ ಕಾರನ್ನು ಬಿಡುಗಡೆಗೊಳಿಸಿರುವ ದೇಶದ ಅತಿ ದೊಡ್ಡ ವಾಹನ ಸಂಸ್ಥೆ ಟಾಟಾ ಮೋಟಾರ್ಸ್, ಮಗದೊಂದು ಅತ್ಯಾಕರ್ಷಕ ಕಾರಿನ ನಿರ್ಮಾಣದಲ್ಲಿ ತೊಡಗಿಸಿಕೊಂಡಿದೆ. ಇದರಂತೆ ನೂತನ ಟಾಟಾ ನೆಕ್ಸನ್ ಕಾಂಪಾಕ್ಟ್ ಕ್ರೀಡಾ ಬಳಕೆಯ ವಾಹನದ ಸಿದ್ಧತೆಯು ತೆರೆಮರೆಯಲ್ಲಿ ಜೋರಾಗಿ ನಡೆಯುತ್ತಿದೆ.

ಪುಣೆಯಲ್ಲಿ ಟಾಟಾ ನೆಕ್ಸನ್ ಟೆಸ್ಟಿಂಗ್ ವೇಳೆ ಎಕ್ಸ್ ಕ್ಲೂಸಿವ್ ಚಿತ್ರಗಳನ್ನು ಸೆರೆ ಹಿಡಿಯಲಾಗಿದೆ. ಹೊರಮೈ ಸಂಪೂರ್ಣವಾಗಿ ಮರೆ ಮಾಚಿರುವ ನೂತನ ನೆಕ್ಸನ್ ಮೊದಲ ನೋಟದಲ್ಲೇ ಅತ್ಯುತ್ತಮ ರಸ್ತೆ ಸಾನಿಧ್ಯವನ್ನು ಕಾಪಾಡಿಕೊಂಡಿದೆ.

ತೆರೆಮರೆಯಲ್ಲಿ ಸಜ್ಜಾಗುತ್ತಿರುವ 'ಟಾಟಾ ನೆಕ್ಸನ್' ಮಿನಿ ಎಸ್‌ಯುವಿ

ಇದಕ್ಕೂ ಮೊದಲು ವರ್ಷಾರಂಭದಲ್ಲಿ ನಡೆದ 2016 ಆಟೋ ಎಕ್ಸ್ ಪೋದಲ್ಲಿ ನಾಲ್ಕು ಮೀಟರ್ ಉದ್ದ ಪರಿಧಿಯೊಳಗಿನ ಕ್ರೀಡಾ ಬಳಕೆಯ ವಾಹನವನ್ನು (ಎಸ್‌ಯುವಿ) ಪರಿಚಯಿಸಲಾಗಿತ್ತು. ಇದರ ಅಭಿವೃದ್ಧಿಯು ಈಗಲೂ ನಡೆಯುತ್ತಿದೆ. ಮಾರುತಿ ವಿಟಾರಾ ಬ್ರಿಝಾಗೆ ಪ್ರತಿಸ್ಪರ್ಧಿಯಾಗಲಿರುವ ನೂತನ ಕಾರು ಜೆಸ್ಟಾ ಹಾಗೂ ಬೋಲ್ಟ್ ತಳಹದಿಯಲ್ಲೇ ನಿರ್ಮಾಣವಾಗಲಿದೆ.

ನೂತನ ಟಾಟಾ ಕಾರು 1.2 ಲೀಟರ್ ರೆವೊಟ್ರಾನ್ ಟರ್ಬೊಚಾರ್ಜ್ಡ್ ಮತ್ತು 1.5 ಲೀಟರ್ ಡೀಸೆಲ್ ಫೋರ್ ಸಿಲಿಂಡರ್ ರೆವೊಟಾರ್ಕ್ ಎಂಜಿನ್ ನಿಂದ ನಿಯಂತ್ರಿಸಲ್ಪಡಲಿದೆ. ಮ್ಯಾನುವಲ್ ಮತ್ತು ಎಎಂಟಿ ಗೇರ್ ಬಾಕ್ಸ್ ಆಯ್ಕೆಯೂ ಇರುತ್ತದೆ.

ನೂತನ ವಿನ್ಯಾಸ ತಂತ್ರಗಾರಿಕೆಯನ್ನು ಟಾಟಾ ನೆಕ್ಸನ್ ಅನುಸರಿಸುತ್ತದೆ. ಇವೆಲ್ಲವೂ ಭರ್ಜರಿ ಪುನರಾಗಮನ ಮಾಡಿಕೊಳ್ಳಲು ಟಾಟಾಗೆ ನೆರವಾಗಲಿದೆ.

ಟಾಟಾ ನೂತನ ಕಾರಿನಲ್ಲಿ ಫ್ರಂಟ್ ಏರ್ ಬ್ಯಾಗ್, ಎಬಿಎಸ್, ಇಬಿಡಿ, ಟಚ್ ಸ್ಕ್ರೀನ್ ಹರ್ಮಾನ್ ಇನ್ಪೋಟೈನ್ಮೆಂಟ್ ಸಿಸ್ಟಂ, ಪ್ರೊಜೆಕ್ಟರ್ ಹೆಡ್ ಲ್ಯಾಂಪ್, ಅಲಾಯ್ ವೀಲ್, ಫಾಗ್ ಲೈಟ್, ಆಟೋಮ್ಯಾಟಿಕ್ ಕ್ಲೈಮೇಟ್ ಕಂಟ್ರೋಲ್ ಮತ್ತು ಔಟ್ ಸೈಡ್ ರಿಯರ್ ವ್ಯೂ ಮಿರರ್ ಮತ್ತು ಸ್ಟ್ಯಾರ್ಟ್-ಸ್ಟಾಪ್ ವೈಶಿಷ್ಟ್ಯಗಳು ಸ್ಟ್ಯಾಂಡರ್ಡ್ ಆಗಿ ದೊರಕುವ ಸಾಧ್ಯತೆಯಿದೆ.