ಫೋರ್ಡ್ ಕಾರು ಉತ್ಪಾದನಾ ಘಟಕ ಸ್ವಾಧೀನಕ್ಕಾಗಿ ಟಾಟಾ ಕಂಪನಿಗೆ ಒಪ್ಪಿಗೆ ಸೂಚಿಸಿದ ಗುಜರಾತ್ ಸರ್ಕಾರ

ಅಹಮದಾಬಾದ್ ಬಳಿಯ ಸನಂದ್‌ನಲ್ಲಿರುವ ಫೋರ್ಡ್ ಇಂಡಿಯಾದ ಪ್ರಯಾಣಿಕ ಕಾರು ಉತ್ಪಾದನಾ ಘಟಕವನ್ನು ಸ್ವಾಧೀನಪಡಿಸಿಕೊಳ್ಳಲು ಟಾಟಾ ಮೋಟಾರ್ಸ್‌ಗೆ ಇದ್ದ ತೊಡಕುಗಳನ್ನು ಗುಜರಾತ್ ಸರ್ಕಾರವು ಬಗೆಹರಿಸಿದ್ದು, ಕ್ಯಾಬಿನೆಟ್ ಒಪ್ಪಂದವನ್ನು ಮುಂದುವರಿಸಲು ಎರಡೂ ಕಂಪನಿಗಳು ಸಲ್ಲಿಸಿದ್ದ ಪ್ರಸ್ತಾವನೆಯನ್ನು ಸಚಿವ ಸಂಪುಟವು ಇಂದು ಅನುಮೋದಿಸಿದೆ.

ರಾಜ್ಯ ಸರ್ಕಾರದ ಒಪ್ಪಿಗೆಯೊಂದಿಗೆ ಟಾಟಾ ಮೋಟಾರ್ಸ್ ಕಂಪನಿಯು ಈ ಹಿಂದೆ ಕಾರು ಉತ್ಪಾದನಾ ಘಟಕ ಪ್ರಾರಂಭಿಸುವ ಸಮಯದಲ್ಲಿ ಫೋರ್ಡ್‌ ಕಂಪನಿಗೆ ನೀಡಲಾಗಿದ್ದ ಪ್ರಮುಖ ವಿನಾಯ್ತಿಗಳು ಮತ್ತು ಪ್ರಯೋಜನಗಳು ಪಡೆಯಲು ಸಾಧ್ಯವಾಗಲಿದ್ದು, ಎರಡು ಕಂಪನಿಗಳ ಪ್ರಸ್ತಾವನೆಗೆ ಕ್ಯಾಬಿನೆಟ್ ಸಭೆಯು ನಿರಾಕ್ಷೇಪಣಾ(NOC) ಪ್ರಮಾಣಪತ್ರವನ್ನು ಸಹ ನೀಡಿದೆ.

ಸಿಎಂ ಭೂಪೇಂದ್ರ ಪಟೇಲ್ ಅವರ ಸಮ್ಮುಖದಲ್ಲಿ ಸೋಮವಾರ ಟಾಟಾ ಮೋಟಾರ್ಸ್ ಮತ್ತು ಫೋರ್ಡ್ ಮೋಟಾರ್ ಕಂಪನಿಗಳು ತಿಳುವಳಿಕೆ ಪತ್ರಕ್ಕೆ ಸಹಿ ಹಾಕಲಿದ್ದು, ರಾಜ್ಯದಲ್ಲಿ ಕೈಗಾರಿಕೆ ಅಭಿವೃದ್ದಿಗಾಗಿ ಗುಜರಾತ್ ಸರ್ಕಾರವು ಟಾಟಾ ಹೊಸ ಯೋಜನೆಗೆ ಪ್ರಮುಖ ವಿನಾಯ್ತಿಗಳನ್ನು ಸಹ ನೀಡಿದೆ.

ಇನ್ನು ಹೊಸ ಯೋಜನೆಗಾಗಿ ಈಗಾಗಲೇ ರೂಪರೇಷಗಳನ್ನು ಸಿದ್ದಪಡಿಸಿರುವ ಟಾಟಾ ಮೋಟಾರ್ಸ್ ಕಂಪನಿಯು ಹಳೆಯ ಉದ್ಯೋಗಿಗಳಿಗೂ ಸಿಹಿಸುದ್ದಿ ನೀಡಿದ್ದು, ಅಸ್ತಿತ್ವದಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಯಾವುದೇ ಉದ್ಯೋಗಿಗಳನ್ನು ತೆಗೆದುಹಾಕದೆ ಟಾಟಾ ಕಂಪನಿಯಲ್ಲಿ ವಿಲೀನ ಮಾಡಿಕೊಂಡು ಉತ್ಪಾದನೆ ಆರಂಭಿಸಲಿದೆ.

ವಾರ್ಷಿಕವಾಗಿ 2.4 ಲಕ್ಷ ಯೂನಿಟ್‌ ಕಾರುಗಳನ್ನು ಮತ್ತು ವರ್ಷಕ್ಕೆ 2.7 ಲಕ್ಷ ಎಂಜಿನ್‌ಗಳನ್ನು ತಯಾರಿಸುವ ಸಾಮರ್ಥ್ಯವನ್ನು ಹೊಂದಿರುವ ಫೋರ್ಡ್ ಸ್ಥಾವರದಲ್ಲಿ ಕಂಪನಿಯು ಇದುವರೆಗೆ ಬರೋಬ್ಬರಿ ರೂ. 4,500 ಕೋಟಿ ರೂಪಾಯಿಗಳನ್ನು ಹೂಡಿಕೆ ಮಾಡಿದ್ದು, ಇದೀಗ ಹೊಸ ಘಟಕ ಸ್ವಾಧೀನ ಪಡಿಸಿಕೊಳ್ಳುತ್ತಿರುವ ಟಾಟಾ ಮೋಟಾರ್ಸ್ ಕಂಪನಿಯು ಕೂಡಾ ಬೃಹತ್ ಮೊತ್ತಕ್ಕೆ ಖರೀದಿಸುತ್ತಿದೆ.

ಖರೀದಿ ಪ್ರಕ್ರಿಯೆಯ ಮೊತ್ತವನ್ನು ಹೊರತುಪಡಿಸಿಯೇ ಹೊಸ ಯೋಜನೆಗಾಗಿ ಟಾಟಾ ಮೋಟಾರ್ಸ್ ಕಂಪನಿಯು 2026ರ ವೇಳೆಗೆ ಒಟ್ಟು 2 ಸಾವಿರ ಕೋಟಿ ಹೂಡಿಕೆ ಮಾಡುವ ಸುಳಿವು ನೀಡಿದ್ದು, ಹೊಸ ಘಟಕವನ್ನು ಸಂಪೂರ್ಣವಾಗಿ ಇವಿ ಮಾದರಿಗಳಿಗಾಗಿ ಮೀಸಲಿರಿಸಿದೆ.

ಸನಂದ್‌ದಲ್ಲಿಯೇ ಈಗಾಗಲೇ ಒಂದು ಘಟಕವನ್ನು ಹೊಂದಿರುವ ಟಾಟಾ ಮೋಟಾರ್ಸ್ ಕಂಪನಿಯು ಸಾಮಾನ್ಯ ಕಾರುಗಳ ಪ್ಲ್ಯಾಟ್‌ಫಾರ್ಮ್ ಅಡಿಯಲ್ಲಿಯೇ ವಾರ್ಷಿಕವಾಗಿ 10 ಸಾವಿರ ಎಲೆಕ್ಟ್ರಿಕ್ ಕಾರುಗಳನ್ನು ನಿರ್ಮಾಣ ಮಾಡುತ್ತಿದ್ದು, ಸ್ವಾಧೀನಪಡಿಸಕೊಳ್ಳಲಾಗುತ್ತಿರುವ ಹೊಸ ಘಟಕವನ್ನು ಉನ್ನತೀಕರಿಸಿ ಇವಿ ಮಾದರಿಗಾಗಿ ಪ್ರತ್ಯೇಕ ಪ್ಲ್ಯಾಟ್‌ಫಾರ್ಮ್ ಸಿದ್ದಪಡಿಸಲಿದೆ.

ಸ್ವಾಧೀನಪಡಿಸಕೊಳ್ಳಲಾಗುತ್ತಿರುವ ಹೊಸ ಘಟಕದಲ್ಲಿ ಹೊಸ ಇವಿ ಪ್ಲ್ಯಾಟ್‌ಫಾರ್ಮ್ ಅಡಿಯಲ್ಲಿ ಕಂಪನಿಯು ಮುಂಬರುವ ದಿನಗಳಲ್ಲಿ ವಾರ್ಷಿಕವಾಗಿ 2 ಇವಿ ಕಾರು ಮಾದರಿಗಳನ್ನು ನಿರ್ಮಾಣ ಮಾಡುವ ಗುರಿಹೊಂದಿದ್ದು, ಹೊಸ ಘಟಕದಲ್ಲಿ ಈ ಹಿಂದಿನ ಫೋರ್ಡ್ ಉದ್ಯೋಗಿಗಳು ಸೇರಿ ಸುಮಾರು 23 ಸಾವಿರ ಉದ್ಯೋಗಿಗಳು ಕಾರ್ಯನಿರ್ವಹಿಸಲಿದ್ದಾರೆ.

ಇದರೊಂದಿಗೆ ಟಾಟಾ ಮೋಟಾರ್ಸ್ ಕಂಪನಿಯು ಭಾರತದಲ್ಲಿ ಫೋರ್ಡ್ ಒಡೆತನದಲ್ಲಿರುವ ಚೆನ್ನೈ(ಎರಡನೇ ಘಟಕ)ವನ್ನು ಸಹ ಸ್ವಾಧೀನಪಡಿಸಿಕೊಳ್ಳುವ ಬಗೆಗೆ ಮಾತುಕತೆ ನಡೆಸಲಾಗುತ್ತಿದ್ದು, ಇದಕ್ಕೆ ಪೂರಕವಾಗಿ ಕೆಲ ತಿಂಗಳ ಹಿಂದಷ್ಟೇ ಟಾಟಾ ಮೋಟಾರ್ಸ್ ಸಮೂಹಗಳ ಅಧ್ಯಕ್ಷ ಎನ್ ಚಂದ್ರಶೇಖರನ್ ತಮಿಳುನಾಡು ಸರ್ಕಾರದ ಜೊತೆ ಮಾತುಕತೆ ಸಹ ನಡೆಸಿದ್ದರು.

ಸದ್ಯ ಸನಂದ್ ಕಾರು ಉತ್ಪಾದನಾ ಘಟಕದ ಮಾಲೀಕತ್ವ ವರ್ಗಾವಣೆ ಪ್ರಕ್ರಿಯೆಯಲ್ಲಿರುವುದರಿಂದ ಮುಂಬರುವ ದಿನಗಳಲ್ಲಿ ತಮಿಳುನಾಡಿನಲ್ಲಿರುವ ಕಾರು ಉತ್ಪಾದನಾ ಘಟಕದ ಮಾಲೀತಕ್ವದ ಕುರಿತು ಮಾಹಿತಿ ದೊರೆಯಲಿದ್ದು, ತಮಿಳುನಾಡಿನಲ್ಲಿರುವ ಘಟಕವು ಸಹ ಟಾಟಾ ಪಾಲಾಗುವ ಸಾಧ್ಯತೆಗಳು ಹೆಚ್ಚಿವೆ.

ಹೊಸ ಕಾರು ಉತ್ಪಾದನಾ ಘಟಕಗಳೊಂದಿಗೆ ಟಾಟಾ ಮೋಟಾರ್ಸ್ ಕಂಪನಿಯು ಭಾರತದಲ್ಲಿಯೇ ಸೆಮಿಕಂಡಕ್ಟರ್ ಉತ್ಪಾದನಾ ಅವಕಾಶಗಳನ್ನು ಎದುರುನೋಡುತ್ತಿದ್ದು, ಸನಂದ್‌ ಘಟಕದಲ್ಲಿ ಇವಿ ಮಾದರಿಗಳಿಗಾಗಿ ಪ್ರತ್ಯೇಕವನ್ನು ಮತ್ತು ಚೆನ್ನೈನಲ್ಲಿರುವ ಘಟಕದಲ್ಲಿ ಸೆಮಿಕಂಡಕ್ಟರ್ ಉತ್ಪಾದನೆಯ ಅವಕಾಶಗಳ ಬಗೆಗೆ ಅಧ್ಯಯನ ನಡೆಸುತ್ತಿದೆ.

ಟಾಟಾ ಮೋಟಾರ್ಸ್ ಕಂಪನಿಯು ಸದ್ಯ ನೆಕ್ಸಾನ್ ಇವಿ, ಟಿಗೋರ್ ಇವಿ ನಂತ ಗ್ರಾಹಕರ ಬೇಡಿಕೆಯೆಂತೆ ಮುಂಬರುವ ದಿನಗಳಲ್ಲಿ ಮತ್ತಷ್ಟು ಹೊಸ ಕಾರು ಮಾದರಿಗಳನ್ನು ಬಿಡುಗಡೆ ಮಾಡುವ ಸಿದ್ದತೆಯಲ್ಲಿದ್ದು, ಕಂಪನಿಯು ಇವಿ ವಾಹನಗಳ ಅಭಿವೃದ್ದಿ, ಉತ್ಪಾದನೆ ಮತ್ತು ಮಾರಾಟಕ್ಕಾಗಿ ಪ್ರತ್ಯೇಕ ಪ್ಲ್ಯಾಟ್‌ಫಾರ್ಮ್ ಕೂಡಾ ಆರಂಭಿಸಿದೆ.

ಸದ್ಯ ಮಾರುಕಟ್ಟೆಯಲ್ಲಿರುವ ಇವಿ ಕಾರುಗಳನ್ನು ಸಾಮಾನ್ಯ ಕಾರುಗಳ ಉತ್ಪಾದನಾ ಪ್ಲ್ಯಾಟ್‌ಫಾರ್ಮ್‌ನಲ್ಲಿ ಅಭಿವೃದ್ದಿಪಡಿಸುತ್ತಿರುವ ಕಂಪನಿಯು ಭವಿಷ್ಯದ ಬೃಹತ್ ಯೋಜನೆಗಳಿಗಾಗಿ ಪ್ರತ್ಯೇಕ ನಿಯಂತ್ರಣ ಹೊಂದಿರುವ ಟಾಟಾ ಪ್ಯಾಸೆಂಜರ್ ಎಲೆಕ್ಟ್ರಿಕ್ ಮೊಬಿಲಿಟಿ ಲಿಮಿಟೆಡ್ (TPEML) ಅಂಗಸಂಸ್ಥೆಯನ್ನು ಸಹ ಆರಂಭಿಸಿದೆ.

ಟಾಟಾ ಮೋಟಾರ್ಸ್ ಕಂಪನಿಯ ಹೊಸ ಅಂಗಸಂಸ್ಥೆಯ ಮೂಲಕ ಇವಿ ವಾಹನಗಳ ಮೇಲೆ ಹೆಚ್ಚಿನ ಗಮನಹರಿಸಲು ನಿರ್ಧರಿಸಿದ್ದು, ಎಲೆಕ್ಟ್ರಿಕ್ ವಾಹನಗಳ ಅಭಿವೃದ್ದಿಗಾಗಿ ಸದ್ಯ ಐಸಿ ಎಂಜಿನ್ ಪರಿವರ್ತಿತ ಪ್ಲ್ಯಾಟ್‌ಫಾರ್ಮ್ ಬಳಸುತ್ತಿರುವ ಕಂಪನಿಯು ಭವಿಷ್ಯದ ಇವಿ ಮಾದರಿಗಳಿಗಾಗಿ ಸಿಗ್ಮಾ ಆರ್ಕಿಟೆಕ್ಚರ್ ಮತ್ತು ಸ್ಕೇಟ್‌ಬೋರ್ಡ್ ಪ್ಲ್ಯಾಟ್‌ಫಾರ್ಮ್ ತೆರೆಯುತ್ತಿದೆ.

ಸಿಗ್ಮಾ ಪ್ಲಾಟ್‌ಫಾರ್ಮ್ ಮೂಲಕ ಮೊದಲ ಇವಿ ಕಾರು ಮಾದರಿಯಾಗಿ ಟಾಟಾ ಮೋಟಾರ್ಸ್ ಕಂಪನಿಯು ತನ್ನ ಬಹುನೀರಿಕ್ಷಿತ ಸಿಯೆರಾ ಇವಿ ಸೇರಿದಂತೆ ಪ್ರಮುಖ ಇವಿ ಕಾರು ಮಾದರಿಯನ್ನು ಬಿಡುಗಡೆ ಮಾಡುವ ಯೋಜನೆಯಲ್ಲಿದ್ದು, ಸಿಗ್ಮಾ ಪ್ಲಾಟ್‌ಫಾರ್ಮ್ ಅಡಿಯಲ್ಲಿ ನಿರ್ಮಾಣವಾಗುವ ಇವಿ ಕಾರುಗಳು ಐಸಿ ಎಂಜಿನ್ ಪರಿವರ್ತಿತ ಪ್ಲ್ಯಾಟ್‌ಫಾರ್ಮ್ ಅಡಿಯಲ್ಲಿ ಇವಿ ಕಾರುಗಳಿಂತಲೂ ಹೆಚ್ಚು ಹಗುರ ಮತ್ತು ಹೆಚ್ಚಿನ ಕಾರ್ಯಕ್ಷಮತೆ ಪಡೆದುಕೊಂಡಿವೆ.