Tata: ಬಲಿಷ್ಟ ಬಂಡೆಯಂಥಹ ಟಾಟಾ ಕಾರಿಗೆ 5-ಸ್ಟಾರ್... ಬುಕಿಂಗ್ ಮುನ್ನವೇ ಫುಲ್ ಡಿಮ್ಯಾಂಡ್!

ಇತ್ತೀಚೆಗೆ ಬಿಡುಗಡೆಯಾದ ಟಾಟಾ ಹ್ಯಾರಿಯರ್ ಇವಿ, ಭಾರತ್ ಎನ್‌ಸಿಎಪಿ ಕ್ರ್ಯಾಶ್ ಪರೀಕ್ಷೆಗಳಲ್ಲಿ ಪೂರ್ಣ 5-ಸ್ಟಾರ್ ರೇಟಿಂಗ್‌ನೊಂದಿಗೆ ಹೊರಬಂದಿದೆ. ಇದು ವಯಸ್ಕ ಮತ್ತು ಮಕ್ಕಳ ಪ್ರಯಾಣಿಕರ ರಕ್ಷಣೆಯಲ್ಲಿ 5 ಸ್ಟಾರ್ ಸೇಫ್ಟಿ ರೇಟಿಂಗ್‌ ಗಳಿಸಿದೆ. ಭಾರತ್ ಎನ್‌ಸಿಎಪಿ ಹ್ಯಾರಿಯರ್ ಇವಿಯ ಟಾಪ್-ಸ್ಪೆಕ್ ಎಂಪವರ್ಡ್ 75 ಮತ್ತು ಎಂಪವರ್ಡ್ 75 AWD ವೇರಿಯೆಂಟ್‌ಗಳನ್ನು ಪರೀಕ್ಷಿಸಿದೆ. ಆದರೆ ಎಲ್ಲಾ ವೇರಿಯೆಂಟ್‌ಗಳ ನಿರ್ಮಾಣ ಗುಣಮಟ್ಟ ಒಂದೇ ಆಗಿರುವುದರಿಂದ ಈ ಕ್ರ್ಯಾಶ್ ಟೆಸ್ಟ್ ಸೇಫ್ಟಿ ರೇಟಿಂಗ್ ಹ್ಯಾರಿಯರ್ ಇವಿಯ ಎಲ್ಲಾ ವೇರಿಯೆಂಟ್‌ಗಳಿಗೆ ಅನ್ವಯಿಸುತ್ತದೆ ಎಂದು ವರದಿಯಾಗಿದೆ.

ಹೊಸ ಎಲೆಕ್ಟ್ರಿಕ್ ಎಸ್‌ಯುವಿ ವಯಸ್ಕ ಪ್ರಯಾಣಿಕರ ರಕ್ಷಣೆಯಲ್ಲಿ 32 ಅಂಕಗಳಿಗೆ ಪೂರ್ಣ 32 ಅಂಕಗಳನ್ನು ಗಳಿಸಿದೆ. ಆದರೆ ಮಕ್ಕಳ ಪ್ರಯಾಣಿಕರ ರಕ್ಷಣೆಯಲ್ಲಿ, ಇದು ಒಟ್ಟು 49 ಅಂಕಗಳಲ್ಲಿ 45 ಅಂಕಗಳನ್ನು ಗಳಿಸಿದೆ. ಹ್ಯಾರಿಯರ್ ಇವಿ ಸ್ಟ್ಯಾಂಡರ್ಡ್ ಆಗಿ ಆರು ಏರ್ ಬ್ಯಾಗ್‌ಗಳು, ಎಲ್ಲಾ ಪ್ರಯಾಣಿಕರಿಗೆ 3-ಪಾಯಿಂಟ್ ಸೀಟ್ ಬೆಲ್ಟ್, ಐಎಸ್‌ಒ ಫಿಕ್ಸ್ ಆಂಕರ್, ಪ್ಯಾಸೆಂಜರ್ ಸೈಡ್ ಏರ್‌ಬ್ಯಾಗ್ ಕಟ್-ಆಫ್ ಸ್ವಿಚ್ ಹೊಂದಿದೆ.

ಟಾಪ್ ವೇರಿಯೆಂಟ್‌ಗಳಲ್ಲಿ 7 ಏರ್‌ಬ್ಯಾಗ್‌ಗಳು, ಲೆವೆಲ್ 2 ADAS (ಅಡ್ವಾನ್ಸ್ಡ್ ಡ್ರೈವರ್ ಅಸಿಸ್ಟೆನ್ಸ್ ಸಿಸ್ಟಮ್ಸ್), ಟಿಪಿಎಂಎಸ್ (ಟೈರ್ ಪ್ರೆಶರ್ ಮಾನಿಟರಿಂಗ್ ಸಿಸ್ಟಮ್), ಹಿಲ್ - ಹೋಲ್ಡ್ ಅಸಿಸ್ಟ್, ಹಿಲ್ ಡಿಸೆಂಟ್ ಕಂಟ್ರೋಲ್, ಎಲೆಕ್ಟ್ರಾನಿಕ್ ಪಾರ್ಕಿಂಗ್ ಬ್ರೇಕ್, ಆಲ್ ವೀಲ್ ಡಿಸ್ಕ್ ಬ್ರೇಕ್ ಹಾಗೂ 360 - ಡಿಗ್ರಿ ಕ್ಯಾಮೆರಾವನ್ನು ಒದಗಿಸಲಾಗಿದೆ.

ಹೊಸ ಟಾಟಾ ಹ್ಯಾರಿಯರ್ ಇವಿಯನ್ನು ಅಧಿಕೃತವಾಗಿ ಜೂನ್ 3 ರಂದು ಬಿಡುಗಡೆಗೊಳಿಸಲಾಯಿತು. ವಾಹನದ ಬುಕಿಂಗ್ ಜುಲೈ 2 ರಿಂದು ಪ್ರಾರಂಭವಾಗಲಿದೆ. ಟಾಟಾ ಹ್ಯಾರಿಯರ್ ಎಲೆಕ್ಟ್ರಿಕ್ ಎಸ್‌ಯುವಿ ಬೆಲೆಗಳು 21.49 ಲಕ್ಷ ರೂ.ಗಳಿಂದ ಪ್ರಾರಂಭವಾಗುತ್ತವೆ, RWD ವೇರಿಯೆಂಟ್‌ಗಳ ಬೆಲೆಯು (ಟಾಪ್ ವೇರಿಯೆಂಟ್) 27.49 ಲಕ್ಷ ರೂ.ಗಳನ್ನು (ಎರಡು ಎಕ್ಸ್‌ ಶೊರೂಂ ಬೆಲೆಗಳು) ತಲುಪುತ್ತದೆ.

ಟಾಟಾ ಹ್ಯಾರಿಯರ್ ಇವಿ ಎರಡು ಬ್ಯಾಟರಿ ಪ್ಯಾಕ್ ಆಯ್ಕೆಗಳು ಮತ್ತು ಎರಡು ಮೋಟಾರು ಕಾನ್ಫಿಗರೇಶನ್ ಆಯ್ಕೆಗಳೊಂದಿಗೆ ಲಭ್ಯವಿದೆ. ಹ್ಯಾರಿಯರ್ ಇವಿಯ ಬೇಸ್‌ ವೇರಿಯೆಂಟ್‌ಗಳು 65 ಕಿಲೋವ್ಯಾಟ್ ಬ್ಯಾಟರಿ ಪ್ಯಾಕ್ ಹೊಂದಿದ್ದರೇ, ಟಾಪ್ ವೇರಿಯೆಂಟ್‌ಗಳು 75 ಕಿಲೋವ್ಯಾಟ್ ಬ್ಯಾಟರಿ ಪ್ಯಾಕ್ ಹೊಂದಿವೆ. ಸಂಪೂರ್ಣ ಚಾರ್ಜ್‌ನಲ್ಲಿ 627 ಕಿಲೋಮೀಟರ್‌ ರೇಂಜ್ ನೀಡುತ್ತದೆ. 6.3 ಸೆಕೆಂಡುಗಳಲ್ಲಿ 100 ಕಿ.ಮೀ ವೇಗವನ್ನು ತಲುಪುತ್ತದೆ.

ಹ್ಯಾರಿಯರ್ ಇವಿ ನವೀಕರಿಸಿದ 14.5-ಇಂಚಿನ ಸ್ಯಾಮ್ಸಂಗ್ ನಿಯೋ ಕ್ಯೂಎಲ್ಇಡಿ ಟಚ್ಸ್ಕ್ರೀನ್ ಇನ್ಫೋಟೈನ್ಮೆಂಟ್ ಸಿಸ್ಟಮ್ ಅನ್ನು ಹೊಂದಿದೆ. ಜೊತೆಗೆ 10.25-ಇಂಚಿನ ಡಿಜಿಟಲ್ ಇನ್ಸ್ಟ್ರುಮೆಂಟ್ ಕ್ಲಸ್ಟರ್ ಅನ್ನು ಹೊಂದಿದೆ. ಈ ಇನ್ಫೋಟೈನ್ಮೆಂಟ್ ಸಿಸ್ಟಂ ವೈರ್ ಲೆಸ್ ಆಂಡ್ರಾಯ್ಡ್ ಆಟೋ ಮತ್ತು ಆಪಲ್ ಕಾರ್ ಪ್ಲೇ ಅನ್ನು ಸಪೋರ್ಟ್ ಮಾಡುತ್ತದೆ.

ಇನ್ಸ್ ಟ್ರೂಮೆಂಟ್ ಕ್ಲಸ್ಟರ್ ವರ್ಧಿತ ಅನುಕೂಲಕ್ಕಾಗಿ ಮ್ಯಾಪ್ಸ್ ಪ್ರದರ್ಶಿಸುವ ಸಾಮರ್ಥ್ಯವನ್ನು ಹೊಂದಿದೆ. ಕ್ಯಾಬಿನ್ ಒಳಗಿನ ಹೆಚ್ಚುವರಿ ಗಮನಾರ್ಹ ನವೀಕರಣವೆಂದರೆ ಹೊಸ ರೋಟರಿ ಡಯಲ್ ಅನ್ನು ಒಳಗೊಂಡಿರುವುದು. ಇದು ನಾರ್ಮಲ್, ಸ್ಯಾಂಡ್, ಸ್ಯಾಂಡ್ ರಟ್ಸ್, ಐಸ್ / ಗ್ರಾಸ್, ರಾಕ್ ಕ್ರಾಲ್ ಮತ್ತು ಕಸ್ಟಮ್ ಆರು ವಿಭಿನ್ನ ಡ್ರೈವ್ ಮೋಡ್‌ಗಳನ್ನು ಆಯ್ಕೆ ಮಾಡಲು ಅನುವು ಮಾಡಿಕೊಡುತ್ತದೆ.

ಇಂಧನ ಚಾಲಿತ ಟಾಟಾ ಹ್ಯಾರಿಯರ್ ಈ ಹಿಂದೆ BNCAP ನಿಂದ 5-ಸ್ಟಾರ್ ಸುರಕ್ಷತಾ ರೇಟಿಂಗ್ ಅನ್ನು ಹೊಂದಿದೆ. ಆದರೆ ಇದು ಸ್ವಲ್ಪ ಕಡಿಮೆ ವಯಸ್ಕರ ರಕ್ಷಣೆಯಲ್ಲಿ 32 ಅಂಕಗಳಿಗೆ 30.08 ಮತ್ತು ಮಕ್ಕಳ ರಕ್ಷಣೆಯಲ್ಲಿ 49 ಅಂಕಗಳಿಗೆ 44.54 ಅಂಕಗಳನ್ನು ಪಡೆದುಕೊಂಡಿದೆ. ಒಟ್ಟಾರೆ ಹ್ಯಾರಿಯರ್ EV 5-ಸ್ಟಾರ್ ಸುರಕ್ಷತಾ ರೇಟಿಂಗ್ ಪಡೆದ ಟಾಟಾದ ಎಂಟನೇ ವಾಹನವಾಗಿದೆ.