MG Windsor: ಕಾರನ್ನು ಜನ ಮುಗಿಬಿದ್ದು ಖರೀದಿ: 1ರೂ. ಖರ್ಚಿಲ್ಲದೆ ಮೈಸೂರಿಗೆ ಹೋಗಿ ಬರಬಹುದು!

ಭಾರತದಲ್ಲಿ ಅತ್ಯುತ್ತಮವಾಗಿ ಮಾರಾಟ ಕಾಣುತ್ತಿರುವ ಎಂಜಿ ವಿಂಡ್ಸರ್ (MG Windsor) ಮತ್ತೊಂದು ಗಮನಾರ್ಹ ಮೈಲಿಗಲ್ಲು ಸಾಧಿಸಿದೆ ಎಂದು ಜೆಎಸ್‌ಡಬ್ಲ್ಯೂ ಎಂಜಿ ಮೋಟಾರ್ ಇಂಡಿಯಾ ಇಂದು ಘೋಷಿಸಿದೆ. ಜುಲೈನಲ್ಲಿ, ಕಂಪನಿಯು ವಿಂಡ್ಸರ್ ಮಾರಾಟದಲ್ಲಿ ಹೊಸ ದಾಖಲೆಯನ್ನು ಸೃಷ್ಟಿಸಿದೆ, ಒಂದೇ ತಿಂಗಳಲ್ಲಿ ಬರೋಬ್ಬರಿ 4,308 ಯುನಿಟ್‌ ಕಾರುಗಳನ್ನು ಮಾರಾಟ ಮಾಡಿದೆ. ಬಿಡುಗಡೆಯಾದಾಗಿನಿಂದ ಇಲ್ಲಿಯವರೆಗೆ ಸುಮಾರು 36,000 ಯುನಿಟ್‌ ಎಂಜಿ ವಿಂಡ್ಸರ್ ಕಾರುಗಳನ್ನು ಮಾರಾಟ ಮಾಡಿರುವುದಾಗಿ ಕಂಪನಿ ತಿಳಿಸಿದೆ. ಈ ಕಾರನ್ನು ಜನ ಮುಗಿಬಿದ್ದು ಖರೀದಿಸಲು ಕಾರಣವೇನು?

ಈ ಬಲವಾದ ಮಾರಾಟದಿಂದಾಗಿ ಕಂಪನಿಯು ಇವಿ ವಿಭಾಗದಲ್ಲಿ ತನ್ನ ಮಾರುಕಟ್ಟೆ ಪಾಲನ್ನು ವಿಸ್ತರಿಸಲು ಸಹಾಯ ಮಾಡಿದೆ. 2025 ರ ತ್ರೈಮಾಸಿಕದಲ್ಲಿ, ಕಂಪನಿಯು ಮಾರುಕಟ್ಟೆ ಪಾಲಿನಲ್ಲಿ ಶೇ 4 ರಷ್ಟು ಹೆಚ್ಚಳವನ್ನು ದಾಖಲಿಸಿದೆ, 2025 ರ ಮೊದಲ ತ್ರೈಮಾಸಿಕದಲ್ಲಿ ಶೇ 28 ರಿಂದ 32 ಕ್ಕೆ ಏರಿದೆ. ಅದೇ ಅವಧಿಯಲ್ಲಿ, ಎಂಜಿ ವಿಂಡ್ಸರ್‌ನ ಸರಾಸರಿ ಮಾರಾಟವು ಶೇ 17 ರಷ್ಟು ಹೆಚ್ಚಾಗಿದೆ.

ಇದಲ್ಲದೆ, ಕಂಪನಿಯ ಇವಿ ಸಗಟು ಮಾರಾಟವು 2025 ರ ಮೊದಲ ತ್ರೈಮಾಸಿಕದಿಂದ 2025 ರ ಎರಡನೇ ತ್ರೈಮಾಸಿಕಕ್ಕೆ ಶೇ 28 ರಷ್ಟು ಹೆಚ್ಚಾಗಿದೆ. ಎಂಜಿ ವಿಂಡ್ಸರ್ ಬಿಡುಗಡೆಯಾದಾಗಿನಿಂದ ಭಾರತೀಯ 4W-EV ವಿಭಾಗದಲ್ಲಿ ಮುಂಚೂಣಿಯಲ್ಲಿದೆ, ಉದ್ಯಮದಲ್ಲಿ ಒಂದು ಅದ್ಭುತ ಕೊಡುಗೆಯಾಗಿ ತನ್ನ ಸ್ಥಾನವನ್ನು ಗಟ್ಟಿಗೊಳಿಸಿದೆ.

MG ವಿಂಡ್ಸರ್ ಅನ್ನು iCOTY ನಿಂದ 2025 ರ ಅತ್ಯಂತ ಅಪೇಕ್ಷಿತ ಗ್ರೀನ್ ಕಾರ್ ಪ್ರಶಸ್ತಿ ಸೇರಿದಂತೆ 30 ಕ್ಕೂ ಹೆಚ್ಚು ಪ್ರಶಸ್ತಿಗಳೊಂದಿಗೆ ಗುರುತಿಸಲಾಗಿದೆ. ಇದು ಭಾರತದ ಮೊದಲ ಇಂಟಲಿಜೆಂಟ್ CUV (ಕ್ರಾಸ್‌ ಓವರ್ ಯುಟಿಲಿಟಿ ವೆಹಿಕಲ್) ಆಗಿದ್ದು, ಆಟೋಮೋಟಿವ್ ಉದ್ಯಮದಲ್ಲಿ ಆಧುನಿಕ ಅದ್ಭುತ ಕಾರಾಗಿ ಹೊರಹೊಮ್ಮಿದೆ. ಸೌಕರ್ಯ, ಶೈಲಿ ಮತ್ತು ತಂತ್ರಜ್ಞಾನದ ಸಂಯೋಜನೆ ನೀಡುತ್ತದೆ.

ಕಾರಿನ ವಿಶೇಷತೆಗಳು

ಎಂಜಿ ವಿಂಡ್ಸರ್ ಇವಿ ಎರಡು ಬ್ಯಾಟರಿ ಪ್ಯಾಕ್ ಆಯ್ಕೆಗಳು ಲಭ್ಯವಿದ್ದು, 37.9 ಕಿಲೋವ್ಯಾಟ್ ಬ್ಯಾಟರಿಯು ಒಂದು ಬಾರಿ ಚಾರ್ಜ್ ಮಾಡಿದರೆ 332 ಕಿ.ಮೀ ಮತ್ತು ದೊಡ್ಡ 52.9 ಕಿಲೋವ್ಯಾಟ್ ಬ್ಯಾಟರಿಯು 449 ಕಿ.ಮೀ ವರೆಗೆ ಚಲಿಸಬಲ್ಲದು. ಕಾರಿನ ಇಂಟೀರಿಯರ್‌ನಲ್ಲಿ 15.6-ಇಂಚಿನ ಇನ್ಫೋಟೈನ್‌ಮೆಂಟ್ ಡಿಸ್ಪ್ಲೇ, ವೆಂಟಿಲೇಟೆಡ್ ಮುಂಭಾಗದ ಸೀಟುಗಳು, ರಿಕ್ಲೈನಿಂಗ್ ಏರೋ-ಲೌಂಜ್ ಹಿಂಭಾಗದ ಸೀಟುಗಳನ್ನು ನೀಡಲಾಗಿದೆ.

ಒಟ್ಟಾರೆ 52.9 ಕಿಲೋವ್ಯಾಟ್ ಬ್ಯಾಟರಿ ಪ್ಯಾಕ್‌ ಕಾರನ್ನು ಒಮ್ಮೆ ಸಂಪೂರ್ಣವಾಗಿ ಚಾರ್ಜ್ ಮಾಡಿದರೆ ಕಂಪನಿಯ ಪ್ರಕಾರ 449 ಕಿ.ಮೀ ವರೆಗೆ ಚಲಿಸಬಹುದು. ಅಂದರೆ ಸಂಪೂರ್ಣ ಚಾರ್ಜ್‌ನಲ್ಲಿ ಬೆಂಗಳೂರಿನಿಂದ ಸುಮಾರು 147 ಕಿ.ಮೀ ದೂರದಲ್ಲಿರುವ ಮೈಸೂರಿಗೆ ಹೋಗಿ ಬರಬಹುದು. ಇನ್ನು ಹೊಸ ವಿಂಡ್ಸರ್ ಇವಿ ಆರಂಭಿಕ ಬೆಲೆ ರೂ.14 ಲಕ್ಷ (ಎಕ್ಸ್-ಶೋರೂಂ) ವಿದೆ.

ಮುಂಭಾಗದ ಆಕ್ಸಲ್ ನಲ್ಲಿ ಅಳವಡಿಸಲಾದ ಪರ್ಮನೆಂಟ್-ಮ್ಯಾಗ್ನೆಟ್ ಸಿಂಕ್ರೊನಸ್ ಮೋಟರ್ ಹೊಂದಿದೆ. ಇದು 136 ಪಿಎಸ್ ಪವರ್ ಮತ್ತು 200 ಎನ್ಎಂ ಟಾರ್ಕ್ ಉತ್ಪಾದಿಸುತ್ತದೆ. 60 ಕಿಲೋವ್ಯಾಟ್ ಸಾಮರ್ಥ್ಯದ ಡಿಸಿ ಫಾಸ್ಟ್ ಚಾರ್ಜರ್ ಬಳಸಿ, ವಾಹನವನ್ನು 50 ನಿಮಿಷಗಳಲ್ಲಿ 80% ವರೆಗೆ ಚಾರ್ಜ್ ಮಾಡಬಹುದು. 7.4 ಕಿಲೋವ್ಯಾಟ್ ಎಸಿ ಚಾರ್ಜರ್ 7 ರಿಂದ 9 ಗಂಟೆಗಳಲ್ಲಿ ಸಂಪೂರ್ಣವಾಗಿ ಚಾರ್ಜ್ ಮಾಡುತ್ತದೆ.

ಕಾರಿನಲ್ಲಿ ವೈರ್‌ಲೆಸ್ ಆಂಡ್ರಾಯ್ಡ್ ಆಟೋ ಮತ್ತು ಆಪಲ್ ಕಾರ್‌ಪ್ಲೇ, ವೈರ್‌ಲೆಸ್ ಫೋನ್ ಚಾರ್ಜಿಂಗ್, 256-ಬಣ್ಣದ ಆಂಬಿಯೆಂಟ್ ಲೈಟಿಂಗ್ ಮತ್ತು ಪನೋರಮಿಕ್ ಇನ್ಫಿನಿಟಿ ವ್ಯೂ ಗ್ಲಾಸ್ ರೂಫ್‌ನೊಂದಿಗೆ ಸಜ್ಜುಗೊಂಡಿದೆ. ಸುರಕ್ಷತಾ ವೈಶಿಷ್ಟ್ಯಗಳಲ್ಲಿ ಆರು ಏರ್‌ಬ್ಯಾಗ್‌ಗಳು, ಎಲ್ಲಾ ನಾಲ್ಕು ಚಕ್ರಗಳಲ್ಲಿ ಡಿಸ್ಕ್ ಬ್ರೇಕ್‌ಗಳು, ಎಲೆಕ್ಟ್ರಾನಿಕ್ ಸ್ಟೆಬಿಲಿಟಿ ಕಂಟ್ರೋಲ್ ಮತ್ತು 360-ಡಿಗ್ರಿ ಕ್ಯಾಮೆರಾ ಸೇರಿವೆ.

ಬೆಲೆ ಏರಿಕೆ: ಇಂತಹ ಬಹುಬೇಡಿಕೆಯ ಎಲೆಕ್ಟ್ರಿಕ್ ಕಾರು ಇತ್ತೀಚೆಗಷ್ಟೆ ಬೆಲೆ ಏರಿಕೆಯನ್ನು ಪಡೆದುಕೊಂಡಿದೆ. ಟಾಪ್-ಸ್ಪೆಕ್ ವಿಂಡ್ಸರ್ ಇವಿ ಎಸೆನ್ಸ್ ಪ್ರೊ ವೇರಿಯೆಂಟ್ ಬೆಲೆಯನ್ನು ರೂ.21,000 ರಷ್ಟು ಹೆಚ್ಚಿಸಿದ್ದು, ಅದರ ಹೊಸ ಎಕ್ಸ್-ಶೋರೂಂ ಬೆಲೆ ರೂ.18.31 ಲಕ್ಷಕ್ಕೆ ತಲುಪಿದೆ. ಈ ಬೆಲೆ ಏರಿಕೆ ಟಾಪ್ ವೇರಿಯೆಂಟ್ ಎಸೆನ್ಸ್ ಪ್ರೊ ವೇರಿಯೆಂಟ್‌ಗೆ ಮಾತ್ರ ಅನ್ವಯಿಸುತ್ತದೆ. ವಿಂಡ್ಸರ್ ಇವಿ ಶ್ರೇಣಿಯ ಆರಂಭಿಕ ಬೆಲೆ ಇನ್ನೂ ಅದೇ ರೂ.14 ಲಕ್ಷ (ಎಕ್ಸ್-ಶೋರೂಂ) ರಷ್ಟಿದೆ.