ನೀರಲ್ಲಿ ಬೋಟ್ ಅಲ್ಲ ಕಾರು; ಇದು ಬೆಂಝ್ ಕಮಾಲ್

By Nagaraja

Published: Thursday, April 28, 2016, 18:37 [IST]

ವಿಶ್ವ ವಿಖ್ಯಾತ ಕಾರುಗಳನ್ನು ನಿರ್ಮಿಸುವುದರಲ್ಲಿ ಹೆಸರುವಾಸಿಯಾಗಿರುವ ಜರ್ಮನಿಯ ಐಷಾರಾಮಿ ಮರ್ಸಿಡಿಸ್ ಬೆಂಝ್ ಸಂಸ್ಥೆಯೀಗ ವಾಹನ ಲೋಕಕ್ಕೆ ಹೊಸತೊಂದು ಕೊಡುಗೆಯನ್ನು ನೀಡಿದೆ. ಅದು ಬೇರೆಯೇನಲ್ಲ, ಅತ್ಯಾಕರ್ಷಕ 'ಏರೋ 460 ಗ್ರ್ಯಾನ್ ಟರಿಸ್ಮೊ ಎಡಿಷನ್ 1' ಬೋಟ್.

ಫ್ರಾನ್ಸ್ ನ ರಿವರಿಯಾ ನದಿಯಲ್ಲಿ ತೇಲುವ ಈ ಬೋಟ್ ಅನ್ನು ವೀಕ್ಷಿಸಿದಾಗ ಇದ್ಯಾವ ಕಾರು ನೀರಲ್ಲಿ ತೇಲಾಡುತ್ತಿದೆಯೆಂಬ ಗೊಂದಲವುಂಟಾಗಬಹುದು. ನಿಜಾಂಶವೆಂದರೆ ಬೆಂಝ್ ಐಕಾನಿಕ್ ರೇಸ್ ಕಾರುಗಳಿಂದ ಪ್ರೇರಣೆ ಪಡೆದುಕೊಂಡು ಇದರ ವಿಶಿಷ್ಟ ವಿನ್ಯಾಸವನ್ನು ರಚಿಸಲಾಗಿದೆ.

'ಸಿಲ್ವರ್ ಏರೋ ಆಫ್ ದಿ ಸೀಸ್' ಎಂಬ ಅಕ್ಕರೆಯ ಹೆಸರಿನಿಂದ ಅರಿಯಲ್ಪಡುವ ಮರ್ಸಿಡಿಸ್ ಬೆಂಝ್ ವಿಹಾರ ನೌಕೆ 11 ಕೋಟಿ ರುಪಾಯಿಗಿಂತಲೂ ಹೆಚ್ಚು ದುಬಾರಿಯೆನಿಸಲಿದೆ.

1930ರ ದಶಕದ ರೇಸಿಂಗ್ ಕಾರುಗಳಿಂದ ಸ್ಪೂರ್ತಿ ಪಡೆದುಕೊಂಡು 14.14 ಮೀಟರ್ ಉದ್ದದ ಈ ವಿಹಾರ ನೌಕೆಯನ್ನು ರಚಿಸಲಾಗಿದೆ.

ಐಕಾನಿಕ್ ಮರ್ಸಿಡಿಸ್ ಬೆಂಝ್ ಸೆಡಾನ್ ಕಾರು ನದಿಯಲ್ಲಿ ತೇಲುವ ರೀತಿಯಲ್ಲಿ ಈ ವಿಹಾರ ನೌಕೆಯನ್ನು ನಿರ್ಮಿಸಲಾಗಿದೆ.

ವಿಶೇಷವೆಂದರೆ ಕೇವಲ ಸೀಮಿತ ಸಂಖ್ಯೆಯ 10ರಷ್ಟು ಯುನಿಟ್ ಗಳಷ್ಟು ಮಾತ್ರ ನಿರ್ಮಾಣವಾಗಲಿದೆ.

ಬ್ರಿಟನ್ ತಳಹದಿಯ ಬೋಟ್ ನಿರ್ಮಾಣ ಸಂಸ್ಥೆ ಸಿಲ್ವರ್ ಏರೋಸ್ ಮರೈನ್ ಜೊತೆಗಾರಿಕೆಯಲ್ಲಿ ಮರ್ಸಿಡಿಸ್ ಬೆಂಝ್ ದುಬಾರಿ ವಿಹಾರ ನೌಕೆ ನಿರ್ಮಿಸಲಿದೆ.

2012ರಲ್ಲೇ ಯೋಜನೆ ಪೂರ್ಣಗೊಳಿಸುವ ಇರಾದೆಯಿತ್ತಾದರೂ ಕಾರಣಂತರಗಳಿಂದಾಗಿ ಹಿನ್ನಡೆ ಸಂಭವಿಸಿತ್ತು. ಕೊನೆಗೂ ಪ್ರತಿಷ್ಠಿತ ಬೋಟ್ ನದಿಗಿಳಿಯುವಲ್ಲಿ ಯಶಸ್ವಿಯಾಗಿದೆ.

ಯಾನ್ಮಾರ್ ಡೀಸೆಲ್ ಎಂಜಿನ್ ಗಳಿಂದ ನಿಯಂತ್ರಿಸಲ್ಪಡುವ ಮರ್ಸಿಡಿಸ್ ಬೆಂಝ್ ದುಬಾರಿ ಬೋಟ್ 480 ಅಶ್ವಶಕ್ತಿಯನ್ನು ಉತ್ಪಾದಿಸುವಷ್ಟು ಸಾಮರ್ಥ್ಯವನ್ನು ಹೊಂದಿರಲಿದೆ.

ಗಂಟೆಗೆ 74 ಕೀ.ಮೀ. (40 knot) ವೇಗದಲ್ಲಿ ಸಂಚರಿಸುವ ಸಾಮರ್ಥ್ಯ ಹೊಂದಿರುವ ಮರ್ಸಿಡಿಸ್ ಬೆಂಝ್ ಏರೋ 460 ಗ್ರ್ಯಾನ್ ಟರಿಸ್ಮೊ ಎಡಿಷನ್ 1 ಬೋಟ್ ನಲ್ಲಿ 10 ಮಂದಿಗೆ ಆರಾಮದಾಯಕವಾಗಿ ಪಯಣಿಸಬಹುದಾಗಿದೆ.