ಅಗ್ಗದ ಬೆಲೆಗೆ ಲಭ್ಯ "ಸೇವಾ ಕ್ಯಾಬ್" - ಓಲಾ, ಉಬರ್‌ಗೆ ಸೆಡ್ಡು ಹೊಡೆದ ಚಾಲಕರು..!!

ಹೆಚ್ಚುವರಿ ಆದಾಯಕ್ಕೆ ಕತ್ತರಿ ಹಾಕಿದ್ದರ ವಿರುದ್ಧ ಸಿಡಿದೆದ್ದಿರುವ ಕ್ಯಾಬ್ ಚಾಲಕರು, ತಮ್ಮದೇ ಸ್ಪಂತ ಆ್ಯಪ್ ಅಭಿವೃದ್ದಿ ಮಾಡಿಕೊಳ್ಳುವ ಮೂಲಕ ಓಲಾ ಮತ್ತು ಉಬರ್ ಸಂಸ್ಥೆಗಳಿಗೆ ನೇರ ಸ್ಪರ್ಧೆ ಒಡ್ಡಿದ್ದಾರೆ.

ಹೊಸ ಆ್ಯಪ್‌ಗೆ "ಸೇವಾ" ಎಂದು ಹೆಸರಿಡಲಾಗಿದ್ದು, ಈ ಮೂಲಕ ತಮ್ಮ ವಿಶ್ವಾಸಿ ಗ್ರಾಹಕರಿಗೆ ಸೇವೆ ನೀಡುತ್ತಿದ್ದು, ಗ್ರಾಹಕರಿಂದ ಉತ್ತಮ ಪ್ರತಿಕ್ರಿಯೆ ದೊರತಿದೆ.

ಈಗಾಗಲೇ ಸಾವಿರಾರು ಕ್ಯಾಬ್ ಚಾಲಕರು ಓಲಾ ಮತ್ತು ಉಬರ್ ಸಂಸ್ಥೆಗಳೊಂದಿಗೆ ಒಪ್ಪಂದಕ್ಕೆ ಗುಡ್‌ಬೈ ಹೇಳಿದ್ದು, ಸ್ವಂತ ಆ್ಯಪ್‌ನಿಂದಲೇ ಭಾರೀ ಆದಾಯಗಳಿಸುವ ನೀರಿಕ್ಷೆಯಲ್ಲಿದ್ದಾರೆ.

ಈ ಹಿಂದೆ ಓಲಾ ಮತ್ತು ಉಬರ್ ಸಂಸ್ಥೆಗಳಿಗೆ ಒಟ್ಟು ಮೊತ್ತದಲ್ಲಿ ಶೇ.27ರಷ್ಟು ಕಮಿಷನ್‌ ನೀಡಬೇಕಿದ್ದ ಕ್ಯಾಬ್ ಚಾಲಕರು, ಅವರು ಹಾಕುವ ಹತ್ತಾರು ನಿರ್ಬಂಧಗಳಿಗೆ ತಲೆ ಬಾಗಲೇಬೇಕಿತ್ತು.

ಇದೇ ಕಾರಣಕ್ಕಾಗಿಯೇ ಓಲಾ ಮತ್ತು ಉಬರ್ ಸಂಸ್ಥೆಗಳೊಂದಿಗಿನ ಒಪ್ಪಂದ ಕಡೆದುಕೊಂಡಿರುವ ಚಾಲಕರು, ಸ್ವಂತ ಆ್ಯಪ್ ಅಭಿವೃದ್ಧಿ ಮಾಡಿಕೊಂಡಿದ್ದಾರೆ.

ಈಗಾಗಲೇ ತಮ್ಮ ವಿಶ್ವಾಸಿ ಗ್ರಾಹಕರ ಜೊತೆ ಸಂಪರ್ಕದಲ್ಲಿರುವ ಕ್ಯಾಬ್ ಚಾಲಕರು ಒಪ್ಪಂದ ಆಧಾರದ ಮೇಲೆ ಸೇವೆ ಒದಗಿಸಲು ಸಿದ್ಧರಾಗಿದ್ದಾರೆ. ಇದರಿಂದ ಓಲಾ ಮತ್ತು ಉಬರ್ ಆದಾಯಕ್ಕೆ ಭಾರೀ ಹೊಡೆತ ಬಿಳಲಿದೆ.

ಹೊಸದಾಗಿ ಆರಂಭವಾಗಿರುವ ಸೇವಾ ಆ್ಯಪ್ ಜಾಹೀರಾತು‌ಗಳಲ್ಲೂ ಓಲಾ ಮತ್ತು ಉಬರ್‌ಗೆ ನೇರವಾಗಿ ಸವಾಲು ಹಾಕಲಾಗಿದ್ದು, ಅಗ್ಗದ ಕ್ಯಾಬ್ ಸೇವೆಗೆ ಸೇವಾ ಆ್ಯಪ್ ಬಳುಸುವಂತೆ ಮನವಿ ಮಾಡಲಾಗಿದೆ.

ಇನ್ನು ಆ್ಯಪ್ ನಿರ್ವಹಣೆಗಾಗಿ ತಿಂಗಳಿಗೆ ಕೇವಲ ರೂ. 700 ಪಾವತಿಸಬೇಕಿರುವ ಕ್ಯಾಬ್ ಚಾಲಕರು, ಓಲಾ ಮತ್ತು ಉಬರ್ ಗ್ರಾಹಕರನ್ನು ತಮ್ಮತ್ತ ಸೆಳೆಯುವ ಮತ್ತಷ್ಟು ಕಾರ್ಯತಂತ್ರ ರೂಪಿಸುತ್ತಿದ್ದಾರೆ.

ಓಲಾ ಮತ್ತು ಉಬರ್ ಗ್ರಾಹಕರನ್ನು ಸಂಪರ್ಕಿಸುತ್ತಿರುವ ಕ್ಯಾಬ್ ಚಾಲಕರು ಪ್ರತಿ ಕಿಲೋ ಮೀಟರ್‌ಗೆ ಕೇವಲ 5 ರೂಪಾಯಿಗೆ ಅಗ್ಗದ ಸೇವೆ ನೀಡಲು ಮುಂದಾಗಿದ್ದಾರೆ.

ಹೀಗಾಗಿ ಕಳೆದ ಒಂದು ತಿಂಗಳ ಅವಧಿಯಲ್ಲಿ ಭಾರೀ ಪ್ರಮಾಣದಲ್ಲಿ ಗ್ರಾಹಕರು ಇದಕ್ಕೆ ಒಪ್ಪಿಗೆ ಸೂಚಿಸುತ್ತಿದ್ದು, ಹೊಸ ಆ್ಯಪ್ ಅಭಿವೃದ್ಧಿ ಕ್ಯಾಬ್ ಚಾಲಕರಿಗೆ ವರದಾನವಾಗಿದೆ.

ಇನ್ನು ಕ್ಯಾಬ್ ಚಾಲಕರಿಗೆ ವರದಾನವಾಗಿ ಪರಿಣಮಿಸಿರುವ "ಸೇವಾ" ಆ್ಯಪ್ ಉಬರ್ ಮತ್ತು ಓಲಾ ಸಂಸ್ಥೆಗಳಿಗೂ ತಲೆನೋವಾಗಿ ಪರಿಣಮಿಸಿದ್ದು, ಆದಾಯಕ್ಕೆ ನೇರ ಹೊಡೆತ ಬಿಳಲಿದೆ.

ಎಲ್ಲವೂ ಅಂದುಕೊಂಡತೆ ಆದಲ್ಲಿ ಮುಂದೊಂದು ದಿನ ಬೆಂಗಳೂರು ಮತ್ತು ಮುಂಬೈ ಸೇರಿದಂತೆ ಪ್ರಮುಖ ಮೆಟ್ರೋ ಸಿಟಿಗಳಲ್ಲಿ ಸೇವಾ ಆ್ಯಪ್ ಬಳಕೆ ಶುರುವಾಗಲಿದ್ದು, ಸಾಕಷ್ಟು ಜನಪ್ರಿಯತೆ ಪಡೆದುಕೊಳ್ಳುವ ನೀರಿಕ್ಷೆಯಿದೆ.