ವಿಶ್ವದಲ್ಲೇ ಪ್ರಥಮ ಬಾರಿಗೆ ಲ್ಯಾಪ್ ಟಾಪ್ ಮಾದರಿಯ ಪುಟ್ಟ ಕಾರು

ಮೂಲ ವಿನ್ಯಾಸವು ಸ್ಕೇಟ್ ಬೋರ್ಡ್ ತರಹನೇ ಇರುವ ಈ ವಾಕ್ ಕಾರ್ (WalkCar) ಗಂಟೆಗೆ 10 ಕೀ.ಮೀ. ವೇಗದಲ್ಲಿ ಸಂಚರಿಸುವ ಸಾಮರ್ಥ್ಯವನ್ನು ಹೊಂದಿದೆ.

ಭವಿಷ್ಯತ್ತಿನತ್ತ ಸಂಚಾರ ವಾಹಕ ಹುಡುಕುವ ಪ್ರಯತ್ನದಲ್ಲಿರುವ 26ರ ಹರೆಯದ ಯುವ ಎಂಜಿನಿಯರ್ ಕುನಿಯಾಕೊ ಸಾಟೋ (Kuniako Sato)ಎಂಬವರು ಈ ವೈಯಕ್ತಿಕ ಸಂಚಾರದ ಕಾರನ್ನು ಅವಿಷ್ಕರಿಸಿದ್ದಾರೆ.

ನಿಮ್ಮ ಪಾಕೆಟ್ ನಲ್ಲಿಟ್ಟುಕೊಂಡು ಸಾಗಬಹುದಾದ ಈ ಕಾರು ಈಗ ಜಗತ್ತಿನ ಮೊತ್ತ ಮೊದಲ 'ಕಾರ್ ಇನ್ ಎ ಬ್ಯಾಗ್' (car in a bag) ಅಥವಾ ಚೀಲದಲ್ಲಿ ಕಾರು ಎಂಬ ಮನ್ನಣೆಗೆ ಪಾತ್ರವಾಗಿದೆ.

ಸಾಟೋ ಅವರ ಈ ಪ್ರಯತ್ನಕ್ಕೆ ಕೊಕೊವಾ ಮೋಟಾರ್ಸ್ (Cocoa Motors) ಬೆಂಗಾವಲಾಗಿ ನಿಂತಿತ್ತು.

ನೋಡಲು ಟ್ಯಾಬ್ಲೆಟ್ ಅಥವಾ ಲ್ಯಾಪ್ ಟಾಪ್ ತರಹನೇ ಇರುವ ಈ ಅತಿ ಚಿಕ್ಕ ಕಾರು ಎರಡರಿಂದ ಮೂರು ಕೆ.ಜಿಗ ಭಾರವನ್ನಷ್ಟೇ ಹೊಂದಿದೆ.

ತಮ್ಮ ಈ ನೂತನ ತಂತ್ರಗಾರಿಕೆಯನ್ನು ಭವಿಷ್ಯದಲ್ಲಿ ಹೆಚ್ಚಿನ ಗ್ರಾಹಕರು ಬಳಕೆ ಮಾಡಲಿದ್ದಾರೆ ಎಂಬ ನಂಬಿಕೆಯನ್ನು ಸಾಟೋ ಹೊಂದಿದ್ದಾರೆ.

ಹಗುರ ಭಾರದ ಅಲ್ಯೂಮಿನಿಯಂ ಪರಿಕರಗಳನ್ನು ಹೊಂದಿರುವ ಈ ಟ್ಯಾಬ್ಲೆಟ್ 120 ಕೆ.ಜಿ ತೂಕವನ್ನು ಹೊರುವಷ್ಟು ಸಕ್ಷಮವಾಗಿದೆ. ಅಂದರೆ ಇದು ಓರ್ವ ವ್ಯಕ್ತಿಯನ್ನು ಹೊತ್ತುಕೊಂಡು ಸಾಗಲು ಬೇಕಾದಷ್ಟಾಗಿದೆ.

ಮೂರು ತಾಸಿನಲ್ಲಿ ಚಾರ್ಜ್ ಮಾಡಿಸಬಲ್ಲ ಈ ಕಾರು ಗರಿಷ್ಠ 12 ಕೀ.ಮೀ. ವ್ಯಾಪ್ತಿ ವರೆಗೆ ಸಂಚರಿಸಬಹುದಾಗಿದೆ. ಈ ಮೂಲಕ ಸಿಟಿ ರೈಡಿಂಗ್ ಗೆ ಹೆಚ್ಚು ಸೂಕ್ತವೆನಿಸಲಿದೆ.

ಇದರ ಬಳಕೆ ಕೂಡಾ ಅಷ್ಟೇ ಸುಲಭವಾಗಿದ್ದು, ಪ್ರಯಾಣಿಕ ಇದರ ಮೇಲೆ ನಿಂತುಕೊಂಡಾಗ ಸ್ವಯಂಚಾಲಿತವಾಗಿ ಸ್ಟ್ಯಾರ್ಟ್ ಆಗಲಿದ್ದು, ಬಳಿಕ ಕಾಲು ಕೆಳಗಿಳಿಸಿದರೆ ನಿಲುಗಡೆಯಾಗಲಿದೆ ಎಂದವರು ವಿವರಿಸುತ್ತಾರೆ.

ಇನ್ನು ಅತ್ತಿತ್ತ ತಿರುಗಬೇಕಾದ್ದಲ್ಲಿ ನಿರ್ದಿಷ್ಟ ಬದಿಗೆ ಹೆಚ್ಚು ಭಾರವನ್ನು ನೀಡಿದರಾಯಿತು. ಅಲ್ಲದೆ ಪಾರ್ಕಿಂಗ್ ಜಾಗದ ಕಿರಿಕಿರಿಯೂ ಇರುವುದಿಲ್ಲ. ನಿಮ್ಮ ಗುರಿ ತಲುಪಿದ ಬಳಿಕ ಬ್ಯಾಗಲ್ಲಿ ಹಾಕಿಕೊಂಡು ಸಾಗಬಹುದಾಗಿದೆ.

ವಿದ್ಯುತ್ ಕಾರು ಮೋಟಾರು ನಿಯಂತ್ರಣ ವ್ಯವಸ್ಥೆಗಳ ಬಗ್ಗೆ ಅಧ್ಯಯನ ನಡೆಸುತ್ತಿರುವ ವೇಳೆ ತಮ್ಮ ಮನದಲ್ಲಿ ಇಂತಹದೊಂದು ನಾವೀನ್ಯ ಯೋಚನೆ ಹೊಳಿಯಿತು ಎಂದು ಸಾಟೋ ತಿಳಿಸುತ್ತಾರೆ.

ಅಷ್ಟಕ್ಕೂ ಈ ಪುಟ್ಟ ಕಾರನ್ನು ಭಾರತೀಯ ರುಪಾಯಿಗೆ ಪರಿವರ್ತಿಸಿದಾಗ ಸರಿ ಸುಮಾರು 50,000 ರು.ಗಳಷ್ಟು ($800 USD) ದುಬಾರಿಯೆನಿಸಲಿದೆ. ಅಲ್ಲದೆ ಆಸಕ್ತರು ಮುಂಗಡವಾಗಿ ಬುಕ್ ಮಾಡಿಕೊಳ್ಳುವ ವ್ಯವಸ್ಥೆಯಿದ್ದು, 2016ರಲ್ಲಿ ಮಾರಾಟ ಆರಂಭವಾಗಲಿದೆ.