ಟಾಟಾ ಒಡೆತನದ ಐಷಾರಾಮಿ JLR ಕಾರುಗಳ ಬೆಲೆ ಕಡಿತ ಘೋಷಣೆ: 30 ಲಕ್ಷದವರೆಗೆ ದರ ಇಳಿಕೆ!

ಜೆಎಲ್‌ಆರ್ (ಜಾಗ್ವಾರ್ ಲ್ಯಾಂಡ್ ರೋವರ್) ಇಂಡಿಯಾ ಇಂದಿನಿಂದ ತನ್ನ ಐಷಾರಾಮಿ ವಾಹನಗಳ ಮೇಲಿನ ಇತ್ತೀಚಿನ ಜಿಎಸ್‌ಟಿ ತರ್ಕಬದ್ಧಗೊಳಿಸುವಿಕೆಯ ಸಂಪೂರ್ಣ ಪ್ರಯೋಜನವನ್ನು ಗ್ರಾಹಕರಿಗೆ ವರ್ಗಾಯಿಸುವುದಾಗಿ ದೃಢಪಡಿಸಿದೆ. ಈ ಮೂಲಕ ರೇಂಜ್ ರೋವರ್, ಡಿಫೆಂಡರ್ ಮತ್ತು ಡಿಸ್ಕವರಿ ಮಾಡಲ್‌ಗಳ ಮೇಲೆ ಗ್ರಾಹಕರು ರೂ. 4.5 ಲಕ್ಷದಿಂದ ರೂ. 30.4 ಲಕ್ಷದವರೆಗೆ ಬೆಲೆ ಕಡಿತಗಳನ್ನು ನೋಡಲಿದ್ದಾರೆ. ಸೆಪ್ಟೆಂಬರ್ 9, 2025 ರಿಂದ (ಇಂದಿನಿಂದ) ಜಾರಿಗೆ ಬರುವಂತೆ ಜೆಎಲ್ಆರ್ ಗ್ರಾಹಕರಿಗೆ ಸಂಪೂರ್ಣ ಜಿಎಸ್‌ಟಿ ಪ್ರಯೋಜನವನ್ನು ವರ್ಗಾಯಿಸಲಿದೆ ಎಂದು ಪ್ರಕಟಣೆಯಲ್ಲಿ ತಿಳಿಸಿದೆ.

ಬೆಲೆ ಪ್ರಯೋಜನವನ್ನು ಘೋಷಿಸಿದ ಜೆಎಲ್‌ಆರ್ ಇಂಡಿಯಾದ ವ್ಯವಸ್ಥಾಪಕ ನಿರ್ದೇಶಕ ರಾಜನ್ ಅಂಬಾ, "ಐಷಾರಾಮಿ ವಾಹನಗಳ ಮೇಲಿನ ಜಿಎಸ್‌ಟಿ ತರ್ಕಬದ್ಧಗೊಳಿಸುವಿಕೆಯು ಗ್ರಾಹಕರಿಗೆ ಮತ್ತು ಉದ್ಯಮಕ್ಕೆ ಸ್ವಾಗತಾರ್ಹ ಕ್ರಮವಾಗಿದೆ. ಈ ಕ್ರಮವು ಭಾರತದ ಐಷಾರಾಮಿ ಮಾರುಕಟ್ಟೆಯಲ್ಲಿ ನಮ್ಮ ವಿಶ್ವಾಸ ಮತ್ತು ಬದ್ಧತೆಯನ್ನು ಬಲಪಡಿಸಲು ಅಗತ್ಯವಾದ ಪ್ರಚೋದನೆಯನ್ನು ನೀಡುತ್ತದೆ" ಎಂದರು.

ಐಷಾರಾಮಿ ವಾಹನಗಳ ಮೇಲಿನ ಜಿಎಸ್‌ಟಿ ದರಗಳನ್ನು ಕಡಿಮೆ ಮಾಡಲು ಜಿಎಸ್‌ಟಿ ಕೌನ್ಸಿಲ್ ನಿರ್ಧಾರ ತೆಗೆದುಕೊಂಡ ನಂತರ ಈ ಬೆಳವಣಿಗೆಯಾಗಿದೆ. ಈ ಹಿಂದೆ ಒಟ್ಟು 50% ವರೆಗೆ (ಜಿಎಸ್ಟಿ ಮತ್ತು ಸೆಸ್) ತೆರಿಗೆ ವಿಧಿಸಲಾಗುತ್ತಿತ್ತು. ಈಗ ಹೆಚ್ಚುವರಿ ಸೆಸ್ ಇಲ್ಲದೆ 40% ಜಿಎಸ್‌ಟಿ ಸ್ಲ್ಯಾಬ್‌ಗೆ ತರಲಾಗಿದೆ. ಹಾಗಾಗಿ ಭಾರೀ ಮೊತ್ತದಲ್ಲಿ ರೇಂಜ್ ರೋವರ್ ಕಾರುಗಳು ಬೆಲೆ ಕಡಿತವನ್ನು ನೋಡಲಿವೆ.

ಯಾವ ಮಾಡಲ್‌ ಮೇಲೆ ಎಷ್ಟು ಲಕ್ಷ ಇಳಿಕೆ?

ಈ ಬದಲಾವಣೆಗಳು ಎಕ್ಸ್-ಶೋರೂಂ ಬೆಲೆಗಳಿಗೆ ಅನ್ವಯಿಸುತ್ತವೆ, ತಕ್ಷಣವೇ ಜಾರಿಗೆ ಬರುತ್ತವೆ. JLR ತನ್ನ ಭಾರತೀಯ ಗ್ರಾಹಕರಿಗೆ GST 2.0 ಪ್ರಯೋಜನಗಳನ್ನು ಜಾರಿಗೆ ತಂದ ಮೊದಲ ಐಷಾರಾಮಿ ವಾಹನ ತಯಾರಕರಲ್ಲಿ ಸ್ಥಾನ ಪಡೆದಿದೆ. ಮೂಲತಃ ಬ್ರಿಟಿಷ್ ಕಂಪನಿಯಾಗಿರುವ 'ಜಾಗ್ವಾರ್ ಲ್ಯಾಂಡ್ ರೋವರ್', ಪ್ರಸ್ತುತ ಟಾಟಾ ಮೋಟಾರ್ಸ್ ಲಿಮಿಟೆಡ್‌ನ ಸಂಪೂರ್ಣ ಸ್ವಾಮ್ಯದ ಅಂಗಸಂಸ್ಥೆಯಾಗಿದ್ದು, ಟಾಟಾ ಸನ್ಸ್‌ನ ಭಾಗವಾಗಿದೆ.

ಕಂಪನಿಯು ಎರಡು ವಿನ್ಯಾಸ ಮತ್ತು ಎಂಜಿನಿಯರಿಂಗ್ ತಾಣಗಳು, ಎರಡು ವಾಹನ ಉತ್ಪಾದನಾ ಸೌಲಭ್ಯಗಳು, ಒಂದು ಘಟಕ ಮತ್ತು ಪೂರ್ಣಗೊಳಿಸುವ ಸೌಲಭ್ಯವನ್ನು ಹೊಂದಿದೆ. ಹಾಗೆಯೇ ಒಂದು ಎಲೆಕ್ಟ್ರಿಕ್ ಪ್ರೊಪಲ್ಷನ್ ಉತ್ಪಾದನಾ ಕೇಂದ್ರ ಮತ್ತು UK ಯಲ್ಲಿ ಒಂದು ಬ್ಯಾಟರಿ ಜೋಡಣೆ ಕೇಂದ್ರವನ್ನು ಹೊಂದಿದೆ.

ಇದು ಚೀನಾ (ಜಂಟಿ ಉದ್ಯಮ), ಸ್ಲೋವಾಕಿಯಾ, ಭಾರತ ಮತ್ತು ಬ್ರೆಜಿಲ್‌ನಲ್ಲಿ ವಾಹನ ಸ್ಥಾವರಗಳನ್ನು ಹೊಂದಿದೆ. ಜೊತೆಗೆ ಪ್ರಪಂಚದಾದ್ಯಂತ ಏಳು ತಂತ್ರಜ್ಞಾನ ಕೇಂದ್ರಗಳನ್ನು ಹೊಂದಿದೆ. ಒಟ್ಟಾರೆ ಬ್ರಿಟಿಷ್ ವಿನ್ಯಾಸ ಮತ್ತು ಕಾರ್ಯಕ್ಷಮತೆಯನ್ನು ಒಳಗೊಂಡಿರುವ ವಾಹನಗಳೊಂದಿಗೆ ಜೆಎಲ್‌ಆರ್ ಇಂಡಿಯಾ ಭಾರತದಲ್ಲಿ ಐಷಾರಾಮಿ ಕಾರುಗಳ ಉನ್ನತೀಕರಣವನ್ನು ಮುಂದುವರೆಸಿದೆ.

ಎಲೆಕ್ಟ್ರಿಕ್ ಕಡೆ ಗಮನ

ಜೆಎಲ್‌ಆರ್‌ನ Reimagine ತಂತ್ರವು ವಿನ್ಯಾಸದ ಮೂಲಕ ಆಧುನಿಕ ಐಷಾರಾಮಿ ಕಾರುಗಳ ಸುಸ್ಥಿರತೆ - ಸಮೃದ್ಧ ದೃಷ್ಟಿಕೋನವನ್ನು ನೀಡುವ ಗುರಿಯನ್ನು ಹೊಂದಿದೆ. 2039 ರ ವೇಳೆಗೆ ಕಂಪನಿಯ ಪೂರೈಕೆ ಸರಪಳಿ, ಕಾರುಗಳು ಮತ್ತು ಕಾರ್ಯಾಚರಣೆಗಳಲ್ಲಿ ಇಂಗಾಲವನ್ನು ಶೂನ್ಯಕ್ಕೆ ತರುವ ಗುರಿಯೊಂದಿಗೆ ವ್ಯವಹಾರವನ್ನು ಪರಿವರ್ತಿಸುತ್ತಿರುವುದಾಗಿ ಕಂಪನಿ ಹೇಳಿಕೊಂಡಿದೆ.

ವಿದ್ಯುದೀಕರಣವು ನಮ್ಮ ಕಾರ್ಯತಂತ್ರದ ಕೇಂದ್ರವಾಗಿದ್ದು, ಈ ದಶಕದ ಅಂತ್ಯದ ಮೊದಲು ಎಲ್ಲಾ ಕಾರುಗಳು ಶುದ್ಧ ಎಲೆಕ್ಟ್ರಿಕ್ ಮಾಡಲ್‌ಗಳಾಗಿರಲಿವೆ. ಈ ಮೂಲಕ ಜಾಗ್ವಾರ್ ಸಂಪೂರ್ಣವಾಗಿ ಎಲೆಕ್ಟ್ರಿಕ್ ಆಗಲಿದೆ. ಜಾಗತಿಕವಾಗಿ ಎಲೆಕ್ಟ್ರಿಕ್‌ಗೆ ಪರಿವರ್ತನೆಗೊಳ್ಳುವಾಗ ಬೇಡಿಕೆಗೆ ಅನುಗುಣವಾಗಿ ಸಂಪೂರ್ಣ ಎಲೆಕ್ಟ್ರಿಕ್ ಆಯ್ಕೆಗಳ ಜೊತೆಗೆ ಹೈಬ್ರಿಡ್ ಮತ್ತು ICE ವಾಹನಗಳನ್ನು ನೀಡುವುದನ್ನು ಮುಂದುವರಿಸುವ ಆಲೋಚನೆಯೂ ಇದೆ ಎಂದು ಕಂಪನಿ ತಿಳಿಸಿದೆ.