ಕನ್ನಡಿಗ ಕೆಎಲ್ ರಾಹುಲ್ ಗತ್ತು ತಿಳಿಯದ RCB: ಇವರ ದುಬಾರಿ ಕಾರುಗಳನ್ನು ನೋಡಿದ್ರೆ ತಲೆ ತಿರುಗುತ್ತೆ!

ಕೆಎಲ್ ರಾಹುಲ್ (KL Rahul) ಈ ಬಾರಿ ಆರ್‌ಸಿಬಿ ತಂಡ ಸೇರಿಕೊಳ್ಳಲಿದ್ದಾರೆ ಅನ್ನೋ ಸುದ್ದಿ ಇತ್ತು. ಇದಕ್ಕೆ ಪೂರಕವಾಗಿ ರಾಹುಲ್ ಕೂಡ ಪರೋಕ್ಷವಾಗಿ ಆರ್‌ಸಿಬಿ ಸೇರಿಕೊಳ್ಳುವ ಬಯಕೆಯನ್ನು ವ್ಯಕ್ತಪಡಿಸಿದಾಗ ಅಬಿಮಾನಿಗಳಿಗೆ ಮತ್ತಷ್ಟು ನಿರೀಕ್ಷೆಯನ್ನು ಹುಟ್ಟು ಹಾಕಿದ್ದರು. ಆದರೆ ಆರ್‌ಸಿಬಿ ಮ್ಯಾನೇಜ್ಮೆಂಟ್ ಮಾತ್ರ ಅಭಿಮಾನಿಗಳ ಮಾತಿಗೆ ಮಣೆ ಹಾಕಿಲ್ಲ. ಸೌದಿ ಅರೇಬಿಯಾದ ಜಿದ್ದಾದಲ್ಲಿ ನಡೆದ ಐಪಿಎಲ್ ಸೀಸನ್-18ರ ಮೆಗಾ ಹರಾಜಿನಲ್ಲಿ ಕೆಎಲ್ ರಾಹುಲ್ ಗಾಗಿ 14 ಕೋಟಿ ರೂ. ಹಾಕಲು ಮನಸು ಮಾಡಿಲ್ಲ ಎಂಬುದು ಬೇಸರದ ಸಂಗತಿ.

ಆರ್‌ಸಿಬಿಯ ನಡೆಗೆ ಸೋಷಿಯಲ್ ಮೀಡಿಯಾದಲ್ಲಿ ಅಭಿಮಾನಿಗಳು ಭಾರೀ ಆಕ್ರೋಶವನ್ನು ವ್ಯಕ್ತಪಡಿಸುತ್ತಿದ್ದಾರೆ. ಕೆಎಲ್ ರಾಹುಲ್ 14 ಕೋಟಿ ರೂಪಾಯಿಗೆ ಡೆಲ್ಲಿ ಕ್ಯಾಪಿಟಲ್ಸ್ ಪಾಲಾಗಿದ್ದಾರೆ. ಇಂಡಿಯನ್ ಪ್ರೀಮಿಯರ್ ಲೀಗ್​ನಲ್ಲಿ (IPL) ಇತಿಹಾಸದಲ್ಲಿ ಕೆಎಲ್ ರಾಹುಲ್ ಈವರೆಗೆ 132 ಪಂದ್ಯಗಳನ್ನು ಆಡಿ ಒಟ್ಟು 4683 ರನ್ ಕಲೆಹಾಕಿದ್ದಾರೆ. ಇದರಲ್ಲಿ 4 ಶತಕ ಹಾಗೂ 37 ಅರ್ಧಶತಕಗಳಿವೆ.

ಕೆಎಲ್ ರಾಹುಲ್ ಈವರೆಗೆ 4 ತಂಡಗಳ ಪರ ಕಣಕ್ಕಿಳಿದಿದ್ದಾರೆ. ಇದರಲ್ಲಿ ಎರಡು ಟೀಮ್​​ಗಳ ನಾಯಕರಾಗಿದ್ದರು. ಇದೀಗ ಕೆಎಲ್​ಆರ್​ 5ನೇ ತಂಡದ ಪರ ಕಣಕ್ಕಿಳಿಯಲು ರೆಡಿಯಾಗಿದ್ದಾರೆ. ಈ ಪ್ರತಿಭಾನ್ವಿತ ಆಟಗಾರನಿಗೆ ಕಾರುಗಳೆಂದ್ರೆ ಸಖತ್ ಕ್ರೇಜ್ ಇದೆ. KL ರಾಹುಲ್ ಒಡೆತನದ ಕೆಲವು ದುಬಾರಿ ಕಾರುಗಳನ್ನು ಇಲ್ಲಿ ನೋಡೋಣ.

ರೇಂಜ್ ರೋವರ್ ವೆಲಾರ್: ರೇಂಜ್ ರೋವರ್ ವೆಲಾರ್ ಜಾಗತಿಕವಾಗಿ ಜನಪ್ರಿಯ ಎಸ್‍ಯುವಿ. ಕೆ.ಎಲ್ ರಾಹುಲ್ ಹೊಂದಿರುವ ನಿರ್ದಿಷ್ಟ ಎಸ್‌ಯುವಿಯು 5.0-ಲೀಟರ್ ಸೂಪರ್ಚಾರ್ಜ್ಡ್ V8 ಆವೃತ್ತಿಯಾಗಿದೆ ಎಂದು ತಿಳಿದುಬಂದಿದೆ. ಈ ಎಸ್‍ಯುವಿಯಲ್ಲಿ 8-ಸ್ಪೀಡ್ ಗೇರ್‌ಬಾಕ್ಸ್ ಹೊಂದಿದ್ದು, 543bhp ಪವರ್ ಮತ್ತು 680Nm ಟಾರ್ಕ್ ಅನ್ನು ಉತ್ಪಾದಿಸುವ ಸಾಮರ್ಥ್ಯವನ್ನು ಹೊಂದಿದೆ.

ಆಸ್ಟನ್ ಮಾರ್ಟಿನ್ DB11: ಪೋರ್ಷೆ ಮತ್ತು ಫೆರಾರಿಗಳಿಗೆ ಹೋಲಿಸಿದರೆ ಆಸ್ಟನ್ ಮಾರ್ಟಿನ್ಸ್ ಭಾರತದಲ್ಲಿ ಅಪರೂಪ. KL ರಾಹುಲ್ ಆಸ್ಟನ್ ಮಾರ್ಟಿನ್ DB11 ನ ಹೆಮ್ಮೆಯ ಮಾಲೀಕರಾಗಿದ್ದಾರೆ. ಇದು ಭಾರತದಲ್ಲಿ ಕೆಲವರು ಮಾತ್ರ ಹೊಂದಿರುವ ಮಾದರಿಯಾಗಿದೆ. ಆಸ್ಟನ್ ಮಾರ್ಟಿನ್ DB11, 5.2-ಲೀಟರ್ V12 ಎಂಜಿನ್‌ನಿಂದ ಚಾಲಿತವಾಗಿದ್ದು, ಇದು 8-ಸ್ಪೀಡ್ DCT ಗೇರ್‌ಬಾಕ್ಸ್ ಮೂಲಕ 503bhp ಪವರ್ ಮತ್ತು 675Nm ಟಾರ್ಕ್ ಉತ್ಪಾದಿಸುವ ಸಾಮರ್ಥ್ಯವನ್ನು ಹೊಂದಿದೆ.

ಮರ್ಸಿಡಿಸ್ ಬೆಂಝ್ C43 AMG: KL ರಾಹುಲ್ ಅವರ ಕಾರು ಸಂಗ್ರಹಣೆಯಲ್ಲಿ ಮುಂದಿನದು ಪ್ರಸಿದ್ಧ Mercedes-Benz C43 AMG, ಇದು ಅವರ ಮೊದಲ ಕಾರು ಎಂದು ಸಹ ಹೇಳಲಾಗುತ್ತದೆ. ಜರ್ಮನ್ ಕಾರ್ಯಕ್ಷಮತೆಯ ಸೆಡಾನ್ ಟ್ವಿನ್-ಟರ್ಬೋಚಾರ್ಜ್ಡ್ 3.0-ಲೀಟರ್ V6 ಎಂಜಿನ್‌ನೊಂದಿಗೆ ಬರುತ್ತದೆ. ಇದು 9-ಸ್ಪೀಡ್ ಆಟೋಮ್ಯಾಟಿಕ್ ಗೇರ್‌ಬಾಕ್ಸ್ ಹೊಂದಿದೆ. 385bhp ಪವರ್ ಮತ್ತು 520Nm ಟಾರ್ಕ್ ಅನ್ನು ಉತ್ಪಾದಿಸುತ್ತದೆ.

ಬಿಎಂಡಬ್ಲ್ಯು X5: ಕೆ.ಎಲ್ ರಾಹುಲ್‌ನ ಪಟ್ಟಿಯಲ್ಲಿರುವ ಅಂತಿಮ ಕಾರು ಬಿಎಂಡಬ್ಲ್ಯು X5, ಇದು ಕೂಡ ಜಾಗತಿಕವಾಗಿ ಜನಪ್ರಿಯ ಎಸ್‍ಯುವಿಯಾಗಿದೆ. ಅಲ್ಲದೇ ಸಿನಿಮಾ ರಂಗದಲ್ಲಿ ಹಲವರು ಈ ಎಸ್‌ಯುವಿಯನ್ನು ಬಳಸುತ್ತಿದ್ದಾರೆ.ಕೆಎಲ್ ರಾಹುಲ್ ಒಡೆತನದ ಬಿಎಂಡಬ್ಲ್ಯು X5 4.4-ಲೀಟರ್ ಟ್ವಿನ್-ಟರ್ಬೊ V8 ಎಂಜಿನ್‌ನಿಂದ ಚಾಲಿತವಾಗಿದೆ, ಇದರ 8-ಸ್ಪೀಡ್ ಗೇರ್‌ಬಾಕ್ಸ್‌ 300bhp ಪವರ್ ಅನ್ನು ಉತ್ಪಾದಿಸುತ್ತದೆ.

ಲ್ಯಾಂಬೋರ್ಗಿನಿ ಹುರಾಕನ್ ಸ್ಪೈಡರ್: ಹುರಾಕನ್ ಇವೊ ಸ್ಪೈಡರ್ ಕನ್ವರ್ಟಬಲ್ ಸಾಫ್ಟ್ ಟಾಪ್ ಹೊಂದಿರುವ ಕಾರಣಕ್ಕೆ ಸ್ಟಾಂಡರ್ಡ್ ಮಾದರಿಗಿಂತ 120 ಕೆ.ಜಿ ಹೆಚ್ಚು ತೂಕವನ್ನು ಹೊಂದಿರುವ ಮಾದರಿಯಾಗಿದೆ. 50 ಕಿ.ಮೀ ವೇಗದಲ್ಲಿ ಚಲಿಸುತ್ತ ಈ ಸಾಫ್ಟ್ ಟಾಪ್ ರೂಫ್ ಅನ್ನು ಕೇವಲ 15 ಸೆಕೆಂಡುಗಳಲ್ಲಿ ಪಡೆದುಕೊಳ್ಳುತ್ತದೆ. ಲ್ಯಾಂಬೊರ್ಗಿನಿ ಹುರಾಕನ್ ಇವೊ ಸ್ಪೈಡರ್ 0 - 100 ಕಿ.ಮೀ ವೇಗವನ್ನು ಕೇವಲ 3.1 ಸೆಕೆಂಡುಗಳಲ್ಲಿ ಕ್ರಮಿಸುವ ಸಾಮರ್ಥ್ಯವನ್ನು ಹೊಂದಿದೆ.

ಡ್ರೈವ್‌ಸ್ಪಾರ್ಕ್ ಕನ್ನಡ ವೆಬ್‌ಸೈಟ್ ತ್ವರಿತವಾಗಿ ಆಟೋಮೊಬೈಲ್ ಸಂಬಂಧಿಸಿದ ಸುದ್ದಿಗಳನ್ನು ನೀಡುತ್ತದೆ. ಜೊತೆಗೆ ಸೋಷಿಯಲ್ ಮೀಡಿಯಾಗಳ ಮೂಲಕ ತಕ್ಷಣವೇ ಓದುಗರೊಂದಿಗೆ ಸುದ್ದಿಗಳನ್ನು ಶೇರ್ ಮಾಡುತ್ತೇವೆ. ಇತ್ತೀಚಿನ ಕಾರು, ಬೈಕ್ ಸುದ್ದಿ, ಟೆಸ್ಟ್ ಡ್ರೈವ್ ವರದಿಗಳು ಮತ್ತು ವೀಡಿಯೊಗಳನ್ನು ಪಡೆಯಲು ನಮ್ಮ ಫೇಸ್‌ಬುಕ್, ಇನ್‌ಸ್ಟಾಗ್ರಾಮ್, ಯೂಟ್ಯೂಬ್ ಪೇಜ್‌ಗಳೊಂದಿಗೆ ಫಾಲೋ ಮಾಡಿ. ನಿಮಗೆ ನಮ್ಮ ಯಾವುದೇ ಸುದ್ದಿ ಇಷ್ಟವಾದರೆ ಲೈಕ್, ಕಾಮೆಂಟ್ ಮಾಡುವುದನ್ನು ಮರೆಯದಿರಿ.