ಹೊಸ ತಲೆಮಾರಿನ ಮಹೀಂದ್ರ ಸ್ಕಾರ್ಪಿಯೊ ಭರ್ಜರಿ ಬಿಡುಗಡೆ

By Nagaraja

Updated: Thursday, September 25, 2014, 15:09 [IST]

ವಾಹನ ಪ್ರೇಮಿಗಳು ಕಾತರದಿಂದ ಕಾದು ಕುಳಿತಿರುವ ಹೊಸ ತಲೆಮಾರಿನ ಮಹೀಂದ್ರ ಸ್ಕಾರ್ಪಿಯೊ ಎಸ್‌ಯುವಿ ಭಾರತ ಮಾರುಕಟ್ಟೆಗೆ ಭರ್ಜರಿ ಎಂಟ್ರಿ ಕೊಟ್ಟಿದೆ. ಒಂದು ಕಾಲದಲ್ಲಿ ದೇಶದ ರಸ್ತೆಯಲ್ಲಿ ಅತಿ ಹೆಚ್ಚು ಸದ್ದು ಮಾಡಿರುವ ಸ್ಕಾರ್ಪಿಯೊ ಹಲವಾರು ವೈಶಿಷ್ಟ್ಯಗಳನ್ನು ಪಡೆದುಕೊಂಡಿದ್ದು, ಮಗದೊಮ್ಮೆ ವಾಹನ ಪ್ರೇಮಿಗಳಲ್ಲಿ ಸಂಚಲನ ಮೂಡಿಸುವ ನಿರೀಕ್ಷೆ ಹೊಂದಿದೆ.

ಇದಕ್ಕೂ ಮೊದಲು ಸ್ನಾಪ್‌ಡೀಲ್‌ನಲ್ಲಿ ಸ್ಕಾರ್ಪಿಯೊ ಬುಕ್ಕಿಂಗ್ ಪ್ರಕ್ರಿಯೆ ಆರಂಭಿಸಿದ್ದ ಮಹೀಂದ್ರ, ದೇಶದ ವಾಹನ ಇತಿಹಾಸದಲ್ಲಿ ಹೊಸ ಕ್ರಾಂತಿಯೆಬ್ಬಿಸಿತ್ತು. ಅಂದ ಹಾಗೆ ಹೊಸ ತಲೆಮಾರಿನ ಸ್ಕಾರ್ಪಿಯೊ ಪ್ರಾರಂಭಿಕ ದರ 7.98 ರು.ಗಳಾಗಿರಲಿದೆ (ಮುಂಬೈ ಎಕ್ಸ್ ಶೋ ರೂಂ).

ದರ ಮಾಹಿತಿ (ಎಕ್ಸ್ ಶೋ ರೂಂ ಮುಂಬೈ)

s2 - 7.98 ಲಕ್ಷ ರು.

s4 - 8.6 ಲಕ್ಷ ರು.

s6 - 9.7 ಲಕ್ಷ ರು.

s8 - 10.84 ಲಕ್ಷ ರು.

s10 - 11.46 ಲಕ್ಷ ರು.

ಹೊಸ ತಲೆಮಾರಿನ ಮಹೀಂದ್ರ ಸ್ಕಾರ್ಪಿಯೊ ಭರ್ಜರಿ ಬಿಡುಗಡೆ

ಹಿಂದಿನ ಮಾದರಿಗೆ ಹೋಲಿಸಿದಾಗ ಸಂಪೂರ್ಣವಾಗಿಯೂ ವಿಭಿನ್ನ ನೋಟ ಗಿಟ್ಟಿಸಿಕೊಂಡಿರುವ ಸ್ಕಾರ್ಪಿಯೊ ವಾಹನ ಪ್ರೇಮಿಗಳಲ್ಲಿ ಕುತೂಹಲ ಕೆರಳಿಸುವಲ್ಲಿ ಯಶ ಕಂಡಿದೆ. ಇದು ಕೇವಲ ವಿನ್ಯಾಸದ ವಿಚಾರದಲ್ಲಿ ಮಾತ್ರವಲ್ಲದೆ ಕಾರಿನ ಒಳಗೂ ಹಾಗೂ ತಾಂತ್ರಿಕ ಮಾನದಂಡಗಳಲ್ಲಿ ಮಹತ್ವದ ಬದಲಾವಣೆ ಪಡೆದುಕೊಂಡಿದೆ.

ಎಲ್ಲ ಹೊಸತನದಿಂದ ಕೂಡಿರುವ ಚಾಸೀ ಮತ್ತು ಐದು ಸ್ಪೀಡ್ ಮ್ಯಾನುವಲ್ ಶಿಫ್ಟ್ ಗೇರ್ ಅತ್ಯುತ್ತಮ ಚಾಲನಾ ಅನುಭವ ಪ್ರದಾನ ಮಾಡಲಿದೆ. ಹಾಗೆಯೇ ಉತ್ತಮ ಹ್ಯಾಡ್ಲಿಂಗ್‌ಗಾಗಿ ಸಸ್ಪೆಷನ್‌ನಲ್ಲೂ ಬದಲಾವಣೆ ತರಲಾಗಿದೆ.

ಹೊಸ ಸ್ಕಾರ್ಪಿಯೊದಲ್ಲಿ ಪರಿಷ್ಕೃತ ಬಂಪರ್, ಹೊಸತಾದ ಗ್ರಿಲ್, ನೂತನ ಪ್ರೊಜೆಕ್ಟರ್ ಹೆಡ್‌ಲ್ಯಾಂಪ್ ಜೊತೆ ಎಲ್‌ಇಡಿ ಡೇಟೈಮ್ ರನ್ನಿಂಗ್ ಲೈಟ್ಸ್ ಸೌಲಭ್ಯವಿರಲಿದೆ.

ಹಿಂದುಗಡೆ ಬಂಪರ್‌ನಲ್ಲೂ ಬದಲಾವಣೆ ಕಂಡುಬಂದಿದ್ದು, ಎಲ್‌ಇಡಿ ಟೈಲ್ ಲೈಟ್, ರೂಫ್ ಮೌಂಟೆಡ್ ಸ್ಪಾಯ್ಲರ್, ಫಾಗ್ ಲ್ಯಾಂಪ್ ಮತ್ತು 17 ಇಂಚಿನ ಅಲಾಯ್ ವೀಲ್ ಪಡೆದುಕೊಂಡಿದೆ.

ಇನ್ನು ಕಾರಿನೊಳಗಿನ ಬಗ್ಗೆ ಮಾತನಾಡುವುದಾದ್ದಲ್ಲಿ ಎಲ್ಲ ಬಾಗಿಲುಗಳಿಗೂ ಪವರ್ ವಿಂಡೋ ಬಟನ್, ಸಮತಲ ಎಸಿ ವೆಂಟ್ಸ್, ಹೊಸ ಇನ್ಸ್ಟ್ರುಮೆಂಟ್ ಕ್ಲಸ್ಟರ್, ಕ್ಲೈಮೇಟ್ ಕಂಟ್ರೋಲ್ ಮತ್ತು ಹೊಸತ ಟಚ್ ಸ್ಕ್ರೀನ್ ಮಾಹಿತಿ ಮನರಂಜನಾ ವ್ಯವಸ್ಥೆಯಿರಲಿದೆ.

ಅದೇ ರೀತಿ ಹೊಸ ಸ್ಟೀರಿಂಗ್ ವೀಲ್ ಅನ್ನು ಜನಪ್ರಿಯ ಎಕ್ಸ್‌ಯುವಿ500 ಮಾದರಿಯಿಂದ ಆಮದು ಮಾಡಲಾಗಿದೆ. ಇದರಲ್ಲೇ ನಿಯಂತ್ರಣ ಸೌಲಭ್ಯವಿರಲಿದೆ.

2014 ಸ್ಕಾರ್ಪಿಯೊ ಫೇಸ್‌ಲಿಫ್ಟ್ ಏರ್ ಬ್ಯಾಗ್ ಮತ್ತು ಎಬಿಎಸ್ ಸಹ ಪಡೆದುಕೊಳ್ಳಲಿದೆ.

ಇನ್ನು ಆಸನ ವ್ಯವಸ್ಥೆಯ ಬಗ್ಗೆ ತಿಳಿಸುವುದಾದ್ದಲ್ಲಿ ವೆರಿಯಂಟ್‌ಗೆ ಅನುಗುಣವಾಗಿ ಏಳರಿಂದ ಒಂಬತ್ತು ಪ್ರಯಾಣಿಕರಿಗೆ ಆರಾಮದಾಯಕವಾಗಿ ಕುಳಿತುಕೊಳ್ಳಬಹುದಾದ ಸೌಲಭ್ಯವಿದೆ.

ಹೊಸ ಸ್ಕಾರ್ಪಿಯೊ ಹಿಂದಿನ ಮಾದರಿಗೆ ಸಮಾನವಾದ 2.2 ಲೀಟರ್ ಎಂಹಾಕ್ (mHAWK) ಮತ್ತು 2.5 ಲೀಟರ್ ಎಂ2ಡಿಐಸಿಆರ್ (m2DiCr) ಡೀಸೆಲ್ ಎಂಜಿನ್‌ನಿಂದ ನಿಯಂತ್ರಿಸಲ್ಪಡಲಿದೆ. ಇದು ಅನುಕ್ರಮವಾಗಿ 75 (200 ಎನ್‌ಎಂ ಟಾರ್ಕ್) ಹಾಗೂ 120 ಅಶ್ವಶಕ್ತಿ (280 ಎನ್‌ಎಂ ಟಾರ್ಕ್) ಉತ್ಪಾದಿಸಲಿದೆ.

ಹೊಸ ಸ್ಕಾರ್ಪಿಯೊ 5.4 ಟರ್ನಿಂಗ್ ರೇಡಿಯಸ್ ಪಡೆದುಕೊಳ್ಳಲಿದ್ದು, ಪ್ರತಿ ಲೀಟರ್‌ಗೆ 15 ಕೀ.ಮೀ. ಮೈಲೇಜ್ ನೀಡುವ ಸಾಮರ್ಥ್ಯ ಹೊಂದಿರಲಿದೆ.

ಒಟ್ಟಿನಲ್ಲಿ ದೀಪಾವಲಿ ಹಬ್ಬದ ಸಂಭ್ರಮವನ್ನು ಎದುರು ನೋಡುತ್ತಿರುವ ಗ್ರಾಹಕರಿಗೆ ದೊಡ್ಡ ಕೊಡುಗೆಯನ್ನೇ ನೀಡಿದೆ. ಅಲ್ಲದೆ ಸ್ಥಳೀಯ ಲಾಂಚ್ ಅಂಗವಾಗಿ ನಾಳೆ ನಡೆಯುವ ಕಾರ್ಯಕ್ರಮದಲ್ಲಿ ಬೆಂಗಳೂರಿನಲ್ಲಿ ಅಧಿಕೃತ ಬಿಡುಗಡೆ ನಡೆಯಲಿದೆ.