ಸುಜುಕಿ ಮಿನಿ ಎಸ್‌ಯುವಿ ಐಎಂ-4 ಭಾರತಕ್ಕೆ ಬರುತ್ತಾ?

85ನೇ ಆವೃತ್ತಿಯ ಜಿನೆವಾ ಮೋಟಾರು ಶೋದಲ್ಲಿ ಸುಜುಕಿ ಸಂಸ್ಥೆಯು ನೂತನ ಐಎಂ-4 ಫೋರ್ ವೀಲ್ ಡ್ರೈವ್ ಮಾದರಿಯನ್ನು ಅನಾವರಣಗೊಳಿಸಿದೆ. ಇದು ಕಾಂಪಾಕ್ಟ್ ಎಸ್‌ಯುವಿ ವಿಭಾಗಕ್ಕೆ ಹೊಸ ಸೇರ್ಪಡೆಯಾಗಿರಲಿದೆ.

ಸುಜುಕಿ ನ್ಯೂ ಜನರೇಷನ್ ಫ್ಲ್ಯಾಟ್‌ಫಾರ್ಮ್‌ನಲ್ಲಿ ಹೊಸ ಸುಜುಕಿ ಕಾರು ನಿರ್ಮಾಣವಾಗಲಿದೆ. ಇದು ಇಂಧನ ಕ್ಷಮತೆ, ಸುರಕ್ಷತೆ, ಹ್ಯಾಂಡ್ಲಿಂಗ್, ಸ್ಥಿರತೆ ಹಾಗೂ ನಿರ್ವಹಣೆಯಲ್ಲಿ ಅತ್ಯುತ್ತಮ ಗುಣಮಟ್ಟವನ್ನು ಕಾಯ್ದುಕೊಳ್ಳಲಿದೆ.

ಈ 18 ಇಂಚುಗಳ 4x4 ಕಾರು 3,693 ಎಂಎಂ ಉದ್ದ, 1,709 ಎಂಎಂ ಅಗಲ, 1,566 ಎಂಎಂ ಎತ್ತರ ಹಾಗೂ 2438 ಎಂಎಂ ಚಕ್ರಾಂತರವನ್ನು ಪಡೆದುಕೊಂಡಿರಲಿದೆ.

ಅಂದ ಹಾಗೆ ಸುಜುಕಿ ಐಎಂ-4 ಕಾಂಪಾಕ್ಟ್ ಎಸ್‌ಯುವಿ 1.2 ಲೀಟರ್ ಡ್ಯುಯಲ್ ಜೆಟ್ ಎಂಜಿನ್‌ನಿಂದ ನಿಯಂತ್ರಿಸಲ್ಪಡಲಿದೆ. ಇದರ ಜೊತೆಗೆ ಸುಜುಕಿಯ ನೂತನ ಸ್ಮಾರ್ಟ್ ಹೈಬ್ರಿಡ್ ವೆಹಿಕಲ್ ತಂತ್ರಜ್ಞಾನವು (ಎಸ್‌ಎಚ್‌ವಿಎಸ್) ಬಳಕೆಯಾಗಲಿದೆ.

ಹಾಗೊಂದು ವೇಳೆ ಭವಿಷ್ಯದಲ್ಲಿ ಐಎಂ-4 ಭಾರತಕ್ಕೆ ಆಗಮಿಸಿದ್ದಲ್ಲಿ ಭಾರಿ ಶಬ್ದ ಮಾಡಲಿದೆ ಎಂಬುದರಲ್ಲಿ ಸಂಶಯವೇ ಇಲ್ಲ. ಏಕೆಂದರೆ ಬೆಳೆದು ಬರುತ್ತಿರುವ ಭಾರತ ಮಾರುಕಟ್ಟೆಯಲ್ಲಿ ಕಾಂಪಾಕ್ಟ್ ಎಸ್‌ಯುವಿಗಳಿಗೆ ಭಾರಿ ಬೇಡಿಕೆಯಿದೆ. ಅಲ್ಲದೆ ಸುಜುಕಿ ಅಂಗಸಂಸ್ಥೆ ಮಾರುತಿಯು ಬೃಹತ್ ಮಾರಾಟ ವಲಯದ ಮೂಲಕ ತನ್ನ ನಿಷ್ಠೆಯನ್ನು ಕಾಯ್ದುಕೊಂಡಿರುವುದು ಹೆಚ್ಚು ಸ್ಪರ್ಧಾತ್ಮಕ ಬೆಲೆಗಳಲ್ಲಿ ಬಿಡುಗಡೆ ಮಾಡಲು ಸಹಕಾರಿಯಾಗಲಿದೆ.

ಒಟ್ಟಿನಲ್ಲಿ ಸುಜುಕಿ ಮಿನಿ ಎಸ್‌ಯುವಿ ಈಗಾಗಲೇ ಗ್ರಾಹಕರಲ್ಲಿ ಹೆಚ್ಚಿನ ಕುತೂಹಲಕ್ಕೆ ಎಡೆ ಮಾಡಿಕೊಟ್ಟಿದೆ. ಸದ್ಯ ಜಿನೆವಾದಲ್ಲಿ ಅರಳಿರುವ ಈ ಹೂವು ಬಹುಬೇಗನೇ ಭಾರತದಲ್ಲೂ ತನ್ನ ಸುಗಂಧವನ್ನು ಪಸರಿಸಲಿ ಎಂಬುದೇ ಡ್ರೈವ್ ಸ್ಪಾರ್ಕ್ ಆಶಯವಾಗಿದೆ.