ಟ್ರಯಂಪ್‌ನ ವಿಶಿಷ್ಟ ಬೈಕ್ ಖರೀದಿಸಿದ ಮಲಯಾಳಂ ನಟ

ಈ ಬಗ್ಗೆ ತಮ್ಮ ಮನದಾಳವನ್ನು ಹಂಚಿಕೊಂಡಿರುವ ದುಲ್ಖರ್, ಟ್ರಯಂಪ್ ಬೊನವಿಲ್ ಬೈಕನ್ನು ಸಂಪೂರ್ಣವಾಗಿಯೂ ತಮ್ಮ ವೈಯಕ್ತಿಕ ಬಯಕೆಗಳಿಗನುಸಾರವಾಗಿ ನಿರ್ಮಿಸಲಾಗಿದೆ ಎಂದಿದ್ದಾರೆ.

ಪ್ರಸ್ತುತ ಬೈಕ್ ವಿನ್ಯಾಸಕ್ಕೆ ಏಳೆಂಟು ತಿಂಗಳುಗಳೇ ಸಂದಿವೆ. ಅಲ್ಲದೆ ಇದರ ಬಣ್ಣವನ್ನು ಆಯ್ಕೆ ಮಾಡಲು ದುಲ್ಖರ್ ಮೂರು ತಿಂಗಳಷ್ಟು ಸಮಯ ತೆಗೆದುಕೊಂಡಿದ್ದರು.

1930ರಿಂದ 1980ರ ಕಾಲಾವಧಿಯಲ್ಲಿ ಜೀವಿಸಿದ್ದ 'ದಿ ಕಿಂಗ್ ಆಫ್ ಕೂಲ್' ಎಂದೇ ಪ್ರಸಿದ್ಧರಾಗಿರುವ ದಿಗ್ಗಜ ನಾಯಕ ಸ್ಟೀವ್ ಮೆಕ್ ಕ್ವೀನ್ ಅವರ ಗೌರವಾರ್ಥ ದುಲ್ಖರ್ ಈ ಬೈಕ್ ವಿನ್ಯಾಸಗೊಳಿಸಿದ್ದಾರೆ.

ಈ ಸಂಬಂಧ ಕೊಚ್ಚಿಯಲ್ಲಿ ಸ್ಥಿತಗೊಂಡಿರುವ ಶ್ಯಾಮಡೈನಾಮಿಕ್ ಟ್ರಯಂಪ್ ಗೆ ಧನ್ಯವಾದ ಸಲ್ಲಿಸಿರುವ ಮಲಯಾಳಂ ನಟ ದುಲ್ಖರ್ ಸಲ್ಮಾನ್, ಚಿತ್ರಗಳನ್ನು ಅಭಿಮಾನಿಗಳ ಜೊತೆ ಹಂಚಿಕೊಂಡಿದ್ದಾರೆ.

ಇದರಲ್ಲಿ ಸ್ಟ್ಯಾಂಡರ್ಡ್ ಮಾದರಿಗಿಂತಲೂ ವಿಭಿನ್ನವಾಗಿ ಬದಿಯಲ್ಲಿ ನಂಬರ್ ಪ್ಲೇಟ್ ಲಗತ್ತಿಸಲಾಗಿದೆ. ಉಳಿದಂತೆ ಮಾರ್ಪಾಡುಗೊಳಿಸಿದ ಫ್ರಂಟ್ ಮಡ್ ಗಾರ್ಡ್, ಮಿರರ್, ಎಕ್ಸಾಸ್ಟ್, ರಿಯರ್ ಮಡ್ ಗಾರ್ಡ್, ಕಸ್ಟಮ್ ಸೀಟು, ರಿಮ್ ಗಳನ್ನು ನೋಡಬಹುದಾಗಿದೆ.

ಅಂದ ಹಾಗೆ ಟ್ರಯಂಪ್ ಬೊನವಿಲ್, 863 ಸಿಸಿ ಡಿಒಎಚ್‌ಸಿ ಏರ್ ಕೂಲ್ಡ್ ಎಂಜಿನ್ ನಿಂದ ನಿಯಂತ್ರಿಸಲ್ಪಡಲಿದ್ದು, 61 ಎನ್ ಎಂ ತಿರುಗುಬಲದಲ್ಲಿ 60 ಅಶ್ವಶಕ್ತಿಯನ್ನು ಉತ್ಪಾದಿಸಲಿದೆ.

ಅಂದ ಹಾಗೆ ಟ್ರಯಂಪ್ ಬೊನವಿಲ್ ದೇಶದಲ್ಲಿ ದೆಹಲಿ ಎಕ್ಸ್ ಶೋ ರೂಂ ಬೆಲೆಯ ಪ್ರಕಾರ 6.9 ಲಕ್ಷ ರು.ಗಳ ವರೆಗೆ ದುಬಾರಿಯೆನಿಸುತ್ತದೆ. ಇನ್ನು ದುಲ್ಖರ್ ಇದಕ್ಕಿಂತಲು ಹೆಚ್ಚು ದುಡ್ಡು ಇದರ ನಿರ್ಮಾಣಕ್ಕಾಗಿ ವ್ಯಯ ಮಾಡಿರುತ್ತಾರೆ.

ಒಟ್ಟಿನಲ್ಲಿ ಬಿಎಂಡಬ್ಲ್ಯು ಇ46 ಎಂ3, ಎಂ5, ಮರ್ಸಿಡಿಸಿ್ ಬೆಂಝ್ ಎಸ್ ಎಲ್ ಎಸ್ ಎಎಂಜಿ, ಬಿಎಂಡಬ್ಲ್ಯು ಕೆ1200 ಜಿಎಸ್ ಹಾಗೂ ಬಿಎಂಡಬ್ಲ್ಯು ಐ8 ಮುಂತಾದ ಐಷಾರಾಮಿ ಕಾರು ಬೈಕ್ ಗಳ ಸಂಗ್ರಹವನ್ನು ಹೊಂದಿರುವ ಈ ಮಲಯಾಳಂ ನಟ ಬ್ರಿಟನ್ ನ ಮಗದೊಂದು ಐಕಾನಿಕ್ ಮೋಟಾರ್ ಸೈಕಲ್ ತಮ್ಮದಾಗಿಸಿಕೊಂಡಿದ್ದಾರೆ.