ಮಾರುತಿ ಕಾರುಗಳಿಗೆ ಫುಲ್ ಡಿಮ್ಯಾಂಡ್: ಹಬ್ಬಕ್ಕೆ ಬೆಲೆ ಇಳಿಕೆ ಘೋಷಣೆ... ಖರೀದಿಗೆ ಮುಗಿಬಿದ್ದ ಜನ!

ಮಾರುತಿ ಸುಜುಕಿ ಸೆಪ್ಟೆಂಬರ್ ತಿಂಗಳಲ್ಲಿ ದಾಖಲೆ ಮಟ್ಟದ ದೇಶೀಯ ಮಾರಾಟ ಹಾಗೂ ರಫ್ತುಗಳನ್ನು ಸಾಧಿಸಿದೆ. ಸ್ವಿಫ್ಟ್, ಬಲೆನೊ, ಡಿಜೈರ್ ಮತ್ತು ಬ್ರೆಝಾದಂತಹ ಪ್ರತಿ ಬಾರಿಯ ಅತ್ಯುತ್ತಮ ಮಾರಾಟ ಕಾಣುವ ಮಾಡಲ್‌ಗಳಿಗೆ ವಿದೇಶಗಳಲ್ಲಿಯೂ ಬೇಡಿಕೆ ಹೆಚ್ಚಾಗಿದೆ. ಸೆಪ್ಟೆಂಬರ್ 2025 ರಲ್ಲಿ ಮಾರುತಿ ಸುಜುಕಿಯ ರಫ್ತುಗಳು ಸಾರ್ವಕಾಲಿಕ ಗರಿಷ್ಠ ಮಟ್ಟವನ್ನು ತಲುಪಿವೆ. ಕೈಗೆಟುಕುವ ಬೆಲೆ, ಇಂಧನ - ಸಮರ್ಥ ವಾಹನಗಳೊಂದಿಗೆ ಆಫ್ರಿಕಾ, ಲ್ಯಾಟಿನ್ ಅಮೆರಿಕ ಮತ್ತು ಏಷ್ಯಾದಾದ್ಯಂತ ಉದಯೋನ್ಮುಖ ಮಾರುಕಟ್ಟೆಗಳನ್ನು ಗುರಿಯಾಗಿಸಿಕೊಂಡು ಕಂಪನಿಯು ತನ್ನ ರಫ್ತು ವಿಭಾಗದಲ್ಲಿ ಸ್ಥಿರವಾದ ಬೆಳವಣಿಗೆ ಕಾಯ್ದುಕೊಂಡಿದೆ.

ದೇಶೀಯ ಮಾರಾಟ ಬೆಳವಣಿಗೆ: ಭಾರತೀಯ ಮಾರುಕಟ್ಟೆಯಲ್ಲಿ, ಹಬ್ಬದ ಸೀಸನ್ ಬೇಡಿಕೆ ಮತ್ತು ಇತ್ತೀಚಿನ ಜಿಎಸ್‌ಟಿ ದರ ಕಡಿತದ ಪ್ರಯೋಜನಗಳಿಂದ ಮಾರುತಿ ಸುಜುಕಿಯ ಪ್ರಯಾಣಿಕ ವಾಹನಗಳ ಮಾರಾಟವು ಪ್ರಭಾವಶಾಲಿ ಬೆಳವಣಿಗೆಯನ್ನು ಕಂಡಿವೆ. ಪ್ರಮುಖ ಕೊಡುಗೆ ನೀಡುವ ಮಾಡಲ್‌ಗಳಲ್ಲಿ ನವೀಕರಿಸಿದ ಬ್ರೆಝಾ, ಎರ್ಟಿಗಾ ಮತ್ತು ಗ್ರ್ಯಾಂಡ್ ವಿಟಾರಾ ಸೇರಿವೆ, ಇದು ಬಲವಾದ ಬುಕಿಂಗ್ ‌ಗಳು ಮತ್ತು ತ್ವರಿತ ಮಾರಾಟವನ್ನು ಕಂಡಿವೆ.

ಸುವ್ಯವಸ್ಥಿತ ರಫ್ತು ಕಾರ್ಯವಿಧಾನಗಳು ಮತ್ತು ಸಿಎನ್‌ಜಿ ವಾಹನಗಳಿಗೆ ಪ್ರೋತ್ಸಾಹ ಸೇರಿದಂತೆ ಹೆಚ್ಚಿನ ಸರ್ಕಾರದ ಬೆಂಬಲವು ಈ ಬಾರಿ ಉತ್ತಮ ಮಾರಾಟವನ್ನು ತಂದುಕೊಟ್ಟಿವೆ. ಹೊಸ ಬಿಡುಗಡೆಗಳು ಮತ್ತು ನವೀಕರಿಸಿದ ತಂತ್ರಜ್ಞಾನ ವೈಶಿಷ್ಟ್ಯಗಳೊಂದಿಗೆ ವಿಸ್ತೃತ ಉತ್ಪನ್ನ ಪೋರ್ಟ್ಫೋಲಿಯೊ, ಮೊದಲ ಬಾರಿಯ ಖರೀದಿದಾರರು ಮತ್ತು ಮೌಲ್ಯವನ್ನು ಬಯಸುವ ಕುಟುಂಬಗಳನ್ನು ಮಾರುತಿ ಸುಜುಕಿ ಕಾರುಗಳು ಹೆಚ್ಚಾಗಿ ಆಕರ್ಷಿಸಿವೆ.

ಮಾರುತಿ ಸುಜುಕಿ ಈ ಎಲ್ಲಾ ಅಂಶಗಳಿಂದ ಭಾರತದಲ್ಲಿ ಮತ್ತೊಮ್ಮೆ ತನ್ನ ಮಾರುಕಟ್ಟೆ ನಾಯಕತ್ವವನ್ನು ಬಲಪಡಿಸಿಕೊಂಡಿದೆ. ಸೆಪ್ಟೆಂಬರ್‌ನಲ್ಲಿ ಬಲವಾದ ಮಾರಾಟ ಪ್ರದರ್ಶನವನ್ನು ನೀಡಿದ್ದು, ಹಬ್ಬದ ತ್ರೈಮಾಸಿಕದಾದ್ಯಂತ ವೇಗವನ್ನು ಕಾಯ್ದುಕೊಳ್ಳುವ ನಿರೀಕ್ಷೆಯಿದೆ. ರಫ್ತು ವಿಸ್ತರಣೆ, ಸುಧಾರಿತ ಸುರಕ್ಷತೆ ಮತ್ತು ಇಂಧನ ದಕ್ಷತೆಯ ವೈಶಿಷ್ಟ್ಯಗಳೊಂದಿಗೆ ಸಜ್ಜುಗೊಂಡ ಹೊಸ ಮಾಡಲ್‌ಗಳು ಹೆಚ್ಚಿನ ಬೇಡಿಕೆ ಪಡೆಯುತ್ತಿವೆ.

ಮಾರುತಿಯ 1,89,665 ವಾಹನಗಳ ಮಾರಾಟ

ಮಾರುತಿ ಸುಜುಕಿ ಸೆಪ್ಟೆಂಬರ್ 2025 ರಲ್ಲಿ ಒಟ್ಟು 1,89,665 ಯುನಿಟ್ ವಾಹನಗಳ ಮಾರಾಟವನ್ನು ದಾಖಲಿಸಿದೆ. ಇದು ಕಳೆದ ವರ್ಷದ ಇದೇ ತಿಂಗಳಲ್ಲಿ ಮಾರಾಟವಾದ 1,84,727 ಯುನಿಟ್ ವಾಹನಗಳಿಗೆ ಹೋಲಿಸಿದರೆ ವರ್ಷದಿಂದ ವರ್ಷಕ್ಕೆ ಶೇ2.7 ರಷ್ಟು ಬೆಳವಣಿಗೆಯನ್ನು ಸೂಚಿಸುತ್ತದೆ. ನವರಾತ್ರಿಯ ಮೊದಲ ಎಂಟು ದಿನಗಳಲ್ಲಿ, ಮಾರುತಿ ಸುಜುಕಿ ದಾಖಲೆಯ 1,65,000 ಯುನಿಟ್ ವಾಹನಗಳನ್ನು ತಲುಪಿಸಿದೆ, ಇದು ಇತ್ತೀಚಿನ ಜಿಎಸ್ ಟಿ 2.0 ಬೆಲೆ ಕಡಿತದ ಬಲವಾದ ಪರಿಣಾಮವನ್ನು ಪ್ರತಿಬಿಂಬಿಸುತ್ತದೆ.

ಫ್ರಾಂಕ್ಸ್, ಬ್ರೆಝಾ, ವಿಕ್ಟೋರಿಸ್, ಗ್ರ್ಯಾಂಡ್ ವಿಟಾರಾ, ಜಿಮ್ನಿ, ಎರ್ಟಿಗಾ, ಎಕ್ಸ್ಎಲ್ - 6 ಮತ್ತು ಇನ್ವಿಕ್ಟೊದಂತಹ ಜನಪ್ರಿಯ ಮಾಡಲ್‌ಗಳು ಸೇರಿದಂತೆ 48,695 ಯುಟಿಲಿಟಿ ವಾಹನಗಳನ್ನು (UV) ಕಾರು ತಯಾರಕರು ಮಾರಾಟ ಮಾಡಿದ್ದಾರೆ. ಮಿನಿ ಮತ್ತು ಕಾಂಪ್ಯಾಕ್ಟ್ ಕಾರು ವಿಭಾಗದಲ್ಲಿ ಕಳೆದ ತಿಂಗಳು 74,090 ಯುನಿಟ್ ವಾಹನಗಳು ಮಾರಾಟವಾಗಿವೆ.

ರಫ್ತು ವಿಷಯಕ್ಕೆ ಬಂದರೆ, ಮಾರುತಿ ಸುಜುಕಿ 42,204 ಯುನಿಟ್ ವಾಹನಗಳೊಂದಿಗೆ ತನ್ನ ಅತ್ಯಧಿಕ ಮಾಸಿಕ ರಫ್ತುಗಳನ್ನು ಸಾಧಿಸಿದೆ. ಇದು ಕಳೆದ ವರ್ಷ ಸೆಪ್ಟೆಂಬರ್ 2024 ರಲ್ಲಿ ರಫ್ತು ಮಾಡಲಾದ 27,728 ಯುನಿಟ್ ವಾಹನಗಳು ಮತ್ತು ಆಗಸ್ಟ್ 2025 ರಲ್ಲಿ ರಫ್ತು ಮಾಡಲಾದ 36,538 ಯುನಿಟ್ ವಾಹಗಳಿಗೆ ಹೋಲಿಸಿದರೆ ಭಾರೀ ಹೆಚ್ಚಳವಾಗಿದೆ. ಈ ಅಂಕಿಅಂಶಗಳು ಅಂತರರಾಷ್ಟ್ರೀಯ ಮಾರುಕಟ್ಟೆಗಳ ಮೇಲೆ ಬ್ರ್ಯಾಂಡ್ ನ ಹೆಚ್ಚುತ್ತಿರುವ ಗಮನವನ್ನು ಒತ್ತಿಹೇಳುತ್ತವೆ.

ಒಟ್ಟಾರೆ ಮಾರುತಿ ಸುಜುಕಿಯ ರಫ್ತು ಸೆಪ್ಟೆಂಬರ್ 2025 ರಲ್ಲಿ ಸಾರ್ವಕಾಲಿಕ ಗರಿಷ್ಠ ಮಟ್ಟವನ್ನು ತಲುಪಿದೆ. ಬಲೆನೊ, ಡಿಜೈರ್, ಸ್ವಿಫ್ಟ್ ನಂತಹ ಮಾಡಲ್‌ಗಳಿಗೆ ವಿದೇಶಗಳಲ್ಲಿ ಬೇಡಿಕೆ ಹೆಚ್ಚಾಗಿದೆ. ಕಂಪನಿಯು ತನ್ನ ರಫ್ತು ವಿಭಾಗದಲ್ಲಿ ಸ್ಥಿರವಾದ ಬೆಳವಣಿಗೆಯ ಪಥವನ್ನು ಕಾಯ್ದುಕೊಂಡಿದ್ದು, ಏಷ್ಯಾದಾದ್ಯಂತ ಪ್ರಮುಖ ಮಾರುಕಟ್ಟೆಗಳಲ್ಲಿ ಕೈಗೆಟುಕುವ ಬೆಲೆ, ಆಕರ್ಷಕ ಫೀಚರ್ಸ್‌ನೊಂದಿಗೆ ತನ್ನ ವಾಹನಗಳಿಗೆ ಬೇಡಿಕೆ ಹೆಚ್ಚಿಸಿಕೊಂಡಿರುವುದು ನಿಜ.