ಆ.10ಕ್ಕೆ ಬಿಡುಗಡೆಯಾಗಲಿದೆ ಫೋಕ್ಸ್‌ವ್ಯಾಗನ್ ಐಷಾರಾಮಿ ಸೆಡಾನ್ 'ಪಸ್ಸಾಟ್'

ಕೆಲ ದಿನಗಳ ಹಿಂದಷ್ಟೇ ಐಷಾರಾಮಿ ಪ್ರೀಮಿಯಂ ಸೆಡಾನ್ ಪಸ್ಸಾಟ್ ಕಾರಿನ ಉತ್ಪಾದನೆಯನ್ನು ಆರಂಭಗೊಳಿಸಿರುವುದಾಗಿ ಹೇಳಿಕೊಂಡಿದ್ದ ಫೋಕ್ಸ್‌ವ್ಯಾಗನ್ ಸಂಸ್ಥೆಯು ಮಹಾರಾಷ್ಟ್ರದ ಔರಂಗಾಬಾದ್ ಘಟಕದಲ್ಲಿ ಪಸ್ಸಾಟ್‌ ಕಾರಿನ ಅಂತಿಮ ಹಂತದ ವಿನ್ಯಾಸಗಳನ್ನು ಕೈಗೊಳ್ಳುವ ಮೂಲಕ ಇದೀಗ ಬಿಡುಗಡೆಗೆ ಸಿದ್ಧಗೊಂಡಿದೆ.

ಜಾಗತಿಕ ಮಟ್ಟದ ಕಾರುಗಳನ್ನು ಭಾರತದಲ್ಲಿ ಪರಿಚಯಿಸುವ ಆವೇಗವನ್ನು ಮುಂದುವರೆಸಿಕೊಂಡು ಹೋಗುವ ನಿಟ್ಟಿನಲ್ಲಿ ಹೆಜ್ಜೆ ಇಟ್ಟಿರುವ ಫೋಕ್ಸ್‌ವ್ಯಾಗನ್ ಸಂಸ್ಥೆಯು ಈ ವರ್ಷ ತನ್ನ ಹೊಚ್ಚ ಹೊಸ ಪಸ್ಸಾಟ್ ಕಾರನ್ನು ಅನಾವರಣಗೊಳಿಸುತ್ತಿದ್ದು, ಎಂಕ್ಯೂಬಿ ಪ್ಲಾಟ್‌ಫಾರಂ ಆಧಾರಿತ ಮೊದಲ ಸೆಡಾನ್ ಎಂಬ ಹೆಗ್ಗಳಿಕೆಯನ್ನು ತನ್ನದಾಗಿಸಿಕೊಂಡಿದೆ.

Recommended Video

2018 Renault Duster Revealed - DriveSpark

ಸೆಡಾನ್ ವಿಭಾಗದಲ್ಲಿ ಪ್ರೀಮಿಯಂ ಡ್ರೈವಿಂಗ್ ಅನುಭವವನ್ನು ನೀಡುವ ಮೂಲಕ ಐಷಾರಾಮಿ ವೈಶಿಷ್ಟ್ಯತೆಗಳಿಗೆ ಮರುಜೀವಕೊಡಲು ಪಸ್ಸಾಟ್ ಭಾರತದಲ್ಲಿ ಬಿಡುಗಡೆಗೊಳ್ಳುತ್ತಿದ್ದು, ಬ್ರ್ಯಾಂಡ್ ಪರಂಪರೆಯನ್ನು ಎತ್ತಿ ಹಿಡಿಯಲಿದೆ ಎನ್ನಲಾಗಿದೆ.

ಪಸ್ಸಾಟ್ ಸೆಡಾನ್ ಕಾರು 2-ಲೀಟರ್ ಡೀಸೆಲ್ ಎಂಜಿನ್ ಬಲದೊಂದಿಗೆ 174 ಬಿಎಚ್‌ಪಿ ಶಕ್ತಿ ಉತ್ಪಾದಿಸಲಿದ್ದು, ಈ ಕಾರಿನ ಎಂಜಿನ್ 6-ಸ್ಪೀಡ್ ಡಿಎಸ್‌ಜಿ ಸ್ವಯಂಚಾಲಿತ ಗೇರ್ ಬಾಕ್ಸ್ ಅಳವಡಿಕೆಯೊಂದಿಗೆ ಬಿಡುಗಡೆಯಾಗಲಿದೆ.

ಹೊಸ ಪಸ್ಸಾಟ್ ಕಾರು ಉತ್ತಮ ಕಾರ್ಯಕ್ಷಮತೆ, ದಕ್ಷತೆ, ಐಷಾರಾಮಿ ಮತ್ತು ಅತ್ಯಂತ ಮುಖ್ಯವಾಗಿ ಸುರಕ್ಷತೆಯ ಒಂದು ಪರಿಪೂರ್ಣ ಮಿಶ್ರಣದ ಅನುಭವ ನೀಡಲಿದೆ ಎನ್ನುವುದು ಕಂಪನಿಯ ವಿವರಣೆಯಾಗಿದೆ.

ಈ ಬಗ್ಗೆ ಮಾತನಾಡಿರುವ ಫೋಕ್ಸ್‌ವ್ಯಾಗನ್ ಇಂಡಿಯಾದ ಪ್ಯಾಸೆಂಜರ್ ಕಾರುಗಳ ನಿರ್ದೇಶಕ, ಸ್ಟೆಫೆನ್ ನ್ಯಾಪ್ "ಅತ್ಯಂತ ಯಶಸ್ವಿ ಪ್ರೀಮಿಯಂ ಐಷಾರಾಮಿ ಉತ್ಪನ್ನಗಳಲ್ಲಿ ಒಂದಾಗಿರುವ ಪಸ್ಸಾಟ್ ಕಾರನ್ನು ಭಾರತೀಯ ಮಾರುಕಟ್ಟೆಗೆ ಮರಳಿ ಪರಿಚಯಿಸಲು ಹೆಚ್ಚು ಉತ್ಸುಕರಾಗಿದ್ದು, ಈ ಕಾರಿನ ಪರಿಚಯದೊಂದಿಗೆ ನಾವು ನಮ್ಮ ಪೋರ್ಟ್‌ಫೋಲಿಯೋವನ್ನು ವಿಸ್ತರಿಸಲು ಇಚ್ಛಿಸುತ್ತೇವೆ" ಎಂದಿದ್ದಾರೆ.

ಅಂತಿಮವಾಗಿ ಹೊಸ ಪಸ್ಸಾಟ್ ಕಾರನ್ನು ಭಾರತೀಯ ಮಾರುಕಟ್ಟೆಯಲ್ಲಿ ಪರಿಚಯಿಸುವುದಾಗಿ ಫೋಕ್ಸ್‌ವ್ಯಾಗನ್ ಇಂಡಿಯಾ ಬಹಿರಂಗಪಡಿಸಿದ್ದು, ಎಂಕ್ಯೂಬಿ ಪ್ಲಾಟ್‌ಫಾರಂ ಉತ್ಪಾದನಾ ವೈಶಿಷ್ಟ್ಯತೆಯೊಂದಿಗೆ ಹೋಂಡಾ ಅಕಾರ್ಡ್, ಸ್ಕೋಡಾ ಸುಪರ್ಬ್ ಮತ್ತು ಟೊಯೋಟಾ ಕ್ಯಾಮ್ರಿ ಕಾರುಗಳಿಗೆ ತೀವ್ರ ಸ್ಪರ್ಧೆ ನೀಡಲಿದೆ.