ಜಮ್ಮುವಿನಿಂದ ಶ್ರೀನಗರಕ್ಕೆ ಸಂಪರ್ಕ ಕಲ್ಪಿಸುವ ಹೊಸ ಸುರಂಗ ಮಾರ್ಗದ ಬಗೆಗಿನ ಆಸಕ್ತಿಕರ ಸಂಗತಿಗಳಿವು

ಈಗ ಇದೇ ರೀತಿಯ ಮತ್ತೊಂದು ಸುರಂಗ ಮಾರ್ಗವು ಶೀಘ್ರದಲ್ಲಿಯೇ ಲೋಕಾರ್ಪಣೆಗೊಳ್ಳಲಿದೆ. ಈ ಸುರಂಗ ಮಾರ್ಗವು ಜಮ್ಮುವಿನಿಂದ ಶ್ರೀನಗರಕ್ಕೆ ಸಂಪರ್ಕ ಕಲ್ಪಿಸುತ್ತದೆ. ಈ ಸುರಂಗ ಮಾರ್ಗದ ಬಗೆಗಿನ ಐದು ಆಸಕ್ತಿದಾಯಕ ಸಂಗತಿಗಳನ್ನು ಈ ಲೇಖನದಲ್ಲಿ ನೋಡೋಣ.

ಜಮ್ಮು - ಶ್ರೀನಗರದ ನಡುವೆ ಸಂಪರ್ಕ

ಈ ಸುರಂಗವು ದಕ್ಷಿಣ ಕಾಶ್ಮೀರದ ಬನಿಹಾಲ್ ಹಾಗೂ ಕಾಜಿಕುಂಡ್'ಗಳ ನಡುವೆ ಸಂಪರ್ಕ ಕಲ್ಪಿಸುತ್ತದೆ. ಈಗ ಹವಾಮಾನಕ್ಕೆ ಅನುಗುಣವಾಗಿ ಬನಿಹಾಲ್ ಹಾಗೂ ದಕ್ಷಿಣ ಕಾಶ್ಮೀರವನ್ನು ಸಂಪರ್ಕಿಸುವ ಮಾರ್ಗವನ್ನು ಕೆಲವೊಮ್ಮೆ ಮುಚ್ಚಲಾಗುತ್ತದೆ.

ಹೊಸ ಸುರಂಗ ಮಾರ್ಗವು ಬಳಕೆಗೆ ಬಂದ ನಂತರ ಈ ಪರಿಸ್ಥಿತಿ ತಪ್ಪಲಿದೆ. ಭಾರೀ ಹಿಮಪಾತ ಹಾಗೂ ಭೂಕುಸಿತದಿಂದ ಉಂಟಾಗುವ ರಸ್ತೆ ತಡೆಯನ್ನು ಈ ಸುರಂಗ ಮಾರ್ಗವು ಸಂಪೂರ್ಣವಾಗಿ ತಪ್ಪಿಸಲಿದೆ.

ಪ್ರಯಾಣದ ಅವಧಿಯಲ್ಲಿ ಕಡಿತ

ಹೊಸ ಸುರಂಗ ಮಾರ್ಗವು ಬಳಕೆಗೆ ಬಂದ ನಂತರ ಪ್ರಯಾಣದ ಅವಧಿ ಕಡಿಮೆಯಾಗುತ್ತದೆ ಎಂದು ಹೇಳಲಾಗಿದೆ. ವರದಿಗಳ ಪ್ರಕಾರ, ಈ ಸುರಂಗ ಮಾರ್ಗದ ಮೂಲಕ ಜಮ್ಮುವಿನಿಂದ ಶ್ರೀನಗರಕ್ಕೆ ಕೇವಲ 1ರಿಂದ 1.5 ಗಂಟೆಗಳಲ್ಲಿ ಸಂಚರಿಸಬಹುದು. ಈ ಮಾರ್ಗವು ಈಗ ಇರುವ ಅಂತರಕ್ಕಿಂತ 16 ಕಿ.ಮೀ ಕಡಿಮೆಯಾಗಲಿದೆ.

ಚಿತ್ರಕೃಪೆ: ಬಸಿತ್ ಜಾರ್ಗರ್ / ಟ್ವಿಟರ್

ಸುರಂಗದ ಉದ್ದ

8.5 ಕಿ.ಮೀ ಉದ್ದವಿರುವ ಈ ಸುರಂಗ ಮಾರ್ಗದ ನಿರ್ಮಾಣಕ್ಕಾಗಿ ರೂ.2,100 ಕೋಟಿ ನಿಗದಿಪಡಿಸಲಾಗಿದೆ. 2011ರಲ್ಲಿ ಆರಂಭವಾಗಿರುವ ಈ ಸುರಂಗ ಮಾರ್ಗದ ನಿರ್ಮಾಣ ಕಾಮಗಾರಿಯು ಶೀಘ್ರದಲ್ಲೇ ಮುಕ್ತಾಯಗೊಳ್ಳುವ ನಿರೀಕ್ಷೆಗಳಿವೆ.

ಕರೋನಾ ವೈರಸ್ ಬಿಕ್ಕಟ್ಟಿನಿಂದ ಕಾಮಗಾರಿ ಸ್ವಲ್ಪ ವಿಳಂಬವಾಗಿದೆ. ಇದರ ಜೊತೆಗೆ ಇನ್ನಷ್ಟು ಅಡಚಣೆಗಳಾಗಿವೆ ಎಂದು ಹೇಳಲಾಗಿದೆ. ಎಲ್ಲಾ ಅಡಚಣೆ ಹಾಗೂ ತೊಂದರೆಗಳನ್ನು ಮೀರಿ ಈ ಸುರಂಗವು ಸದ್ಯದಲ್ಲಿಯೇ ಲೋಕಾರ್ಪಣೆಗೊಳ್ಳಲಿದೆ.

ಸುಗಮ ಸಾರಿಗೆ

ಸುಗಮ ಸಾರಿಗೆಗಾಗಿ ರಚನೆ, ಕಾರ್ಯ ಹಾಗೂ ಪ್ರಸರಣದ ಆಧಾರದ ಮೇಲೆ ಈ ಸುರಂಗವನ್ನು ನಿರ್ಮಿಸಲಾಗುತ್ತಿದೆ. ಈ ಸುರಂಗ ಮಾರ್ಗದ ಒಳಗೆ 124 ಜೆಟ್ ಫ್ಯಾನ್‌, 234 ಸಿಸಿಟಿವಿ ಕ್ಯಾಮೆರಾ ಹಾಗೂ ಅಗ್ನಿಶಾಮಕ ತಂತ್ರಜ್ಞಾನವನ್ನು ಅಳವಡಿಸಲಾಗುತ್ತದೆ.

ಪ್ರತಿ 500 ಮೀಟರ್‌ಗಳಿಗೆ ಒಂದರಂತೆ ತುರ್ತು ನಿರ್ಗಮನ ಪಥವಿರಲಿದೆ. ಈ ಸುರಂಗ ಮಾರ್ಗದಲ್ಲಿ ಸಾಗುವಾಗ ಮಧ್ಯದಲ್ಲಿ ಏನಾದರೂ ತೊಂದರೆ ಕಂಡು ಬಂದರೆ ಈ ತುರ್ತು ಪಥಗಳ ಮೂಲಕ ಸುಲಭವಾಗಿ ನಿರ್ಗಮಿಸಬಹುದು.

ಜವಾಹರ್ ಸುರಂಗ

ಜವಾಹರ್ ಸುರಂಗ ಮಾರ್ಗದಿಂದ 400 ಮೀಟರ್ ಕೆಳಗೆ ಈ ಹೊಸ ಸುರಂಗ ಮಾರ್ಗವನ್ನು ನಿರ್ಮಿಸಲಾಗುತ್ತಿದೆ. ಈ ಹೊಸ ಸುರಂಗ ಮಾರ್ಗವು ಸಮುದ್ರ ಮಟ್ಟದಿಂದ 2,194 ಮೀಟರ್ ಎತ್ತರದಲ್ಲಿದೆ.