ನಿರೀಕ್ಷೆಗೂ ಮುನ್ನ ಬಿಡುಗಡೆಯಾಗಲಿದೆ ಟಾಟಾ ನೆಕ್ಸನ್ ಕಾರು

ಟಾಟಾ ಮೋಟಾರ್ಸ್ ಕಂಪನಿಯು ತನ್ನ ಬಹು ನಿರೀಕ್ಷಿತ ನೆಕ್ಸನ್ ಕಾಂಪ್ಯಾಕ್ಟ್ ಎಸ್‌ಯುವಿ ಕಾರಿನ ಬಿಡುಗಡೆಯನ್ನು ದೀಪಾವಳಿಗೆ ಬಿಡುಗಡೆ ಮಾಡಲಿದೆ ಎಂದು ನಿರೀಕ್ಷಿಸಲಾಗಿತ್ತು. ಆದರೆ, ಮಾಹಿತಿಯ ಪ್ರಕಾರ ಈ ಕಾರನ್ನು ಸದ್ಯದರಲ್ಲಿಯೇ ಅನಾವರಣಗೊಳಿಸಲು ಟಾಟಾ ಮುಂದಾಗಿದೆ.

ಭಾರತದಲ್ಲಿ, ಆಗಸ್ಟ್ ಅಥವಾ ಸೆಪ್ಟೆಂಬರ್ 2017ರ ಆರಂಭದಲ್ಲಿ ನೆಕ್ಸನ್ ಕಾರನ್ನು ಟಾಟಾ ಮೋಟರ್ಸ್ ಬಿಡುಗಡೆಗೊಳಿಸಲು ಮುಂದಾಗಿದೆ.

ದೀಪಾವಳಿ ಹಬ್ಬ ಆರಂಭಕ್ಕೂ ಎರಡು ತಿಂಗಳ ಮುಂಚಿತವಾಗಿ ಈ ಕಾರಿನ ಬಿಡುಗಡೆಯಾಗಲಿದ್ದು, ಟಾಟಾ ಸಂಸ್ಥೆಯ ಎಸ್‌ಯುವಿ ವಿಭಾಗಕ್ಕೆ ಮತ್ತಷ್ಟು ಬಲ ತುಂಬಲಿರುವುದಂತೂ ಖಂಡಿತ.

ಹೊಸ ತೆರಿಗೆ ಪದ್ಧತಿ ಜಿಎಸ್‌ಟಿಯಿಂದಾಗಿ ವಾಹನಗಳ ಬೆಲೆ ಕಡಿತಗೊಂಡಿದ್ದು, ಇಂತಹ ಸಂದರ್ಭದಲ್ಲಿ ಕಾರು ಕೊಳ್ಳಲು ಸಂಭಾವ್ಯ ಖರೀದಿದಾರರು ಹೆಚ್ಚು ಉತ್ಸಾಹ ಹೊಂದಿದ್ದಾರೆ ಎನ್ನುವುದನ್ನು ಸಂಸ್ಥೆ ಊಹೆ ಮಾಡಿರುವುದೇ ಈ ನಿರ್ಧಾರಕ್ಕೆ ಮುಖ್ಯ ಕಾರಣ ಎನ್ನಬಹುದು.

ನಮೆಗೆಲ್ಲರಿಗೂ ತಿಳಿದಿರುವಂತೆ, ಹೊಸ ತೆರಿಗೆ ವ್ಯವಸ್ಥೆಯ ನಿಯಮದ ಪ್ರಕಾರ ಎಸ್‌ಯುವಿ ಕಾರುಗಳ ಬೆಲೆಗಳಲ್ಲಿ ಶೇಕಡಾ 3 ರಿಂದ 14% ರಷ್ಟು ಕಡಿತಗೊಳ್ಳಲಿದೆ.

ಟಾಟಾ ಟಿಯೊಗೊ, ಹೆಕ್ಸಾ ಮತ್ತು ಟಿಗೋರ್ ಕಾರುಗಳ ನಂತರ ಇಂಪ್ಯಾಕ್ಟ್ ವಿನ್ಯಾಸ ತತ್ತ್ವವನ್ನು ಆಧರಿಸಿದ ನಾಲ್ಕನೆಯ ಕಾರು ಟಾಟಾ ನೆಕ್ಸನ್ ಎಂಬ ಖ್ಯಾತಿಗೆ ಈ ಕಾರು ಪಾತ್ರವಾಗಿದೆ.

ಭಾರತದ ಮಾರುಕಟ್ಟೆಯಲ್ಲಿ ಮಾರುತಿ ಬ್ರೀಝ, ಫೋರ್ಡ್ ಎಕೊಸ್ಪೋರ್ಟ್ ಮತ್ತು ಮಹೀಂದ್ರಾ ಟಿಯುವಿ300 ಕಾರುಗಳೊಂದಿಗೆ ನೆಕ್ಸನ್ ಸ್ಪರ್ಧಿಸಲಿದೆ.