Hyundai: ಬಯಸದೇ ಬಂತು ರೂ. 50 ಲಕ್ಷದ EV: 1,100ನೇ ಕಾರನ್ನು ಉಡುಗೊರೆಯಾಗಿ ಕೊಟ್ಟ ಹ್ಯುಂಡೈ

ಹ್ಯುಂಡೈ (Hyundai)ಮೋಟಾರ್ ಇಂಡಿಯಾ ಇಂದು ತನ್ನ ಐಷಾರಾಮಿ ಎಲೆಕ್ಟ್ರಿಕ್ SUV IONIQ 5 ಅನ್ನು 'ಬಾಲಿವುಡ್ ಕಿಂಗ್- ಶಾರುಖ್ ಖಾನ್'ಗೆ ಉಡುಗೊರೆಯಾಗಿ ನೀಡಿದೆ. ಹ್ಯುಂಡೈ ಜೊತೆಗಿನ 25 ವರ್ಷಗಳ ಸುದೀರ್ಘ ಒಡನಾಟವನ್ನು ಸ್ಮರಿಸುತ್ತಾ, ಕಂಪನಿಯು ತನ್ನ ಪ್ರಮುಖ EV SUV ಅನ್ನು ಕಿಂಗ್ ಖಾನ್‌ಗೆ ಪ್ರಸ್ತುತಪಡಿಸಿರುವುದಾಗಿ ಕಂಪನಿ ಹೇಳಿದೆ.

ಎಲ್ಲರಿಗೂ ತಿಳಿದಿರುವಂತೆ ಬಾಲಿವುಡ್ ಬಾದ್‌ಷಾ ಶಾರುಖ್ ಖಾನ್ ಅವರು ಹ್ಯುಂಡೈಗೆ ಬ್ರಾಂಡ್‌ ಅಂಬಾಸಿಡರ್ ಆಗಿದ್ದು, ಅವರ ನಿರಂತರ ಬೆಂಬಲ ಮತ್ತು ಬ್ರ್ಯಾಂಡ್‌ನಲ್ಲಿನ ನಂಬಿಕೆಗೆ ಧನ್ಯವಾದ ತಿಳಿಸಲಾಯಿತು. ಇನ್ನು ಹೊಸ hyundai IONIQ 5 ವಿಷಯಕ್ಕೆ ಬಂದರೆ, ಹ್ಯುಂಡೈ ಈ ವರ್ಷದ ಆರಂಭದಲ್ಲಿ ನಡೆದ ಆಟೋ ಎಕ್ಸ್‌ಪೋದಲ್ಲಿ IONIQ 5 ಅನ್ನು ಬಿಡುಗಡೆ ಮಾಡಿತು.

1000 ಕ್ಕೂ ಹೆಚ್ಚು ಯುನಿಟ್‌ಗಳು ಮಾರಾಟವಾಗುವುದರೊಂದಿಗೆ, IONIQ 5 ಗ್ರಾಹಕರಿಂದ ಉತ್ತಮ ಪ್ರತಿಕ್ರಿಯೆಯನ್ನು ಪಡೆದಿದೆ. ಇದೀಗ ಶಾರುಖ್ ಖಾನ್ ಅವರು IONIQ 5 ರ 1,100 ನೇ ಘಟಕವನ್ನು ಸ್ವೀಕರಿಸಿದ್ದಾರೆ. ಇದು ಅವರ ಕಾರು ಸಂಗ್ರಹಣೆಯಲ್ಲಿ ಮೊದಲ EV ಆಗಿದ್ದು, ಅವರಿಗೆ ಅತ್ಯಂತ ಐಷಾರಾಮಿ ಮತ್ತು ಸೌಕರ್ಯದೊಂದಿಗೆ ಸುಸ್ಥಿರ ಚಲನಶೀಲತೆಯ ಅನುಭವವನ್ನು ನೀಡುತ್ತದೆ ಎಂದು ಕಂಪನಿ ಹೇಳಿದೆ.

ಹುಂಡೈ IONIQ 5 ವಿಶೇಷತೆಗಳು: ಹ್ಯುಂಡೈ IONIQ 5 ಫ್ಯೂಚರಿಸ್ಟಿಕ್ ವಿನ್ಯಾಸವನ್ನು ಹೊಂದಿದ್ದು, E-GMP ಪ್ಲಾಟ್‌ಫಾರ್ಮ್‌ನಲ್ಲಿ ಅಭಿವೃದ್ಧಿಪಡಿಸಲಾಗಿದೆ. ಅತ್ಯಾಧುನಿಕ ಸ್ಮಾರ್ಟ್ ತಂತ್ರಜ್ಞಾನವನ್ನು ಹೊಂದಿದ್ದು, ಗ್ರಾಹಕರಿಗೆ ಶಕ್ತಿಯುತ ಮತ್ತು ಸುಧಾರಿತ ಪವರ್‌ಟ್ರೇನ್‌ಗಳನ್ನು ನೀಡುತ್ತದೆ. ಉನ್ನತ-ಪವರ್ ಬ್ಯಾಟರಿ 72.6 kWh ಅನ್ನು ನೀಡುತ್ತದೆ, ಇದನ್ನು ಪ್ರಮಾಣಿತ ಸುಧಾರಿತ ಮತ್ತು ಹೆಚ್ಚಿನ ಸಾಂದ್ರತೆಯ ಬ್ಯಾಟರಿ ಕೋಶಗಳಿಂದ ನಿರ್ಮಿಸಲಾಗಿದೆ.

350 kW DC ಚಾರ್ಜರ್‌ನೊಂದಿಗೆ, IONIQ 5 ಅನ್ನು ಕೇವಲ 18 ನಿಮಿಷಗಳಲ್ಲಿ ಶೇ10 ರಿಂದ ಶೇ80 ರಷ್ಟು ಚಾರ್ಜ್ ಮಾಡಬಹುದು, ಇದು ಗ್ರಾಹಕರಿಗೆ ಅಲ್ಟ್ರಾ-ಫಾಸ್ಟ್ ಚಾರ್ಜಿಂಗ್ ಅನ್ನು ಒದಗಿಸುತ್ತದೆ. IONIQ 5 ಗ್ರಾಹಕರಿಗೆ 631 ಕಿ.ಮೀಗಳ ARAI ಪ್ರಮಾಣೀಕೃತ ರೇಂಜ್ ನೀಡುತ್ತದೆ. ಪ್ರತಿಯೊಂದು ಪ್ರಯಾಣದಲ್ಲಿಯೂ ನಿಜವಾದ ಬಹುಮುಖತೆ ಮತ್ತು ಪ್ರಯಾಣ ಸೌಕರ್ಯ ನಿಡುತ್ತದೆ ಎಂದು ಹ್ಯುಂಡೈ ಹೇಳಿದೆ.

ಕಾರನ್ನು ಸ್ವೀಕರಿಸಿ ತಮ್ಮ ಕೃತಜ್ಞತೆ ವ್ಯಕ್ತಪಡಿಸಿದ ನಟ ಶಾರುಖ್ ಖಾನ್, "ಹೊಸ ಎಲೆಕ್ಟ್ರಿಕ್ SUV ಹ್ಯುಂಡೈ IONIQ 5 ಅನ್ನು ಸ್ವೀಕರಿಸಲು ನನಗೆ ಗೌರವವಿದೆ. ಇದು ನನ್ನ ಮೊದಲ EV ಅದರಲ್ಲೂ ಹ್ಯುಂಡೈ ಇವಿಯನ್ನು ಪಡೆದಿರುವುದು ನನಗೆ ಖುಷಿಯಾಗಿದೆ. IONIQ 5 ಅದರ ವಿಶಿಷ್ಟ ವಿನ್ಯಾಸ ಮತ್ತು ಅಸಾಧಾರಣ ವೈಶಿಷ್ಟ್ಯಗಳೊಂದಿಗೆ ನೋಡಲು ಆನಂದದಾಯಕವಾಗಿದೆ. ಹ್ಯುಂಡೈನ ಈ ಇವಿಯ 1000 ಯುನಿಟ್‌ಗಳನ್ನು ಮಾರಾಟ ಮಾಡಿದೆ ಎಂಬುದನ್ನು ನಂಬಲಾಗದು.

ಹ್ಯುಂಡೈ ಮೋಟಾರ್ ಇಂಡಿಯಾ ಹಿರಿಯ ಸದಸ್ಯರಾಗಿ ನಮ್ಮ 25 ವರ್ಷಗಳ ಸುದೀರ್ಘ ಪ್ರಯಾಣವು ನನಗೆ ಮತ್ತು ಬ್ರ್ಯಾಂಡ್‌ಗೆ ನಿಜವಾಗಿಯೂ ಫಲಪ್ರದವಾಗಿದೆ. ನಾವು ಒಟ್ಟಿಗೆ ಕೆಲವು ಅದ್ಭುತ ಕ್ಷಣಗಳು ಮತ್ತು ಮೈಲಿಗಲ್ಲುಗಳನ್ನು ಹೊಂದಿದ್ದೇವೆ. ಹ್ಯುಂಡೈ ಬ್ರ್ಯಾಂಡ್ ನನಗೆ ಕುಟುಂಬವಿದ್ದಂತೆ. ಭಾರತದಲ್ಲಿನ ಅತ್ಯಂತ ವಿಶ್ವಾಸಾರ್ಹ ಮತ್ತು ಪ್ರೀತಿಯ ಕಾರ್ ಬ್ರಾಂಡ್‌ನೊಂದಿಗೆ ಸಂಬಂಧ ಹೊಂದಲು ನನಗೆ ಸಂತೋಷವಾಗಿದೆ ಎಂದರು.

ಹ್ಯುಂಡೈ ಮೋಟಾರ್ ಇಂಡಿಯಾ ಲಿಮಿಟೆಡ್‌ನ ಎಂಡಿ ಮತ್ತು ಸಿಇಒ ಅನ್ಸೂ ಕಿಮ್ ಮಾತನಾಡಿ, "ಹ್ಯುಂಡೈ ಕಳೆದ 25 ವರ್ಷಗಳಿಂದ ಶಾರುಖ್ ಖಾನ್ ಅವರೊಂದಿಗೆ ಸಂಬಂಧ ಹೊಂದಿದ್ದು, ಇದು ದೀರ್ಘಾವಧಿಯ ಬ್ರ್ಯಾಂಡ್-ರಾಯಭಾರಿ ಪಾಲುದಾರಿಕೆಯಲ್ಲಿ ಒಂದಾಗಿದೆ. ಶಾರುಖ್ ಅವರು ಹುಂಡೈ ಕುಟುಂಬದ ಸದಸ್ಯರಲ್ಲೊಬ್ಬರು ಮತ್ತು ಇಷ್ಟು ವರ್ಷಗಳಲ್ಲಿ ನಮ್ಮ ಬ್ರ್ಯಾಂಡ್ ಮೌಲ್ಯಗಳು ಮತ್ತು ಪ್ರತಿಪಾದನೆಗಳನ್ನು ಹೆಚ್ಚಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದಾರೆ.

ಧನ್ಯವಾದವಾಗಿ, ನಾವು ನಮ್ಮ ಪ್ರಮುಖ EV- IONIQ 5 ಅನ್ನು SRK ಗೆ ಪ್ರಸ್ತುತಪಡಿಸಿದ್ದೇವೆ, ಇದು ಕಾರಿನ ತಾಂತ್ರಿಕ ಸಾಮರ್ಥ್ಯ ಮತ್ತು ಭಾರತದಲ್ಲಿ ಚಲನಶೀಲತೆಯ ಭವಿಷ್ಯವನ್ನು ಪ್ರದರ್ಶಿಸುತ್ತದೆ. ಹ್ಯುಂಡೈನಲ್ಲಿ ಅವರ ಅಚಲ ಬೆಂಬಲಕ್ಕಾಗಿ ನಾವು ನಿಜವಾಗಿಯೂ ಕೃತಜ್ಞರಾಗಿರುತ್ತೇವೆ. ನಮ್ಮ ಬಂಧವು ಇನ್ನೂ ಹಲವು ವರ್ಷಗಳವರೆಗೆ ಮುಂದುವರಿಯುತ್ತದೆ ಎಂದು ಭಾವಿಸುತ್ತೇವೆ ಎಂದರು.