ದೋಷಪೂರಿತ ನಂಬರ್‍‍ಪ್ಲೇಟ್‍ ಹೊಂದಿದ್ದ ಕಾರಿಗೆ ಪೊಲೀಸರು ಮಾಡಿದ್ದೇನು?

ಗಮನಿಸಬೇಕಾದ ಸಂಗತಿಯೆಂದರೆ ಬಹುತೇಕರು ಸಿಂಗಲ್ ಡಿಜಿಟ್ ನಂಬರ್‍‍ಗಳನ್ನು ತಮ್ಮ ವಾಹನಗಳ ನಂಬರ್‍‍ಪ್ಲೇಟ್‍‍ನಲ್ಲಿ ಅಳವಡಿಸಿಕೊಳ್ಳುತ್ತಾರೆ. 0009 ಎಂದು ನಂಬರ್‍‍ಪ್ಲೇಟ್‍‍ನಲ್ಲಿ ಬರೆಸುವ ಬದಲು ಕೇವಲ 9 ಎಂದು ಬರೆಯಿಸುತ್ತಾರೆ. ಮೋಟಾರು ವಾಹನಗಳ ಕಾಯ್ದೆಯು ಬೇಕಾಬಿಟ್ಟಿಯಾಗಿ ನಂಬರ್ ಪ್ಲೇಟ್ ಅಳವಡಿಸುವವರ ವಿರುದ್ಧ ಕ್ರಮ ಕೈಗೊಳ್ಳಲು ಪೊಲೀಸರಿಗೆ ಅಧಿಕಾರ ನೀಡಿದೆ.

ಈ ನಿಟ್ಟಿನಲ್ಲಿ ಹೈದರಾಬಾದ್ ಪೊಲೀಸರು ಹೊಸ ಅಭಿಯಾನವನ್ನು ಆರಂಭಿಸಿದ್ದಾರೆ. ದಂಡ ವಿಧಿಸುವ ಬದಲು ವಾಹನಗಳನ್ನು ವಶಕ್ಕೆ ಪಡೆಯುತ್ತಿದ್ದಾರೆ. ಇದರ ಜೊತೆಗೆ ವಾಹನ ಸವಾರರಲ್ಲಿ ಜಾಗೃತಿ ಮೂಡಿಸುತ್ತಿದ್ದಾರೆ.

ಹೈದರಾಬಾದ್‍‍ನ ಪಂಚಗಟ್ಟ ಪೊಲೀಸರು ನಿನ್ನೆ ದೋಷಪೂರಿತ ನಂಬರ್ ಪ್ಲೇಟ್ ಹೊಂದಿದ್ದ ವಾಹನವೊಂದನ್ನು ವಶಕ್ಕೆ ಪಡೆದಿದ್ದಾರೆ. ಪೊಲೀಸರು ಹೀಗೆ ವಶಕ್ಕೆ ಪಡೆದ ಟೊಯೊಟಾ ಫಾರ್ಚೂನರ್ ಕಾರು ಸಿಂಗಲ್ ಡಿಜಿಟ್‍‍ನ ರಿಜಿಸ್ಟ್ರೇಶನ್ ನಂಬರ್ ಅನ್ನು ಹೊಂದಿತ್ತು.

ನಂಬರ್ ಪ್ಲೇಟ್‍‍ನಲ್ಲಿದ್ದ ಬೇರೆ ಅಕ್ಷರಗಳು ಹಾಗೂ ಅಂಕಿಗಳಿಗಿಂತ ವಾಹನದ ಈ ಸಂಖ್ಯೆಯೇ ದೊಡ್ಡದಾಗಿತ್ತು. ಪೊಲೀಸರು ಈ ರೀತಿಯ ವಾಹನಗಳ ಮೇಲೆ ಕಣ್ಣಿಟ್ಟಿದ್ದಾರೆ. ಟೊಯೊಟಾ ಫಾರ್ಚೂನರ್ ಕಾರ್ ಅನ್ನು ವಶಕ್ಕೆ ಪಡೆದ ನಂತರ ಪೊಲೀಸರು ಅದರ ನಂಬರ್ ಪ್ಲೇಟ್ ಅನ್ನು ಬದಲಿಸಿದ್ದಾರೆ.

ಫಾರ್ಚೂನರ್ ಮೊದಲು ಹೊಂದಿದ್ದ ನಂಬರ್ ಹಾಗೂ ನಂತರ ಪೊಲೀಸರು ಅಳವಡಿಸಿದ ನಂಬರ್‍‍ಪ್ಲೇಟ್‍‍ಗಳ ಫೋಟೊಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿವೆ. ಇದರಿಂದಾದರೂ ವಾಹನ ಸವಾರರು ಜಾಗೃತರಾಗಲಿದ್ದಾರೆ ಎಂಬುದು ಪೊಲೀಸರ ಅಭಿಪ್ರಾಯ.

ಟೊಯೊಟಾ ಫಾರ್ಚೂನರ್ ಅನ್ನು ವಶಕ್ಕೆ ಪಡೆದ ನಂತರ ಪೊಲೀಸರು ಸ್ಥಳದಲ್ಲಿಯೇ ಬೇರೆ ನಂಬರ್ ಪ್ಲೇಟ್ ಅಳವಡಿಸಿದ್ದಾರೆ. ಈ ನಂಬರ್ ಪ್ಲೇಟ್‍‍ನ ಹಣವನ್ನು ಫಾರ್ಚೂನರ್ ಮಾಲೀಕನಿಂದ ಪಡೆಯಲಾಯಿತೇ ಎಂಬುದು ತಿಳಿದು ಬಂದಿಲ್ಲ.

ಆದರೆ ಎಲ್ಲಾ ಸಮಯದಲ್ಲೂ ಪೊಲೀಸರು ಈ ರೀತಿಯಾಗಿ ಸೌಮ್ಯವಾಗಿ ವರ್ತಿಸುವ ಸಾಧ್ಯತೆಗಳಿಲ್ಲ. ಸದ್ಯಕ್ಕೆ ಜನರಲ್ಲಿ ಜಾಗೃತಿಯನ್ನು ಮೂಡಿಸುವ ಕೆಲಸವನ್ನು ಮಾಡುತ್ತಿರುವ ಕಾರಣಕ್ಕೆ ಟೊಯೊಟಾ ಫಾರ್ಚೂನರ್ ಕಾರ್ ಅನ್ನು ವಶಕ್ಕೆ ಪಡೆದು ಬೇರೆ ನಂಬರ್ ಪ್ಲೇಟ್ ಅಳವಡಿಸಿದ್ದಾರೆ.

ನಂಬರ್‍‍ಪ್ಲೇಟ್‍‍ಗಳ ಬಗ್ಗೆ ಕಾರ್ಯಾಚರಣೆಯನ್ನು ಆರಂಭಿಸಿದರೆ, ಇದರ ಜೊತೆಗೆ ಉಳಿದ ದಾಖಲೆಗಳನ್ನೂ ಸಹ ಪರಿಶೀಲಿಸಿ, ದಾಖಲೆಗಳಿಲ್ಲದಿದ್ದರೆ ದಂಡ ವಿಧಿಸಲಿದ್ದಾರೆ. ಪೊಲೀಸರು ದಂಡ ವಿಧಿಸುವ ಮುನ್ನ ನಿಮ್ಮ ವಾಹನದ ನಂಬರ್‍‍ಪ್ಲೇಟ್ ಸರಿಯಾಗಿದೆಯೇ ಪರಿಶೀಲಿಸಿ ಕೊಳ್ಳಿ.