ತಲೆಯೆತ್ತಲಿದೆ ಜಸ್ಟ್ 850 ಕೋಟಿ ರು. ವೆಚ್ಚದ ಫೆರಾರಿ ಥೀಮ್ ಪಾರ್ಕ್

By Nagaraja

Published: Friday, March 14, 2014, 18:06 [IST]

ಬಹುಶ: ಜಗತ್ತಿನ ಅತಿ ದುಬಾರಿ ಥೀಮ್ ಪಾರ್ಕ್‌ಗಳಲ್ಲಿ ಇದು ಮೊದಲನೆಯದ್ದಾಗಿರಬಹುದು. ವಿಶ್ವದ ಐಷಾರಾಮಿ ಸೂಪರ್ ಕಾರು ತಯಾರಕ ಸಂಸ್ಥೆಯಾಗಿರುವ ಫೆರಾರಿ ಬರೋಬ್ಬರಿ 850 ಕೋಟಿ ರು.ಗಿಂತಲೂ ದುಬಾರಿ ವೆಚ್ಚದಲ್ಲಿ ಥೀಮ್ ಪಾರ್ಕ್ ನಿರ್ಮಿಸಲು ಹೊರಟಿದೆ.

ಫಾರ್ಮುಲಾ ಒನ್ ರೇಸ್‌ನಲ್ಲಿ ನೀವೆಲ್ಲರೂ ಫೆರಾರಿ ಕಾರುಗಳನ್ನು ನೋಡಿರುತ್ತೀರಾ ಇದೀಗ ನೈಜ ಫೆರಾರಿ ಥೀಮ್ ಪಾರ್ಕ್ ಮಜಾ ಸವಿಯುವ ಕಾಲ ಸನ್ನಿಹಿತವಾಗಿದೆ. ಅಂದ ಹಾಗೆ 2016ನೇ ಇಸವಿಯಲ್ಲಿ ಸ್ಪೇನ್‌ನ ಬಾರ್ಸಿಲೋನಾದಲ್ಲಿರುವ ಪೋರ್ಟ್ ಅವೆಂಚ್ಯುರಾ ರೆಸಾರ್ಟ್‌ನಲ್ಲಿ ನೂತನ ಥೀಮ್ ಪಾರ್ಕ್ ತೆರೆದುಕೊಳ್ಳಲಿದೆ.

ತಲೆಯೆತ್ತಲಿದೆ ಜಸ್ಟ್ 850 ಕೋಟಿ ರು. ವೆಚ್ಚದ ಫೆರಾರಿ ಥೀಮ್ ಪಾರ್ಕ್

ಖಾಸಗಿ ಶೇರು ಬಂಡವಾಳ ಸಂಸ್ಥೆಯಾಗಿರುವ ಇನ್ವೆಸ್ಟ್‌ಇಂಡಸ್ಟ್ರಿಯಲ್ ಹಾಗೂ ಕೆಕೆಆರ್ ಜಂಟಿಯಾಗಿ ಫೆರಾರಿ ಥೀಮ್ ಪಾರ್ಕ್ ನಿರ್ಮಿಸುತ್ತಿದೆ. ಅಲ್ಲದೆ ಈ ಸಂಬಂಧ ಫೆರಾರಿಯ 'ಕುದುರೆ' ಲಾಂಛನವನ್ನು ತಮ್ಮದಾಗಿಸಿಕೊಂಡಿದೆ.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ಇಟಲಿ ಮೂಲದ ಇನ್ವೆಸ್ಟ್‌ಇಂಡಸ್ಟ್ರಿಯಲ್ ಹಿರಿಯ ಪಾಲುದಾರ ಆಂಡ್ರಿಯಾ ಬೊನೊಮಿ, ಫೆರಾರಿ ಯೂನಿಕ್ ಸಂಸ್ಥೆ ಆಗಿದ್ದು, ಈ ಪಾರ್ಕ್ ನಿಜವಾಗ್ಲೂ ಯೂನಿಕ್ ಎನಿಸಿಕೊಳ್ಳಲಿದೆ ಎಂದಿದ್ದಾರೆ.

ಐಕಾನಿಕ್ ಆಸ್ಟನ್ ಮಾರ್ಟಿನ್ ಸಂಸ್ಥೆಯಲ್ಲಿ ಶೇಕಡಾ 40ರಷ್ಟು ಶೇರು ಹೊಂದಿರುವ ಇನ್ವೆಸ್ಟ್‌ಇಂಡಸ್ಟ್ರಿಯಲ್ ತವರೂರಾದ ಇಟಲಿಯನ್ನು ಕಡೆಗಣಿಸಿ ಸ್ಪೇನ್‌ನ ಬಾರ್ಸಿಲೋನಾದಲ್ಲಿ ನೂತನ ಪಾರ್ಕ್ ನಿರ್ಮಿಸಲು ಹೊರಟಿದೆ. ಯಾಕೆಂದರೆ ಇಲ್ಲಿ ಪೋರ್ಟ್ ಅವೆಂಚ್ಯುರಾ ರಿಸಾರ್ಟ್ ಸ್ಥಿತಗೊಂಡಿರುವುದರಿಂದ ಹೆಚ್ಚಿನ ಸಂಖ್ಯೆಯ ಗ್ರಾಹಕರನ್ನು ತನ್ನತ್ತ ಸೆಳೆಯುವ ಇರಾದೆ ಹೊಂದಿದೆ.

ಫಿಯೆಟ್ ಗ್ರೂಪ್ ಆಟೋಮೊಬೈಲ್ಸ್ ಭಾಗವಾಗಿರುವ ಫೆರಾರಿ ಥೀಮ್ ಪಾರ್ಕ್, 75,000 ಚದರ ಮೀಟರ್ ಪ್ರದೇಶದಲ್ಲಿ ಸ್ಥಿತಗೊಂಡಿರಲಿದೆ. ಇಲ್ಲಿ 250 ಕೋಣೆಗಳುಳ್ಳ ಪಂಚಾತಾರಾ ಹೋಟೆಲ್ ಸೌಲಭ್ಯವಿರಲಿದೆ.

ಇದು ಮೊದಲ ಬಾರಿಯೇನಲ್ಲ ಫೆರಾರಿ ಥೀಮ್ ಪಾರ್ಕ್ ನಿರ್ಮಿಸುತ್ತಿರುವುದು. ಈ ಹಿಂದೆ 2010ನೇ ಇಸವಿಯಲ್ಲಿ ಅಬುದಾಬಿಯಲ್ಲಿ ಇಂತಹದೊಂದು ಥೀಮ್ ಪಾರ್ಕ್ ರಚಿಸಿತ್ತು. ಇದೀಗ ದುಬೈನಲ್ಲಿ ಲಭಿಸಿರುವ ಅಭೂತಪೂರ್ವ ಪ್ರತಿಕ್ರಿಯೆಯ ಹಿನ್ನಲೆಯಲ್ಲಿ ತನ್ನ ಥೀಮ್ ಪಾರ್ಕ್ ಯೋಜನೆಯನ್ನು ವಿಸ್ತರಿಸಲು ಫೆರಾರಿ ನಿರ್ಧರಿಸಿದೆ.