ಮೋದಿ ತವರೂರಲ್ಲಿ ದೇಶದ ಚೊಚ್ಚಲ ಎಲೆಕ್ಟ್ರಿಕ್ ಸ್ಪೋರ್ಟ್ಸ್ ಕಾರು

ಹೆಸರೇನು?

ದೇಶದ ಚೊಚ್ಚಲ ಎಲೆಕ್ಟ್ರಿಕ್ ಸ್ಪೋರ್ಟ್ಸ್ ಕಾರು 'ಸೂಪರ್ ನೋವಾ ಎಲೆಕ್ಟ್ರಿಕ್ ವೆಹಿಕಲ್' (ಎಸ್‌ಎನ್‌ಇವಿ) ಎಂದು ಹೆಸರಿಸಿಕೊಳ್ಳಲಿದೆ. 2014 ನವೆಂಬರ್ ತಿಂಗಳಾಂತ್ಯದಲ್ಲಿ ಸಾಗಿದ ಗುಜರಾತ್ ಆಟೋ ಶೋದಲ್ಲಿ ಈಗಾಗಲೇ ಮೊದಲ ಮಾದರಿ ಪ್ರದರ್ಶನ ಕಂಡಿರುವ ಎಲೆಕ್ಟ್ರಿಕ್ ಕ್ರೀಡಾ ಕಾರು ನಿಕಟ ಭವಿಷ್ಯದಲ್ಲೇ ನಿರ್ಮಾಣ ಹಂತವನ್ನು ತಲುಪುವ ತವಕದಲ್ಲಿದೆ.

ಮೂರು ಬ್ಯಾಟರಿಗಳು

ಭಾರತದಲ್ಲೇ ನಿರ್ಮಾಣಗೊಳ್ಳಲಿರುವ ಮೊದಲ ಎಲೆಕ್ಟ್ರಿಕ್ ಸ್ಪೋರ್ಟ್ಸ್ ಕಾರು ಮೂರು ಬ್ಯಾಟರಿ ಆಯ್ಕೆಗಳನ್ನು ಪಡೆಯಲಿದೆ. ಇದು ಲೀಡ್ ಆಸಿಡ್, ಲಿಥಿಯಂ ಇಯಾನ್ ಹಾಗೂ ಸೂಪರ್‌ಕ್ಯಾಪಿಸಿಟರ್ ಎಂದೆನಿಸಿಕೊಳ್ಳಲಿದೆ.

ವ್ಯಾಪ್ತಿ

ಅಷ್ಟೇ ಅಲ್ಲದೆ ಕೇವಲ ಒಂದೇ ಚಾರ್ಜ್‌ನಲ್ಲಿ 1000 ಕೀ.ಮೀ. ದೂರದ ವರೆಗೆ ಸಾಗುವ ಸಾಮರ್ಥ್ಯವನ್ನು ಈ ಎಲೆಕ್ಟ್ರಿಕ್ ಸ್ಪೋರ್ಟ್ಸ್ ಕಾರು ಹೊಂದಿರಲಿದೆ ಎಂದು ಗೋಲ್ಡನ್ ಏರ್ ವೈರ್ ಲೆಸ್ ಸಂಸ್ಥೆಯ ಸ್ಥಾಪಕರಾಗಿರುವ ಶಶಿ ವೈಸ್ ತಿಳಿಸಿದ್ದಾರೆ.

ಐದು ನಿಮಿಷದಲ್ಲೇ ಚಾರ್ಜಿಂಗ್

ಅದೇ ರೀತಿ ಇದರ ಲೀಡ್ ಆಸಿಡ್ ಬ್ಯಾಟರಿ ಜಾರ್ಜ್ ಮಾಡಿಸಲು ಎಂಟು ತಾಸು, ಅಂತೆಯೇ ಲಿಥಿಯಂ ಇಯಾನ್ ಬ್ಯಾಟರಿ ಮಾಡಿಸಲು ಎರಡು ತಾಸು ಹಾಗೂ ಸೂಪರ್ ಕ್ಯಾಪಿಸಿಟರ್ ಚಾರ್ಜ್ ಮಾಡಿಸಲು ಕೇವಲ ಐದು ನಿಮಿಷಗಳೇ ಸಾಕಾಗುವುದು. ಇನ್ನು ಈ ಎಲೆಕ್ಟ್ರಿಕ್ ಸೂಪರ್ ಕಾರು ಪ್ರತಿ ಗಂಟೆಗೆ ಗರಿಷ್ಠ 150 ಕೀ.ಮೀ. ವೇಗವನ್ನು ಪಡೆದುಕೊಳ್ಳುವ ಸಾಮರ್ಥ್ಯ ಹೊಂದಿರಲಿದೆ.

500 ಕೋಟಿ ರು. ಹೂಡಿಕೆ

ಸದ್ಯ ಹೂಡಿಕೆದಾರರಲ್ಲಿ 500 ಕೋಟಿ ರು. ಬೃಹತ್ ಹೂಡಿಕೆಗೆ ವಿನಂತಿಸಿಕೊಂಡಿರುವ ಸಂಸ್ಥೆಯು ಸದ್ಯದಲ್ಲೇ ನಿರ್ಮಾಣ ಪ್ರಕ್ರಿಯೆ ಆರಂಭಿಸುವ ಯೋಜನೆ ಹೊಂದಿದೆ. ಗುಜರಾತ್ ಮಾತ್ರವಲ್ಲದೆ, ದೆಹಲಿ, ಮುಂಬೈ, ಬೆಂಗಳೂರು ಹಾಗೂ ರಾಯ್‌ಪುರದಲ್ಲೂ ನಿರ್ಮಾಣ ಘಟಕ ತೆರೆಯುವ ಯೋಜನೆ ಹೊಂದಿದೆ.

ಇನ್ನು ವಿಶೇಷವಾದ ಸಂಗತಿಯೆಂದರೆ ಸಂಸ್ಥೆಯು ಈಗಾಗಲೇ 250ರಷ್ಟು ಬುಕ್ಕಿಂಗ್ ಗಿಟ್ಟಿಸಿಕೊಂಡಿದೆ. ಆದರೆ ಭಾರತ ವಾಹನ ಅಧ್ಯಯನ ಸಂಸ್ಥೆಯ ಪ್ರಕಾರ ದೇಶದಲ್ಲಿ ಎಲೆಕ್ಟ್ರಿಕ್ ಸ್ಪೋರ್ಟ್ಸ್ ಕಾರುಗಳಿಗೆ ಅನುಮೋದನೆ ನೀಡಲು ಯಾವುದೇ ಮಾರ್ಗಸೂಚಿಗಳಿಲ್ಲ. ಈ ಬಗ್ಗೆ ಸರಕಾರವು ಇನ್ನಷ್ಟೇ ರೂಪುರೇಷೆ ಮಾಡಬೇಕಾಗಿದೆ.