ಭಾರತದಲ್ಲಿ ಹೊಸ ಬ್ರ್ಯಾಂಡ್‌ಗಳದ್ದೇ ಹವಾ: ಇಷ್ಟಪಟ್ಟು ಖರೀದಿಸುತ್ತಿದ್ದಾರೆ ಜನ, ಫುಲ್ ಡಿಮ್ಯಾಂಡ್!

ಭಾರತದಲ್ಲಿ ಎಲೆಕ್ಟ್ರಿಕ್ ಕಾರುಗಳಿಗೆ ಬೇಡಿಕೆ ಹೆಚ್ಚುತ್ತಲೇ ಇದೆ, ಹೊಸ ಹೊಸ ಬ್ರ್ಯಾಂಡ್‌ಗಳು ದೇಶದಲ್ಲಿ ತಮ್ಮ ಇವಿಗಳನ್ನು ಪರಿಚಯಿಸಿ ಲಾಭ ಮಾಡಿಕೊಳ್ಳುತ್ತಿವೆ. ಜಾಗತಿಕವಾಗಿ ಗುರ್ತಿಸಿಕೊಂಡಿರುವ ಎಂಜಿ ಮೋಟಾರ್ ಕೂಡ ತನ್ನ ಜನಪ್ರಿಯ ಮಾಡಲ್‌ಗಳೊಂದಿಗೆ ಭಾರತದಲ್ಲಿ ಮುನ್ನುಗ್ಗುತ್ತಿದೆ, ಈ ಬ್ರ್ಯಾಂಡ್ ಇಂಧನ ಚಾಲಿತ ಕಾರುಗಳನ್ನು ಮಾರಾಟ ಮಾಡುತ್ತದೆಯಾದರೂ, ಇವಿಗಳಿಗೆ ತುಂಬಾ ಬೇಡಿಕೆ ಹೊಂದಿದೆ. ಅದರಲ್ಲೂ 'ಎಂಜಿ ವಿಂಡ್ಸರ್' ಕಾರು, ಕಂಪನಿಗೆ ಚಿನ್ನದ ಮೊಟ್ಟೆಯಾಗಿದೆ. ನಿಧಾನವಾಗಿ ಭಾರತದಲ್ಲಿ ತನ್ನ ಅಸ್ತಿತ್ವನ್ನು ಭದ್ರಪಡಿಸಿಕೊಳ್ಳುತ್ತಿರುವ ಎಂಜಿ ಮೋಟಾರ್, ಫೆಬ್ರವರಿ ತಿಂಗಳಲ್ಲಿ ಬರೋಬ್ಬರಿ 4,957 ಕಾರುಗಳನ್ನು ಮಾರಾಟ ಮಾಡಿದೆ.

ಕಳೆದ ವರ್ಷ ಫೆಬ್ರವರಿ ತಿಂಗಳಲ್ಲಿ ಮಾರಾಟವಾದ ಕಾರುಗಳಿಗೆ ಹೋಲಿಸಿದರೆ, ಫೆಬ್ರವರಿ 2026 ರಲ್ಲಿ JSW MG ಮೋಟಾರ್ ಇಂಡಿಯಾ 24% ರಷ್ಟು ವಾರ್ಷಿಕ (Y-o-Y) ಬೆಳವಣಿಗೆಯನ್ನು ದಾಖಲಿಸಿದೆ. ಫೆಬ್ರವರಿ ತಿಂಗಳಲ್ಲಿ ಕಂಪನಿಯು 4,957 ಯೂನಿಟ್‌ ಕಾರುಗಳ ಮಾರಾಟವನ್ನು ಸಾಧಿಸಿದೆ, ಈ ಮಾರಾಟದಲ್ಲಿ ಕಂಪನಿಯ ಇಂಧನ ಚಾಲಿತ ವಾಹನಗಳು ಮತ್ತು ಎಲೆಕ್ಟ್ರಿಕ್ ವಾಹನಗಳು (EV) ಸೇರಿವೆ.

ಎಂಜಿ ಮೆಜೆಸ್ಟರ್ ವಿಶೇಷತೆಗಳು

JSW MG ಮೋಟಾರ್ ಇಂಡಿಯಾ ಕಂಪನಿಯು ಭಾರತದ ಮೊದಲ D+ SUV - MG MAJESTOR ಅನ್ನು ಫೆಬ್ರವರಿಯಲ್ಲಿ ಪರಿಚಯಿಸಿತು. ಈ ದೈತ್ಯ ಕಾರಿನ ಉದ್ದ, ಅಗಲ ಮತ್ತು ಎತ್ತರದ ಆಯಾಮಗಳೊಂದಿಗೆ, MG MAJESTOR ವಿಭಾಗದಲ್ಲೇ ಮೊದಲ- ಟ್ರಿಪಲ್ ಡಿಫರೆನ್ಷಿಯಲ್ ಲಾಕ್‌ಗಳು (ಮುಂಭಾಗ, ಹಿಂಭಾಗ ಮತ್ತು ಮಧ್ಯ) ಮತ್ತು 10 ಆಫ್-ರೋಡ್ ಮೋಡ್‌ಗಳೊಂದಿಗೆ ಸುಧಾರಿತ 4WD ಸಿಸ್ಟಮ್ ಮತ್ತು ಕ್ರಾಲ್ ಕಂಟ್ರೋಲ್ ಮೋಡ್‌ನೊಂದಿಗೆ ಬರುತ್ತದೆ.

MG ಯ ಕಂಪ್ಲೀಟ್ ಪೀಸ್ ಆಫ್ ಮೈಂಡ್ ಪ್ರೋಗ್ರಾಂನ ಭಾಗವಾಗಿ, MAJESTOR 5 ವರ್ಷಗಳ ಅನಿಯಮಿತ KM ವಾರಂಟಿ, 5 ವರ್ಷಗಳ ರಸ್ತೆ-ಬದಿಯ ಸಹಾಯ ಮತ್ತು 5 ಕಾರ್ಮಿಕ-ಮುಕ್ತ ಸೇವೆಗಳನ್ನು ಒಳಗೊಂಡಿರುವ ಉದ್ಯಮ-ಪ್ರಮುಖ 5-5-5 ಆಫರ್‌ನೊಂದಿಗೆ ಬರುತ್ತದೆ. ಗ್ರಾಹಕರು ಈಗ ಈ ಅತ್ಯಂತ ಸಮರ್ಥ ಮತ್ತು ಪ್ರೀಮಿಯಂ SUV ಯನ್ನು ರೂ. 41,000 ಪಾವತಿಸಿ ಬುಕ್ ಮಾಡಬಹುದು.

ಕಂಪನಿಯ ಪ್ರಕಾರ ಇದು ಭಾರತದ ಮೊದಲ ಡಿ+ ಎಸ್‌ಯುವಿ ಆಗಿದ್ದು, ಏಪ್ರಿಲ್‌ನಲ್ಲಿ ಬಿಡುಗಡೆ ಮಾಡಲು ನಿರ್ಧರಿಸಲಾಗಿದೆ. ಹಾಗೆಯೇ ಮೇ 2026 ರಲ್ಲಿ ಡೆಲಿವರಿಗಳು ಪ್ರಾರಂಭವಾಗಲಿವೆ. ಅನಾವರಣಗೊಂಡಾಗಿನಿಂದ ಈ ಎಸ್‌ಯುವಿಯ ಬಗ್ಗೆ ತಿಳಿದುಕೊಳ್ಳಲು ಜನರಿಗೆ ಸಾಕಷ್ಟು ಕುತೂಹಲವಿದೆ, ಬನ್ನಿ ಹಾಗಾದ್ರೆ ಎಂಜಿ ಮೆಜೆಸ್ಟರ್ ಎಸ್‌ಯುವಿಯ ಪ್ರಮುಖ ಫೀಚರ್‌ಗಳನ್ನು ನೋಡೋಣ.

ಕಾರಿನ ಕ್ಯಾಬಿನ್ ಒಳಗೆ ಮುಂಭಾಗದಲ್ಲಿ ಟ್ವಿನ್ ವೈರ್‌ಲೆಸ್ ಚಾರ್ಜರ್‌ಗಳನ್ನು ನೀಡಲಾಗಿದ್ದು, ಎಂಜಿ ಮೆಜೆಸ್ಟರ್ ಇಂಟೀರಿಯರ್‌ನ್ನು ಎದ್ದು ಕಾಣುವುಂತೆ ಮಾಡುತ್ತದೆ. ಇದು ಸಾಮಾನ್ಯ ವೈರ್ಡ್ ಚಾರ್ಜಿಂಗ್ ಆಯ್ಕೆಗಳಿಗಿಂತ ಹೆಚ್ಚುವರಿ ಅನುಕೂಲವನ್ನು ನೀಡುತ್ತದೆ. ಒಟ್ಟಾರೆ ಸಂಪೂರ್ಣವಾಗಿ ಹೊಸ ಪ್ರೀಮಿಯಂ ಕ್ಯಾಬಿನ್ ಪಡೆದಿದ್ದು, ಅಪ್‌ಡೇಟೆಡ್ ಡ್ಯಾಶ್‌ಬೋರ್ಡ್ ಮತ್ತು ಆಧುನಿಕ ಸೆಂಟರ್ ಕನ್ಸೋಲ್ ವಿನ್ಯಾಸವನ್ನು ಹೊಂದಿದೆ.

ಪ್ಲಶ್ ಲೆದರ್ ಮತ್ತು ನಯವಾದ ಸೆಂಟರ್ ಕನ್ಸೋಲ್‌ನೊಂದಿಗೆ ಬ್ಲಾಕ್ ಥೀಮ್‌ನಲ್ಲಿ ಡಿಸೈನ್ ಮಾಡಲಾದ ಇಂಟೀರಿಯರ್, ಡ್ರೈವರ್ ಮತ್ತು ಕೋ-ಡ್ರೈವರ್‌ಗೆ ವೆಂಟಿಲೇಟೆಡ್ ಹಾಗೂ ಮಸಾಜ್ ಸೀಟ್‌ಗಳನ್ನು ನೀಡುತ್ತದೆ. ಇವುಗಳನ್ನು ಬಹು ರೀತಿಯಲ್ಲಿ ಹೊಂದಿಸಬಹುದಾಗಿದೆ (12-ವೇ ಡ್ರೈವರ್, 8-ವೇ ಪ್ಯಾಸೆಂಜರ್). ಪನೋರಮಿಕ್ ಸನ್‌ರೂಫ್, 64-ಕಲರ್ ಆಂಬಿಯೆಂಟ್ ಲೈಟಿಂಗ್, 3-ಝೋನ್ ಎಸಿ ಒದಗಿಸಲಾಗಿದೆ.

6- ಅಥವಾ 7-ಸೀಟರ್ ಸಂರಚನೆಗಳಲ್ಲಿ ಹೊಂದಿಕೊಳ್ಳುವ ಈ ಕಾರು, ಕುಟುಂಬಗಳು ಅಥವಾ ಅಡ್ವೆಂಚರ್ ಬಯಸುವವರಿಗೂ ಸರಿಹೊಂದುತ್ತದೆ. ಡ್ಯುಯಲ್ 12.3-ಇಂಚಿನ ಡಿಸ್ಪ್ಲೇಗಳು (ಇನ್ಸ್ಟ್ರುಮೆಂಟ್ ಕ್ಲಸ್ಟರ್ ಮತ್ತು ಇನ್ಫೋಟೈನ್‌ಮೆಂಟ್), ವೈರ್‌ಲೆಸ್ ಆಂಡ್ರಾಯ್ಡ್ ಆಟೋ/ಆಪಲ್ ಕಾರ್‌ಪ್ಲೇ, 12-ಸ್ಪೀಕರ್ JBL, ಡ್ಯುಯಲ್ ವೈರ್‌ಲೆಸ್ ಚಾರ್ಜರ್‌ಗಳು, 220V ಔಟ್‌ಲೆಟ್ ಮತ್ತು 75+ iSMART ಕನೆಕ್ಟೆಡ್ ಫೀಚರ್ಸ್ ಒಳಗೊಂಡಿದೆ.