ದೆಹಲಿಯಲ್ಲಿ ಫೆರಾರಿ ಯೂನಿವರ್ಸೋ: ಲೂಸ್ ಇವಿ ಮತ್ತು F80 ಹೈಪರ್‌ಕಾರ್‌ಗಳ ಅಬ್ಬರ, ಟಿಕೆಟ್ ಬುಕ್ ಮಾಡೋದು ಹೇಗೆ?

ದೆಹಲಿಯ ಯಶೋಭೂಮಿಯಲ್ಲಿ ಇಂದು (ಅಕ್ಟೋಬರ್ 24) ಅದ್ಧೂರಿ ‘ಫೆರಾರಿ ಯೂನಿವರ್ಸೋ’ ಕಾರು ಪ್ರದರ್ಶನಕ್ಕೆ ಚಾಲನೆ ಸಿಕ್ಕಿದ್ದು, ಸಾರ್ವಜನಿಕ ಪ್ರವೇಶ ಮುಕ್ತವಾಗಿದೆ. ಫೆರಾರಿಯ ಮೊಟ್ಟಮೊದಲ ಸಂಪೂರ್ಣ ಎಲೆಕ್ಟ್ರಿಕ್ ಕಾರು ‘ಲೂಸ್’ (Luce) ಮತ್ತು ಅತ್ಯಾಕರ್ಷಕ ‘F80’ ಹೈಪರ್‌ಕಾ‌ರ್ ಈ ಪ್ರದರ್ಶನದ ಪ್ರಮುಖ ಆಕರ್ಷಣೆಗಳಾಗಿವೆ. ಭಾರತದಲ್ಲೇ ಮೊದಲ ಬಾರಿಗೆ ಫೆರಾರಿ ತನ್ನ ಇವಿ ಕಾರನ್ನು ಸಾರ್ವಜನಿಕವಾಗಿ ಪ್ರದರ್ಶಿಸುತ್ತಿದ್ದು, ದೆಹಲಿ-ಎನ್‌ಸಿಆರ್ ಮಂದಿಗೆ ಈ ವೀಕೆಂಡ್‌ನಲ್ಲೇ ಮಾರನೆಲ್ಲೋದ ಫೆರಾರಿ ಜಗತ್ತನ್ನು ಕಣ್ಣುಂಬಿಕೊಳ್ಳುವ ಅಪರೂಪದ ಅವಕಾಶ ಸಿಕ್ಕಿದೆ. ಈ ಈವೆಂಟ್‌ಗೆ ಭಾರಿ ಜನಸ್ತೋಮ ಹರಿದುಬರುವ ನಿರೀಕ್ಷೆಯಿದ್ದು, ಟಿಕೆಟ್‌ಗಳು ಬೇಗನೆ ಸೋಲ್ಡ್‌ಔಟ್ ಆಗುವ ಸಾಧ್ಯತೆಯಿದೆ.

ಈ ಪ್ರದರ್ಶನದ ಟಿಕೆಟ್‌ಗಳು 'ಡಿಸ್ಟ್ರಿಕ್ಟ್' (District) ಆ್ಯಪ್‌ನಲ್ಲಿ ಲಭ್ಯವಿದ್ದು, ಭಾನುವಾರದವರೆಗೆ ವಿವಿಧ ಸಮಯದ ಸ್ಲಾಟ್‌ಗಳನ್ನು ಕಾಯ್ದಿರಿಸಬಹುದು. ಆರಂಭಿಕ ಟಿಕೆಟ್ ದರ ₹2,125 ಆಗಿದೆ. ಪ್ರವೇಶಕ್ಕೆ ಸರ್ಕಾರಿ ಗುರುತಿನ ಚೀಟಿ (Govt ID) ಕಡ್ಡಾಯ. ಸ್ಥಳದಲ್ಲಿ ಪೇಡ್ ಪಾರ್ಕಿಂಗ್ ಮತ್ತು ವಿಶೇಷ ಚೇತನರಿಗೆ ಅಗತ್ಯ ಅನುಕೂಲಗಳಿವೆ. ಅಂದಹಾಗೆ, ಲೂಸ್ ಕಾರನ್ನು ತಂತ್ರಜ್ಞಾನ ಪ್ರದರ್ಶನಕ್ಕಾಗಿ ಮಾತ್ರ ತರಲಾಗಿದ್ದು, ಭಾರತದಲ್ಲಿ ಇದರ ಬೆಲೆ ಅಥವಾ ಬುಕಿಂಗ್ ಬಗ್ಗೆ ಯಾವುದೇ ಅಧಿಕೃತ ಘೋಷಣೆಯಾಗಿಲ್ಲ. ಹೀಗಾಗಿ ಟಿಕೆಟ್ ಮುಂಚಿತವಾಗಿಯೇ ಬುಕ್ ಮಾಡಿ, ಡಿಜಿಟಲ್ ಕ್ಯೂಆರ್ ಕೋಡ್ ಅನ್ನು ಮೊಬೈಲ್‌ನಲ್ಲಿ ರೆಡಿ ಇಟ್ಟುಕೊಳ್ಳಿ.

ಫೆರಾರಿ ಯೂನಿವರ್ಸೋ ದೆಹಲಿ: ಪ್ರದರ್ಶನದಲ್ಲಿ ಏನೆಲ್ಲಾ ಇರಲಿದೆ?

ಇಲ್ಲಿನ ರೋಡ್-ಕಾ‌ರ್ ವಿಭಾಗದಲ್ಲಿ ಲೂಸ್ ಇವಿ, F80, 12 ಸಿಲಿಂಡ್ರಿ (12Cilindri) ಮಾದರಿಗಳು, ಪುರೋಸಂಗ್ (Purosangue), ಅಮಲ್ಫಿ ಸ್ಪೈಡರ್ (Amalfi Spider) ಮತ್ತು 849 ಟೆಸ್ಟಾರೊಸಾ ಸ್ಪೈಡರ್ (849 Testarossa Spider) ಕಾರುಗಳು ಕಣ್ಣು ಕೋರೈಸಲಿವೆ. ರೇಸಿಂಗ್ ವಿಭಾಗದಲ್ಲಿ 499P ಹಾಗೂ SF-26 ಕಾರುಗಳನ್ನು ವೀಕ್ಷಿಸಬಹುದು. ಇದರ ಜೊತೆಗೆ ಡೇಟೋನಾ SP3, F50, 365 GTB4 ಹಾಗೂ 2008ರ 'ಮ್ಯಾಜಿಕ್ ಇಂಡಿಯಾ ಟೂರ್' ಶೈನ್ ಮಾಡಿದ್ದ 612 ಸ್ಕಾಗ್ಲಿಯೆಟ್ಟಿ ಕಾರುಗಳು ಪ್ರದರ್ಶನದಲ್ಲಿವೆ. ಇನ್ನು ಅತ್ಯಾಕರ್ಷಕ ಬಣ್ಣ, ಲೆದರ್ ಮತ್ತು ಸ್ಟೀರಿಂಗ್ ಆಯ್ಕೆಗಳನ್ನೊಳಗೊಂಡ 'ಟೇಲರ್ ಮೇಡ್' ಸ್ಟೇಷನ್‌ಗಳು ಫೋಟೋ ಶೂಟ್‌ಗೆ ಸೂಕ್ತ ಹಿನ್ನೆಲೆ ಒದಗಿಸಲಿವೆ.

ಫೆರಾರಿ ಯೂನಿವರ್ಸೋ ದೆಹಲಿ: ಟಿಕೆಟ್‌ಗಳು ಮತ್ತು ಸಮಯದ ವಿವರ

ಅಕ್ಟೋಬರ್ 26ರವರೆಗೆ ಬೆಳಿಗ್ಗೆ ಮತ್ತು ಮಧ್ಯಾಹ್ನದ ವಿವಿಧ ಸಮಯಗಳಲ್ಲಿ ಪ್ರವೇಶಿಸಲು ಡಿಸ್ಟ್ರಿಕ್ಟ್‌ನಲ್ಲಿ ಸ್ಲಾಟ್‌ಗಳು ತೆರೆದಿರುತ್ತವೆ. ಕುಟುಂಬ ಸಮೇತರಾಗಿ ಬರಬಹುದು, ಆದರೆ ಸಾಕುಪ್ರಾಣಿಗಳಿಗೆ ಪ್ರವೇಶವಿಲ್ಲ. ಇಡೀ ಪ್ರದರ್ಶನ ಕಣ್ಣುಂಬಿಕೊಳ್ಳಲು ಕನಿಷ್ಠ 2 ಗಂಟೆಗಳ ಸಮಯ ಬೇಕಾಗಬಹುದು. ನಿಮ್ಮ ಸ್ಲಾಟ್‌ಗಿಂತ 15 ನಿಮಿಷ ಮುಂಚಿತವಾಗಿ ತಲುಪುವುದು ಒಳ್ಳೆಯದು. ಅಡಚಣೆಯಿಲ್ಲದೆ ವಿಡಿಯೋ ಅಥವಾ ವಾಕ್‌ಥ್ರೂ ಶೂಟ್ ಮಾಡಲು ಬಯಸುವವರು ಸಂಜೆಯ ನಂತರದ ಸ್ಲಾಟ್‌ಗಳನ್ನು ಆರಿಸಿಕೊಳ್ಳಬಹುದು.

ದಿನಾಂಕ	ಆರಂಭಿಕ ಬೆಲೆ	ವಿವರಗಳು
ಅಕ್ಟೋಬರ್ 24	₹2,125	ಡಿಸ್ಟ್ರಿಕ್ಟ್‌ನಲ್ಲಿ ಹಲವು ಸ್ಲಾಟ್‌ಗಳು ಲಭ್ಯ
ಅಕ್ಟೋಬರ್ 25	₹2,125	ವೀಕೆಂಡ್ ರಶ್: ಲೈವ್ ಆ್ಯಪ್‌ನಲ್ಲಿ ಚೆಕ್ ಮಾಡಿ
ಅಕ್ಟೋಬರ್ 26	₹2,125	ಸಮಯಕ್ಕೆ ತಕ್ಕಂತೆ ವಿವಿಧ ಸ್ಲಾಟ್‌ಗಳು ಲಭ್ಯ

ಫೆರಾರಿ ಯೂನಿವರ್ಸೋ ದೆಹಲಿ: ಫೋಟೋಗ್ರಫಿ ನಿಯಮಗಳು

ವೈಯಕ್ತಿಕ ಕ್ಯಾಮೆರಾಗಳನ್ನು ತರಲು ಅನುಮತಿಯಿದೆಯಾದರೂ, ಕಾರುಗಳನ್ನು ಮುಟ್ಟುವುದನ್ನು ಕಟ್ಟುನಿಟ್ಟಾಗಿ ನಿಷೇಧಿಸಲಾಗಿದೆ. ಟ್ರೈಪಾಡ್ ಮತ್ತು ಸ್ಲೈಡರ್‌ಗಳನ್ನು ಬಳಸದಿರುವುದು ಉತ್ತಮ. ಜನದಟ್ಟಣೆ ಇರುವೆಡೆ ಬೇಗನೆ ಶಾರ್ಟ್ಸ್ ಅಥವಾ ರೀಲ್ಸ್ ಮುಗಿಸಿಕೊಳ್ಳುವುದು ಒಳಿತು, ಕ್ಲೋಸ್-ಅಪ್ ಫೋಟೋಗಳಿಗೆ 'ಟೇಲರ್ ಮೇಡ್' ಸ್ಟೇಷನ್‌ಗಳು ಸುರಕ್ಷಿತ. ಪ್ರದರ್ಶನ ಮುಗಿದ ನಂತರ ನೆನಪಿಗಾಗಿ ಖರೀದಿಸಲು ಫೆರಾರಿಯ ಆಫಿಷಿಯಲ್ ಟೀ-ಶರ್ಟ್‌ಗಳು ಹಾಗೂ ಸ್ಕೇಲ್ ಮಾಡೆಲ್ ಕಾರುಗಳು ಲಭ್ಯವಿರುವ ರಿಟೇಲ್ ಲಾಂಜ್ ಕೂಡ ಇಲ್ಲಿದೆ. ಸ್ಥಳದಲ್ಲಿ ಸಿಬ್ಬಂದಿ ನೀಡುವ ಸೂಚನೆಗಳನ್ನು ಕಡ್ಡಾಯವಾಗಿ ಪಾಲಿಸಿ.

ಫೆರಾರಿ ಯೂನಿವರ್ಸೋ ದೆಹಲಿ: ತಲುಪುವುದು ಹೇಗೆ?

ಈವೆಂಟ್‌ಗೆ ತಲುಪಲು ದೆಹಲಿ ಏರ್‌ಪೋರ್ಟ್ ಎಕ್ಸ್‌ಪ್ರೆಸ್ ಮೆಟ್ರೋ ಮೂಲಕ ಯಶೋಭೂಮಿ ದ್ವಾರಕಾ ಸೆಕ್ಟರ್ 25 ಸ್ಟೇಷನ್‌ಗೆ ತಲುಪಿ. ಅಲ್ಲಿಂದ ಹಾಲ್ 2 ಗೆ ತಲುಪಲು ಮಾರ್ಗಸೂಚಿ ಬೋರ್ಡ್‌ಗಳನ್ನು ಹಾಕಲಾಗಿದೆ. ವಾಹನಗಳಲ್ಲಿ ಬರುವವರಿಗೆ ಪೇಡ್ ಪಾರ್ಕಿಂಗ್ ವ್ಯವಸ್ಥೆಯಿದೆ. ಭದ್ರತಾ ತಪಾಸಣೆ ಇರುವುದರಿಂದ ನಿಮ್ಮ ಐಡಿ ಕಾರ್ಡ್ ಮತ್ತು ಟಿಕೆಟ್ ಕ್ಯೂಆರ್ ಕೋಡ್ ಅನ್ನು ಸಿದ್ಧವಾಗಿಟ್ಟುಕೊಳ್ಳಿ. ವಿಡಿಯೋ ಮಾಡುವ ಆಲೋಚನೆಯಿದ್ದರೆ, ಜನರ ಓಡಾಟಕ್ಕೆ ತೊಂದರೆಯಾಗದಂತೆ ಮೊದಲೇ ಎಕ್ಸಿಟ್ ಪಾಯಿಂಟ್‌ಗಳನ್ನು ಗುರುತಿಸಿಕೊಳ್ಳಿ.