412 ಬಿಎಚ್‌ಪಿ ಪ್ರೇರಿತ ಮರ್ಸಿಡಿಸ್-ಎಎಂಜಿ ಎ 45 ಎಸ್ 4ಮ್ಯಾಟಿಕ್ ಪ್ಲಸ್ ಭಾರತದಲ್ಲಿ ಬಿಡುಗಡೆ

ಹೊಸ ಮರ್ಸಿಡಿಸ್-ಎಎಂಜಿ ಎ 45 ಎಸ್ 4ಮ್ಯಾಟಿಕ್ ಪ್ಲಸ್ ಕಾರು ಮಾದರಿಯು ಐಷಾರಾಮಿ ಹ್ಯಾಚ್‌ಬ್ಯಾಕ್ ಆವೃತ್ತಿಯಾಗಿದ್ದು, ಎಎಂಜಿ ಪರ್ಫಾಮೆನ್ಸ್ ತಂತ್ರಜ್ಞಾನದೊಂದಿಗೆ ಹೆಚ್ಚಿನ ಕಾರ್ಯಕ್ಷಮತೆಯನ್ನು ಹೊಂದಿರುವ ಹೊಸ ಕಾರು ಎಂಟ್ರಿ ಲೆವಲ್ ಪರ್ಫಾಮೆನ್ಸ್ ಕಾರುಗಳಲ್ಲಿಯೇ ಹೆಚ್ಚಿನ ಮಟ್ಟದ ವಿಶೇಷತೆಗಳನ್ನು ಒಳಗೊಂಡಿದೆ.

ಭಾರತದಲ್ಲಿ ಸದ್ಯ ಮರ್ಸಿಡಿಸ್ ಬೆಂಝ್ ಕಂಪನಿಯು ಒಟ್ಟು 24 ವಿವಿಧ ಕಾರು ಮಾದರಿಗಳನ್ನು ಮಾರಾಟ ಮಾಡುತ್ತಿದ್ದು, ಇದರಲ್ಲಿ ಹೊಸ ಮರ್ಸಿಡಿಸ್-ಎಎಂಜಿ ಎ 45 ಎಸ್ 4ಮ್ಯಾಟಿಕ್ ಪ್ಲಸ್ ಸೇರಿ ಒಂಬತ್ತು ಎಎಂಜಿ ಮಾದರಿಗಳನ್ನು ಮಾರಾಟ ಮಾಡುತ್ತಿದೆ.

ಎಎಂಜಿ ಮಾದರಿಗಳನ್ನು ಕಂಪನಿಯು ಸದ್ಯ ಕೇಂದ್ರ ಸರ್ಕಾರದ ಹೊಸ ಆಮದು ನೀತಿಯಲ್ಲಿ ಭಾರತದಲ್ಲಿ ಮಾರಾಟ ಮಾಡುತ್ತಿದ್ದು, ಹೊಸ ಮಾದರಿಗಳೊಂದಿಗೆ ಐಷಾರಾಮಿ ಕಾರು ಮಾರಾಟ ವಿಭಾಗದಲ್ಲಿ ಮರ್ಸಿಡಿಸ್ ಬೆಂಝ್ ಕಂಪನಿಯು ಹಲವು ವರ್ಷಗಳಿಂದ ಸತತವಾಗಿ ನಂ.1 ಸ್ಥಾನ ಕಾಯ್ದುಕೊಳ್ಳುತ್ತಿದೆ.

ಮರ್ಸಿಡಿಸ್-ಎಎಂಜಿ ಎ 45 ಎಸ್ ಮಾದರಿಯು ಮರ್ಸಿಡಿಸ್ ಬೆಂಝ್ ಕಂಪನಿಯ ಅತ್ಯಂತ ಶಕ್ತಿಯುತವಾದ ಫೋರ್ ಸಿಲಿಂಡರ್ ಮೋಟಾರ್ ಪ್ರೇರಿತ 2.0-ಲೀಟರ್ ಟರ್ಬೊ ಪೆಟ್ರೋಲ್ ಎಂಜಿನ್ ಹೊಂದಿದ್ದು, ಇದು 8-ಸ್ಪೀಡ್ ಆಟೋಮ್ಯಾಟಿಕ್ ಗೇರ್‌ಬಾಕ್ಸ್‌ನೊಂದಿಗೆ 412 ಬಿಎಚ್‌ಪಿ ಮತ್ತು 500 ಎನ್ಎಂ ಟಾರ್ಕ್ ಉತ್ಪಾದಿಸಬಲ್ಲದು.

ಎಎಂಜಿ ಎ 45 ಎಸ್ ಮಾದರಿಯು ಸ್ಟ್ಯಾಂಡರ್ಡ್ ಎ 35 ಸೆಡಾನ್ ಮಾದರಿಗಿಂತಲೂ ಹೆಚ್ಚುವರಿ 115 ಬಿಎಚ್‌ಪಿ ಉತ್ಪಾದನಾ ಸಾಮರ್ಥ್ಯ ಹೊಂದಿದ್ದು, 4 ಮ್ಯಾಟಿಕ್ ಆಲ್ ವ್ಹೀಲ್ ಡ್ರೈವ್ ಸಿಸ್ಟಂನೊಂದಿಗೆ ಕೇವಲ 3.9 ಸೆಕೆಂಡುಗಳಲ್ಲಿ ಸೊನ್ನೆಯಿಂದ 100 ಕಿ.ಮೀ ವೇಗ ಪಡೆದುಕೊಳ್ಳಬಲ್ಲದು.

ಕಾರಿನ ವೇಗ ವರ್ಧನೆಗೆ ಪೂರಕವಾಗಿ ಹೊಸ ಕಾರಿನಲ್ಲಿ ಒಟ್ಟು ಆರು ಡ್ರೈವ್ ಮೋಡ್‌ಗಳನ್ನು ನೀಡಲಾಗಿದ್ದು, ಕಂಫರ್ಟ್, ಸ್ಪೋರ್ಟ್, ಸ್ಪೋರ್ಟ್ ಪ್ಲಸ್, ಸ್ಲಿಪೆರಿ, ಇಂಡಿವಿಜ್ಯುವಲ್‌ ಮತ್ತು ರೇಸ್ ಮೋಡ್‌ಗಳನ್ನು ಹೊಂದಿದೆ.

ಹೊಸ ಕಾರು ಎಎಂಜಿ-ಶೈಲಿಯ ಪನಾಮೆರಿಕಾನಾ ಗ್ರಿಲ್‌ನೊಂದಿಗೆ ಬಲಿಷ್ಠ ವಿನ್ಯಾಸ ಹೊಂದಿದ್ದು, ಹುಡ್‌ನಲ್ಲಿ ಚೂಪಾದ ಟ್ವಿನ್ ಲೈನ್ಸ್, ಸ್ಲಿಕ್ ಎಲ್‌ಇಡಿ ಹೆಡ್‌ಲ್ಯಾಂಪ್‌ಗಳು ಮತ್ತು ದೊಡ್ಡ ಏರ್ ಡ್ಯಾಮ್‌ಗಳು ಮತ್ತು ಇಂಟಿಗ್ರೇಟೆಡ್ ಸ್ಪ್ಲಿಟರ್ ಕೂಡಾ ಹೊಂದಿದೆ.

ಕಡಿಮೆ ಪ್ರೊಫೈಲ್ ಟೈರ್‌ಗಳೊಂದಿಗೆ ದೊಡ್ಡದಾದ 19-ಇಂಚಿನ ಮಿಶ್ರಲೋಹದ ಚಕ್ರಗಳನ್ನು ಹೊಂದಿದ್ದು, ಹಿಂಬದಿಯಲ್ಲಿ ಡಿಫ್ಯೂಸರ್ ಮತ್ತು ಕ್ವಾಡ್ ಎಕ್ಸಾಸ್ಟ್ ಸಿಸ್ಟಮ್ ಮೂಲಕ ಸ್ಪೋರ್ಟಿ ಲುಕ್ ಪಡೆದುಕೊಳ್ಳಲಿದೆ.

ಹಾಗೆಯೇ ಹೊಸ ಕಾರಿನ ಕ್ಯಾಬಿನ್ ಕೂಡಾ ಸ್ಪೋರ್ಟಿ ಮತ್ತು ಆಕ್ರಮಣಕಾರಿಯಾಗಿದ್ದು, ಇದು ಎಎಂಜಿ ವಿನ್ಯಾಸ ಪ್ರೇರಣೆಯೊಂದಿಗೆ ಐಷಾರಾಮಿ ಪರ್ಫಾಮೆನ್ಸ್ ಕಾರು ಬಯಸುವ ಗ್ರಾಹಕರನ್ನು ಸೆಳೆಯಲಿದೆ.

ಹೊಸ ಕಾರಿನಲ್ಲಿ ಕಪ್ಪು ಆರ್ಟಿಕೊ ಮ್ಯಾನ್ ಮೇಡ್ ಲೆದರ್ ಮತ್ತು ಡೈನಾಮಿಕಾ ಮೈಕ್ರೋಫೈಬರ್ ಸಂಯೋಜನೆಯೊಂದಿಗೆ ಕಾಂಟ್ರಾಸ್ಟ್ ಸ್ಟಿಚಿಂಗ್ ಮತ್ತು ಟ್ರಿಮ್ ಪ್ಯಾಟರ್ನ್‌ನೊಂದಿಗೆ ಬರುವ ಬಕೆಟ್-ಶೈಲಿಯ ಸ್ಪೋರ್ಟ್ ಸೀಟ್‌ಗಳನ್ನು ಹೊಂದಿದ್ದು, ಎಎಂಜಿ ಪರ್ಫಾರ್ಮೆನ್ಸ್ ಸ್ಟೀರಿಂಗ್ ವ್ಹೀಲ್ ಅನ್ನು ನ್ಯಾಪ್ಪಾ ಲೆದರ್/ಡಿನಾಮಿಕಾ ಮೈಕ್ರೋಫೈಬರ್‌ನಲ್ಲಿ ಕಾಂಟ್ರಾಸ್ಟ್ ಯೆಲ್ಲೊ ಟಾಪ್ ಸ್ಟಿಚಿಂಗ್, ಯೆಲ್ಲೊ ಬಣ್ಣದಲ್ಲಿ ಗಂಟೆಯ ಗುರುತು, ಎಎಂಜಿ ಸ್ಟೀರಿಂಗ್ ವ್ಹೀಲ್ ಬಟನ್‌ ಹೊಂದಿರಲಿದೆ.

ಜೊತೆಗೆ ಎಎಂಜಿ ಲೋಗೋ, ಆಂಬಿಯೆನ್ಸ್ ಲೈಟಿಂಗ್ಸ್‌ಗಳೊಂದಿಗೆ ಆಸಕ್ತ ಗ್ರಾಹಕರಿಗಾಗಿ ಮರ್ಸಿಡಿಸ್ ಇಂಡಿಯಾ ಕಂಪನಿಯು ತನ್ನ ಡಿಸೈನ್‌ನೊ ಪ್ಲಾಟ್‌ಫಾರ್ಮ್ ಅಡಿಯಲ್ಲಿ ಹಲವಾರು ಗ್ರಾಹಕೀಕರಣ ಆಯ್ಕೆಗಳನ್ನು ಸಹ ನೀಡುತ್ತದೆ.

ಈ ಕಾರಿನಲ್ಲಿ ಮರ್ಸಿಡಿಸ್ ಕಂಪನಿಯು ಸಿಗ್ನೇಚರ್ ಸಿಂಗಲ್ ಯೂನಿಟ್ ಡಿಸ್ಪ್ಲೇ ಜೊತೆಗೆ ಇನ್ಫೋಟೈನ್‌ಮೆಂಟ್ ಮತ್ತು ಇನ್‌ಸ್ಟ್ರುಮೆಂಟೇಶನ್‌ಗಾಗಿ ಎರಡು ಪ್ರತ್ಯೇಕ ಸ್ಕ್ರೀನ್‌ಗಳನ್ನು ನೀಡಿದ್ದು, ಮೊದಲನೆಯದು ಟಚ್‌ಸ್ಕ್ರೀನ್ ಘಟಕವಾಗಿದ್ದರೆ ಎಂಬಕ್ಸ್ ಇನ್ಫೋಟೈನ್‌ಮೆಂಟ್ ಸಿಸ್ಟಮ್‌ನೊಂದಿಗೆ ಬರುತ್ತದೆ.

ಇದನ್ನು ಸೆಂಟರ್ ಕನ್ಸೋಲ್‌ನಲ್ಲಿರುವ ಟ್ರ್ಯಾಕ್‌ಪ್ಯಾಡ್, ಟಚ್‌ಸ್ಕ್ರೀನ್ ಡಿಸ್ಪ್ಲೇ, ಸ್ಟೀರಿಂಗ್ ನಿಯಂತ್ರಣಗಳು ಅಥವಾ 'ಹೇ ಮರ್ಸಿಡಿಸ್' ಎಂದು ಹೇಳುವ ಮೂಲಕ ಸರಳವಾಗಿ ಧ್ವನಿ ಆಜ್ಞೆಯನ್ನು ಬಳಸಿ ನಿಯಂತ್ರಿಸಬಹುದಾಗಿದ್ದು, ಕಾರು ಪ್ರೀಮಿಯಂ ಬರ್ಮೆಸ್ಟರ್ ಸೌಂಡ್ ಸಿಸ್ಟಮ್ ಅನ್ನು ಸಹ ಪಡೆಯುತ್ತದೆ.

ಇದಲ್ಲದೆ ಇನ್ಸ್ಟ್ರುಮೆಂಟ್ ಕ್ಲಸ್ಟರ್‌ಗಾಗಿ ಗ್ರಾಹಕರು ಮೂರು ಎಎಂಜಿ ಡಿಸ್ಪ್ಲೇ ಶೈಲಿಗಳನ್ನು ಪಡೆದುಕೊಳ್ಳಲಿದ್ದು, ಇಲ್ಲಿ "ಕ್ಲಾಸಿಕ್", "ಸ್ಪೋರ್ಟ್" ಮತ್ತು "ಸೂಪರ್‌ ಸ್ಪೋರ್ಟ್" ನಡುವೆ ಆಯ್ಕೆ ಮಾಡಬಹುದಾಗಿದ್ದು, ಹೆಡ್-ಅಪ್ ಡಿಸ್ಪ್ಲೇ, ಬ್ಲೈಂಡ್-ಸ್ಪಾಟ್ ಅಸಿಸ್ಟ್ ಮತ್ತು ಆಕ್ಟಿವ್ ಲೇನ್ ಕೀಪ್ ಅಸಿಸ್ಟ್ ಅನ್ನು ಸಹ ಪಡೆಯುತ್ತದೆ.