ದೆಹಲಿಯಲ್ಲಿ ಫೆರಾರಿ ಕಾರುಗಳ ಜಾತ್ರೆ! F80, 12Cilindri ಹೈಪರ್‌ಕಾರ್‌ಗಳನ್ನು ಕಣ್ಣಾರೆ ನೋಡುವ ಅವಕಾಶ

ರಾಜಧಾನಿ ದೆಹಲಿಯ ಆಟೋಮೊಬೈಲ್ ಪ್ರಿಯರಿಗೆ ಇಂದು (ಅಕ್ಟೋಬರ್ 27) ನಿಜಕ್ಕೂ ವಿಶೇಷ ದಿನ! ದ್ವಾರಕಾದ ಯಶೋಭೂಮಿಯಲ್ಲಿ ಬಹುನಿರೀಕ್ಷಿತ 'ಯುನಿವರ್ಸೊ ಫೆರಾರಿ' (Universo Ferrari) ಕಾರು ಪ್ರದರ್ಶನ ಅಧಿಕೃತವಾಗಿ ಆರಂಭವಾಗಿದ್ದು, ನವೆಂಬರ್ 1 ರವರೆಗೆ ಸಾರ್ವಜನಿಕರಿಗೆ ಮುಕ್ತವಾಗಿರಲಿದೆ. ಭಾರತದಲ್ಲೇ ಮೊದಲ ಬಾರಿಗೆ ಎಫ್‌80 (F80) ಹೈಪರ್‌ಕಾರ್, 12 ಸಿಲಿಂಡ್ರಿ ಮ್ಯಾನುವಲ್ (12Cilindri Manuale) ಹಾಗೂ ಫೆರಾರಿ ಲೂಸ್‌ (Ferrari Luce) ಮಾದರಿಗಳನ್ನು ಇಲ್ಲಿ ಪ್ರದರ್ಶಿಸಲಾಗುತ್ತಿದೆ. ಇವುಗಳ ಜೊತೆಗೆ ಪ್ರಸಿದ್ಧ 499ಪಿ ಲೇ ಮಾನ್ಸ್ (499P Le Mans) ಪ್ರೊಟೊಟೈಪ್ ಕಾರ್ ಕೂಡ ಕಾರು ಪ್ರಿಯರ ಕಣ್ಣು ಕೋರೈಸುತ್ತಿದೆ.

ದೂರದಿಂದಷ್ಟೇ ನೋಡಿ ಕಣ್ತುಂಬಿಕೊಳ್ಳುವ ಬದಲಿಗೆ, ಈ ಐಷಾರಾಮಿ ಫೆರಾರಿ ಕಾರುಗಳ ತೀರಾ ಹತ್ತಿರಕ್ಕೆ ಹೋಗಿ ಪ್ರತಿಯೊಂದು ವಿನ್ಯಾಸವನ್ನೂ ಸೂಕ್ಷ್ಮವಾಗಿ ವೀಕ್ಷಿಸಲು ಇಲ್ಲಿ ಅವಕಾಶವಿದೆ. 12 ಸಿಲಿಂಡ್ರಿ ಮ್ಯಾನುವಲ್ ಕಾರಿನ ಗೇರ್ ಲಿವರ್ ಮತ್ತು ಕ್ಲಚ್ ಪೆಡಲ್ ವಿನ್ಯಾಸ, ಲೂಸ್‌ ಮಾದರಿಯ ಹೈಟೆಕ್ ಕಾಕ್‌ಪಿಟ್ ಒಳಗಿನ ಡಿಜಿಟಲ್ ಫೀಚರ್ಸ್‌ಗಳನ್ನು ಹತ್ತಿರದಿಂದಲೇ ನೋಡಬಹುದು. ಅಷ್ಟೇ ಅಲ್ಲ, ಇಲ್ಲಿನ ಹೆರಿಟೇಜ್ ವಿಭಾಗದಲ್ಲಿ ಅಪರೂಪದ ಫೆರಾರಿ ಎಫ್50 (F50) ಕಾರ್ ಕೂಡ ಪ್ರದರ್ಶನದಲ್ಲಿದ್ದು, ಭಾರತದಲ್ಲಿ ಇದನ್ನು ಕಣ್ಣಾರೆ ನೋಡುವುದೇ ಒಂದು ವಿಶೇಷ ಅನುಭವ.

ದೆಹಲಿಯಲ್ಲಿ ಯುನಿವರ್ಸೊ ಫೆರಾರಿ ಪ್ರದರ್ಶನ: ಟಿಕೆಟ್ ದರ ಮತ್ತು ಸಮಯದ ವಿವರ ಇಲ್ಲಿದೆ

ಈ ಪ್ರದರ್ಶನವು ನವೆಂಬರ್ 1ರ ವರೆಗೆ ಯಶೋಭೂಮಿಯ ಹಾಲ್ 2ರಲ್ಲಿ ದಿನವೂ ನಡೆಯಲಿದೆ (ಅಕ್ಟೋಬರ್ 19 ರಿಂದಲೇ ಸಾರ್ವಜನಿಕ ಪ್ರವೇಶ ಆರಂಭವಾಗಿದೆ). ವೀಕ್ಷಣೆಗಾಗಿ 2 ಗಂಟೆಗಳ ಸ್ಲಾಟ್‌ಗಳಿದ್ದು, ಡಿಸ್ಟ್ರಿಕ್ಟ್ (District) ಆ್ಯಪ್‌ನಲ್ಲಿ ಟಿಕೆಟ್ ದರ ₹2,125 ರಿಂದ ಪ್ರಾರಂಭವಾಗುತ್ತದೆ. ನೀವು ಫೋಟೋ ಅಥವಾ ವೀಡಿಯೊಗಳನ್ನು ರಶ್ ಇಲ್ಲದೆ ಕ್ಲಿಕ್ಕಿಸಿಕೊಳ್ಳಬೇಕೆಂದರೆ ಬೆಳಗಿನ ಜಾವ ಅಥವಾ ತಡಸಂಜೆಯ ಸ್ಲಾಟ್‌ಗಳನ್ನು ಆಯ್ಕೆ ಮಾಡಿಕೊಳ್ಳುವುದು ಒಳಿತು. ವಾರಾಂತ್ಯಕ್ಕಿಂತ ವಾರದ ದಿನಗಳಲ್ಲಿ ಜನದಟ್ಟಣೆ ತುಸು ಕಡಿಮೆ ಇರಲಿದೆ.

ಖಂಡಿತ ತಪ್ಪದೇ ನೋಡಬೇಕಾದ ಫೆರಾರಿ ಕಾರುಗಳು: F80, 12Cilindri Manuale, Luce, 499P

ಪ್ರದರ್ಶನಕ್ಕೆ ಹೋದ ತಕ್ಷಣವೇ ಭಾರತದಲ್ಲಿ ಇದೇ ಮೊದಲ ಬಾರಿಗೆ ಎಂಟ್ರಿ ಕೊಟ್ಟಿರುವ F80 ಹೈಪರ್‌ಕಾರ್‌ನ ಅತ್ಯಾಧುನಿಕ ರೇಸಿಂಗ್ ಹೈಬ್ರಿಡ್ ತಂತ್ರಜ್ಞಾನ ಹಾಗೂ ಏರೋಡೈನಾಮಿಕ್ಸ್ ವಿನ್ಯಾಸವನ್ನು ನೋಡಿ. ನಂತರ, 12Cilindri Manuale ಕಾರಿನ ಸಿಮ್ಯುಲೇಟೆಡ್ 6-ಸ್ಪೀಡ್ ಗೇರ್‌ಬಾಕ್ಸ್ ಮತ್ತು ಕ್ಲಚ್ ಸೆಟಪ್ ವೀಕ್ಷಿಸಿ. ಫೆರಾರಿಯ ಮೊದಲ ಎಲೆಕ್ಟ್ರಿಕ್ ಇಂಟೀರಿಯರ್ ಹೊಂದಿರುವ 'ಲೂಸ್‌' (Luce) ಝೋನ್‌ಗೆ ಭೇಟಿ ನೀಡಿ, ಕೊನೆಯಲ್ಲಿ ಫೆರಾರಿ ರೇಸಿಂಗ್ ಜಗತ್ತಿಗೆ ಕಂಬ್ಯಾಕ್ ಮಾಡಲು ಕಾರಣವಾದ 499P ಕಾರ್‌ನ ರೇಸ್ ಟೆಕ್ನಾಲಜಿಯನ್ನು ಕಣ್ಣುಂಬಿಕೊಳ್ಳಿ.

ತಲುಪುವುದು ಹೇಗೆ? ಮೆಟ್ರೋ ಮಾರ್ಗ ಮತ್ತು ಪಾರ್ಕಿಂಗ್ ವಿವರ

ಹೊಸ ದೆಹಲಿ ಅಥವಾ ಐಜಿಐ ಟರ್ಮಿನಲ್ 3 ಯಿಂದ ವೇಗವಾಗಿ ತಲುಪಲು 'ಏರ್‌ಪೋರ್ಟ್ ಎಕ್ಸ್‌ಪ್ರೆಸ್' ಮೆಟ್ರೋ ಏರಿ 'ಯಶೋಭೂಮಿ ದ್ವಾರಕಾ ಸೆಕ್ಟರ್ 25' ಸ್ಟೇಷನ್‌ನಲ್ಲಿ ಇಳಿಯಿರಿ. ಈ ಮೆಟ್ರೋ ಸ್ಟೇಷನ್ ಪ್ರದರ್ಶನ ಆವರಣದೊಳಗೇ ಇದೆ. ಸ್ವಂತ ವಾಹನದಲ್ಲಿ ಬರುವವರಿಗೆ ಯಶೋಭೂಮಿಯಲ್ಲಿ ಪಾರ್ಕಿಂಗ್ ಸೌಲಭ್ಯವಿದ್ದು, ವಾರಾಂತ್ಯದಲ್ಲಿ ಕೊಂಚ ಬೇಗ ತಲುಪುವುದು ಒಳಿತು. ಇನ್ನು, ಪ್ರದರ್ಶನದಲ್ಲಿರುವ ಕಾರುಗಳನ್ನು ಮುಟ್ಟಲು ಅವಕಾಶವಿಲ್ಲ (No-Touch Policy) ಎಂದು ಭದ್ರತಾ ಸಿಬ್ಬಂದಿ ಸ್ಪಷ್ಟಪಡಿಸಿದ್ದಾರೆ.