ಬಜಾಜ್ ಆಟೋ ಮಾಜಿ ಅಧ್ಯಕ್ಷ, ದಿಗ್ಗಜ ಉದ್ಯಮಿ ರಾಹುಲ್ ಬಜಾಜ್ ನಿಧನ

ರೂಬಿ ಹಾಲ್ ಕ್ಲಿನಿಕ್‌ನ ಮ್ಯಾನೇಜಿಂಗ್ ಟ್ರಸ್ಟಿ ಡಾ.ಪುರವೇಜ್ ಗ್ರಾಂಟ್ ಪ್ರಕಾರ, ಅವರನ್ನು ಕಳೆದ ಒಂದು ತಿಂಗಳಿನಿಂದ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಭಾನುವಾರ ಸಕಲ ಸರ್ಕಾರಿ ಗೌರವಗಳೊಂದಿಗೆ ರಾಹುಲ್ ಬಜಾಜ್ ಅಂತ್ಯಕ್ರಿಯೆ ನಡೆಯಲಿದೆ. 40 ವರ್ಷಗಳ ಕಾಲ ಬಜಾಜ್ ಗ್ರೂಪ್‌ನ ಅಧ್ಯಕ್ಷರಾಗಿ ಕಾರ್ಯನಿರ್ವಹಿಸಿದ ರಾಹುಲ್ ಬಜಾಜ್ ಅವರ ನಿಧನಕ್ಕೆ ಉದ್ಯಮಿಗಳು ಮತ್ತು ರಾಜಕಾರಣಿಗಳು ಸಂತಾಪ ಸೂಚಿಸಿದ್ದಾರೆ.

ಬಜಾಜ್ ಗ್ರೂಪ್‌ನ ಹೇಳಿಕೆಯಲ್ಲಿ, "ದಿವಂಗತ ರೂಪಾ ಬಜಾಜ್ ಅವರ ಪತಿ ಮತ್ತು ರಾಜೀವ್ / ದೀಪಾ, ಸಂಜೀವ್ / ಶೆಫಾಲಿ ಮತ್ತು ಸುನೈನಾ / ಮನೀಶ್ ಅವರ ತಂದೆ ರಾಹುಲ್ ಬಜಾಜ್ ಅವರ ನಿಧನದ ಬಗ್ಗೆ ನಿಮಗೆ ತೀವ್ರ ದುಃಖದಿಂದ ತಿಳಿಸುತ್ತೇನೆ. ಅವರು 2022 ಫೆಬ್ರವರಿ 12ರಂದು ಅವರ ಹತ್ತಿರದ ಕುಟುಂಬದ ಸದಸ್ಯರ ಸಮ್ಮುಖದಲ್ಲಿ ಮಧ್ಯಾಹ್ನ ನಿಧನರಾದರು" ಎಂದು ತಿಳಿಸಿದೆ.

2021ರ ಏಪ್ರಿಲ್ ತಿಂಗಳಿನಲ್ಲಿ ರಾಹುಲ್ ಬಜಾಜ್ ಅವರು ಬಜಾಜ್ ಆಟೋ ಅಧ್ಯಕ್ಷ ಸ್ಥಾನಕ್ಕೆ ರಾಜೀನಾಮೆ ನೀಡಿದರು ಮತ್ತು ಪ್ರಸ್ತುತ ಕಂಪನಿಯ ಅಧ್ಯಕ್ಷ ಎಮೆರಿಟಸ್ ಆಗಿದ್ದರು. ರಾಹುಲ್ ಬಜಾಜ್ ಅವರು 2001 ರಲ್ಲಿ ಮೂರನೇ ಅತ್ಯುನ್ನತ ನಾಗರಿಕ ಪ್ರಶಸ್ತಿಯಾದ ಪದ್ಮಭೂಷಣ ಪ್ರಶಸ್ತಿಯನ್ನು ಪಡೆದರು.

ಅವರು 2006 ಮತ್ತು 2010 ರ ನಡುವೆ ರಾಜ್ಯಸಭಾ ಸಂಸದರಾಗಿಯೂ ಸೇವೆ ಸಲ್ಲಿಸಿದರು. ರಾಹುಲ್ ಬಜಾಜ್ 1965 ರಲ್ಲಿ ಅವರ ತಂದೆ, ಸ್ವಾತಂತ್ರ್ಯ ಹೋರಾಟಗಾರ ಜಮ್ನಾಲಾಲ್ ಬಜಾಜ್ ಅವರಿಂದ ಬಜಾಜ್ ಗ್ರೂಪ್ ಅನ್ನು ವಹಿಸಿಕೊಂಡರು. ಅವರು ಕಂಪನಿಯನ್ನು ಎತ್ತರಕ್ಕೆ ಮುನ್ನಡೆಸಿದರು.

ಅದರಲ್ಲಿ ದ್ವಿಚಕ್ರ ವಾಹನ ವ್ಯಾಪಾರವು ಪ್ರಮುಖವಾಗಿದೆ. 2008 ರಲ್ಲಿ, ಅವರು ಬಜಾಜ್ ಆಟೋವನ್ನು ಮೂರು ಘಟಕಗಳಾಗಿ ವಿಭಜಿಸಿದರು. ಬಜಾಜ್ ಆಟೋ, ಬಜಾಜ್ ಫಿನ್‌ಸರ್ವ್ ಮತ್ತು ಹೋಲ್ಡಿಂಗ್ ಕಂಪನಿ. ಅವರ ಮಕ್ಕಳಾದ ರಾಜೀವ್ ಬಜಾಜ್ ಮತ್ತು ಸಂಜೀವ್ ಬಜಾಜ್ ಈಗ ಕಂಪನಿಯ ದೈನಂದಿನ ವ್ಯವಹಾರಗಳನ್ನು ನಿರ್ವಹಿಸುತ್ತಿದ್ದಾರೆ.

ರಾಹುಲ್ ಬಜಾಜ್ ಅವರು 1979 ಮತ್ತು 1980 ರ ನಡುವೆ ಭಾರತೀಯ ಕೈಗಾರಿಕಾ ಒಕ್ಕೂಟದ (CII) ಅಧ್ಯಕ್ಷರಾಗಿಯೂ ಸೇವೆ ಸಲ್ಲಿಸಿದರು. ಅವರು ಭಾರತೀಯ ಆಟೋಮೊಬೈಲ್ ತಯಾರಕರ ಸಂಘದ (SIAM) ಅಧ್ಯಕ್ಷರಾಗಿಯೂ ನೇಮಕಗೊಂಡರು. ಅವರು 1986-89 ರ ನಡುವೆ ಹಿಂದಿನ ಭಾರತೀಯ ಏರ್‌ಲೈನ್ಸ್‌ನ ಅಧ್ಯಕ್ಷರಾಗಿ ನೇಮಕಗೊಂಡರು ಮತ್ತು 1999 ರಿಂದ 2000 ರವರೆಗೆ ಎರಡನೇ ಅವಧಿಗೆ CII ಅಧ್ಯಕ್ಷರಾದರು.

ಹಲವಾರು ಮುಖಂಡರು ಹಾಗೂ ಪ್ರಮುಖರು ಸಂತಾಪ ವ್ಯಕ್ತಪಡಿಸಿದ್ದಾರೆ. "ರಾಹುಲ್ ಬಜಾಜ್ ಅವರ ನಿಧನದ ಸುದ್ದಿ ತಿಳಿದು ದುಃಖವಾಯಿತು. ಭಾರತೀಯ ಉದ್ಯಮದ ಡೊಯೆನ್, ಅವರು ಉದ್ಯಮದ ಆದ್ಯತೆಗಳ ಬಗ್ಗೆ ಉತ್ಸುಕರಾಗಿದ್ದರು. ಅವರ ವೃತ್ತಿಜೀವನವು ರಾಷ್ಟ್ರದ ಕಾರ್ಪೊರೇಟ್ ವಲಯದ ಏರಿಕೆ ಮತ್ತು ಸಹಜ ಶಕ್ತಿಯನ್ನು ಪ್ರತಿಬಿಂಬಿಸುತ್ತದೆ. ಅವರ ಅಗಲಿಕೆಯಿಂದ ಉದ್ಯಮ ಜಗತ್ತಿನಲ್ಲಿಶೂನ್ಯವನ್ನು ಉಂಟುಮಾಡುತ್ತದೆ. ಅವರ ಕುಟುಂಬಕ್ಕೆ ನನ್ನ ಸಂತಾಪಗಳು" ಎಂದು ರಾಮನಾಥ್‌ ಕೋವಿಂದ್‌ ಟ್ವೀಟ್‌ ಮಾಡಿದ್ದಾರೆ.

"ಯಶಸ್ವಿ ಉದ್ಯಮಿ, ಲೋಕೋಪಕಾರಿ ಮತ್ತು ಬಜಾಜ್‌ನ ಮಾಜಿ ಅಧ್ಯಕ್ಷ ರಾಹುಲ್ ಬಜಾಜ್ ಅವರಿಗೆ ನನ್ನ ಹೃತ್ಪೂರ್ವಕ ನಮನಗಳು. ಪದ್ಮಭೂಷಣ ಪ್ರಶಸ್ತಿ ಪುರಸ್ಕೃತ ರಾಹುಲ್ ಜಿ ಅವರೊಂದಿಗೆ ಹಲವು ವರ್ಷಗಳಿಂದ ವೈಯಕ್ತಿಕ ಸಂಬಂಧ ಹೊಂದಿದ್ದೇನೆ. ಕಳೆದ ಐದು ದಶಕಗಳಿಂದ ಬಜಾಜ್ ಗ್ರೂಪ್ ಅನ್ನು ಮುನ್ನಡೆಸಿರುವ ರಾಹುಲ್ ಜಿ, ಉದ್ಯಮದಲ್ಲಿ ಪ್ರಮುಖ ಪಾತ್ರ ವಹಿಸಿದ್ದಾರೆ. ದೇವರು ಅಗಲಿದ ಆತ್ಮಕ್ಕೆ ಚಿರಶಾಂತಿ ನೀಡಲಿ ಮತ್ತು ಕುಟುಂಬ ಸದಸ್ಯರಿಗೆ ಶಕ್ತಿ ನೀಡಲಿ. ಶಾಂತಿ" ಎಂದು ನೀತಿ ಗಡ್ಕರಿ ಟ್ವೀಟ್‌ ಮಾಡಿದ್ದಾರೆ. ಇನ್ನು ಉದ್ಯಮಿ ರಾಹುಲ್‌ ಬಜಾಜ್‌ ನಿಧನಕ್ಕೆ ಕೇಂದ್ರ ಸಚಿವ ನೀತಿನ್‌ ಗಡ್ಕರಿ, ದೆಹಲಿ ಮುಖ್ಯಮಂತ್ರಿ ಅರವಿಂದ ಕೇಜ್ರಿವಾಲ್‌ ಸೇರಿದಂತೆ ಹಲವರು ಸಂತಾಪ ಸೂಚಿಸಿದ್ದಾರೆ.

ಬಜಾಜ್ ಆಟೋಗೆ ಸಮಾನಾರ್ಥಕ ಪದದಂತೆಯೇ ಬೆಳೆದ ಹಿರಿಯ ಖ್ಯಾತ ರಾಹುಲ್ ಬಜಾಜ್ ಅವರು 83ನೇ ವಯಸ್ಸಿನಲ್ಲಿ ನಿಧನರಾಗಿದ್ದಾರೆ. ರಾಹುಲ್‌ ಬಜಾಜ್‌, ಭಾರತೀಯ ಕಾರ್ಪೊರೇಟ್ ಜಾಹೀರಾತು ಉದ್ಯಮದಲ್ಲಿಯೇ ಅತ್ಯಂತ ಪ್ರಸಿದ್ಧ ಟ್ಯಾಗ್‌ಲೈನ್‌ ಎಂದೇ ಜನಪ್ರಿಯವಾದ 'ಯು ಜಸ್ಟ್‌ ಕಾಂಟ್‌ ಬೀಟ್‌ ಅ ಬಜಾಜ್‌' ಅಂದರೆ ನೀವು ಬಜಾಜ್ ಅನ್ನು ಸೋಲಿಸಲು ಸಾಧ್ಯವಿಲ್ಲ ಎಂದರ್ಥ, ಹೀಗೆ ಹೇಳುತ್ತಾ ತಮ್ಮ ಅಜ್ಜ ಜಮ್ನಾಲಾಲ್‌ ಬಜಾಜ್‌ ಕಟ್ಟಿದ್ದ ಬಜಾಜ್‌ ಸಂಸ್ಥೆಯನ್ನು ಜಾಗತಿಕ ಮಟ್ಟದಲ್ಲಿ ಬೆಳೆಸಿದರು,

ಕಂಪನಿಯ ದ್ವಿಚಕ್ರ ವಾಹನಕ್ಕಾಗಿ ಮಾಡಿದ್ದ ಜಾಹೀರಾತು 'ಹಮಾರಾ ಬಜಾಜ್' ಎನ್ನುತ್ತಲೇ ದೇಶದ ಮನೆ ಮನೆಗೆ ಕಾಲಿಟ್ಟವರು. ಭಾರತದಲ್ಲಿ ಹೊಸ ಸಂಚಲನವನ್ನು ಸೃಷ್ಟಿಸಿತು. ನಂತರ ಜಾಜ್ ಆಟೋ ಸಂಸ್ಥೆಯು ದೊಡ್ಡ ಮಟ್ಟದ ಬಳೆವಣಿಗೆಯನ್ನು ಸಾಧಿಸಿತು. ಇದರಲ್ಲಿ ರಾಹುಲ್‌ ಬಜಾಜ್‌ ಪ್ರಾಮುಖ ಪಾತ್ರವಹಿಸಿದ್ದಾರೆ.

ಇನ್ನು ಇಳಿ ವಯಸ್ಸಿನಲ್ಲಿಯು ಕಂಪನಿಯ ಆಗುಹೋಗುಗಳನ್ನು ತಾವೇ ಮುನ್ನಡೆಸುತ್ತಿದ್ದವರು. 2021ರ ಏಪ್ರಿಲ್‌ನ ತಿಂಗಳಿನಲ್ಲಿ ಅವರು ಬಜಾಜ್ ಆಟೋ ಅಧ್ಯಕ್ಷ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದರು. ಆದರೆ ಅವರನ್ನು ಐದು ವರ್ಷಗಳ ಅವಧಿಗೆ ಸಂಸ್ಥೆಯ ಗೌರವಾಧ್ಯಕ್ಷರನ್ನಾಗಿ ನೇಮಿಸಲಾಗಿತ್ತು.