ಭಾರತದಲ್ಲಿ ನಿಮಗೆ ತಿಳಿಯದ ಕೆಲ ಸಂಚಾರ ನಿಯಮಗಳು: ತಿಳಿಯಿರಿ, ಇಲ್ಲದಿದ್ರೆ ದಂಡ ಫಿಕ್ಸ್!

ಅಭಿವೃದ್ಧಿ ಹೊಂದಿದ ದೇಶಗಳಿಗೆ ಹೋಲಿಸಿದರೆ ಭಾರತದಲ್ಲಿ ಸಂಚಾರ ನಿಯಮಗಳನ್ನು ಹೆಚ್ಚಾಗಿ ಪಾಲನೆ ಮಾಡುವುದಿಲ್ಲ. ಕಾರಣ ಎಷ್ಟೋ ಮಂದಿಗೆ ನಿಯಮಗಳ ಬಗ್ಗೆ ಅರಿವೇ ಇಲ್ಲ ಎಂಬುದನ್ನು ಒಪ್ಪಲೇಬೇಕು, ಎಲ್ಲಾ ತಿಳಿದವರಿಗೂ ಕೂಡ ಕೆಲವು ನಿಯಮಗಳ ಬಗ್ಗೆ ತಿಳಿದಿರುವುದಲ್ಲ. ನಿಜ ಜೀವನದಲ್ಲಿ ನಿಮ್ಮನ್ನು ಅಚ್ಚರಿಗೊಳಿಸುವಂತಹ ಹಲವಾರು ಕಾನೂನುಗಳಿವೆ.

ಇಂತಹ ಅವೆಷ್ಟೋ ಕಾನೂನುಗಳನ್ನು ಪೊಲೀಸರು ನಿಯಮಿತವಾಗಿ ಜಾರಿಗೊಳಿಸದಿದ್ದರೂ, ಸದ್ಯ ಅವು ಅಸ್ತಿತ್ವದಲ್ಲಿಯೇ ಇವೆ. ಈ ತಿಳಿಯದ ನಿಯಮಗಳನ್ನು ಉಲ್ಲಂಘಿಸಿ ದಂಡ ಹಾಕಿಸಿಕೊಂಡವರೂ ಇದ್ದಾರೆ. ಹಾಗಾಗಿ ಭಾರತದಲ್ಲಿ ಯಾರೂ ತಿಳಿಸದ ಹಾಗೂ ಬಹುತೇಕರಿಗೆ ತಿಳಿಯದ ಕೆಲ ಪ್ರಮುಖ ಟ್ರಾಫಿಕ್ ನಿಯಮಗಳನ್ನು ಇಲ್ಲಿ ನೋಡೊಣ.

ಕಾರನ್ನು ಐಡಲ್‌ನಲ್ಲಿಟ್ಟು ಹೋಗಬಾರದು: ಕಾರಿನ ಎಂಜಿನ್ ಆನ್‌ನಲ್ಲಿ ಬಿಟ್ಟು ಹೋದರೆ ದಂಡ ವಿಧಿಸಬಹುದು. ನೀವು ಟ್ರಾಫಿಕ್ ಸಿಗ್ನಲ್‌ನಲ್ಲಿದ್ದರೂ ಅಥವಾ ರಸ್ತೆ ಬದಿಯಲ್ಲಿ ನಿಲ್ಲಿಸಿದ್ದರೂ, ವಾಹನದ ಎಂಜಿನ್ ಅನಗತ್ಯವಾಗಿ ಚಲಿಸುತ್ತಿದ್ದರೆ ನಿಮಗೆ ಪೊಲೀಸರು ದಂಡ ವಿಧಿಸಬಹುದು. ಈ ನಿಯಮವು ಚಾಲಕರು ಇಂಧನವನ್ನು ಉಳಿಸಲು ಮತ್ತು ವಾಹನವು ಬಳಕೆಯಲ್ಲಿಲ್ಲದಿದ್ದಾಗ ಎಂಜಿನ್ ಅನ್ನು ಆಫ್ ಮಾಡುವಂತೆ ಮಾಡುತ್ತದೆ.

ಸಂಚಾರ ನಿರ್ಬಂಧಿಸುವುದು: ಈ ಸಮಸ್ಯೆಯು ಹೆಚ್ಚಾಗಿ ಪಾರ್ಕಿಂಗ್ ಸ್ಥಳಗಳಲ್ಲಿ ಕಂಡುಬರುತ್ತದೆ. ಕೆಲ ಕಾರು ಮಾಲೀಕರು ತಮ್ಮ ವಾಹನಗಳನ್ನು ಇತರ ವಾಹನಗಳಿಗೆ ಅಡ್ಡಿಪಡಿಸುವ ರೀತಿಯಲ್ಲಿ ನಿಲ್ಲಿಸುತ್ತಾರೆ. ಪಾರ್ಕಿಂಗ್ ಸ್ಥಳದಲ್ಲಿ ಮತ್ತೊಂದು ಕಾರಿನ ಮಾರ್ಗವನ್ನು ನಿರ್ಬಂಧಿಸುವುದು ಅಪರಾಧವೆಂದು ಪರಿಗಣಿಸಲಾಗುತ್ತದೆ. ಪಾರ್ಕಿಂಗ್ ಅಡಚಣೆಯ ಕಾರಣಕ್ಕೆ ದಂಡ ವಿಧಿಸಬಹುದು. ಇಂತಹ ಪರಿಸ್ಥಿತಿಯನ್ನು ಎದುರಿಸುವಾಗ ಜನರು ಪೊಲೀಸರನ್ನು ಕರೆಯಬಹುದು.

ಕಾರಿನಲ್ಲಿ ಧೂಮಪಾನ ಮಾಡಬಾರದು: ಸಾರ್ವಜನಿಕ ಪ್ರದೇಶಗಳಲ್ಲಿದ್ದಾಗ ಕಾರಿನಲ್ಲಿ ಧೂಮಪಾನ ಮಾಡುವುದು ಕಾನೂನುಬಾಹಿರವಾಗಿದೆ. ಸಾರ್ವಜನಿಕ ಸ್ಥಳದಲ್ಲಿ ವಾಹನ ನಿಲುಗಡೆ ಮಾಡಿದರೂ, ವಾಹನದಲ್ಲಿದ್ದವರು ಧೂಮಪಾನ ಮಾಡುತ್ತಿದ್ದರೆ, ಪೊಲೀಸರು ದಂಡ ವಿಧಿಸಬಹುದು. ಈ ನಿಯಮವು ಚಾಲಕನಿಗೆ ಧೂಮಪಾನದಿಂದ ಉಂಟಾಗುವ ಸಂಭಾವ್ಯ ಅಪಘಾತಗಳಿಂದ ತಡೆಯುತ್ತದೆ.

ಟಿವಿ ಸ್ಥಾಪನೆ: ಚಾಲನೆ ಮಾಡುವಾಗ ವೀಡಿಯೊಗಳನ್ನು ಪ್ಲೇ ಮಾಡಬಹುದಾದ ಆಫ್ಟರ್ ಮಾರ್ಕೆಟ್ ಸಿಸ್ಟಮ್‌ಗಳನ್ನು ಸ್ಥಾಪಿಸಲಾಗುತ್ತಿದೆ. ವಾಹನದ ಡ್ಯಾಶ್‌ಬೋರ್ಡ್‌ನಲ್ಲಿ ಟಿವಿ ಅಥವಾ ಯಾವುದೇ ವೀಡಿಯೊ ಪ್ಲೇಯಿಂಗ್ ಸಾಧನವನ್ನು ಸ್ಥಾಪಿಸುವುದು ಕಾನೂನುಬಾಹಿರವಾಗಿದೆ. ಉಲ್ಲಂಘಿಸುವವರಿಗೆ ದಂಡ ವಿಧಿಸಬಹುದು. ವೀಡಿಯೊಗಳನ್ನು ನೋಡುವುದು ಅಥವಾ ಇತರ ಯಾವುದೇ ಚಟುವಟಿಕೆಯಲ್ಲಿ ತೊಡಗುವುದರಿಂದ ಚಾಲಕನ ಗಮನ ಬೇರೆಡೆ ಹೋಗಿ ಅಪಘಾತಗಳಿಗೆ ಕಾರಣವಾಗಬಹುದು.

ಪ್ರಥಮ ಚಿಕಿತ್ಸೆ: ಈ ನಿಯಮವು ಚೆನ್ನೈ ಮತ್ತು ಕೋಲ್ಕತ್ತಾಗೆ ನಿರ್ದಿಷ್ಟವಾಗಿದೆ. ಇತರ ರಾಜ್ಯಗಳಲ್ಲಿ ಅನ್ವಯಿಸುವುದಿಲ್ಲ. ಅಪಘಾತವಾದ ಸಂದರ್ಭದಲ್ಲಿ ಯಾವುದೇ ಕಾರಿನಲ್ಲಿ ಪ್ರಯಾಣಿಸುವವರು ವಾಹನ ನಿಲ್ಲಿಸಿ ಪ್ರಥಮ ಚಿಕಿತ್ಸೆ ನೀಡಲು ವಿಫಲವಾದರೆ, ಅಂಥವರು ರೂ. 500 ಅಥವಾ ಮೂರು ತಿಂಗಳವರೆಗೆ ಜೈಲು ಶಿಕ್ಷೆಯನ್ನು ಎದುರಿಸಬೇಕಾಗುತ್ತದೆ. ಈ ನಿಯಮವು ಪ್ರತಿ ವಾಹನವು ಪ್ರಥಮ ಚಿಕಿತ್ಸಾ ಕಿಟ್‌ನೊಂದಿಗೆ ಸುಸಜ್ಜಿತವಾಗಿದೆ ಎಂದು ಖಚಿತಪಡಿಸುತ್ತದೆ.

ಇನ್ನೊಬ್ಬರ ಕಾರನ್ನು ಪಡೆಯುವುದು: ಈ ನಿಯಮ ಚೆನ್ನೈನಲ್ಲಿ ಮಾತ್ರ ಅನ್ವಯಿಸುತ್ತದೆ. ಈ ನಿಯಮದ ಪ್ರಕಾರ, ನೀವು ಸ್ನೇಹಿತರ ವಾಹನವನ್ನು ಪಡೆದರೆ, ಮಾಲೀಕರಿಗೆ ತಿಳಿಸಬೇಕು. ಮಾಲೀಕರಿಗೆ ತಿಳಿಯದೆ ಸ್ನೇಹಿತರ ಅಥವಾ ಸಂಬಂಧಿಕರ ವಾಹನವನ್ನು ಚಾಲನೆ ಮಾಡಿ ಸಿಕ್ಕಿಬಿದ್ದರೆ, ಚೆನ್ನೈ ಪೊಲೀಸರು ಮೂರು ತಿಂಗಳ ಜೈಲು ಶಿಕ್ಷೆ ಅಥವಾ ರೂ. 500 ದಂಡ ವಿಧಿಸಬಹುದು. ಈ ನಿಯಮವು ಕಾರು ಕಳ್ಳತನವನ್ನು ತಡೆಗಟ್ಟುವ ಗುರಿಯನ್ನು ಹೊಂದಿದೆ.

ಅಪರಿಚಿತರಿಗೆ ಲಿಫ್ಟ್ ನೀಡಬಾರದು: ಅಪರಿಚಿತ ವ್ಯಕ್ತಿಗಳಿಗೆ ಲಿಫ್ಟ್ ನೀಡುವುದನ್ನು ಭಾರತದಲ್ಲಿ ಅಪರಾಧವೆಂದು ಪರಿಗಣಿಸಲಾಗಿದೆ. ನೀವು ಅಪರಿಚಿತರಿಗೆ ಲಿಫ್ಟ್ ನೀಡಿದರೆ, ನಿಮ್ಮ ವಾಹನವನ್ನು ಟ್ಯಾಕ್ಸಿಯಾಗಿ ಬಳಸಲಾಗುತ್ತಿದೆ ಎಂದು ವಶಪಡಿಸಿಕೊಳ್ಳಬಹುದು. ರಸ್ತೆಬದಿಯಲ್ಲಿ ನಿಂತಿರುವ ಅಪರಿಚಿತರಿಗೆ ಸ್ವಂತ ಕಾರಿನಲ್ಲಿ ಕೂರಿಸಿಕೊಂಡು ಲಿಫ್ಟ್ ಕೊಡುವುದನ್ನು ಅನುಮತಿಸಲಾಗುವುದಿಲ್ಲ. ಈ ನಿಯಮ ಸಂಭಾವ್ಯ ಕಳ್ಳತನ ಮತ್ತು ವಾಣಿಜ್ಯ ಉದ್ದೇಶಗಳಿಗಾಗಿ ಖಾಸಗಿ ವಾಹನಗಳ ದುರ್ಬಳಕೆಯಿಂದ ರಕ್ಷಿಸುತ್ತದೆ.