ಟೊಯೋಟಾದ ಪ್ರಮುಖ ಎಸ್‌ಯುವಿ ಹಿಂಪಡೆಯುವಿಕೆ ಘೋಷಣೆ: 11,529 ಕಾರುಗಳಲ್ಲಿ ದೋಷ?

ಟೊಯೋಟಾ ಭಾರತದಲ್ಲಿ ಡಿಸೆಂಬರ್ 9, 2024 ರಿಂದ ಏಪ್ರಿಲ್ 29, 2025 ರ ನಡುವೆ ತಯಾರಿಸಲಾದ 11,529 ಅರ್ಬನ್ ಕ್ರೂಸರ್ ಹೈರೈಡರ್ ಕಾರುಗಳನ್ನು ಗ್ರಾಹಕರಿಂದ ಹಿಂಪಡೆಯುವುದಾಗಿ ಘೋಷಿಸಿದೆ. ಕಂಪನಿ ನಿರ್ಮಿಸಿದ ಈ ಕಾರುಗಳಲ್ಲಿನ ಇಂಧನ ಮಟ್ಟದ ಸೂಚಕದಲ್ಲಿನ (ಅನಲಾಗ್ ಟೈಪ್) ದೋಷದಿಂದಾಗಿ ತನ್ನ ಅರ್ಬನ್ ಕ್ರೂಸರ್ ಹೈರೈಡರ್ ಕಾರುಗಳನ್ನು ಸ್ವಯಂಪ್ರೇರಿತವಾಗಿ ಹಿಂಪಡೆಯುತ್ತಿರುವುದಾಗಿ ಘೋಷಿಸಿದೆ. ವಾಹನಗಳಿಗೆ ಉಚಿತವಾಗಿ ದುರಸ್ತಿ ಮಾಡಲಾಗುವುದು, ಇದಕ್ಕಾಗಿ ಅರ್ಬನ್ ಕ್ರೂಸರ್ ಹೈರೈಡರ್ ಮಾಲೀಕರನ್ನು ಕಂಪನಿ ಸಂಪರ್ಕಿಸಲಿದೆ, ಅಧಿಕೃತ ಡೀಲರ್‌ಶಿಪ್‌ಗಳಲ್ಲಿ ಅಗತ್ಯ ಬದಲಿಗಳನ್ನು ಒದಗಿಸಲಾಗುವುದು ಎಂದು ವರದಿಯಾಗಿದೆ.

"ದೋಷವೆಂದು ಕಂಡುಬಂದರೆ ಸಂಯೋಜಿತ ಮೀಟರ್ ಅನ್ನು ಪರಿಶೀಲಿಸುವುದು ಮತ್ತು ಬದಲಾಯಿಸುವುದು ಅಭಿಯಾನದ ಭಾಗವಾಗಿದೆ" ಎಂದು ಟೊಯೊಟಾ ಹೇಳಿದೆ. ಕಾರಿನಲ್ಲಿ ಕೆಲವು ಪರಿಸ್ಥಿತಿಗಳಲ್ಲಿ ಫ್ಯೂಯಲ್ ಗೇಜ್ ಟ್ಯಾಂಕ್ ನಲ್ಲಿನ ಸರಿಯಾದ ಇಂಧನ ಮಟ್ಟವನ್ನು ಸೂಚಿಸದಿರಬಹುದು. ಇದರ ಪರಿಣಾಮವಾಗಿ ಟ್ಯಾಂಕ್‌ನಲ್ಲಿನ ಇಂಧನ ಮಟ್ಟವು ವಿನ್ಯಾಸಗೊಳಿಸಿದ ಮಿತಿಗಿಂತ ಕೆಳಗಿಳಿದಿದ್ದರೂ ಸಹ ಕಡಿಮೆ ಇಂಧನ ಮಟ್ಟದ ವಾರ್ನಿಂಗ್ ಲೈಟ್ ಬೆಳಗದಿರಬಹುದು.

ಈ ಪರಿಸ್ಥಿತಿಯಲ್ಲಿ ಇಂಧನ ಮಟ್ಟದ ಸೂಚಕವು ಕಡಿಮೆ ಇಂಧನ ಮಟ್ಟದ ಬಗ್ಗೆ ಚಾಲಕನಿಗೆ ಎಚ್ಚರಿಕೆ ನೀಡುವುದಿಲ್ಲ, ಆದ್ದರಿಂದ ಇಂಧನವಿಲ್ಲದ ಸ್ಥಿತಿಯ ಬಗ್ಗೆ ಚಾಲಕರಿಗೆ ಅರಿವಿಲ್ಲದಿದ್ದಾಗಿ ಎಂಜಿನ್ ನಿಲ್ಲಬಹುದು / ಸ್ಥಗಿತಗೊಳ್ಳಬಹುದು" ಎಂದು ಸೊಸೈಟಿ ಆಫ್ ಇಂಡಿಯನ್ ಆಟೋಮೊಬೈಲ್ ಮ್ಯಾನುಫ್ಯಾಕ್ಚರರ್ಸ್ (ಸಿಯಾಮ್) ವೆಬ್‌ಸೈಟ್‌ನಲ್ಲಿ ಸ್ವಯಂಪ್ರೇರಿತ ರೀ-ಕಾಲ್ ಮಾಹಿತಿ ವಿಭಾಗದಲ್ಲಿ ತಿಳಿಸಲಾಗಿದೆ.

ಟೊಯೊಟಾ ಡೀಲರ್‌ಶಿಪ್‌ಗಳು ವಾಹನಗಳ ಮೇಲೆ ಪರಿಣಾಮ ಬೀರುವ ಮಾಲೀಕರನ್ನು ಸಂಪರ್ಕಿಸಲಿವೆ. ದೋಷಯುಕ್ತವೆಂದು ಕಂಡುಬಂದರೆ ಆ ಭಾಗವನ್ನು ಯಾವುದೇ ವೆಚ್ಚವಿಲ್ಲದೆ ಬದಲಾಯಿಸುತ್ತವೆ. ಮಾಲೀಕರು toyotabharat.com/q-service/safety-recall/ ಗೆ ಲಾಗ್ ಇನ್ ಆಗಬಹುದು. ವಾಹನಕ್ಕೆ ಪರಿಣಾಮ ಬೀರಿದೆಯೇ ಎಂದು ಪರಿಶೀಲಿಸಲು ತಮ್ಮ ವಾಹನದ ವಿಐಎನ್ ಅನ್ನು ನಮೂದಿಸಿ ಪರಿಶೀಲಿಸಬಹುದು.

ಅರ್ಬನ್ ಕ್ರೂಸರ್ ಹೈರೈಡರ್‌ಗೆ ಈ ಇತ್ತೀಚಿನ ರೀ-ಕಾಲ್ ಮೊದಲನೆಯದಲ್ಲ, ಟೊಯೊಟಾ ಹೈರೈಡರ್ ಕಾರು ಮಾರುತಿ ಗ್ರ್ಯಾಂಡ್ ವಿಟಾರಾದ ರೀ-ಬ್ಯಾಡ್ಜ್ ಎಂಜಿನಿಯರಿಂಗ್ ಮಾಡಲ್ ಆಗಿದ್ದು, 39,506 ಯುನಿಟ್ ಕಾರುಗಳನ್ನು ಇತ್ತೀಚೆಗೆ ಬೇರೊಂದು ಸಮಸ್ಯೆಯಿಂದಾಗಿ ಹಿಂಪಡೆಯಲಾಗಿತ್ತು. ದೋಷಯುಕ್ತ ಮುಂಭಾಗದ ಸೀಟ್ ಬೆಲ್ಟ್ ಭುಜದ ಎತ್ತರ ಹೊಂದಾಣಿಕೆ ಮತ್ತು ಹಿಂಭಾಗದ ಸೀಟ್ ಬೆಲ್ಟ್ ಜೋಡಣೆಯಂತಹ ಸಮಸ್ಯೆಗಳಿಂದಾಗಿ ಹಿಂಪಡೆದು ಮರುಸ್ಥಾಪನೆಗಳನ್ನು ಉಚಿತವಾಗಿ ಮಾಡಿಕೊಟ್ಟಿದೆ.

ಅರ್ಬನ್ ಕ್ರೂಸರ್ ಹೈರೈಡರ್ ಹಾಗೂ ಮಾರುತಿ ಸುಜುಕಿ ಗ್ರ್ಯಾಂಡ್ ವಿಟಾರಾ ಬಹುತೇಕ ಒಂದೇ ಆಗಿವೆ. ಮಾಲೀಕರು ತಮ್ಮ ನೋಂದಣಿ ಪ್ರಮಾಣಪತ್ರವನ್ನು ಪರಿಶೀಲಿಸುವ ಮೂಲಕ ಅಥವಾ ಟೊಯೋಟಾದ ಗ್ರಾಹಕ ಸೇವೆಯನ್ನು ಸಂಪರ್ಕಿಸುವ ಮೂಲಕ ತಮ್ಮ ವಾಹನದಲ್ಲಿ ಸಮಸ್ಯೆ ಇದೆಯೇ ಎಂದು ಪರಿಶೀಲಿಸಬಹುದು. ಕಂಪನಿಯ ಈ ಕ್ರಮವು ಭಾರತೀಯ ಮಾರುಕಟ್ಟೆಯಲ್ಲಿ ಸುರಕ್ಷತೆ ಮತ್ತು ಗುಣಮಟ್ಟದ ಭರವಸೆಯ ಕಡೆಗೆ ಟೊಯೋಟಾದ ಗ್ರಾಹಕ - ಮೊದಲ ವಿಧಾನವನ್ನು ಪ್ರತಿಬಿಂಬಿಸುತ್ತದೆ.

ಅರ್ಬನ್ ಕ್ರೂಸರ್ ಹೈರೈಡರ್ ವಿಶೇಷತೆ: ಟೊಯೋಟಾ ಅರ್ಬನ್ ಕ್ರೂಸರ್ ಹೈರೈಡರ್ ಮೂರು ಎಂಜಿನ್ ಆಯ್ಕೆಗಳೊಂದಿಗೆ ಲಭ್ಯವಿದೆ. ಅವುಗಳೆಂದರೆ, 1.5-ಲೀಟರ್ ಮೈಲ್ಡ್-ಹೈಬ್ರಿಡ್ ಪೆಟ್ರೋಲ್, 1.5-ಲೀಟರ್ CNG ಮತ್ತು ಪೆಟ್ರೋಲ್ ಎಂಜಿನ್ ಅನ್ನು ಎಲೆಕ್ಟ್ರಿಕ್ ಮೋಟಾರ್ ಮತ್ತು ಆನ್-ಬೋರ್ಡ್ ಬ್ಯಾಟರಿಯೊಂದಿಗೆ ಜೋಡಿಸುವ ಸ್ಟ್ರಾಂಗ್-ಹೈಬ್ರಿಡ್ ಸಿಸ್ಟಮ್ ಆಗಿದೆ. ಮೈಲ್ಡ್-ಹೈಬ್ರಿಡ್ 101 bhp ಪವರ್ ಮತ್ತು 136.8 Nm ಟಾರ್ಕ್ ಉತ್ಪಾದಿಸುತ್ತದೆ.

ವೇರಿಯೆಂಟ್ ಅವಲಂಬಿಸಿ ಮ್ಯಾನುವಲ್, ಆಟೋಮ್ಯಾಟಿಕ್ ಮತ್ತು ಆಲ್-ವೀಲ್-ಡ್ರೈವ್ ಆಯ್ಕೆಗಳೊಂದಿಗೆ ಬರುತ್ತದೆ. CNG ರೂಪಾಂತರಗಳು ಮ್ಯಾನುವಲ್‌ನಲ್ಲಿ ಮಾತ್ರ ಬರುತ್ತವೆ, ಆದರೆ ಸ್ಟ್ರಾಂಗ್-ಹೈಬ್ರಿಡ್ ಲೈನ್-ಅಪ್ ಪ್ರತ್ಯೇಕವಾಗಿ e-CVT ಯೊಂದಿಗೆ ಬರುತ್ತದೆ. ಇದು 27.97 ಕಿಮೀ/ಲೀ ವರೆಗೆ ARAI- ರೇಟೆಡ್ ಮೈಲೇಜ್ ನೀಡುತ್ತದೆ, ಇದು ವಿಭಾಗದಲ್ಲಿಯೇ ಅತ್ಯಧಿಕ ಮೈಲೇಜ್ ಆಗಿದೆ.