ಭಾರತಕ್ಕೆ ಭರ್ಜರಿ ಎಂಟ್ರಿ ಕೊಟ್ಟ ಟೊಯೊಟಾ ಕರೊಲ್ಲಾ ಆಲ್ಟೀಸ್

ಸಂಸ್ಥೆಯ ಪ್ರಕಾರ ನೂತನ ಕರೊಲ್ಲಾ ಆಲ್ಟೀಸ್, ಟೊಯೊಟಾದ ಹೊಸ ವಿನ್ಯಾಸದ ಸಂಕೇತವಾಗಿರಲಿದೆ. ಇದು ಭಾರತ ಸೇರಿದಂತೆ ಜಾಗತಿಕವಾಗಿಯೂ ಉತ್ತಮ ಮಾರಾಟ ಗಿಟ್ಟಿಸಿಕೊಳ್ಳುವ ನಿರೀಕ್ಷೆಯನ್ನು ಸಂಸ್ಥೆ ಹೊಂದಿದೆ.

ಈ ಹಿಂದೆ 2003ನೇ ಇಸವಿಯಲ್ಲಿ ಲಾಂಚ್ ಕಂಡಿದ್ದ ಆಲ್ಟೀಸ್, ಸಿ ಸೆಡಾನ್ ವಿಭಾಗದಲ್ಲಿ ಅತ್ಯಂತ ಹೆಚ್ಚು ಮಾರಾಟ ಗಿಟ್ಟಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿತ್ತು. ಅಲ್ಲದೆ 10 ದಶಲಕ್ಷದಷ್ಟು ಸಂತುಷ್ಟ ಗ್ರಾಹಕರನ್ನು ಪಡೆದಿತ್ತು.

ಅಂದ ಹಾಗೆ ನೂತನ ಟೊಯೊಟಾ ಕರೊಲ್ಲಾ ಬೆಲೆಯು 2014 ಮೇ ತಿಂಗಳಲ್ಲಿ ಘೋಷಣೆಯಾಗಲಿದೆ. ಇದೇ ಸಂದರ್ಭದಲ್ಲೇ ವಿತರಣೆ ಕಾರ್ಯ ಕೂಡಾ ಆರಂಭವಾಗಲಿದೆ.

ನೂತನ ಟೊಯೊಟಾ ಆಲ್ಟೀಸ್ ವಿವಿಟಿಐ ಪೆಟ್ರೋಲ್ ಮತ್ತು 1.4 ಲೀಟರ್ ಡಿ-4ಡಿ ಡೀಸೆಲ್ ಎಂಜಿನ್ ಹೊಂದಿದೆ. ಇದು ಹಿಂದಿನ ಆವೃತ್ತಿಗೆ ಸಮಾನವಾಗಿರುತ್ತದೆ.

ಹಾಗೆಯೇ ಪೆಟ್ರೋಲ್ ವೆರಿಯಂಟ್ ಸಿವಿಟಿ-ಐ ಜತೆ ಏಳು ಸ್ಪೀಡ್ ಸ್ವಿಕ್ಯೂಷಲ್ ಶಿಫ್ಟ್‌ಮ್ಯಾಟಿಕ್ ಗೇರ್ ಬಾಕ್ಸ್ ಪಡೆದುಕೊಂಡಿದೆ. ಇನ್ನು ಇಂದಿನಿಂದಲೇ ಆಲ್ಟೀಸ್ ಬುಕ್ಕಿಂಗ್ ಪ್ರಕ್ರಿಯೆ ಆರಂಭವಾಗಿರುತ್ತದೆ.

ಪ್ರಸ್ತುತ 11ನೇ ಜನಾಂಗದ ಕರೊಲ್ಲಾ ಆಲ್ಟೀಸ್, ತನ್ನ ನಿಕಟ ಪ್ರತಿಸ್ಪರ್ಧಿಗಳಾದ ಹ್ಯುಂಡೈ ಎಲಾಂಟ್ರಾ, ಸ್ಕೋಡಾ ಒಕ್ಟಾವಿಯಾ ಮತ್ತು ಫೋಕ್ಸ್‌ವ್ಯಾಗನ್ ಜೆಟ್ಟಾ ಆವೃತ್ತಿಗೆ ಪೈಪೋಟಿ ಒಡ್ಡಲಿದೆ.