ಚೀನಾ ಗಾಜಿನ ಸೇತುವೆ ಎಷ್ಟು ಸುರಕ್ಷಿತ?

ಬಲ್ಲ ಮೂಲಗಳ ಪ್ರಕಾರ 11 ಪ್ರಯಾಣಿಕರನ್ನು ಕುಳ್ಳಿರಿಸಿ ವೋಲ್ವೋ ಎಕ್ಸ್ ಸಿ90 ಕ್ರೀಡಾ ಬಳಕೆಯ ಕಾರು ಚೀನಾ ಗಾಜಿನ ಸೇತುವೆಯ ಭದ್ರತೆಯನ್ನು ಪರಿಶೀಲಿಸಿದೆ.

ಇನ್ನೇನು ಕೆಲವೇ ದಿನಗಳಲ್ಲಿ ಚೀನಾ ಗಾಜಿನ ಸೇತುವೆ ಲೋಕಾರ್ಪಣೆಯಾಗಲಿರುವಂತೆಯೇ ಸುರಕ್ಷತೆಯನ್ನು ಖಾತ್ರಿಪಡಿಸಲು ಆಯೋಜಕರಿಂದ ಈ ಎಲ್ಲ ಕಸರತ್ತುಗಳು ಮುಂದುವರಿದಿದೆ.

ಚೀನಾದ ಝಾಂಗ್ಜಿಯಾಂಜಿ ರಾಷ್ಟ್ರೀಯ ಉದ್ಯಾನವನದ (Zhangjiajie Grand Canyon bridge) ಮೇಲ್ಗಡೆಯಲ್ಲಿ ಎರಡು ಬೃಹತ್ ಪರ್ವತ ಶಿಖರಗಳ ನಡುವೆ ಸೇತುವೆಯನ್ನು ಕಟ್ಟಲಾಗಿದೆ.

ಚೀನಾದ ಹುನಾನ್ ಪ್ರಾಂತ್ಯದ ಝಾಂಗ್ಜಿಯಾಂಜಿ ಎಂಬ ಪ್ರದೇಶದಲ್ಲಿ ವಿಶ್ವದ ಅತಿ ದೊಡ್ಡ ಗಾಜಿನ ಸೇತುವೆಯಾಗಿರುವ ಝಾಂಗ್ಜಿಯಾಂಜಿ ಗ್ರಾಂಡ್ ಕ್ಯಾನಾನ್ ಸೇತುವೆ ನೆಲೆಗೊಂಡಿದೆ.

ಸಮುದ್ರ ತಲದಿಂದ 900 ಅಡಿ ಮೇಲ್ಗಡೆಯಾಗಿ ಹಾದು ಹೋಗುವ ಪ್ರಸ್ತುತ ಸೇತುವೆ, ಜಗತ್ತಿನ ಅತಿ ಉದ್ದದ ಹಾಗೂ ಎತ್ತರದಲ್ಲಿರುವ ಗ್ಲಾಸ್ ಬ್ರಿಡ್ಜ್ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.

0.27 ಮೈಲು (1,410 ಅಡಿ) ಉದ್ದದ ಇಲ್ಲಿನ ಗಾಜಿನ ಸೇತುವೆಯಲ್ಲಿ ಏಕಕಾಲಕ್ಕೆ 800ರಷ್ಟು ಪ್ರವಾಸಿಗರಿಗೆ ಅವಕಾಶ ಮಾಡಿಕೊಡಲಾಗುವುದು.

ಗಾಜಿನ ಪಾರದರ್ಶಕತೆಯೇ ಸೇತುವೆಯ ಪ್ರಮುಖ ಆಕರ್ಷಣೆಯಾಗಿದೆ. ಇಸ್ರೇಲ್ ವಾಸ್ತುಶಿಲ್ಪಿ ಹೈಮ್ ಡೋಟನ್ (Haim Dotan) ಎಂಬವರು 19 ಅಡಿ ಅಗಲದ ಈ ವಿಸ್ಮಯಕಾರಿ ಗಾಜಿನ ಸೇತುವೆಯ ಸೂತ್ರಧಾರಿಯಾಗಿದ್ದಾರೆ.

ಎರಡು ಬದಿಗಳಲ್ಲಿ ಸ್ಟೀಲ್ ಬೀಮ್ ಗಳನ್ನು ಹೊಂದಿರುವ ಸಸ್ಪೆನ್ಷನ್ ವ್ಯವಸ್ಥೆ, ಬದಿಯಲ್ಲಿ ಬೃಹತ್ತಾದ ಕೇಬಲ್ ಗಳನ್ನು ಲಗತ್ತಿಸಲಾಗಿದೆ. ಇದು ಬಲವಾಗಿ ಬೀಸುವ ಗಾಳಿ, ಭೂಕಂಪ ಹಾಗೂ ಹಿಮಪಾತಗಳನ್ನು ಎದುರಿಸುವಷ್ಟು ಸಮರ್ಥವಾಗಿದೆ.