ಬಿಡುಗಡೆಗೆ ಸಿದ್ದವಾದ 2022ರ ಟೊಯೊಟಾ ಗ್ಲಾಂಝಾ ಹ್ಯಾಚ್‌ಬ್ಯಾಕ್!

ಪ್ರೀಮಿಯಂ ಹ್ಯಾಚ್‌ಬ್ಯಾಕ್ ಬಲೆನೊ ಮಾದರಿಯು ಮರುಬ್ಯಾಡ್ಜ್ ಆವೃತ್ತಿಯಾಗಿರುವ ಗ್ಲಾಂಝಾ ಕೂಡಾ ಉನ್ನತೀಕರಣ ಅಂಶಗಳೊಂದಿಗೆ ಬಿಡುಗಡೆಗೆ ಸಿದ್ದವಾಗುತ್ತಿದ್ದು, 2022ರ ಮಾರುತಿ ಸುಜುಕಿ ಬಲೆನೊದ ಉತ್ಪಾದನೆಯು ಗುಜರಾತ್‌ನಲ್ಲಿರುವ ತನ್ನ ಅತ್ಯಾಧುನಿಕ ಉತ್ಪಾದನಾ ಘಟಕದಲ್ಲಿ ನಡೆಯುತ್ತದೆ. ಹೊಸ ಮಾರುತಿ ಸುಜುಕಿ ಬಲೆನೊವನ್ನು ಬಿಡುಗಡೆ ಮಾಡಿರುವ ಕಾರಣ ಟೊಯೊಟಾ ಶೀಘ್ರದಲ್ಲೇ ತನ್ನ ಹೊಸ ಗ್ಲಾಂಝಾ ಮಾದರಿಯನ್ನು ಭಾರತೀಯ ಮಾರುಕಟ್ಟೆಯಲ್ಲಿ ಬಿಡುಗಡೆ ಮಾಡಬಹುದೆಂದು ನಿರೀಕ್ಷಿಸಲಾಗಿದೆ.

4 ಟ್ರಿಮ್ ಹಂತಗಳಲ್ಲಿ ಲಭ್ಯವಿರುವ ಮಾರುತಿ ಸುಜುಕಿ ಬಲೆನೊಗಿಂತ ಭಿನ್ನವಾಗಿ, ಮುಂಬರುವ 2022 ಟೊಯೊಟಾ ಗ್ಲಾಂಝಾ ಹ್ಯಾಚ್‌ಬ್ಯಾಕ್ ಅನ್ನು ಕೇವಲ 2 ಟ್ರಿಮ್ ಮಟ್ಟದಲ್ಲಿ ನೀಡಲಾಗುವುದು ಎಂದು ತಿಳಿದುಬಂದಿದೆ.

ಟೊಯೊಟಾದಿಂದ ಇತ್ತೀಚಿನ ಪ್ರೀಮಿಯಂ ಹ್ಯಾಚ್‌ಬ್ಯಾಕ್‌, 2022ರ ಮಾರುತಿ ಸುಜುಕಿ ಬಲೆನೊಗೆ ಹೋಲುತ್ತದೆ. ಈ ಬಗ್ಗೆ ಒಂದೇ ಮಾತಿನಲ್ಲಿ ಹೇಳುವುದಾದರೆ ಹೊಸ 2022 ಟೊಯೊಟಾ ಗ್ಲಾಂಝಾ ಹೊಸ ಮಾರುತಿ ಸುಜುಕಿ ಬಲೆನೊದ ಮರುವಿನ್ಯಾಸಗೊಳಿಸಿದ ಮುಂಭಾಗದ ಗ್ರಿಲ್, ಎಲ್ಇಡಿ ಹೆಡ್‌ಲ್ಯಾಂಪ್‌ಗಳು, ಹೊಸ ಎಲ್ ಆಕಾರದ ಟೈಲ್ ಲ್ಯಾಂಪ್‌ಗಳು, ಮುಂಭಾಗದ ಬಂಪರ್, ಫಾಗ್ ಲ್ಯಾಂಪ್‌ಗಳು, ಹಿಂಭಾಗದ ಬಂಪರ್ ಮತ್ತು ಇನ್ನೂ ಹಲವನ್ನು ಒಳಗೊಂಡಿರಲಿದೆ.

ಇದಲ್ಲದೆ ಟೊಯೊಟಾ ಗ್ಲಾಂಝಾ 2022ರ ಬಲೆನೊದ ಹೊಸ ಡ್ಯಾಶ್ ಬೋರ್ಡ್ ಅನ್ನು ಸಹ ಒಳಗೊಂಡಿರುತ್ತದೆ. ಜೊತೆಗೆ ಆಪಲ್ ಕಾರ್‌ಪ್ಲೇ ಮತ್ತು ಆಂಡ್ರಾಯ್ಡ್ ಆಟೋದೊಂದಿಗೆ ಹೊಸ 9.0-ಇಂಚಿನ ಟಚ್ ಸ್ಕ್ರೀನ್ ಇನ್ಫೋಟೈನ್‌ಮೆಂಟ್ ನಂತಹ ಇತರ ನವೀಕರಣಗಳನ್ನು ಸಹ ಒಳಗೊಂಡಿರುತ್ತದೆ.

ಈ ನವೀಕರಣಗಳ ಜೊತೆಗೆ, ಹೊಸ ಟೊಯೊಟಾ ಗ್ಲಾಂಝಾ ಫ್ಲಾಟ್-ಬಾಟಮ್ ಸ್ಟೀರಿಂಗ್ ವೀಲ್, ಪರಿಷ್ಕೃತ ಇನ್‌ಸ್ಟ್ರುಮೆಂಟ್ ಕನ್ಸೋಲ್, ವೈರ್‌ಲೆಸ್ ಚಾರ್ಜಿಂಗ್ ಪ್ಯಾಡ್, ಸಂಪರ್ಕಿತ-ಕಾರ್ ಟೆಕ್, ಹೆಡ್-ಅಪ್ ಡಿಸ್‌ಪ್ಲೇ ಮತ್ತು ಇನ್ನೂ ಅನೇಕ ವೈಶಿಷ್ಟ್ಯಗಳನ್ನು ಹೊಂದಿರಲಿದೆ.

ಹೊಸ ಬಲೆನೊ ಹ್ಯಾಚ್‌ಬ್ಯಾಕ್‌ ಹಿಂದಿನ ಮಾದರಿಗಿಂತಲೂ ಸುಮಾರು 50 ರಿಂದ 70 ಕೆ.ಜಿ ತೂಕ ಹೆಚ್ಚಾಗಿದೆ. ಆದ್ದರಿಂದ ಹೊಸ 2022 ಗ್ಲಾಂಝಾ ಕೂಡಾ ತನ್ನ ತೂಕದಲ್ಲಿ ಹಿಂದಿನ ಮಾದರಿಗೆ ಹೋಲಿಸಿದರೆ ತುಸು ಹೆಚ್ಚಾಗುವ ಸಾಧ್ಯತೆ ಇದೆ ಎಂದು ಹೇಳಬಹುದು.

ಇದಲ್ಲದೆ, ಹೊಸ ಟೊಯೊಟಾ ಗ್ಲಾಂಝಾ ದೊಡ್ಡ 14-ಇಂಚಿನ ಡಿಸ್ಕ್‌ ಬ್ರೇಕ್‌ಗಳು ಮತ್ತು ನವೀಕರಿಸಿದ ಬಲೆನೊದಂತಹ ಸುಧಾರಿತ ಸಸ್ಪೆನ್ಷನ್ ವ್ಯವಸ್ಥೆಯನ್ನು ಸಹ ಒಳಗೊಂಡಿರುತ್ತದೆ.

ಹೊಸ 2022ರ ಮಾರುತಿ ಸುಜುಕಿ ಬಲೆನೊದಂತೆಯೇ ಟೊಯೊಟಾ ಗ್ಲಾಂಝಾ 6 ಏರ್‌ಬ್ಯಾಗ್‌ಗಳು, ಇಎಸ್‌ಪಿ, ಹಿಲ್-ಹೋಲ್ಡ್‌ ಅಸಿಸ್ಟ್, ಎಬಿಎಸ್, ಇಬಿಡಿ, ರಿವರ್ಸ್ ಪಾರ್ಕಿಂಗ್ ಸೆನ್ಸಾರ್‌ಗಳು, ಐಎಸ್‌ಒಎಫ್‌ಐಎಕ್ಸ್‌ ಆಂಕರಿಂಗ್ ಪಾಯಿಂಟ್‌ಗಳು ಮತ್ತು ಇನ್ನೂ ಕೆಲವು ಸುರಕ್ಷತಾ ವೈಶಿಷ್ಟ್ಯಗಳೊಂದಿಗೆ ಬರಲಿದೆ.

ಮುಂಬರುವ ಟೊಯೊಟಾ ಗ್ಲಾಂಝಾವನ್ನು ಹೊಸ ಬಲೆನೊದಂತಹ ಕೇವಲ ಒಂದು ಎಂಜಿನ್ ಆಯ್ಕೆಯೊಂದಿಗೆ ನೀಡಲಾಗುವುದು. ಈ ಎಂಜಿನ್ 1.2 ಲೀಟರ್ ನ್ಯಾಚುರಲ್-ಆಸ್ಪಿರೇಟೆಡ್ ಪೆಟ್ರೋಲ್ ಎಂಜಿನ್ ಆಗಿದ್ದು, 12 ವೋಲ್ಟ್ ಮೈಲ್ಡ್-ಹೈಬ್ರಿಡ್ ವ್ಯವಸ್ಥೆಯನ್ನು ಹೊಂದಿದೆ. 2022ರ ಮಾರುತಿ ಸುಜುಕಿ ಬಲೆನೊದಲ್ಲಿ ಈ ಎಂಜಿನ್ 89 ಬಿಎಚ್‌ಪಿ ಪೀಕ್ ಪವರ್ ಮತ್ತು 113 ಎನ್ಎಂ ಗರಿಷ್ಠ ಟಾರ್ಕ್ ಅನ್ನು ಉತ್ಪಾದಿಸುತ್ತದೆ.

ಹೊಸ ಮಾರುತಿ ಸುಜುಕಿ ಬಲೆನೊದಲ್ಲಿ 5-ಸ್ಪೀಡ್ ಮ್ಯಾನುಯಲ್ ಗೇರ್ ಬಾಕ್ಸ್ ಹಿಂದಿನ ಮಾದರಿಗೆ ಹೋಲುತ್ತದೆ. ಹಿಂದಿನ ಮಾದರಿಯ ಸಿವಿಟಿ ಗೇರ್ ಬಾಕ್ಸ್ ಅನ್ನು 5-ಸ್ಪೀಡ್ ಎಎಂಟಿ ಘಟಕದೊಂದಿಗೆ ಬದಲಾಯಿಸಲಾಗಿದೆ. ಆದ್ದರಿಂದ, ಮುಂಬರುವ ಟೊಯೊಟಾ ಗ್ಲಾಂಝಾ ಒಂದೇ ರೀತಿಯ ಬದಲಾವಣೆಗಳೊಂದಿಗೆ ಬರಲಿದೆ ಎಂದು ನಿರೀಕ್ಷಿಸಲಾಗಿದೆ.

ಟೊಯೊಟಾ ಕಂಪನಿಯು ಭಾರತದಲ್ಲಿ ಬಹಳ ಬಲವಾದ ಮಾರಾಟ ಮತ್ತು ಸೇವಾ ಜಾಲವನ್ನು ಹೊಂದಿದ್ದರೂ, ಇತ್ತೀಚಿನ ವರ್ಷಗಳಲ್ಲಿ ಕಾರು ಮಾರಾಟದಲ್ಲಿ ಸ್ವಲ್ಪ ಕುಸಿತವನ್ನು ಕಂಡಿದೆ. ಟೊಯೊಟಾ ಗ್ಲಾಂಝಾದಂತಹ ಹೆಚ್ಚಿನ ಪ್ರಮಾಣದ ಮಾದರಿಗಳು ಭಾರತದಲ್ಲಿ ತನ್ನ ಮಾರಾಟ ಸಂಖ್ಯೆಯನ್ನು ಹೆಚ್ಚಿಸಲು ಸಹಾಯ ಮಾಡುತ್ತದೆ. ಟೊಯೊಟಾ ಮುಂಬರುವ ಗ್ಲಾಂಝಾಗೆ ಕೆಲವು ಬದಲಾವಣೆಗಳನ್ನು ಸೇರಿಸಿದರೆ ಅದು ಉತ್ತಮವಾಗಿರುತ್ತದೆ. ಇದು 2022ರ ಮಾರುತಿ ಸುಜುಕಿ ಬಲೆನೊದಿಂದ ದೃಶ್ಯಾತ್ಮಕವಾಗಿ ಪ್ರತ್ಯೇಕಿಸುತ್ತದೆ.