ಹೋಂಡಾ ಅಮೇಜ್ ಆಕರ್ಷಕ ಆಕ್ಸೆಸರಿ ಪ್ಯಾಕೇಜ್ ಜತೆ ಲಭ್ಯ

ನೂತನ ಆಕ್ಸೆಸರಿ ಪ್ಯಾಕೇಜ್ ಆಳವಡಿಕೆಯೊಂದಿಗೆ ಕಾರಿನ ಮುಂಭಾಗದ ಛಾಯೆ ಸುಧಾರಣೆಯಾಗಲಿದೆ. ನೂತನ ಕಾರು ಕಪ್ಪು ವರ್ಣದ ಗ್ರಿಲ್ ಜತೆಗೆ ಕ್ರೋಮ್ ಸುತ್ತುವರಿದುಕೊಳ್ಳಲಿದೆ. ಇದು ಟ್ವಿನ್ ಸ್ಲಾಟ್ ಕ್ರೋಮ್ ಗ್ರಿಲನ್ನು ಬದಲಾಯಿಸಲಿದೆ.

ಇದರ ಜತೆಗೆ ಲಿಪ್ ಸ್ಪಾಯ್ಲರ್, ಸೈಡ್ ಸ್ಕರ್ಟ್, ರಿಯರ್ ಸ್ಕರ್ಟ್, ಬೂಟ್ ಲಿಡ್ ಸ್ಪಾಯ್ಲರ್, ಪರಿಷ್ಕೃತ ಅಲಾಯ್ ವೀಲ್, ಅಲ್ಯೂಮಿನಿಯಂ ಪೆಡಲ್ ಮತ್ತು ಸುವರ್ಣಾಲಂಕೃತ ಫೂಟ್ ವೀಲ್ಸ್ ಪಡೆದುಕೊಳ್ಳಲಿದೆ.

ಈ ಎಲ್ಲ ಆಕ್ಸೆಸರಿ ಕಿಟ್‌ಗಳು ಹೋಂಡಾ ಅಮೇಜ್‌ಗೆ ಕ್ರೀಡಾತ್ಮಕ ಲುಕ್ ನೀಡುವಲ್ಲಿ ಯಶಸ್ವಿಯಾಗಲಿದೆ. ಇದು ಗ್ರಾಹಕರಲ್ಲಿ ಹೆಚ್ಚು ಕುತೂಹಲಕಾರಿ ಎನಿಸಿಕೊಳ್ಳಲಿದೆ.

ಹಾಗಿದ್ದರೂ ಇವೆಲ್ಲವೂ ಹೆಚ್ಚುವರಿ ಆಕ್ಸೆಸರಿ ಪ್ಯಾಕೇಜ್ ಆಗಿದ್ದರೂ ಕಾರಿನ ತಾಂತ್ರಿಕತೆಯಲ್ಲಿ ಯಾವುದೇ ಬದಲಾವಣೆ ತರಲಾಗಿಲ್ಲ. ಹೋಂಡಾ ಅಮೇಜ್ ಪೆಟ್ರೋಲ್ ಹಾಗೂ ಡೀಸೆಲ್ ಎಂಜಿನ್ ಆಯ್ಕೆಗಳಲ್ಲಿ ಲಭ್ಯವಾಗಲಿದೆ.

ಅಂದ ಹಾಗೆ ಹೋಂಡಾ ಅಮೇಜ್ 1.2 ಲೀಟರ್ ಐ-ವಿಟೆಕ್ (i-VTEC) ಪೆಟ್ರೋಲ್ ಮಿಲ್ ಮತ್ತು 1.5 ಲೀಟರ್ ಐ-ಡಿಟೆಕ್ (i-DTEC) ಡೀಸೆಲ್ ಎಂಜಿನ್‌ನಿಂದ ನಿಯಂತ್ರಿಸಲ್ಪಡಲಿದೆ.

ಈ ವಿಶೇಷ ಆಕ್ಸೆಸರಿ ಪ್ಯಾಕೇಜ್‌ ಎಷ್ಟು ದುಬಾರಿಯಾಗಲಿದೆ ಎಂಬುದಕ್ಕೆ ನಿಖರ ಮಾಹಿತಿಗಳು ಬಂದಿಲ್ಲ. ಆದರೆ ಬಲ್ಲ ಮೂಲಗಳ ಪ್ರಕಾರ 50ರಿಂದ 60,000 ರು.ಗಳಷ್ಟು ದುಬಾರಿಯಾಗಲಿದೆ.

ಏತನ್ಮಧ್ಯೆ 2013 ಅಕ್ಟೋಬರ್ ತಿಂಗಳ ಮಾರಾಟದಲ್ಲಿ 11,214 ಯುನಿಟ್ ಮಾರಾಟ ದಾಖಲಿಸಿರುವ ಹೋಂಡಾ ಶೇಕಡಾ 39ರಷ್ಟು ವೃದ್ಧಿ ದರ ಕಾಪಾಡುವಲ್ಲಿ ಯಶಸ್ವಿಯಾಗಿದೆ. ಕಳೆದ ಬಾರಿ 8,085 ಯುನಿಟ್ ಮಾತ್ರ ಮಾರಾಟವಾಗಿತ್ತು.

ಇನ್ನು 2013 ಎಪ್ರಿಲ್‌ನಿಂದ ಅಕ್ಟೋಬರ್ ಅವಧಿ ಪರಿಗಣಿಸಿದಾಗ 70,381 ಯುನಿಟ್ ಮಾರಾಟ ಕಂಡಿರುವ ಹೋಂಡಾ, ಶೇಕಡಾ 63ರಷ್ಟು ಏರಿಕೆ ಕಂಡಿದೆ. ಕಳೆದ ಬಾರಿ 43,525 ಯುನಿಟ್ ಮಾತ್ರ ಮಾರಾಟವಾಗಿತ್ತು.

ಈ ಪೈಕಿ ಕಳೆದ ಐದು ವರೆ ತಿಂಗಳಲ್ಲೇ 37,841ಕ್ಕೂ ಹೆಚ್ಚು ಯಶಸ್ವಿ ಗ್ರಾಹಕರನ್ನು ಗಿಟ್ಟಿಸಿಕೊಳ್ಳುವಲ್ಲಿ ಅಮೇಜ್ ಯಶಸ್ವಿಯಾಗಿದೆ. ಅಲ್ಲದೆ ಅಕ್ಟೋಬರ್ ತಿಂಗಳಲ್ಲಿ ಮಾತ್ರವಾಗಿ 9564 ಯುನಿಟ್ ಮಾರಾಟ ದಾಖಲಿಸಿಕೊಂಡಿದೆ.