ಕಾರು, ಬೈಕ್ ಮಾಲಿಕರ ಜೇಬಿಗೆ ಕತ್ತರಿ; ವಿಮೆ ಕಂತಿನಲ್ಲಿ ಭಾರಿ ಏರಿಕೆ

By Nagaraja

Published: Wednesday, March 30, 2016, 15:17 [IST]

ವಾಹನ ಮಾಲಿಕರ ಜೇಬಿಗೆ ಕತ್ತರಿ ಪ್ರಯೋಗಿಸಿರುವ ಕೇಂದ್ರ ಸರಕಾರ ಮುಂಬರುವ 2016 ಎಪ್ರಿಲ್ 01ರಿಂದ ಮೂರನೇ ವ್ಯಕ್ತಿಯ ವಾರ್ಷಿಕ ವಿಮೆ ಕಂತನ್ನು (ಥರ್ಡ್ ಪಾರ್ಟಿ) ಶೇಕಡಾ 40ರಷ್ಟು ಹೆಚ್ಚಳಗೊಳಿಸಲು ನಿರ್ಧರಿಸಿದೆ.

ಭಾರತೀಯ ವಿಮಾ ನಿಯಂತ್ರಣ ಮತ್ತು ಅಭಿವೃದ್ಧಿ ಪ್ರಾಧಿಕಾರ (ಐಆರ್‌ಡಿಎ) ಪ್ರಯಾಣಿಕ ಕಾರು, ಬೈಕ್, ಸ್ಕೂಟರ್ ಸೇರಿದಂತೆ ಎಲ್ಲ ವಾಹನಗಳ ವಿಮಾ ಕಂತನ್ನು ಶೇಕಡಾ 40ರಷ್ಟು ಹೆಚ್ಚಳಗೊಳಿಸಿದೆ.

ಕಾರು, ಬೈಕ್ ಮಾಲಿಕರ ಜೇಬಿಗೆ ಕತ್ತರಿ; ವಿಮೆ ಕಂತಿನಲ್ಲಿ ಭಾರಿ ಏರಿಕೆ

ವರ್ಷಂಪ್ರತಿ ಐಆರ್‌ಡಿಎ ವಿಮಾ ಕಂಪನಿಗಳಿಗೆ ಆದ ನಷ್ಟವನ್ನು ಮತ್ತು ಒಟ್ಟು ಕ್ಲೈಮ್ ಮಾಡಲಾದ ವಿಮೆಗಳ ಆಧಾರದಲ್ಲಿ ಥರ್ಡ್ ಪಾರ್ಟಿ ವಿಮೆಯನ್ನು ಪರಿಷ್ಕರಣೆಗೊಳಿಸುತ್ತಿದೆ. ಈಗ ಮಾಡಿರುವ ವಿಮಾ ಕಂತಿನ ಹೆಚ್ಚಳವು ವಾಹನ ಮಾಲಿಕರಿಗೆ ಬಲವಾದ ಹೊಡೆತವನ್ನೇ ನೀಡಲಿದೆ.

ವಾಣಿಜ್ಯ ವಾಹನಗಳ ಮೇಲಿನ ಥರ್ಡ್ ಪಾರ್ಟಿ ಕಂತನ್ನು ಶೇಕಡಾ 15ರಿಂದ 30ರಷ್ಟು ಹೆಚ್ಚಿಸಿರುವುದು ಟ್ರಕ್ ಮಾಲಿಕರಿಂದ ಭಾರಿ ಪ್ರತಿಭಟನೆಗೆ ಕಾರಣವಾಗುತ್ತಿದೆ.

ಅತ್ತ 1500 ಸಿಸಿ ವರೆಗಿನ ಪ್ರಯಾಣಿಕ ಕಾರುಗಳ ಥರ್ಡ್ ಪಾರ್ಟಿ ವಿಮೆ ಪ್ರೀಮಿಯಂ ಶೇಕಡಾ 40ರಷ್ಟು ಹೆಚ್ಚಳಗೊಳಿಸಲಾಗಿದೆ. ಈ ನಡುವೆ ಹೆಚ್ಚು ಸುರಕ್ಷಿತ ಎನಿಸಿಕೊಂಡರೂ 1.5 ಸಿಸಿ ಮೇಲ್ಪಟ್ಟ ಐಷಾರಾಮಿ ಕಾರುಗಳ ವಿಮೆಯನ್ನು ಶೇಕಡಾ 25ರಷ್ಟು ಏರಿಕೆಗೊಳಿಸಿದೆ.

ಇನ್ನೊಂದೆಡೆ ತಮ್ಮ ದೈನಂದಿನ ಸವಾರಿಗಾಗಿ ದ್ವಿಚಕ್ರ ವಾಹನವನ್ನು ಆಶ್ರಯಿಸಿಕೊಳ್ಳುತ್ತಿರುವ ದೇಶದ ಅಸಂಖ್ಯಾತ ಬೈಕ್ ಮಾಲಿಕರ ಜೇಬಿಗೂ ಕತ್ತರಿ ಪ್ರಯೋಗಿಸಿದ್ದು, ಥರ್ಡ್ ಪಾರ್ಟಿ ವಿಮೆಯನ್ನು ಶೇಕಡಾ 25ರ ವರೆಗೂ ವರ್ಧಿಸಲಾಗಿದೆ. ಏತನ್ಮಧ್ಯೆ 350 ಸಿಸಿ ಮೇಲ್ಪಟ್ಟ ದ್ವಿಚಕ್ರ ವಾಹನಗಳ ಥರ್ಡ್ ಪಾರ್ಟಿ ವಿಮೆಯನ್ನು ಶೇಕಡಾ 10ರಷ್ಟು ಇಳಿಕೆಗೊಳಿಸಲಾಗಿದೆ.