ಭಾರತದಲ್ಲಿಯೂ ಬಿಡುಗಡೆಯಾಗಲಿದೆ ಹ್ಯುಂಡೈನ ಸ್ಟಾರ್‌ಎಕ್ಸ್ ಎಂಪಿವಿ

ಇತ್ತೀಚಿಗಷ್ಟೇ ಹ್ಯುಂಡೈ ಕಂಪನಿಯು ಕ್ರೆಟಾ ಎಸ್‌ಯುವಿಯನ್ನು ದೇಶಿಯ ಮಾರುಕಟ್ಟೆಯಲ್ಲಿ ಬಿಡುಗಡೆಗೊಳಿಸಿತ್ತು. ಈ ಸಂದರ್ಭದಲ್ಲಿ ಹ್ಯುಂಡೈ ಇಂಡಿಯಾ ಮುಖ್ಯಸ್ಥರು ಭಾರತದಲ್ಲಿ ಪ್ರೀಮಿಯಂ ಎಂವಿವಿ ಮಾದರಿಯನ್ನು ಬಿಡುಗಡೆಗೊಳಿಸುವ ಯೋಜನೆಯ ಬಗ್ಗೆ ಮಾತನಾಡಿದ್ದರು.

ಈ ಹೊಸ ಮಾದರಿಯ ಎಂಪಿವಿಯು ದೇಶಿಯ ಮಾರುಕಟ್ಟೆಯಲ್ಲಿ ಟೊಯೊಟಾ ಇನೊವಾ ಹಾಗೂ ಕಿಯಾ ಕಾರ್ನಿವಲ್ ಮಾದರಿಗಳಿಗೆ ಪೈಪೋಟಿ ನೀಡಲಿದೆ.

ಭಾರತದಲ್ಲಿ ಹ್ಯುಂಡೈ ಕಂಪನಿಯು ಬಿಡುಗಡೆಗೊಳಿಸಲಿರುವ ಹೊಸ ಎಂಪಿವಿಯು ಹ್ಯುಂಡೈನ ಸ್ಟಾರ್‌ಎಕ್ಸ್ ಎಂಪಿವಿಯಾಗಿರುವ ನಿರೀಕ್ಷೆಗಳಿವೆ.

ಹ್ಯುಂಡೈ ಸ್ಟಾರ್‌ಎಕ್ಸ್ ಮಾದರಿಯನ್ನು ಕಿಯಾ ಕಾರ್ನಿವಲ್ ಕಾರಿನ ರೀತಿಯಲ್ಲಿಯೇ ತಯಾರಿಸಲಾಗುವುದು. ಈ ಕಾರಿನ ಗಾತ್ರವು ಕಿಯಾ ಕಾರ್ನಿವಲ್ ಕಾರಿನಂತೆಯೇ ಇರಲಿದೆ.

ಹ್ಯುಂಡೈ ಕಂಪನಿಯು ಭಾರತದಲ್ಲಿ ಈ ಹೊಸ ಪ್ರೀಮಿಯಂ ಎಂಪಿವಿಯನ್ನು ಹೊಸ ಹೆಸರಿನಲ್ಲಿ ಬಿಡುಗಡೆಗೊಳಿಸುವ ಸಾಧ್ಯತೆಗಳಿವೆ. ಜೊತೆಗೆ ಕೆಲವು ಬದಲಾವಣೆಗಳನ್ನು ಮಾಡಲಾಗುವುದು.

ದೇಶಿಯ ಮಾರುಕಟ್ಟೆಯಲ್ಲಿ ಬಿಡುಗಡೆಯಾದ ನಂತರ, ಈ ಎಂಪಿವಿಯು ಸಹ ಕಿಯಾ ಕಾರ್ನಿವಲ್‌ನಂತೆ ವಿವಿಧ ಸೀಟುಗಳ ಆಯ್ಕೆಗಳಲ್ಲಿ ಲಭ್ಯವಿರಲಿದೆ. ಈ ಕಾರಿನ ಮೂರನೇ ತಲೆಮಾರಿನ ಮಾದರಿಯನ್ನು ಅಂತರ್ ರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಮಾರಾಟ ಮಾಡಲಾಗುತ್ತಿದೆ.

ಹ್ಯುಂಡೈ ಕಂಪನಿಯು ಈ ಹೊಸ ಎಂಪಿವಿಯನ್ನು ಮುಂದಿನ ವರ್ಷದ ಅಂತ್ಯದ ವೇಳೆಗೆ ಭಾರತದಲ್ಲಿ ಬಿಡುಗಡೆಗೊಳಿಸುವ ನಿರೀಕ್ಷೆಗಳಿವೆ.

ಈ ಹೊಸ ಎಂಪಿವಿಯಲ್ಲಿ ಕಿಯಾ ಕಾರ್ನಿವಲ್ ಎಂಪಿವಿಯಲ್ಲಿರುವ 2.2 ಲೀಟರಿನ ಡೀಸೆಲ್ ಎಂಜಿನ್ ಅನ್ನು ಅಳವಡಿಸಲಾಗುವುದು. ಈ ಎಂಜಿನ್ ಗರಿಷ್ಠ 197 ಬಿಹೆಚ್ ಪಿ ಪವರ್ ಹಾಗೂ 440 ಎನ್ಎಂ ಟಾರ್ಕ್ ಉತ್ಪಾದಿಸುತ್ತದೆ. ಆಟೋಮ್ಯಾಟಿಕ್ ಗೇರ್‌ಬಾಕ್ಸ್ ಆಯ್ಕೆಗಳನ್ನು ನೀಡಲಾಗುವುದು.

ಕಿಯಾ ಸೆಲ್ಟೋಸ್ ಹಾಗೂ ಹೊಸ ತಲೆಮಾರಿನ ಕ್ರೆಟಾ ಎಸ್ ಯುವಿಯಂತೆ ಈ ಕಾರ್ ಅನ್ನು ಸಹ ಹಲವು ಮಾದರಿಗಳಲ್ಲಿ ಬಿಡುಗಡೆಗೊಳಿಸಲಾಗುವುದು. ಹ್ಯುಂಡೈ ಕಂಪನಿಯ ಈ ಹೊಸ ಎಂಪಿವಿ ಕಾರು ಭಾರತೀಯ ಗ್ರಾಹಕರಲ್ಲಿ ಹೆಚ್ಚಿನ ನಿರೀಕ್ಷೆಯನ್ನು ಹುಟ್ಟು ಹಾಕಿದೆ.