ಕಾರಿನ ಮೇಲೆ 3,400 ಲಿಪ್‌ಸ್ಟಿಕ್ ಕಿಸ್ ಮಾರ್ಕ್ಸ್: ಪೊಲೀಸರ ಎಂಟ್ರಿಯಿಂದ ಮಾಲೀಕನಿಗೆ ಬಿತ್ತು ದಂಡ!

ಗ್ವಾಲಿಯರ್‌ನಲ್ಲಿ ಕಳೆದ ವಾರಾಂತ್ಯದಲ್ಲಿ ಮಾರುತಿ ಸುಜುಕಿ ಸ್ವಿಫ್ಟ್ ಕಾರಿನ ವಿಡಿಯೋವೊಂದು ಸೋಷಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗಿತ್ತು. ಕಾರಿನ ಮೇಲೊಂದಿಷ್ಟಲ್ಲ, ಬರೋಬ್ಬರಿ 3,400 ಲಿಪ್‌ಸ್ಟಿಕ್ ಮುದ್ದಿನ ಗುರುತುಗಳಿದ್ದವು! ಈ ವಿಡಿಯೋ ವೈರಲ್ ಆಗ್ತಿದ್ದಂತೆ ಕಾರನ್ನು ಪತ್ತೆಹಚ್ಚಿದ ಪೊಲೀಸರು, ಅದನ್ನು ಜಪ್ತಿ ಮಾಡಿ ಬರೋಬ್ಬರಿ ₹5,500 ದಂಡ ವಿಧಿಸಿದ್ದಾರೆ. ಅಷ್ಟೇ ಅಲ್ಲ, ಕಾರಿನ ಮಾಲೀಕನ ಕೈಲಿಂದಲೇ ಪೊಲೀಸ್ ಠಾಣೆಯಲ್ಲಿ ಆ ಕಲೆಯನ್ನು ಒರೆಸಿ ಶುಚಿಗೊಳಿಸಿದ್ದಾರೆ. ಈ ಕ್ಲಿಪ್ ಈಗಾಗಲೇ ಸುಮಾರು 55 ಲಕ್ಷಕ್ಕೂ ಹೆಚ್ಚು ವೀವ್ಸ್ ಪಡೆದುಕೊಂಡಿದೆ. ಹಾಗಾದರೆ ಈ ಬಗ್ಗೆ ಮೋಟಾರು ವಾಹನ ಕಾಯ್ದೆ ಏನು ಹೇಳುತ್ತದೆ? ಇಂತಹ ರೀಲ್ಸ್ ಹುಚ್ಚಿನಿಂದ ವಾಹನ ಸೀಜ್ ಆಗುವುದು ಯಾಕೆ? ಇಲ್ಲಿದೆ ವಿವರ.

ನಿಯಮಗಳ ಪ್ರಕಾರ, ವಾಹನದ ನೋಂದಣಿ ಸಂಖ್ಯೆ (ನಂಬರ್ ಪ್ಲೇಟ್) ಸ್ಪಷ್ಟವಾಗಿ ಕಾಣಿಸದೇ ಇರುವುದು ಅಥವಾ ಮುಚ್ಚಿರುವುದು ದೊಡ್ಡ ಅಪರಾಧ. ಕೇಂದ್ರ ಮೋಟಾರು ವಾಹನ ಕಾಯ್ದೆಯಡಿ ಪ್ರತಿಯೊಂದು ವಾಹನದಲ್ಲೂ ಸ್ಪಷ್ಟವಾಗಿ ಕಾಣಿಸುವ 'ಹೈ ಸೆಕ್ಯೂರಿಟಿ ರಿಜಿಸ್ಟ್ರೇಷನ್ ಪ್ಲೇಟ್' (HSRP) ಇರುವುದು ಕಡ್ಡಾಯ. ವಿವಿಧ ರಾಜ್ಯಗಳಲ್ಲಿ ಮೋಟಾರು ವಾಹನ ಕಾಯ್ದೆಯಡಿ ಇದಕ್ಕೆ ವಿಧಿಸುವ ದಂಡದ ಪ್ರಮಾಣ ಬೇರೆ ಬೇರೆಯಾಗಿದೆ. ಇದರೊಂದಿಗೆ ರೀಲ್ಸ್ ಮಾಡುವಾಗ ಅಪಾಯಕಾರಿಯಾಗಿ ವಾಹನ ಚಾಲನೆ ಮಾಡುವುದು ಅಥವಾ ರಸ್ತೆಯಲ್ಲಿ ಗಮನ ಭಂಗ ತರುವುದೂ ಶಿಕ್ಷಾರ್ಹ. ವಾಹನದ ಗುರುತು ಸಿಗದಂತೆ ದೊಡ್ಡ ಮಟ್ಟದ ಸ್ಟಿಕ್ಕರ್ ಅಥವಾ ಕಾಸ್ಮೆಟಿಕ್ ವಿನ್ಯಾಸಗಳನ್ನು ಮಾಡಿದರೆ ಪೊಲೀಸರು ವಾಹನವನ್ನು ಜಪ್ತಿ ಮಾಡಬಹುದು.

ವೈರಲ್ ರೋಡ್ ಸ್ಟಂಟ್‌ಗಳಿಗೆ ನಿಯಮ ಹಾಗೂ ದಂಡದ ವಿವರ

ಭಾರತದ ವಿವಿಧ ನಗರಗಳಲ್ಲಿ ದಂಡದ ಪ್ರಮಾಣ ವಿಭಿನ್ನವಾಗಿದೆ. ದೆಹಲಿಯಲ್ಲಿ ದೋಷಪೂರಿತ ಅಥವಾ ಫ್ಯಾನ್ಸಿ ನಂಬರ್ ಪ್ಲೇಟ್ ಅಳವಡಿಸಿದರೆ ಮೊದಲ ಬಾರಿಗೆ ₹5,000 ಮತ್ತು ಪದೇ ಪದೇ ತಪ್ಪೆಸಗಿದರೆ ₹10,000 ವರೆಗೆ ದಂಡ ವಿಧಿಸಲಾಗುತ್ತದೆ. ಅದೇ ನವಿ ಮುಂಬೈನಲ್ಲಿ ನಂಬರ್ ಪ್ಲೇಟ್ ಮುಚ್ಚಿಟ್ಟರೆ ಮೊದಲ ಬಾರಿಗೆ ₹500 ದಂಡವಿದೆ. ಅನುಮತಿಯಿಲ್ಲದೆ ಜಾಹೀರಾತು ಅಥವಾ ನಿಯಮಬಾಹಿರವಾಗಿ ಸ್ಟಿಕ್ಕರ್ ಹಾಕಿದರೂ ಹೆಚ್ಚುವರಿ ದಂಡ ಬೀಳುತ್ತದೆ. ಇನ್ನು ಜನನಿಬಿಡ ರಸ್ತೆಗಳಲ್ಲಿ ಅಪಾಯಕಾರಿ ರೀತಿಯಲ್ಲಿ ಚಾಲನೆ ಮಾಡುವುದು ಅಥವಾ ರೀಲ್ಸ್‌ಗಾಗಿ ಸ್ಟಂಟ್‌ ಮಾಡುವುದು ಕಂಡುಬಂದರೆ ಬೇರೆಯದೇ ಕಠಿಣ ಕಾಯ್ದೆಗಳಡಿ ಪ್ರಕರಣ ದಾಖಲಾಗುತ್ತದೆ.

ಲಿಪ್‌ಸ್ಟಿಕ್ ಕಲೆ ತೆಗೆಯಲು ಎಷ್ಟು ವೆಚ್ಚ? ಸ್ವಿಫ್ಟ್ ಡಿಟೇಲಿಂಗ್ ಸಲಹೆಗಳು

ಕಾರಿನ ಮೇಲಿನ ಲಿಪ್‌ಸ್ಟಿಕ್ ಕಲೆಗಳನ್ನು ತೆಗೆಯಲು ಇಡೀ ಕಾರಿಗೆ ರೀಪೇಂಟಿಂಗ್ ಮಾಡುವ ಅಗತ್ಯವಿಲ್ಲ. ಬದಲಿಗೆ ಪ್ರೊಫೆಷನಲ್ 'ಡಿಕಂಟ್ಯಾಮಿನೇಷನ್' ಮತ್ತು ಮೆಷಿನ್ ಪಾಲಿಶಿಂಗ್ ಸಾಕಾಗುತ್ತದೆ. ಕಾರಿನ ಗಾತ್ರ ಮತ್ತು ಕಲೆ ಎಷ್ಟು ಆಳಕ್ಕೆ ಇಳಿದಿದೆ ಎಂಬುದರ ಆಧಾರದ ಮೇಲೆ ಡಿಟೇಲಿಂಗ್ ವೆಚ್ಚ ನಿರ್ಧಾರವಾಗುತ್ತದೆ. ಒಂದು ವೇಳೆ ಕಲೆಗಳು ಪೇಂಟ್‌ನ ಮೇಲ್ಪದರಕ್ಕೆ ಹಾನಿ ಮಾಡಿದ್ದರೆ, ಆ ನಿರ್ದಿಷ್ಟ ಭಾಗಕ್ಕೆ (ಪ್ಯಾನೆಲ್) ಮಾತ್ರ ಪೇಂಟಿಂಗ್ ಮಾಡಿಸಬೇಕಾಗಬಹುದು. ಕಾರಿಗೆ ಪೇಂಟ್ ಪ್ರೊಟೆಕ್ಷನ್ ಫಿಲ್ಮ್ (PPF) ಹಾಕಿಸಿದ್ದರೆ, ಅದನ್ನು ತೆಗೆದು ಮತ್ತೆ ಹೊಸದಾಗಿ ಹಾಕಿಸಲು ಹೆಚ್ಚು ವೆಚ್ಚವಾಗುತ್ತದೆ. ಭಾರತದಲ್ಲಿ ಪ್ರಸ್ತುತ ಚಾಲ್ತಿಯಲ್ಲಿರುವ ಅಂದಾಜು ದರಗಳ ಪಟ್ಟಿ ಇಲ್ಲಿದೆ.

ಸೇವೆ/ಕೆಲಸ	ಭಾರತದಲ್ಲಿ ಅಂದಾಜು ವೆಚ್ಚ (2026)
ಸಿಂಗಲ್-ಸ್ಟೇಜ್ ಪಾಲಿಶ್ (ಹ್ಯಾಚ್‌ಬ್ಯಾಕ್)	₹2,000–3,500
ಟೂ-ಸ್ಟೇಜ್ ಪೇಂಟ್ ಕರೆಕ್ಷನ್	₹4,000–10,000
ಡೀಪ್ ತ್ರೀ-ಸ್ಟೇಜ್ ಕರೆಕ್ಷನ್	₹18,000–32,000
ಪ್ರತಿ ಪ್ಯಾನೆಲ್‌ಗೆ ರೀಪೇಂಟಿಂಗ್	₹3,800–8,500
ಸಂಪೂರ್ಣ ಹ್ಯಾಚ್‌ಬ್ಯಾಕ್ ರೀಪೇಂಟಿಂಗ್	₹25,000–38,000
ಪಿಪಿಎಫ್ ರಿಮೂವಲ್ + ಹೊಸದಾಗಿ ಅಳವಡಿಕೆ (ಹ್ಯಾಚ್‌ಬ್ಯಾಕ್)	₹30,500–89,000

ದಂಡದಿಂದ ಬಚಾವ್ ಆಗಿ ಸುರಕ್ಷಿತ ರೀಲ್ಸ್ ಮಾಡಲು ಈ ಟಿಪ್ಸ್ ಅನುಸರಿಸಿ

ವಾಹನದ ನಂಬರ್ ಪ್ಲೇಟ್ ಅನ್ನು ಯಾವುದೇ ಕಾರಣಕ್ಕೂ ಮುಚ್ಚಬೇಡಿ ಅಥವಾ ಡಿಸೈನ್ ಮಾಡಬೇಡಿ. ದೂರದಿಂದ ನೋಡಿದರೂ ನಂಬರ್ ಸ್ಪಷ್ಟವಾಗಿ ಕಾಣಿಸುವಂತಿರಬೇಕು. ವಾಹನದ ಲೋಗೋ, ಲೈಟ್‌ಗಳು, ಮಿರರ್ ಅಥವಾ ಗಾಜುಗಳನ್ನು ಮುಚ್ಚುವಂತಹ ಸ್ಟಿಕ್ಕರ್/ಗ್ರಾಫಿಕ್ಸ್ ಬಳಸಬೇಡಿ. ಚಾಲನೆ ಮಾಡುವಾಗ ವಿಡಿಯೋ ಶೂಟ್ ಮಾಡಬೇಡಿ. ಬದಲಿಗೆ ಖಾಸಗಿ ಜಾಗಗಳಲ್ಲಿ ಸುರಕ್ಷತಾ ಕ್ರಮಗಳೊಂದಿಗೆ ಶೂಟಿಂಗ್ ಮಾಡಿ. ಸಾರ್ವಜನಿಕ ರಸ್ತೆಗಳಲ್ಲಿ ಲೈಟ್ ಹೊಡೆಯುವ (ರಿಫ್ಲೆಕ್ಟಿವ್) ಅಥವಾ ಜಾಹೀರಾತು ಮಾದರಿಯ ರ‍್ಯಾಪ್‌ಗಳನ್ನು ಬಳಸಬೇಡಿ. ರಸ್ತೆಯಲ್ಲಿ ಶೂಟಿಂಗ್ ಮಾಡಲೇಬೇಕಿದ್ದರೆ ವಾಹನ ದಟ್ಟಣೆ ಇಲ್ಲದಿರುವಲ್ಲಿ ಪಾರ್ಕ್ ಮಾಡಿ, ಟ್ರಾಫಿಕ್ ಕೋನ್‌ಗಳನ್ನು ಬಳಸಿ ನಿಯಮ ಪಾಲಿಸಿ. ಇತ್ತೀಚೆಗೆ ಪೊಲೀಸರು ಸಾಮಾಜಿಕ ಜಾಲತಾಣದ ರೀಲ್ಸ್ ನೋಡಿಯೇ ವಾಹನಗಳನ್ನು ಪತ್ತೆಹಚ್ಚಿ ಜಪ್ತಿ ಮಾಡುತ್ತಿದ್ದಾರೆ, ಎಚ್ಚರ!