RTO Raid: ಬೆಂಗಳೂರಿನಲ್ಲಿ ನಟ ಅಮಿತಾಬ್ ಬಚ್ಚನ್ ಹೆಸರಿನಲ್ಲಿದ್ದ Rolls Royce ಕಾರು ಸೀಜ್

RTO ಅಧಿಕಾರಿಗಳು ನಡೆಸಿದ ವಿಶೇಷ ಕಾರ್ಯಾಚರಣೆಯಲ್ಲಿ ಹತ್ತುಕ್ಕೂ ಹೆಚ್ಚು ಸೂಪರ್ ಕಾರುಗಳು ಸಾರಿಗೆ ಇಲಾಖೆಯ ನಿಯಮಗಳ ವಿರುದ್ದವಾಗಿ ಸಂಚರಿಸಿ ಸಿಕ್ಕಿಬಿದ್ದಿದ್ದು, ಕಳೆದ ಕೆಲ ವರ್ಷಗಳ ಹಿಂದೆ ಬಾಲಿವುಡ್ ನಟ ಅಮಿತಾಬ್ ಬಚ್ಚನ್ ಒಡೆತನದಲ್ಲಿದ್ದ Rolls Royce Phantom ಕಾರು ಕೂಡಾ ಸಾರಿಗೆ ನಿಯಮ ಉಲ್ಲಂಘಿಸಿರುವುದು ಬೆಳಕಿಗೆ ಬಂದಿದೆ.

ಹೊಸ ಮೋಟಾರ್ ವೆಹಿಕಲ್ ಆಕ್ಟ್ ಜಾರಿ ನಂತರ ಸಂಚಾರಿ ನಿಯಮಗಳ ಉಲ್ಲಂಘನೆ ವಿರುದ್ದ ಕಠಿಣ ಕ್ರಮ ಜರುಗಿಸಲಾಗುತ್ತಿದ್ದು, ವಾಹನಗಳ ದಾಖಲೆ ಪರಿಶೀಲನೆ ವೇಳೆ ಸಾರಿಗೆ ಇಲಾಖೆಯ ಅಧಿಕಾರಿಗಳು ನಿಯಮ ಬಾಹಿರವಾಗಿ ಸಂಚರಿಸುತ್ತಿದ್ದ Rolls Royce Phantom ಕಾರನ್ನು ವಶಕ್ಕೆ ಪಡೆದಿದ್ದಾರೆ.

ನಗರದ ಪ್ರತಿಷ್ಠಿತ ಯುಬಿ ಸಿಟಿ ಸುತ್ತಮುತ್ತ ಹೆಚ್ಚಿನ ಸಂಖ್ಯೆಯಲ್ಲಿ ಓಡಾಡುವ ಐಷಾರಾಮಿ ಕಾರುಗಳ ಪರಿಶೀಲನೆ ಮಾಡಿದ್ದ ಸಾರಿಗೆ ಇಲಾಖೆಯ ಅಧಿಕಾರಿಗಳು ರೋಲ್ಸ್ ರಾಯ್ಸ್, ಫೋರ್ಷೆ, ಬಿಎಂಡಬ್ಲ್ಯು, ಮರ್ಸಿಡಿಸ್ ಬೆಂಝ್, ಆಡಿ ಸೇರಿದಂತೆ ಹಲವು ಸೂಪರ್ ಕಾರುಗಳನ್ನು ತಡೆದು ದಾಖಲೆ ಪರಿಶೀಲನೆ ಮಾಡಿ ಸಾರಿಗೆ ನಿಯಮ ಉಲ್ಲಂಘಿಸಿರುವ ಮಾಲೀಕರಿಗೆ ಶಾಕ್ ನೀಡಿದರು.

ಸಾರಿಗೆ ಇಲಾಖೆಯ ಹೆಚ್ಚುವರಿ ಆಯುಕ್ತ ನರೇಂದ್ರ ಹೋಳ್ಕರ್‌ ನೇತೃತ್ವದಲ್ಲಿ ನಗರದ ವಿವಿಧಡೆ ನಡೆದ ಕಾರ್ಯಾಚರಣೆಯಲ್ಲಿ ತೆರಿಗೆ ಕಟ್ಟದ ಹಾಗೂ ಮಾಲೀಕತ್ವ ಬದಲಾವಣೆ ಮಾಡಿಕೊಳ್ಳದೆ ಸಂಚಾರ ಮಾಡುತ್ತಿರುವ ವಾಹನಗಳನ್ನು ಸೀಜ್ ಮಾಡಿದ್ದಾರೆ.

ದಾಖಲೆಗಳ ಪರಿಶೀಲನೆ ವೇಳೆ ಯುಬಿ ಸಿಟಿಯತ್ತ ಸಂಚರಿಸುತ್ತಿದ್ದ Rolls Royce Phantom ಕಾರನ್ನು ತಡೆದ ಆರ್‌ಟಿಓ ಅಧಿಕಾರಿಗಳು ಕಾರಿನ ದಾಖಲೆ ಪರಿಶೀಲಿಸಿದಾಗ ಅಮಿತಾಬ್ ಬಚ್ಚನ್ ಹೆಸರಿನಲ್ಲಿ ಇರುವುದು ಪತ್ತೆಯಾಗಿದೆ.

ಆದರೆ ನಟ ಅಮಿತಾಬ್ ಬಚ್ಚನ್ ಅವರು Rolls Royce Phantom ಕಾರನ್ನು 2019ರಲ್ಲಿಯೇ ಬೆಂಗಳೂರು ಮೂಲದ ರಿಯಲ್ ಎಸ್ಟೇಟ್ ಉದ್ಯಮಿಯಾಗಿರುವ ಬಾಬು ಎಂಬುವರಿಗೆ ಮಾರಾಟ ಮಾಡಿದ್ದರು.

ಹಲವಾರು ಹಿಟ್ ಚಿತ್ರಗಳೊಂದಿಗೆ ಹತ್ತಾರು ಬಗೆಯ ಸೂಪರ್ ಕಾರುಗಳ ಕಲೆಕ್ಷನ್ ಹೊಂದಿರುವ ಅಮಿತಾಬ್ ಬಚ್ಚನ್ ಅವರು ಹೊಸ ಕಾರು ಖರೀದಿಗಾಗಿ ತಮ್ಮ ಬಳಿಯಿದ್ದ 2007ರ Rolls Royce Phantom ಕಾರನ್ನು ಮಾರಾಟ ಮಾಡಿದ್ದರು.

2007ರಲ್ಲಿ ಏಕಲವ್ಯ ಎನ್ನುವ ಥ್ರಿಲ್ಲರ್ ಚಿತ್ರದಲ್ಲಿ ಅದ್ಬುತ ಅಭಿಯನಕ್ಕಾಗಿ ನಿರ್ದೇಶಕ ವಿಧು ವಿನೋದ್ ಚೋಪ್ರಾ ಅವರು ಅಮಿತಾಬ್ ಬಚ್ಚನ್ ಅವರಿಗೆ ಸಿಲ್ವರ್ ಕಲರ್ ಹೊಂದಿದ್ದ Rolls Royce Phantom ಉಡುಗೊರೆಯಾಗಿ ಸಿಕ್ಕಿತ್ತು.

ಏಕಲವ್ಯ ಚಿತ್ರವು ವಿಶ್ವದ ಪ್ರಮುಖ ರಾಷ್ಟ್ರಗಳಲ್ಲಿ ತೆರೆ ಕಾಣುವ ಮೂಲಕ ಉತ್ತಮ ಗಳಿಕೆ ಕಂಡಿದ್ದಕ್ಕಾಗಿ ಸಿಕ್ಕ ಉಡುಗೊರೆಯನ್ನು ನಟ ಅಮಿತಾಬ್ ಬಚ್ಚನ್ ಅವರು 2019ರಲ್ಲಿ ಉಮ್ರಾ ಡೆವೆಲಪರ್ ಮಾಲೀಕರಾದ ಬಾಬು ಎಂಬುವವರಿಗೆ ರೂ. 6 ಕೋಟಿ ಮಾರಾಟ ಮಾಡಿದ್ದರು.

ಸೆಲೆಬ್ರಿಟಿ ಕಾರು ಎಂಬ ಕಾರಣಕ್ಕೆ ಮೂಲ ಬೆಲೆಗಿಂತಲೂ ದುಪ್ಪಟ್ಟು ಹಣ ಕೊಟ್ಟು ಖರೀದಿಸಿದ್ದ ಬಾಬು ಕಾರಿನ ಮಾಲೀಕತ್ವ ಬದಲಾವಣೆ ಮಾಡದೆ ಇದೀಗ ಸಂಕಷ್ಟಕ್ಕೆ ಸಿಲುಕಿದ್ದಾರೆ.

ಅಮಿತಾಬ್ ಬಚ್ಚನ್ ಅವರಿಂದ Rolls Royce Phantom ಖರೀದಿಸಿ ಮೂರು ವರ್ಷಗಳಾದರೂ ಮಾಲೀಕತ್ವ ಬದಲಾವಣೆ ಮಾಡದೆ ಸಂಚರಿಸುತ್ತಿರುವ ಕಾರಣಕ್ಕೆ ಸೀಜ್ ಮಾಡಲಾಗಿದ್ದು, ಸಾರಿಗೆ ನಿಯಮಗಳ ಪ್ರಕಾರ ಈ ಪ್ರಕರಣದಲ್ಲಿ ಬಾಬು ಅವರಿಗೆ ಭಾರೀ ಪ್ರಮಾಣದ ದಂಡ ಭರಿಸಬೇಕಾಗಬಹುದು.

ಸದ್ಯ ಸೀಜ್ ಮಾಡಲಾಗಿರುವ Rolls Royce Phantom ಕಾರು ನೆಲಮಂಗಲದಲ್ಲಿರುವ ಆರ್‌ಟಿಓ ಕಚೇರಿಯಲ್ಲಿದ್ದು, ಮಾಲೀಕತ್ವ ಬದಲಾವಣೆಗಾಗಿ ಹೆಚ್ಚಿನ ಮಟ್ಟದ ತೆರಿಗೆ ಪಾವತಿಯಿಂದ ತಪ್ಪಿಸಿಕೊಳ್ಳಲು ಹೋಗಿ ಇದೀಗ ಭಾರೀ ದಂಡ ತೆತ್ತಬೇಕಾದ ಪರಿಸ್ಥಿತಿ ಎದುರಾಗಿದೆ.

Rolls Royce Phantom ಕಾರು ಖರೀದಿಸುವಾಗ ಬಾಬು ಅವರು ಡೀಲರ್ಸ್ ಮೂಲಕ ಕಾರು ಖರೀದಿಸುವಾಗ ಐಟಿ ಇಲಾಖೆಗೆ ಕೇವಲ 1.50 ಕೋಟಿ ಲೆಕ್ಕ ತೋರಿಸಿದ್ದು, ರೂ. 6 ಕೋಟಿಯ ಬೆಲೆಯ ಕಾರನ್ನು ಖರೀದಿಸಲು ಕಪ್ಪು ಹಣ ಬಳಕೆಯಾಗಿರುವ ಬಗೆಗೆ ಇದೀಗ ಐಟಿ ಅಧಿಕಾರಿಗಳು ಕೂಡಾ ಪರಿಶೀಲನೆ ಮಾಡುವ ಸಾಧ್ಯತೆಗಳಿವೆ.

ಜೊತೆಗೆ ವಶಪಡಿಸಿಕೊಳ್ಳಲಾದ Rolls Royce Phantom ಕಾರಿನ ಥರ್ಡ್ ಪಾರ್ಟಿ ಇನ್ಸುರೆನ್ಸ್ ಮುಗಿದು ಕೆಲ ತಿಂಗಳುಗಳೇ ಕಳೆದಿದ್ದು, ಭರ್ಜರಿ ಕಾರ್ಯಾಚರಣೆ ವೇಳೆ ಹಲವು ಐಷಾರಾಮಿ ಕಾರುಗಳ ಮಾಲೀಕರ ಕಳ್ಳಾಟಗಳು ಬಯಲಾಗುತ್ತಿವೆ.

ನಿನ್ನೆ ನಡೆದ ಆರ್‌ಟಿಓ ಅಧಿಕಾರಿಗಳ ಕಾರ್ಯಾಚರಣೆಯಲ್ಲಿ ದ್ವಿಚಕ್ರ ವಾಹನವೊಂದರ ಇನ್ಸುರೆನ್ಸ್ ಸೂಪರ್ ಕಾರಿನ ಇನ್ಸುರೆನ್ಸ್‌ನೊಂದಿಗೆ ಜೋಡಣೆ ಮಾಡಿರುವುದನ್ನು ಪತ್ತೆಹಚ್ಚಲಾಗಿದ್ದು, ಸೂಪರ್ ಕಾರುಗಳ ಮಾಲೀಕರ ಕಳ್ಳಾಟಗಳಿಗೆ ಅಧಿಕಾರಿಗಳನ್ನೇ ತಬ್ಬಿಬ್ಬಾಗುವಂತೆ ಮಾಡಿದೆ.