ಸರ್ಕಾರದ ಆರು ಏರ್‌ಬ್ಯಾಗ್‌ಗಳ ಕಡ್ಡಾಯ ನಿಯಮ ಪ್ರಯಾಣಿಕರಿಗೆ ಸಹಾಯಕವಾಗಲಿದೆಯೇ?

ಪ್ರಯಾಣಿಕ ಕಾರುಗಳಲ್ಲಿ ಆರು ಏರ್‌ಬ್ಯಾಗ್‌ಗಳನ್ನು ಅಳವಡಿಸುವ ಬಗ್ಗೆ ಭಾರತ ಸರ್ಕಾರವು ಒತ್ತು ನೀಡುತ್ತಿದ್ದು, ಅಪಘಾತಗಳಲ್ಲಿ ಪ್ರಯಾಣಿಕರನ್ನು ರಕ್ಷಿಸುವ ಮೂಲಕ ಸುರಕ್ಷತೆಯನ್ನು ಹೆಚ್ಚಿಸುವ ಗುರಿಯನ್ನು ಹೊಂದಿದೆ. ಅಪಘಾತಗಳ ಸಮಯದಲ್ಲಿ ಗಂಭೀರ ಗಾಯಗಳನ್ನು ಕಡಿಮೆ ಮಾಡಲು ಎಲ್ಲಾ ಪ್ರಯಾಣಿಕ ವಾಹನಗಳಲ್ಲಿ ಕನಿಷ್ಠ ಆರು ಏರ್‌ಬ್ಯಾಗ್‌ಗಳನ್ನು (ಮುಂಭಾಗದ ಚಾಲಕ ಮತ್ತು ಪ್ರಯಾಣಿಕರ ಏರ್‌ ಬ್ಯಾಗ್‌ಗಳು, ಸೈಡ್ ಏರ್‌ಬ್ಯಾಗ್‌ಗಳು ಮತ್ತು ಕರ್ಟನ್ ಏರ್‌ ಬ್ಯಾಗ್‌ಗಳು ಸೇರಿದಂತೆ) ಕಡ್ಡಾಯಗೊಳಿಸಲು ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯ ಕಠಿಣ ನಿರ್ಣಯ ತೆದೆಗುಕೊಂಡಿದೆ.

ಇತ್ತೀಚಿನ ವರದಿಗಳ ಪ್ರಕಾರ, ಸಚಿವ ನಿತಿನ್ ಗಡ್ಕರಿ ಅವರು ಎಲ್ಲಾ ಕಾರುಗಳಲ್ಲಿ ಆರು ಏರ್‌ ಬ್ಯಾಗ್‌ಗಳನ್ನು ಕಡ್ಡಾಯಗೊಳಿಸಲು ನಿರ್ಧರಿಸಿದ್ದಾರೆ. ಇದಕ್ಕೆ ತಯಾರಕರು ಕೂಡ ಪ್ರೋತ್ಸಾಹಿಸುವಂತೆ ಮಾಡಲು ಭಾರತ್ ನ್ಯೂ ಕಾರ್ ಅಸೆಸ್ಮೆಂಟ್ ಪ್ರೋಗ್ರಾಂ (ಭಾರತ್ NCAP) ನಂತಹ ಹೊಸ ಕ್ರ್ಯಾಶ್ ಸುರಕ್ಷತಾ ರೇಟಿಂಗ್ ವ್ಯವಸ್ಥೆಯನ್ನು ಈಗಾಗಲೇ ಪರಿಚಯಿಸಲಾಗಿದೆ.

ಇದು ಕಾರುಗಳ ಗುಣಮಟ್ಟವನ್ನು ನಿರ್ಧರಿಸುವ ಸಂಸ್ಥೆಯಾಗಿದ್ದು, ಇದರಿಂದ ಹೊರಬರುವ ಸುರಕ್ಷತಾ ರೇಟಿಂಗ್ ಖರೀದಿದಾರ ಮೇಲೆ ಹೆಚ್ಚಿನ ಪ್ರಭಾವ ಭೀರುತ್ತದೆ. ಕಾರಿನ ಕ್ರಾಷ್ ಪರೀಕ್ಷೆಯಲ್ಲಿ ಆರು ಏರ್‌ಬ್ಯಾಗ್‌ಗಳನ್ನು ಒಳಗೊಂಡಿರುವ ಕಾರಿಗೆ ಹೆಚ್ಚಿನ ರೇಟಿಂಗ್ ಸಿಗುತ್ತದೆ. ಏಕೆಂದರೆ ಕಾರನ್ನು ಕ್ರಾಷ್ ಮಾಡಿದಾಗ ಅದರೊಳಗಿರುವ ಡಮ್ಮಿಗೆ ಏರ್‌ಬ್ಯಾಗ್‌ಗಳಿಂದ ರಕ್ಷಣೆ ಪಡೆದು ಕಡಿಮೆ ಗಾಯಗಳು ಬೀಳುತ್ತವೆ. ಇದರಿಂದ ಕಾರಿಗೆ ರೇಟಿಂಗ್ ಹೆಚ್ಚಾಗುತ್ತದೆ.

ಪ್ರಯಾಣಿಕರಿಗೆ ಪರಿಣಾಮಕಾರಿತ್ವ

ಆರು ಏರ್‌ಬ್ಯಾಗ್‌ಗಳು ಸುರಕ್ಷತೆಯನ್ನು ಗಮನಾರ್ಹವಾಗಿ ಸುಧಾರಿಸುತ್ತವೆ, ವಿಶೇಷವಾಗಿ ಅಡ್ಡವಾಗಿ ಹೊಡೆದ ಡಿಕ್ಕಿಗಳಲ್ಲಿ ಗಾಯಗಳಾಗದಂತೆ ಮಾಡುತ್ತದೆ. ಹಿಂದಿನ ಸೀಟುಗಳಲ್ಲಿರುವವರು ಸೇರಿದಂತೆ ಎಲ್ಲಾ ಪ್ರಯಾಣಿಕರನ್ನು ಅವು ರಕ್ಷಿಸುತ್ತವೆ, ಮಾರಕ ಮತ್ತು ಗಂಭೀರ ಗಾಯಗಳ ಅಪಾಯಗಳನ್ನು ಕಡಿಮೆ ಮಾಡುತ್ತವೆ. ಇದು ಈಗಾಗಲೇ ಹಲವು ಅಪಘಾತಗಳಲ್ಲಿ ಸಾಭೀತಾಗಿದೆ. ಮಾರುತಿ ಸುಜುಕಿ ಕಂಪನಿಯು ಈಗಾಗಲೇ 2025ರ ಅಂತ್ಯದ ವೇಳೆಗೆ ತಮ್ಮ ಸಂಪೂರ್ಣ ಕಾರುಗಳನ್ನು ಆರು ಏರ್‌ಬ್ಯಾಗ್‌ಗಳೊಂದಿಗೆ ಸಜ್ಜುಗೊಳಿಸಲು ಮುಂದಾಗಿದೆ.

ಕಳವಳಗಳು ಮತ್ತು ಪರಿಣಾಮ

ಆರು ಏರ್‌ಬ್ಯಾಗ್‌ಗಳ ಸೇರ್ಪಡೆಯು ವಾಹನದ ವೆಚ್ಚವನ್ನು ರೂ. 25,000 ರಿಂದ ರೂ. 50,000 ಅಥವಾ ಅದಕ್ಕಿಂತ ಹೆಚ್ಚು ದುಬಾರಿಯಾಗಿಸುತ್ತದೆ. ಇದು ಕೈಗೆಟುಕುವಿಕೆಯ ಮೇಲೆ ಪರಿಣಾಮ ಬೀರಬಹುದು, ವಿಶೇಷವಾಗಿ ಬಜೆಟ್ ಕಾರು ವಿಭಾಗಗಳಲ್ಲಿ ಇದರ ಪರಿಣಾಮ ಹೆಚ್ಚಾಗಿರುತ್ತದೆ. ಹಾಗೆಯೇ ಹೆಚ್ಚುವರಿ ಏರ್‌ಬ್ಯಾಗ್‌ಗಳನ್ನು ಅಳವಡಿಸಿಕೊಳ್ಳಲು ಕಾರುಗಳನ್ನು ಮರುವಿನ್ಯಾಸಗೊಳಿಸುವ ಅಗತ್ಯವಿದೆ.

ವಿವರವಾಗಿ ಹೇಳುವುದಾದ್ರೆ, ಭಾರತದಲ್ಲಿ ಹೆಚ್ಚಿನ ಸಾಮೂಹಿಕ - ಮಾರುಕಟ್ಟೆಯ ಕಾರುಗಳು ಮೂಲತಃ ಸೈಡ್ ಮತ್ತು ಕರ್ಟನ್ ಏರ್‌ಬ್ಯಾಗ್‌ಗಳನ್ನು ಅಳವಡಿಸಲು ವಿನ್ಯಾಸಗೊಳಿಸಲಾಗಿಲ್ಲ. ಆರು ಏರ್‌ಬ್ಯಾಗ್‌ಗಳನ್ನು ಸೇರಿಸಲು ಕಾರಿನ ದೇಹದ ರಚನೆ ಮತ್ತು ಒಳಾಂಗಣದ ವ್ಯಾಪಕ ಮರು - ಇಂಜಿನಿಯರಿಂಗ್ ಅಗತ್ಯವಿರುತ್ತದೆ, ಇದು ದುಬಾರಿ ಮತ್ತು ಸಮಯ ತೆಗೆದುಕೊಳ್ಳುತ್ತದೆ.

ಮತ್ತೊಂದೆಡೆ ಕೆಲವು ತಜ್ಞರು ಸೂಚಿಸುವಂತೆ, ಕೇವಲ ಆರು ಏರ್‌ಬ್ಯಾಗ್‌ಗಳನ್ನು ಕಡ್ಡಾಯಗೊಳಿಸುವುದಕ್ಕಿಂತ ವಾಹನದ ರಚನಾತ್ಮಕ ಸಮಗ್ರತೆಯನ್ನು ಸುಧಾರಿಸುವುದು ಮತ್ತು ಸುರಕ್ಷತಾ ವೈಶಿಷ್ಟ್ಯಗಳನ್ನು (ಆಟೋನಮಸ್ ಎಮರ್ಜೆನ್ಸಿ ಬ್ರೇಕಿಂಗ್‌ನಂತಹ) ಹೆಚ್ಚಸುವುದು ಪ್ರಯಾಣಿಕರ ರಕ್ಷಣೆಗೆ ಹೆಚ್ಚು ಪರಿಣಾಮಕಾರಿಯಾಗಿದೆ. ಏರ್‌ಬ್ಯಾಗ್‌ಗಳು ಮಾತ್ರ ರಕ್ಷಣೆ ಹೆಚ್ಚಿಸುವುದಿಲ್ಲ ಎಂಬ ಅಂಶವನ್ನು ಉಲ್ಲೇಖಿಸಿದ್ದಾರೆ.

ಒಟ್ಟಾರೆ ಆರು ಏರ್‌ಬ್ಯಾಗ್‌ಗಳು ಕೂಡ ಗಾಯದ ತೀವ್ರತೆಯನ್ನು ಕಡಿಮೆ ಮಾಡುವ ಮೂಲಕ ಮತ್ತು ಎಲ್ಲಾ ಆಸನಗಳಿಗೆ, ವಿಶೇಷವಾಗಿ ಪಕ್ಕದ ಡಿಕ್ಕಿಗಳಲ್ಲಿ, ಅಪಘಾತ ರಕ್ಷಣೆಯನ್ನು ಹೆಚ್ಚಿಸುವ ಮೂಲಕ ಪ್ರಯಾಣಿಕರಿಗೆ ಸಹಾಯ ಮಾಡುತ್ತದೆ. ಹಾಗೆಯೇ ವೆಚ್ಚದ ಪರಿಣಾಮ, ಎಂಜಿನಿಯರಿಂಗ್ ಸವಾಲುಗಳು, ರಚನಾತ್ಮಕ ಸುರಕ್ಷತೆ, ಖರೀದಿದಾರರಿಗೆ ಕಾರುಗಳನ್ನು ಕೈಗೆಟುಕುವ ಬೆಲೆಯಲ್ಲಿ ಸಿಗದಂತೆ ಮಾಡುತ್ತದೆ. ಈ ಬಗ್ಗೆ ನಿಮ್ಮ ಅನಿಸಿಕೆಗಳನ್ನು ಕಮೆಂಟ್‌ನಲ್ಲಿ ತಿಳಿಸಿ.