Tesla: ಅಮೆರಿಕಾ ಬ್ರಾಂಡ್‌ಗೆ ಮನೆ ದಾರಿ ತೋರಿಸಿದ ಭಾರತ: ನಂ.1 ಕಾರನ್ನು ಯಾರೂ ಖರೀದಿಸುತ್ತಿಲ್ಲ!

ಭಾರತದಲ್ಲಿ ತನ್ನ ಕಾರುಗಳನ್ನು ಪರಿಚಯಿಸಲು ತುಂಬಾ ಸಾಹಸ ಮಾಡಿದ್ದ ಅಮೆರಿಕ ಮೂಲದ ಎಲೆಕ್ಟ್ರಿಕ್ ವಾಹನ (ಇವಿ) ತಯಾರಕ ಟೆಸ್ಲಾ (Tesla), ಕೊನೆಗೂ ಭಾರತದಲ್ಲಿ ಯಶಸ್ವಿಯಾಗಿ ತನ್ನ ಕಾರನ್ನು ಬಿಡುಗಡೆ ಮಾಡಿದೆ. ಆದರೆ ಯಾರೂ ಖರೀದಿಸಲು ಆಸಕ್ತಿ ತೋರಿಸುತ್ತಿಲ್ಲ. ಆಟೋ ಉದ್ಯಮದ ದತ್ತಾಂಶಗಳ ಪ್ರಕಾರ, 2025 ರಲ್ಲಿ ಭಾರತದಲ್ಲಿ ತನ್ನ ಏಕೈಕ ಎಲೆಕ್ಟ್ರಿಕ್ ವಾಹನವಾದ 'ಮಾಡೆಲ್ ವೈ' (Model Y) ಎಸ್‌ಯುವಿಯ ಕೇವಲ 225 ಯುನಿಟ್‌ ಕಾರುಗಳನ್ನು ಮಾತ್ರ ಮಾರಾಟ ಮಾಡಲಾಗಿದೆ.

ಆಟೋಮೊಬೈಲ್ ಡೀಲರ್ಸ್ ಅಸೋಸಿಯೇಷನ್‌ಗಳ ಒಕ್ಕೂಟದ (ಎಫ್‌ಎಡಿಎ) ದತ್ತಾಂಶವು ಟೆಸ್ಲಾ ಸೆಪ್ಟೆಂಬರ್‌ನಲ್ಲಿ 64, ಅಕ್ಟೋಬರ್‌ನಲ್ಲಿ 40, ನವೆಂಬರ್‌ನಲ್ಲಿ 48 ಮತ್ತು ಡಿಸೆಂಬರ್‌ನಲ್ಲಿ 73 ಯುನಿಟ್‌ ಕಾರುಗಳನ್ನು ಮಾರಾಟ ಮಾಡಿರುವುದಾಗಿ ತೋರಿಸಿದೆ. ಒಟ್ಟಾರೆ ನಾಲ್ಕು ತಿಂಗಳಲ್ಲಿ ಕೇವಲ 225 ಕಾರುಗಳನ್ನು ಮಾರಾಟ ಮಾಡಿದ್ದು, ಕಂಪನಿಗೆ ಭಾರತದಲ್ಲಿ ತೀವ್ರ ಹಿನ್ನಡೆಯಾಗಿದೆ.

ಕಂಪನಿಯು ಜುಲೈನಲ್ಲಿ ದೇಶದಲ್ಲಿ ತನ್ನ ಮೊದಲ ಶೋರೂಮ್ ಅನ್ನು ತೆರೆದಿತ್ತು, ಇನ್ನೂ ಒಂದು ವರ್ಷವನ್ನು ಪೂರ್ಣಗೊಳಿಸಿಲ್ಲ. ಬ್ಲೂಮ್‌ಬರ್ಗ್ ವರದಿಯ ಪ್ರಕಾರ, ಟೆಸ್ಲಾ ಕಳೆದ ವರ್ಷ ಭಾರತೀಯ ಮಾರುಕಟ್ಟೆಗೆ ಪ್ರವೇಶಿಸಿದ ನಂತರ ಮಾರಾಟವು ನಿರೀಕ್ಷೆಗಿಂತ ನಿಧಾನವಾಗಿತ್ತು, ನಂತರ ಟೆಸ್ಲಾ ಭಾರತದಲ್ಲಿ ತನ್ನ ಕಾರುಗಳ ಮೇಲೆ ರಿಯಾಯಿತಿಗಳನ್ನು ಕೂಡ ನೀಡಿದೆ. ಆದರೂ ಆರಂಭದಲ್ಲಿ ದೇಶಕ್ಕೆ ತಂದ ಕಾರುಗಳಲ್ಲಿ ಮೂರನೇ ಒಂದು ಭಾಗದಷ್ಟು ಮಾರಾಟ ಮಾಡಲು ಹೆಣಗಾಡುತ್ತಿದೆ.

ಟೆಸ್ಲಾ ಜುಲೈನಲ್ಲಿ ಭಾರತದಲ್ಲಿ ಅಧಿಕೃತವಾಗಿ ಪಾದಾರ್ಪಣೆ ಮಾಡಿತು, ಮಾಡೆಲ್ ವೈ ಅನ್ನು ದೇಶದಲ್ಲಿ ತನ್ನ ಆರಂಭಿಕ ಮಟ್ಟದ ಮಾಡಲ್ ಆಗಿ ಇರಿಸಿತು. ಜಾಗತಿಕವಾಗಿ ಬಲವಾದ ಬ್ರ್ಯಾಂಡ್ ಮನ್ನಣೆಯ ಹೊರತಾಗಿಯೂ, ಭಾರತದಲ್ಲಿ ಮಾರಾಟವು ಸೀಮಿತವಾಗಿದೆ. ಟೆಸ್ಲಾ ಕಳೆದ ವರ್ಷ ಸುಮಾರು 300 ಮಾಡೆಲ್ ವೈ ಎಸ್‌ಯುವಿಗಳನ್ನು ಭಾರತಕ್ಕೆ ರವಾನಿಸಿದ್ದು, ಇದರಲ್ಲಿ ನಾಲ್ಕು ತಿಂಗಳ ನಂತರವೂ ಸುಮಾರು 100 ವಾಹನಗಳು ಮಾರಾಟವಾಗದೆ ಉಳಿದಿವೆ.

ಪ್ರಸ್ತುತ ಭಾರತದಲ್ಲಿ ಮಾಡೆಲ್ ವೈ ಅನ್ನು ರಿಯರ್ ವೀಲ್ - ಡ್ರೈವ್ (RWD) ಪವರ್‌ಟ್ರೇನ್‌ನೊಂದಿಗೆ ಸಂಪೂರ್ಣವಾಗಿ ನಿರ್ಮಿಸಲಾದ ಯೂನಿಟ್ ಆಗಿ ಮಾರಾಟ ಮಾಡುತ್ತಿದೆ. ಭಾರತದಲ್ಲಿ, ಟೆಸ್ಲಾ ಪ್ರಸ್ತುತ ಗುರುಗ್ರಾಮ್, ಮುಂಬೈ ಮತ್ತು ದೆಹಲಿಯಲ್ಲಿ ಎಕ್ಸ್‌ಪೀರಿಯನ್ಸ್ ಸೆಂಟರ್‌ಗಳನ್ನು ನಿರ್ವಹಿಸುತ್ತಿದೆ. ಕಂಪನಿಯು ಈ ನಗರಗಳಲ್ಲಿ ಕನಿಷ್ಠ 12 ಸೂಪರ್‌ಚಾರ್ಜರ್‌ಗಳು ಮತ್ತು 10 ಸಾಮಾನ್ಯ ಚಾರ್ಜರ್‌ಗಳನ್ನು ಸ್ಥಾಪಿಸಿದೆ.

ಟೆಸ್ಲಾ ಮಾಡಲ್ ವೈ ವಿಶೇಷತೆಗಳು:

ಮಾಡೆಲ್ ವೈನ ಸ್ಟ್ಯಾಂಡರ್ಡ್ RWD ವೇರಿಯೆಂಟ್ ಬೆಲೆಯು ರೂ. 59.89 ಲಕ್ಷ (ಎಕ್ಸ್-ಶೋರೂಂ) ವಿದ್ದರೆ, ಲಾಂಗ್ ರೇಂಜ್ RWD ವೇರಿಯೆಂಟ್ ಬೆಲೆ ರೂ. 67.89 ಲಕ್ಷ (ಎಕ್ಸ್-ಶೋರೂಂ) ಇದೆ. ಇವು ಭಾರತಕ್ಕೆ ಸಂಪೂರ್ಣ ನಿರ್ಮಿತ ವಾಹನಗಳಾಗಿ ಬರುವುದರಿಂದ ಹೆಚ್ಚಿನ ಆಮದು ಸುಂಕದಿಂದಾಗಿ ಬೆಲೆಗಳು ವಿದೇಶಿ ಮಾರುಕಟ್ಟೆಗಳಿಗಿಂತ ಗಮನಾರ್ಹವಾಗಿ ಹೆಚ್ಚಾಗಿದೆ ಎಂಬುದನ್ನು ಗಮನಿಸಬೇಕು.

ಕಾರ್ಯಕ್ಷಮತೆಯ ವಿಷಯದಲ್ಲಿ, ಸ್ಟ್ಯಾಂಡರ್ಡ್ RWD ಮಾಡೆಲ್ ವೈ ಪೂರ್ಣ ಚಾರ್ಜ್‌ನಲ್ಲಿ 500 ಕಿ.ಮೀ ವರೆಗೆ ರೇಂಜ್ ನೀಡಿದರೆ, ಲಾಂಗ್ ರೇಂಜ್ ಆವೃತ್ತಿಯು ಸಿಂಗಲ್ ಚಾರ್ಜ್‌ನಲ್ಲಿ 622 ಕಿ.ಮೀ ವರೆಗೆ ನೀಡುತ್ತದೆ. ಸ್ಟ್ಯಾಂಡರ್ಡ್ ವೇರಿಯೆಂಟ್ 5.9 ಸೆಕೆಂಡುಗಳಲ್ಲಿ 100 ಕಿ.ಮೀ ವೇಗವನ್ನು ತಲುಪಬಲ್ಲದು, ಲಾಂಗ್ ರೇಂಜ್ ವೇರಿಯೆಂಟ್ 5.6 ಸೆಕೆಂಡುಗಳಲ್ಲಿ ತಲುಪುವ ಸಾಮರ್ಥ್ಯವನ್ನು ಹೊಂದಿದೆ. ಎರಡೂ ಮಾಡಲ್‌ಗಳು 201 ಕಿ.ಮೀ ಟಾಪ್ ಸ್ಪೀಡ್ ಹೊಂದಿವೆ.

ಸ್ಟ್ಯಾಂಡರ್ಡ್ ಮಾಡೆಲ್ ವೈ ಕೇವಲ 15 ನಿಮಿಷ ಚಾರ್ಜ್ ಮಾಡಿದರೆ ಸುಮಾರು 238 ಕಿ.ಮೀ ರೇಂಜ್ ಮರಳಿ ಪಡೆಯಬಹುದು, ಲಾಂಗ್ ರೇಂಜ್ ವೇರಿಯೆಂಟ್ ಬರೋಬ್ಬರಿ 267 ಕಿ.ಮೀ ಹಿಂದಿರುಗಿಸುತ್ತದೆ. ವಿನ್ಯಾಸದ ವಿಷಯದಲ್ಲಿ ಮುಂಭಾಗ ಮತ್ತು ಹಿಂಭಾಗದ ಲೈಟ್‌ಬಾರ್‌ಗಳೊಂದಿಗೆ ಪೂರ್ಣ LED ಒಳಗೊಂಡಿದೆ. SUV ತನ್ನ ಡ್ರೈವರ್-ಅಸಿಸ್ಟ್ ಸಿಸ್ಟಮ್‌ ಭಾಗವಾಗಿ ಎಂಟು ಕ್ಯಾಮೆರಾಗಳನ್ನು ಹೊಂದಿದೆ.