ಬೈಕ್ ನಲ್ಲಿ 120 ಕಿ.ಮೀ ಸ್ಪೀಡ್‌ನಲ್ಲಿ ಹೋದವನ ಅದೃಷ್ಟ! ABS ಮಹತ್ವ ತಿಳಿಯುತ್ತೆ ನೋಡಿ ಈ ವಿಡಿಯೋ

ABS (Anti-lock braking system) ಈ ಒಂದು ವೈಶಿಷ್ಟ್ಯ ಈಗಿನ ವಾಹನಗಳಿಗೆ ಬಹಳ ಮುಖ್ಯವಾದ ವೈಶಿಷ್ಟ್ಯವಾಗಿದೆ. ಏಕೆಂದರೆ ವಾಹನಗಳಲ್ಲಿ ಬ್ರೇಕಿಂಗ್ ಸಿಸ್ಟಮ್ ಎಂಬುದು ಸಂಭಾವ್ಯ ಅಪಘಾತಗಳಿಂದ ಆಗುವ ತೀವ್ರ ಹಾನಿಯನ್ನು ತಪ್ಪಿಸುತ್ತದೆ. ಹಾಗಾಗಿ ಭಾರತದಲ್ಲಿ ಮಾರಾಟವಾಗುವ ಹೆಚ್ಚಿನ ವಾಹನಗಳಲ್ಲಿ ABS ಬ್ರೇಕ್‌ಗಳನ್ನು ಪ್ರಮಾಣಿತವಾಗಿ ನೀಡಲಾಗುತ್ತಿದೆ.

ಇದನ್ನು ಸಾಮಾನ್ಯ ಬ್ರೇಕ್‌ಗಳಿಗೆ ಹೋಲಿಸಿಕೊಂಡರೆ ತುಂಬಾ ಅಡ್ವಾನ್ಸ್‌ಡ್ ಆಗಿ ಕಾರ್ಯನಿರ್ವಹಿಸುತ್ತದೆ. ಮೊದಲೇ ಹೇಳಿದಂತೆ ಈಗಿನ ಭಾರತೀಯ ರಸ್ತೆ ಪರಿಸ್ಥಿತಿಗಳಿಗೆ ಈ ಎಬಿಎಸ್ ಬ್ರೇಕ್‌ಗಳು ತುಂಬಾ ಉಪಯುಕ್ತವಾಗಿದೆ. ಇದಕ್ಕೆ ಉತ್ತಮ ಉದಾಹರಣೆಯೆಂಬಂತೆ ಇತ್ತೀಚಗೆ ಸಂಭಾವ್ಯ ಭೀಕರ ಅಪಘಾತದಿಂದ ಪಾರಾದ ಘಟನೆ ಕ್ಯಾಮರಾದಲ್ಲಿ ಸೆರೆಯಾಗಿದ್ದು, ಆಶ್ಚರ್ಯಕರ ರೀತಿಯಲ್ಲಿ ಸವಾರ ಪಾರಾಗಿದ್ದಾನೆ.

ಎಬಿಎಸ್ ಬ್ರೇಕ್ ಯಮಹಾ ಆರ್15 ಬೈಕ್ ನಲ್ಲಿ ಪ್ರಯಾಣಿಸುತ್ತಿದ್ದ ವ್ಯಕ್ತಿಯ ಜೀವ ಉಳಿಸಿದ ವಿಡಿಯೋ ಇದೀಗ ವೈರಲ್ ಆಗಿದೆ. ಈ ವೀಡಿಯೊವನ್ನು ಯೂಟ್ಯೂಬ್‌ನಲ್ಲಿ ಅಪ್‌ಲೋಡ್ ಮಾಡಲಾಗಿದೆ. ತಮಿಳುನಾಡಿನ 2 ಲೇನ್ ಹೆದ್ದಾರಿಯಲ್ಲಿ ಈ ಘಟನೆ ನಡೆದಿದೆ. ಇದು ವಿ4 ಮಾದರಿಯಾಗಿದ್ದು, ಯಮಹಾ ಆರ್15 ಬೈಕ್ ಸವಾರ ಧರಿಸಿದ್ದ ಹೆಲ್ಮೆಟ್ ಮೇಲೆ ಕ್ಯಾಮೆರಾ ಅಳವಡಿಸಲಾಗಿತ್ತು.

ಆ ಕ್ಯಾಮರಾದಲ್ಲಿ ಈ ರಸ್ತೆ ಅಪಘಾತದ ಘಟನೆ ದಾಖಲಾಗಿದೆ. ಯಮಹಾ R15 ಬೈಕಿನ ಸವಾರನು ಗಂಟೆಗೆ 124 ಕಿ.ಮೀ ವೇಗದಲ್ಲಿ ಚಲಿಸುತ್ತಿರುವುದನ್ನು ಇನ್ಸ್ಟ್ರುಮೆಂಟ್ ಕ್ಲಸ್ಟರ್ ನಮಗೆ ಬಹಳ ಸ್ಪಷ್ಟವಾಗಿ ತೋರಿಸುತ್ತದೆ. ಈ ವೇಗದಲ್ಲಿ ಸವಾರ ಟೆಂಪೋ ಟ್ರಾವೆಲರ್ ಸೇರಿದಂತೆ ಕೆಲವು ವಾಹನಗಳನ್ನು ಹಿಂದಿಕ್ಕುತ್ತಾನೆ. ನಂತರ ನೇರವಾಗಿ ಟಾಟಾ ಏಸ್ ಪಿಕಪ್ ಟ್ರಕ್ ಅನ್ನು ಡಿಕ್ಕಿ ಹೊಡೆದಿದ್ದಾನೆ.

ಇದಕ್ಕೂ ಮುನ್ನ ಪಿಕಪ್ ಟ್ರಕ್ ಚಾಲಕ ಬಲ ಬದಿಗೆ ತಿರುಗಲು ಪ್ರಯತ್ನಿಸಿದ್ದ. ಆದರೆ ಅವನು ಸುತ್ತಮುತ್ತಲಿನ ಪ್ರದೇಶವನ್ನು ಗಮನಿಸಿರಲಿಲ್ಲ. ಜೊತೆಗೆ ಆತ ಇಂಡಿಕೇಟರ್ ಕೂಡ ಹಾಕಿರಲಿಲ್ಲ, ಪಿಕಪ್ ಟ್ರಕ್ ಅನ್ನು ಹಿಂದಿಕ್ಕುವ ನಿರೀಕ್ಷೆಯಲ್ಲಿದ್ದ ಯಮಹಾ R15 ಸವಾರನಿಗೆ ಇದು ಗೊಂದಲವನ್ನು ಉಂಟುಮಾಡಿತ್ತು. ಉದ್ವಿಗ್ನಗೊಂಡ ಸವಾರ ತಕ್ಷಣವೇ ಬ್ರೇಕ್ ಹಾಕಿದರು.

ಇದರಿಂದ ಬೈಕಿನ ವೇಗ ತಕ್ಷಣವೇ ಕಡಿಮೆಯಾಯಿತು. ಆದರೆ, ಯಮಹಾ ಆರ್15 ಬೈಕ್ ಟಾಟಾ ಏಸ್ ಪಿಕಪ್ ಟ್ರಕ್ ಹಿಂಭಾಗಕ್ಕೆ ಡಿಕ್ಕಿ ಹೊಡೆಯುವುದನ್ನು ತಪ್ಪಿಸಲು ಸಾಧ್ಯವಾಗಲಿಲ್ಲ. ಆದರೆ ಅದೃಷ್ಟವಶಾತ್ ಬೈಕ್ ನಿಯಂತ್ರಣ ತಪ್ಪಲಿಲ್ಲ. ಡಿಕ್ಕಿಯ ರಭಸಕ್ಕೆ ಬೈಕ್‌ನ ಮುಂಭಾಗ ಜಖಂಗೊಂಡಿದೆ. ಯಮಹಾ ಆರ್15 ಬೈಕ್ ಸವಾರರಿಗೂ ಸಣ್ಣಪುಟ್ಟ ಗಾಯಗಳಾಗಿವೆ.

ಆದರೂ ಅವರು ಬದುಕುಳಿದಿರುವುದು ಸಂತಸದ ಸಂಗತಿ. ಇದು ಕೇವಲ ಎಬಿಎಸ್ ಬ್ರೇಕಿಂಗ್ ಅವನ ಬದುಕಿಗೆ ಪ್ರಮುಖ ಕಾರಣವಾಗಿದೆ. ಯಮಹಾ R15 ಡ್ಯುಯಲ್ ಚಾನೆಲ್ ABS ಬ್ರೇಕ್‌ನೊಂದಿಗೆ ಬರುತ್ತದೆ. ಒಂದು ವೇಳೆ ಈ ವೈಶಿಷ್ಟ್ಯವನ್ನು ಹೊಂದಿರದ ಬೈಕ್‌ಗೆ ಆಗಿದ್ದರೇ ಅಪಘಾತದ ಪರಿಣಾಮವು ಭೀಕರವಾಗಿರುತ್ತಿತ್ತು.

ಆದರೆ ಈ ರಸ್ತೆ ಅಪಘಾತಕ್ಕೆ ಟಾಟಾ ಏಸ್ ಪಿಕಪ್ ಟ್ರಕ್ ಚಾಲಕನನ್ನು ಮಾತ್ರ ದೂರುವುದು ಸರಿಯಲ್ಲ. ವಾಸ್ತವವಾಗಿ, Yamaha R15 ಸವಾರನ ದೋಷ ಕೂಡ ಇದೆ. 2 ಲೇನ್ ಹೆದ್ದಾರಿಯಲ್ಲಿ ಈ ವೇಗದಲ್ಲಿ ಸಂಚರಿಸುವುದು ಒಳ್ಳೆಯದಲ್ಲ. ಭಾರತೀಯ ರಸ್ತೆಗಳಲ್ಲಿ ಏನು ಬೇಕಾದರೂ ಆಗಬಹುದು. ಆದ್ದರಿಂದ ಮಧ್ಯಮ ವೇಗವನ್ನು ಇಟ್ಟುಕೊಳ್ಳುವುದು ಉತ್ತಮ.