ಶಿಕ್ಷಕಿಗೆ ಬೆಂಝ್ ಕಾರು ಉಡುಗೊರೆಯಾಗಿ ನೀಡಿದ ನರ್ಸರಿ ಬಾಲಕಿ

By Nagaraja

Published: Tuesday, June 7, 2016, 15:51 [IST]

ಶಿಕ್ಷಕರ ದಿನಾಚರಣೆಯಂದು ಅಧ್ಯಾಪಕರಿಗೆ ಗುಲಾಬಿ ಹೂವನ್ನು ನೀಡುವುದನ್ನು ಹೊರತುಪಡಿಸಿದರೆ ಶಿಕ್ಷಕರಿಗೆ ಉಡುಗರೆ ನೀಡುವ ವಾಡಿಕೆಯೇ ಇಲ್ಲ. ಅಬ್ಬಬ್ಬಾ ಅಂದರೆ ಅಧ್ಯಾಪಕರ ನಿವೃತ್ತಿ ವೇಳೆ ಉಡುಗೊರೆ ನೀಡಲೂ ಬಹುದು. ಹಾಗಿರಬೇಕೆಂದರೆ ಅತ್ತ ಕುವೈತ್ ನಲ್ಲಿ ನರ್ಸರಿ ಶಾಲಾ ಬಾಲಕಿಯೊಬ್ಬಾಕೆ ತನ್ನ ಶಿಕ್ಷಕಿಗೆ ಅತಿ ದುಬಾರಿ ಮರ್ಡಿಡಿಸ್ ಬೆಂಝ್ ಕಾರನ್ನು ಉಡುಗೊರೆ ನೀಡುವ ಮೂಲಕ ಗಮನ ಸೆಳೆದಿದ್ದಾರೆ.

ಈ ವಿಷಯ ಕಿವಿಗೆ ಬೀಳುತ್ತಿದ್ದಂತೆಯೇ ಹಲವರಲ್ಲಿ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದ್ದು 5ರ ಹರೆಯದ ಬಾಲಕಿ ನೂರ್ ಅಲ್ ಫಾರಿಸ್ ಮುಗ್ಧ ಮನಸ್ಸು ಮಾತ್ರ ಮಂದಹಾಸ ಬೀರಿದೆ. ಪ್ರಸ್ತುತ ಸುದ್ದಿಯೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿ ಪಸರಿಸುತ್ತಿದೆ.

ಶಿಕ್ಷಕಿಗೆ ಬೆಂಝ್ ಕಾರು ಉಡುಗೊರೆಯಾಗಿ ನೀಡಿದ ನರ್ಸರಿ ಬಾಲಕಿ

ಕಿಂಡರ್ ಗಾರ್ಟನ್ ಶಾಲೆಯಿಂದ ತೇರ್ಗಡೆ ಹೊಂದಿರುವುದಕ್ಕಾಗಿ ತಮ್ಮ ನೆಚ್ಚಿನ ಶಿಕ್ಷಕಿ ಮಿಸ್ ನಾದಿಯಾ ಅವರಿಗೆ ಈ ಪುಟ್ಟ ಬಾಲಕಿ ಐಷಾರಾಮಿ ಬೆಂಝ್ ಕಾರನ್ನು ಉಡುಗರೆಯಾಗಿ ನೀಡಿದ್ದಾರೆ.

ಬೆಂಝ್ ಕಾರಿನ ಮುಂಭಾಗದ ಬೊನೆಟ್ ನಲ್ಲಿ ಕುಳಿತುಕೊಂಡಿರುವ ಬಾಲಕಿ ವಿಂಡ್ ಶೀಲ್ಡ್ ಮೇಲೆ ಇದು ನನ್ನ ನೆಚ್ಚಿನ ಟೀಚರ್ ಗೆ ನೀಡುವ ಉಡುಗೊರೆ ಎಂದು ಅರೇಬಿ ಭಾಷೆಯಲ್ಲಿ ಬರೆದಿಟ್ಟಿದ್ದಾರೆ.