ಬರುತ್ತಿದೆ ಗಾಳಿಯಿಂದ ಚಲಿಸುವ ಟಾಟಾ ಕಾರು - ಏರ್‌ಪೊಡ್

ಸಂಕುಚಿತ ವಾಯು ಸಿದ್ಧಾಂತದಲ್ಲಿ ಚಲಿಸುವ ಈ ತ್ರಿಚಕ್ರ ವಾಹನ ಅಭಿವೃದ್ಧಿಗಾಗಿ ಟಾಟಾ ಸಂಸ್ಥೆಯು ಫ್ರಾನ್ಸ್‌ನ ಮೋಟಾರು ಡೆವಲಪ್‌ಮೆಂಟ್ ಇಂಟರ್ ನ್ಯಾಷನಲ್ (ಎಂಡಿಐ) ಜೊತೆ ಕೈಜೋಡಿಸಿಕೊಂಡಿದೆ. ಸರಿ ಸುಮಾರು ಏಳು ವರ್ಷಗಳ ಹಿಂದೆ ಆರಂಭಿಸಿರುವ ಈ ಯೋಜನೆಯು ಈಗಾಗಲೇ ಎರಡು ಹಂತವನ್ನು ಪೂರ್ಣಗೊಳಿಸಿದೆ.

ಬ್ಯುಸಿನೆಸ್ ಸ್ಟ್ಯಾಂಡರ್ಡ್ ವರದಿ ಪ್ರಕಾರ ಬ್ಲೂ ಸ್ಕೈ ಯೋಜನೆಯ ಅಡಿಯಲ್ಲಿ ಸಂಕುಚಿತ ಏರ್ ಎಂಜಿನ್ ಅಭಿವೃದ್ಧಿಯಲ್ಲಿ ಟಾಟಾ ತೊಡಗಿದ್ದು, 2015ರ ವೇಳೆಯಾಗುವಾಗ ಹವಾಯ್‌ನಲ್ಲಿ ಈ ಮಹತ್ತರ ಯೋಜನೆ ಪರಿಚಯವಾಗಲಿದೆ.

ಇದು ಸಂಸ್ಥೆಯ ಶೂನ್ಯ ಮಾಲಿನ್ಯದ ವಾಹನದ ನೀತಿಯ ಭಾಗವಾಗಿದ್ದು, ಇದರಲ್ಲಿ ಸ್ಟೀರಿಂಗ್ ವೀಲ್ ಬದಲು ಜಾಯ್ ಸ್ಟಿಕ್ (ವಿವಿಧ ದಿಕ್ಕುಗಳಲ್ಲಿ ಚಲಿಸಬಹುದಾದ ನಿಯಂತ್ರಕ) ಇರಲಿದೆ.

ಟಾಟಾ ಏರ್ ಪೊಡ್‌ನಲ್ಲಿ ಒಂದು ಮಗು ಹಾಗೂ ಮೂವರಿಗೆ ಕುಳಿತುಕೊಳ್ಳಬಹುದಾಗಿದೆ. ಹಾಗೆಯೇ ಗಂಟೆಗೆ 80 ಕೀ.ಮೀ. ಅಂತೆಯೇ ಗರಿಷ್ಠ 200 ಕೀ.ಮೀ. ವ್ಯಾಪ್ತಿಯ ವರೆಗೆ ಚಲಿಸಬಹುದಾಗಿದೆ.

ಭಾರತದಂತಹ ವಾಹನ ನಿಬಿಡ ರಾಷ್ಟ್ರಗಳಿಗೆ ಹೇಳಿ ಮಾಡಿಸಿದಂತಹ ವಾಹನ ಇದಾಗಿದ್ದು, ಯಾವುದೇ ರೀತಿಯ ಟ್ರಾಫಿಕ್ ಪರಿಸ್ಥಿತಿಯನ್ನು ನಿಭಾಯಿಸಬಹುದಾಗಿದೆ. ಹಾಗೆಯೇ ಪಾರ್ಕಿಂಗ್ ಕೂಡಾ ಬಹಳ ಸುಲಭವಾಗಿದೆ.

ಸದ್ಯ ಬಂದಿರುವ ಮಾಹಿತಿಗಳ ಪ್ರಕಾರ ಐದು ಲಕ್ಷ ರು.ಗಳ ಅಂದಾಜು ಬೆಲೆಯನ್ನು ಟಾಟಾ ಏರ್ ಪೊಡ್‌ಗೆ ನಿಗದಿಪಡಿಸಲಾಗಿದೆ. ಈ ಬಗ್ಗೆ ಮುಂದಿನ ದಿನಗಳಲ್ಲೇ ಸ್ಪಷ್ಟ ಉತ್ತರ ದೊರಕಲಿದೆ. ಇದಕ್ಕಾಗಿ ಸದಾ ಓದುತ್ತಿರಿ ಡ್ರೈವ್ ಸ್ಪಾರ್ಕ್!