ಆಕರ್ಷಕ ಬೆಲೆಗಳಲ್ಲಿ ಗರಿಷ್ಠ ಸೇವೆ ಪಡೆಯುವ ಹೊಸ ವಾರಂಟಿ ಪ್ಯಾಕೇಜ್ ಘೋಷಿಸಿದ ಹ್ಯುಂಡೈ

ಹೊಸ ವಾಹನ ಖರೀದಿ ನಂತರ ನೀಡಲಾಗುವ ನಿಗದಿತ ವಾರಂಟಿ ನಂತರ ವಾಹನ ನಿರ್ವಹಣೆಯನ್ನು ಸುಲಭಗೊಳಿಸಲು ಹ್ಯುಂಡೈ ಕಂಪನಿಯು ಹೊಸದಾಗಿ ಅತಿ ಕಡಿಮೆ ವೆಚ್ಚದ ನಿರ್ವಹಣಾ ಯೋಜನೆಯ ಪ್ಯಾಕೇಜ್‌ಗಳನ್ನು ಪರಿಚಯಿಸುತ್ತಿದ್ದು, ಹೊಸ ಪ್ಯಾಕೇಜ್ ಮೂಲಕ ಹ್ಯುಂಡೈ ಕಾರು ಮಾಲೀಕರು ತಮ್ಮ ವಾಹನಗಳಿಗೆ ಗರಿಷ್ಠ ಪ್ರಮಾಣದ ಸುರಕ್ಷತೆ ಒದಗಿಸಬಹುದಾಗಿದೆ.

ಹೊಸ ನಿರ್ವಹಣಾ ಪ್ಯಾಕೇಜ್‌ನಲ್ಲಿ ಗ್ರಾಹಕರಿಗೆ ಪ್ರಮುಖ ಬಿಡಿಭಾಗಗಗಳ ಮೇಲೆ ಗರಿಷ್ಠ ಭದ್ರತೆ ನೀಡಲಿದ್ದು, ಕೆಲವು ಪ್ರಮುಖ ಬಿಡಿಭಾಗಗಳನ್ನು ನಿಯಮಿತವಾಗಿ ಬದಲಿ ಮಾಡಿಕೊಡುವ ಮೂಲಕ ಕಾರಿನ ಕಾರ್ಯಕ್ಷಮತೆಯನ್ನು ಹೆಚ್ಚಿಸಲಿದೆ.

ಹ್ಯುಂಡೈ ಘೋಷಣೆ ಮಾಡಿರುವ ಶೀಲ್ದ್ ಆಫ್ ಟ್ರಸ್ಟ್ ಪ್ಯಾಕೇಜ್ ಮೂಲಕ 5 ವರ್ಷಗಳ ಕಾಲ ನಿಮ್ಮ ವಾಹನಗಳಿಗೆ ಗರಿಷ್ಠ ಭದ್ರತೆ ನೀಡಬಹುದಾಗಿದ್ದು, ಕಡಿಮೆ ವೆಚ್ಚದ ನಿರ್ವಹಣಾ ಯೋಜನೆಯಲ್ಲಿ ದೋಷಯುಕ್ತ ಭಾಗಗಳನ್ನು ಕಾಲಕಾಲಕ್ಕೆ ಬದಲಾಯಿಸಲಿದೆ.

ಹೊಸ ನಿರ್ವಹಣಾ ವೆಚ್ಚದಲ್ಲಿ ಬ್ರೇಕ್, ಕ್ಲಚ್, ವೈಪರ್, ಬಲ್ಪ್‌ಗಳು ಮತ್ತು ಸೀಟ್ ಬೆಲ್ಟ್ ಸೇರಿದಂತೆ ಒಟ್ಟು 14 ತಾಂತ್ರಿಕ ಅಂಶಗಳನ್ನು ಕಾಲಕಾಲಕ್ಕೆ ಬದಲಿಸಲಿರುವ ಹ್ಯುಂಡೈ ಕಂಪನಿಯು ಇನ್ನುಳಿದ ತಾಂತ್ರಿಕ ಅಂಶಗಳನ್ನು ಅತಿ ದರದಲ್ಲಿ ಸೇವೆಗಳನ್ನು ಒದಗಿಸಲಿದೆ. ಇದರಿಂದ ವಾಹನ ತಾಂತ್ರಿಕ ಅಂಶಗಳ ಕಾರ್ಯಕ್ಷಮತೆಗೆ ಹೆಚ್ಚು ಪ್ರಯೋಜನವಾಗಲಿದ್ದು, ಸ್ಟ್ಯಾಂಡರ್ಡ್ ವಾರಂಟಿ ಹೊರತುಪಡಿಸಿ ಶೀಲ್ದ್ ಆಫ್ ಟ್ರಸ್ಟ್ ಪ್ಯಾಕೇಜ್ ಖರೀದಿ ಮಾಡಬೇಕಾಗುತ್ತದೆ.

ಇನ್ನು ಹ್ಯುಂಡೈ ಇಂಡಿಯಾ ಹೊಸ ಗ್ರಾಹಕರನ್ನು ಆಕರ್ಷಿಸಲು ಫೆಬ್ರವರಿ ತಿಂಗಳಿನಲ್ಲಿ ಹಲವಾರು ಕೊಡುಗೆಗಳನ್ನು ನೀಡುತ್ತಿದ್ದು, ಈ ಕೊಡುಗೆಗಳ ಅಡಿಯಲ್ಲಿ ಕಂಪನಿಯು ಆಕರ್ಷಕ ರಿಯಾಯಿತಿಗಳನ್ನು ನೀಡುತ್ತಿದೆ.

ಜನಪ್ರಿಯ ಹ್ಯಾಚ್‌ಬ್ಯಾಕ್ ಕಾರು ಮಾದರಿಯಾದ ಸ್ಯಾಂಟ್ರೊ ಕಾರಿನ ಎರಾ ಮಾದರಿಯ ಮೇಲೆ ರೂ.20,000 ರಿಯಾಯಿತಿ ನೀಡಲಾಗುತ್ತಿದ್ದು, ಇತರೆ ಎಲ್ಲಾ ಕಾರು ಮಾದರಿಗಳ ಮೇಲೆ ರೂ.30,000 ನಗದು ರಿಯಾಯಿತಿ ಜೊತೆಗೆ ರೂ.15 ಸಾವಿರಗಳ ವಿನಿಮಯ ಬೋನಸ್ ಹಾಗೂ ರೂ.5 ಸಾವಿರ ಕಾರ್ಪೊರೇಟ್ ರಿಯಾಯಿತಿ ನೀಡಲಾಗುತ್ತದೆ.

ಗ್ರ್ಯಾಂಡ್ ಐ 10 ನಿಯೋಸ್ ಕಾರಿನ ಮೇಲೆ ರೂ.45 ಸಾವಿರ ನಗದು ರಿಯಾಯಿತಿ ನೀಡಲಾಗುತ್ತಿದ್ದು, ಇದರ ಜೊತೆಗೆ ಹ್ಯುಂಡೈ ಕಂಪನಿಯು ಈ ಕಾರಿನ ಇತರೆ ಎಲ್ಲಾ ಕಾರು ಮಾದರಿಗಳ ಮೇಲೂ ರೂ.15 ಸಾವಿರ ನಗದು ರಿಯಾಯಿತಿಯನ್ನು ನೀಡುತ್ತಿದೆ.

ಕಂಪ್ಯಾಕ್ಟ್ ಸೆಡಾನ್ ಔರಾ ಬಗ್ಗೆ ಹೇಳುವುದಾದರೆ ಈ ಕಾರಿನ ಮೇಲೆ ಟರ್ಬೊ ಮಾದರಿಯ ಮೇಲೆ ರೂ.50 ಸಾವಿರ ರಿಯಾಯಿತಿ ನೀಡಲಾಗುತ್ತಿದ್ದು,ಈ ಕಾರಿನ 1.2-ಲೀಟರ್ ಪೆಟ್ರೋಲ್ ಹಾಗೂ 1.2-ಲೀಟರ್ ಡೀಸೆಲ್ ಮಾದರಿಗಳ ಮೇಲೆ ರೂ.20,000ಗಳ ನಗದು ರಿಯಾಯಿತಿಯನ್ನು ನೀಡಲಾಗುತ್ತದೆ.

ಹ್ಯುಂಡೈ ಎಲಾಂಟ್ರಾ ಪೆಟ್ರೋಲ್ ಆಟೋಮ್ಯಾಟಿಕ್ ಮಾದರಿಗಳ ಮೇಲೆ ರೂ.30 ಸಾವಿರ ಹಾಗೂ ಪೆಟ್ರೋಲ್ ಮ್ಯಾನುಯಲ್ ಮಾದರಿಗಳ ಮೇಲೆ ರೂ.70 ಸಾವಿರ ರಿಯಾಯಿತಿ ನೀಡಲಾಗುತ್ತಿದ್ದು, ಕೋನಾ ಇವಿ ಕಾರಿನ ಮೇಲೆ ರೂ.50 ಸಾವಿರ ನಗದು ರಿಯಾಯಿತಿ ನೀಡಲಾಗುತ್ತದೆ.