ವೇಗವಾಗಿ ಚಲಿಸುತ್ತಿದ್ದ ರೈಲಿಗೆ ಸಿಕ್ಕಿ ಪುಡಿಪುಡಿಯಾದ ಬಿ‍ಎಂ‍‍ಡಬ್ಲ್ಯು

ಅಪಘಾತಗಳಿಗೆ ಪ್ರಮುಖ ಕಾರಣ ಸಂಚಾರಿ ನಿಯಮಗಳನ್ನು ಸರಿಯಾಗಿ ಪಾಲಿಸದೇ ಇರುವುದು. ನಿಯಮಗಳ ಉಲ್ಲಂಘನೆ ಭಾರೀ ಪ್ರಮಾಣದಲ್ಲಿಯೇ ಆಗುತ್ತಿವೆ. ವಾಹನ ದಟ್ಟಣೆ ಹೆಚ್ಚಿರುವ ಕಡೆಯಲ್ಲಿಯೇ ಹೆಚ್ಚಿನ ಪ್ರಮಾಣದ ನಿಯಮ ಉಲ್ಲಂಘನೆಗಳು ಸಂಭವಿಸುತ್ತಿವೆ. ಇದರಿಂದಾಗಿ ಅಪಘಾತಗಳ ಸಂಖ್ಯೆ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ.

ಪ್ರತಿದಿನ ಸಂಭವಿಸುವ ಅಪಘಾತಗಳ ಪ್ರಮಾಣವನ್ನು ಇಂಟರ್‍‍ನೆಟ್‍‍‍ನಲ್ಲಿ ಅಪ್‍‍ಲೋಡ್ ಮಾಡಲಾಗುತ್ತಿದೆ. ಕೆಲವು ಬಾರಿ ಅಪಘಾತದ ವೀಡಿಯೊಗಳನ್ನೂ ಸಹ ಅಪ್‍‍ಲೋಡ್ ಮಾಡಲಾಗುತ್ತದೆ. ಕೆಲವು ಅಪಘಾತಗಳ ವೀಡಿಯೊಗಳು ಭೀಕರವಾಗಿರುತ್ತವೆ.

ಈ ವೀಡಿಯೊಗಳನ್ನು ಜನರಲ್ಲಿ ಸಾಮಾಜಿಕ ಜಾಗೃತಿಯನ್ನು ಮೂಡಿಸುವ ಸಲುವಾಗಿ ಅಪ್‍‍ಲೋಡ್ ಮಾಡಲಾಗುತ್ತದೆ. ಇತ್ತೀಚಿಗೆ ಸಂಭವಿಸಿದ ಅಪಘಾತವೊಂದರ ವೀಡಿಯೊವನ್ನೂ ಸಹ ಅಪ್‍‍ಲೋಡ್ ಮಾಡಲಾಗಿದೆ. ಈ ವೀಡಿಯೊದಲ್ಲಿ ಕಾರು ಪುಡಿ ಪುಡಿಯಾಗುವುದನ್ನು ಕಾಣಬಹುದು.

ಈ ಘಟನೆ ನಡೆದಿರುವುದು ಅಮೆರಿಕಾದಲ್ಲಿರುವ ಲಾಸ್ ಏಂಜಲೀಸ್‍‍ನಲ್ಲಿ. ಈ ಘಟನೆಯಲ್ಲಿ ರೈಲ್ವೆ ಕ್ರಾಸಿಂಗ್‍‍ನಲ್ಲಿ ಸಾಗುವ ಕಾರಿಗೆ, ವೇಗವಾಗಿ ಬರುವ ರೈಲು ಗುದಿಯುತ್ತದೆ. ಅಲ್ಲಿನ ಪೊಲೀಸರ ಪ್ರಕಾರ ಕಪ್ಪು ಬಣ್ಣದ ಬಿ‍ಎಂ‍‍ಡಬ್ಲ್ಯು ಕಾರು ವೇಗವಾಗಿ ಚಲಿಸಿ ರೈಲ್ವೆ ಕ್ರಾಸಿಂಗ್ ದಾಟಿರುವುದೇ ಈ ಅಪಘಾತಕ್ಕೆ ಕಾರಣ.

ಈ ವೇಳೆ ಅತಿ ವೇಗದಲ್ಲಿದ್ದ ರೈಲು ನಿಯಂತ್ರಣಕ್ಕೆ ಸಿಗದೇ ಕಾರಿಗೆ ಗುದ್ದಿದೆ. ಈ ಘಟನೆಯಲ್ಲಿ ಕಾರು ಸಂಪೂರ್ಣವಾಗಿ ನಜ್ಜುಗುಜ್ಜಾಗಿದೆ. ಆದರೆ ಅದೃಷ್ಟವಶಾತ್ ಕಾರಿನ ಚಾಲಕ ಪ್ರಾಣಾಪಾಯದಿಂದ ಪಾರಾಗಿದ್ದಾನೆ. ಸ್ಥಳದಲ್ಲಿದ್ದ ಬೇರೆ ವಾಹನ ಸವಾರರ ಪ್ರಕಾರ ಕಾರು ಚಾಲಕನಿಗೆ ಸಣ್ಣಪುಟ್ಟ ಗಾಯಗಳಾಗಿವೆ.

ಈ ಅಪಘಾತದಲ್ಲಿ ಕಾರು ಚಾಲಕನು ಬದುಕಿದ್ದು ನಿಜಕ್ಕೂ ಆತನ ಅದೃಷ್ಟವೆಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದಾರೆ. ಸಣ್ಣ ಪುಟ್ಟ ಗಾಯಗಳಾಗಿದ್ದ ಕಾರು ಚಾಲಕನನ್ನು ಪೊಲೀಸರು ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಚಿಕಿತ್ಸೆಯ ನಂತರ ಚಾಲಕನನ್ನು ಡಿಸ್‍‍ಚಾರ್ಜ್ ಮಾಡಲಾಗಿದೆ.

ಲಾಸ್ ಏಂಜಲೀಸ್ ನಗರ ಪೊಲೀಸರು ಈ ಅಪಘಾತದ ದೃಶ್ಯವನ್ನು ತಮ್ಮ ಅಧಿಕೃತ ಟ್ವಿಟರ್ ಪೇಜ್‍‍ನಲ್ಲಿ ಪ್ರಕಟಿಸಿದ್ದಾರೆ. ಇದರ ಜೊತೆಗೆ ರೈಲ್ವೆ ಕ್ರಾಸಿಂಗ್‍‍ಗಳನ್ನು ದಾಟುವಾಗ ಹೆಚ್ಚು ಜಾಗರೂಕತೆಯನ್ನು ವಹಿಸಬೇಕೆಂದು ವಾಹನ ಸವಾರರಿಗೆ ಸಲಹೆ ನೀಡಿದ್ದಾರೆ.