ರೂ.71 ಸಾವಿರದ ಸ್ಕೂಟರ್‌ಗೆ ಬರೋಬ್ಬರಿ ರೂ.15 ಲಕ್ಷ ನೀಡಿ ಫ್ಯಾನ್ಸಿ ನಂಬರ್‌ ಖರೀದಿಸಿದ ವ್ಯಕ್ತಿ

ಸ್ಕೂಟರ್ ನಂಬರ್ ಪ್ಲೇಟ್​​ಗಾಗಿ ಖರ್ಚು ಮಾಡಿದ ಹಣದಲ್ಲಿ ಕಾರನ್ನು ಕೊಳ್ಳಬಹುದಾಗಿತ್ತು. ಚಂಡೀಗಢದ ವ್ಯಕ್ತಿಯೊಬ್ಬರು ತಮ್ಮ ಹೋಂಡಾ ಆ್ಯಕ್ಟೀವಾ ಸ್ಕೂಟರ್‌ಗೆ ಫ್ಯಾನ್ಸಿ ನೋಂದಣಿ ಸಂಖ್ಯೆ CH-01- CJ-0001 ಗಾಗಿ ರೂ,15.44 ಲಕ್ಷವನ್ನು ಖರ್ಚು ಮಾಡಿದ್ದಾರೆ. ಅವರು ನಂಬರ್ ಖರೀದಿಸಿದ ವಾಹನವು ನಮಗೆ ಆಶ್ಚರ್ಯವನ್ನುಂಟುಮಾಡಿದೆ, ಈ ವಾಹನ ಹೋಂಡಾ ಆಕ್ಟಿವಾ ಸ್ಕೂಟರ್ ಆಗಿದೆ, ಅದರ ಬೆಲೆಯು ಕೇವಲ ರೂ.71,000 ಆಗಿದೆ.

ಚಂಡೀಗಢದಲ್ಲಿ ನೆಲೆಸಿರುವ ಬ್ರಿಜ್‌ ಮೋಹನ್‌. ವಯಸ್ಸು 42 ವರ್ಷ. ಜಾಹಿರಾತು ಕ್ಷೇತ್ರದ ನೌಕರ. ಅವರು ಚಂಡೀಗಢ ನೋಂದಣಿ ಮತ್ತು ಪರವಾನಗಿ ಪ್ರಾಧಿಕಾರ ನಡೆಸಿದ ಇ-ಹರಾಜಿನಲ್ಲಿ ಈ ವಿಶೇಷ ಸಂಖ್ಯೆಯನ್ನು ರೂ.15.44 ಲಕ್ಷಕ್ಕೆ ಬಿಡ್ ಮಾಡಿ ಖರೀದಿಸಿದ್ದಾರೆ.

ಬ್ರಿಜ್ ಮೋಹನ್ ಅವರು ಇದೇ ಮೊದಲ ಬಾರಿಗೆ ಫ್ಯಾನ್ಸಿ ನಂಬರ್ ಖರೀದಿಸಿದ್ದು, ಇತ್ತೀಚೆಗಷ್ಟೇ ಖರೀದಿಸಿದ ಹೋಂಡಾ ಆಕ್ಟಿವಾ ಸ್ಕೂಟರ್‌ಗೆ ನಂಬರ್ ಬಳಸುವುದಾಗಿ ಹೇಳಿದ್ದು, ನಂತರ ಅದನ್ನು ನನ್ನ ಕಾರಿಗೆ ಬಳಸುವುದಾಗಿ ಅವರು ಹೇಳಿದ್ದಾರೆ.

ಚಂಡೀಗಢದಲ್ಲಿ ಏ.14ರಿಂದ 16ರವರೆಗೆ ನಡೆದ ಫ್ಯಾನ್ಸಿ ನಂಬರ್‌ಗಳ ಹರಾಜಿನಲ್ಲಿ 4.4 ಲಕ್ಷ ರೂ.ನಿಂದ ಗರಿಷ್ಠ 30 ಲಕ್ಷ ರೂ.ವರೆಗೂ ನೋಂದಣಿ ಸಂಖ್ಯೆಗಳು ಹರಾಜಾಗಿವೆ. ಹೊಸ ಸರಣಿಯ CH-01-CJ ಗಾಗಿ ಫ್ಯಾನ್ಸಿ ಸಂಖ್ಯೆಗಳ ಹರಾಜು, ಉಳಿದ ಸಂಖ್ಯೆಗಳೊಂದಿಗೆ ಏಪ್ರಿಲ್ 14 ರಿಂದ ಏಪ್ರಿಲ್ 16, 2022 ರವರೆಗೆ ನಡೆಸಲಾಯಿತು.

ನೋಂದಣಿ ಮತ್ತು ಪರವಾನಗಿ ಪ್ರಾಧಿಕಾರವು ಸುಮಾರು 378 ನೋಂದಣಿ ಸಂಖ್ಯೆಗಳನ್ನು ಹರಾಜು ಮಾಡಿದೆ ಎಂದು ವರದಿಯಾಗಿದೆ. ಇದು ಒಟ್ಟು ರೂ.1.5 ಕೋಟಿ ಗಳಿಸಿತು. ಅತ್ಯಂತ ದುಬಾರಿ ನಂಬರ್ ಅನ್ನು ಬ್ರಿಜ್ ಮೋಹನ್ ಖರೀದಿಸಿದರೆ, ಇತರ ದುಬಾರಿ ಫ್ಯಾನ್ಸಿ ನಂಬರ್‌ಗಳಲ್ಲಿ CH-01- CJ-007 ಮತ್ತು CH-01-CJ-003 ಸೇರಿದೆ, ಇವೆರಡೂ ರೂ.4.4 ಲಕ್ಷ ಮತ್ತು ರೂ.4.2 ಲಕ್ಷ ಮೌಲ್ಯವನ್ನು ಪಡೆದುಕೊಂಡವು.

ಎಲ್ಲಾ ವಿಶೇಷ ಸಂಖ್ಯೆಗಳನ್ನು ಮೀಸಲು ಬೆಲೆಗೆ ಬಿಡ್ ಮಾಡಲಾಗಿದೆ ಮತ್ತು ಬಿಡ್ದಾರರು ಹರಾಜಿನಿಂದ ಒಂದು ತಿಂಗಳೊಳಗೆ ಉಳಿದ ಮೊತ್ತವನ್ನು ಪಾವತಿಸಬೇಕಾಗುತ್ತದೆ ಅಥವಾ ಅವರು ಮೂಲ ಮೊತ್ತದ ಸುಮಾರು 10 ಪ್ರತಿಶತದಷ್ಟು ದಂಡವನ್ನು ಪಾವತಿಸಬೇಕಾಗುತ್ತದೆ.

CH-01- CJ-0001 ಮೀಸಲು ಬೆಲೆ ರೂ,50,000 ಆಗಿದ್ದರೆ, ಇತರ ಎರಡು ಸಂಖ್ಯೆಗಳಿಗೆ ರೂ.30,000 ಆಗಿತ್ತು. ಇಲ್ಲಿಯವರೆಗೆ, ಚಂಡೀಗಢದಲ್ಲಿ 0001 ಸಂಖ್ಯೆಗೆ ಯಾರಾದರೂ ಮಾಡಿದ ಅತಿ ಹೆಚ್ಚು ಬಿಡ್ 2012 ರಲ್ಲಿ, CH-01-AP ಸರಣಿ ಸಂಖ್ಯೆಗೆ ರೂ.26.05 ಲಕ್ಷ ಪಾವತಿಸಿದಾಗ. ಇದು ಅವರ ಹೊಸ ಮರ್ಸಿಡಿಸ್ ಬೆಂಝ್ ಎಸ್-ಕ್ಲಾಸ್‌ಗಾಗಿ ಉದ್ದೇಶಿಸಲಾಗಿತ್ತು.

ಇನ್ನು ಹೋಂಡಾ ಮೋಟಾರ್‌ಸೈಕಲ್ ಮತ್ತು ಸ್ಕೂಟರ್ ಇಂಡಿಯಾ ಕಂಪನಿಯು ತನ್ನ ಅತಿ ಹೆಚ್ಚು ಮಾರಾಟವಾಗುವ ಆಕ್ಟಿವಾ ಸ್ಕೂಟರ್ ಮಾದರಿಗಳ ಬೆಲೆಗಳನ್ನು ಪರಿಷ್ಕರಿಸಿದೆ. ಹೊಸ ಬೆಲೆ ಪರಿಷ್ಕರಣೆಯು ಹೋಂಡಾ ಆಕ್ಟಿವಾ 6ಜಿ ಮತ್ತು ಆಕ್ಟಿವಾ 125 ಎರಡೂ ರೂಪಾಂತರಗಳ ಮೇಲೆ ಪರಿಣಾಮ ಬೀರುತ್ತದೆ.

ಹೋಂಡಾ ಆಕ್ಟಿವಾ 6ಜಿ ಮತ್ತು ಆಕ್ಟಿವಾ 125 ಸ್ಕೂಟರ್‌ಗಳ ಬೆಲೆಯನ್ನು ರೂ,500 ನಿಂದ ರೂ.1,000ಕ್ಕೆ ಹೆಚ್ಚಿಸಲಾಗಿದೆ. ಬೆಲೆ ಏರಿಕೆಯ ನಂತರ, ಆಕ್ಟಿವಾ 6ಜಿ ಸ್ಕೂಟರ್ ಬೆಲೆಯು ರೂ.71,432 ರಿಂದ ಲಭ್ಯವಿರುತ್ತದೆ. ಮತ್ತೊಂದೆಡೆ, ಆಕ್ಟಿವಾ 125 ಈಗ ರೂ.74,989 ನಿಂದ ಲಭ್ಯವಿರುತ್ತದೆ. ಬೆಲೆ ಏರಿಕೆಯ ಹೊರತಾಗಿ, ಸ್ಕೂಟರ್‌ಗಳಲ್ಲಿ ಯಾವುದೇ ಬದಲಾವಣೆಗಳನ್ನು ಮಾಡಲಾಗಿಲ್ಲ. ಹೋಂಡಾ ಆಕ್ಟಿವಾ ದೇಶದಲ್ಲಿ ಹೆಚ್ಚು ಮಾರಾಟವಾಗುವ ಸ್ಕೂಟರ್ ಆಗಿದೆ. ದೇಶದಲ್ಲಿ ಮಾರಾಟವಾಗುವ ಪ್ರತಿ ಎರಡನೇ ಸ್ಕೂಟರ್ ಮತ್ತು ಪ್ರತಿ ಮೂರನೇ ದ್ವಿಚಕ್ರ ವಾಹನವು ಆಕ್ಟಿವಾ ಆಗಿರುತ್ತದೆ ಮತ್ತು ಮಾರಾಟದ ವಿಷಯದಲ್ಲಿ ಮೊದಲ ಸ್ಥಾನದಲ್ಲಿದೆ.

ಈ ಹೋಂಡಾ ಆಕ್ಟಿವಾ 125 ಸ್ಕೂಟರ್ ಬಗ್ಗೆ ಹೇಳುವುದಾದರೆ ಸ್ಟ್ಯಾಂಡರ್ಡ್, ಅಲಾಯ್ ಮತ್ತು ಡಿಲಕ್ಸ್ ಎಂಬ ರೂಪಾಂತರಗಳಲ್ಲಿ ಲಭ್ಯವಿದೆ. ವಿಶ್ವಾಸಾರ್ಹವಾದ ಹಾಗೂ ಹೆಚ್ಚು ಮೈಲೇಜ್ ನೀಡುವ ಈ ಸ್ಕೂಟರ್ ಹೆಚ್ಚು ಜನಪ್ರಿಯತೆಯನ್ನು ಗಳಿಸಿದೆ. ಈ ಹೋಂಡಾ ಆಕ್ಟಿವಾ 125 ಸ್ಕೂಟರ್ ನಲ್ಲಿ 124 ಸಿಸಿ ಏರ್-ಕೂಲ್ಡ್ ಎಂಜಿನ್ ಅಳವಡಿಸಲಾಗಿದೆ. ಈ ಎಂಜಿನ್ 6,500 ಆರ್‌ಪಿಎಂನಲ್ಲಿ 8.18 ಬಿಹೆಚ್‍ಪಿ ಪವರ್ ಮತ್ತು 5,000 ಆರ್‌ಪಿಎಂನಲ್ಲಿ 10.3 ಎನ್ಎಂ ಟಾರ್ಕ್ ಅನ್ನು ಉತ್ಪಾದಿಸುತ್ತದೆ.

ಬಿಎಸ್ 6 ಎಂಜಿನ್ ಹೊಂದಿರುವ ಈ ಆಕ್ಟಿವಾ 125 ಸ್ಕೂಟರಿನಲ್ಲಿ ಪರಿಷ್ಕರಿಸಿದ ಎಲ್‍ಇ‍‍ಡಿ ಹೆಡ್ ಲ್ಯಾಂಪ್, ಮುಂಭಾಗ ಹಾಗೂ ಸೈಡ್‍‍ನಲ್ಲಿ ಕ್ರೋಮ್ ಟ್ರಿಮ್ ಹಾಗೂ ಮುಂಭಾಗದಲ್ಲಿ ಹೊಸ ಎಪ್ರಾನ್‍‍ಗಳನ್ನು ಒಳಗೊಂಡಿವೆ. ಇನ್ನು ಹೋಂಡಾ ಮೋಟಾರ್‌ಸೈಕಲ್ ಮತ್ತು ಸ್ಕೂಟರ್ ಇಂಡಿಯಾ ಕಂಪನಿಯು ಕಳೆದ ತಿಂಗಳು ದೇಶಿಯ ಮಾರುಕಟ್ಟೆಯಲ್ಲಿ 3,09,549 ಯುನಿಟ್‌ಗಳನ್ನು ಮಾರಾಟ ಮಾಡಿದ್ದಾರೆ. ದೇಶೀಯ ಮಾರಾಟವು ಕಳೆದ ತಿಂಗಳಿಗಿಂತ ಶೇಕಡಾ 8.3 ರಷ್ಟು ಏರಿಕೆ ಕಂಡಿದೆ.