ಗಣೇಶ ವಿಸರ್ಜನೆ ಸಂಭ್ರಮ: ಮುಂಬೈ ರಸ್ತೆಯಲ್ಲಿ ಸೂಪರ್‌ಕಾರ್‌ಗಳ ಅಬ್ಬರ, ದಂಡ ತಪ್ಪಿಸಲು ಈ ನಿಯಮ ಪಾಲಿಸಿ!

ಇಂದು (ಸೆಪ್ಟೆಂಬರ್ 25) ದಕ್ಷಿಣ ಮುಂಬೈನಲ್ಲಿ ಗಣೇಶ ವಿಸರ್ಜನೆಯ ಭರಾಟೆ ಜೋರಾಗಿದ್ದು, ಭಾರಿ ಟ್ರಾಫಿಕ್ ಜಾಮ್ ಉಂಟಾಗುವ ಸಾಧ್ಯತೆಯಿದೆ. ಇನ್ನೊಂದೆಡೆ, ನಗರದ ರಸ್ತೆಗಳಲ್ಲಿ ಧೂಳೆಬ್ಬಿಸುತ್ತಿರುವ ಸೂಪರ್‌ಕಾರ್‌ಗಳ ವಿಡಿಯೋಗಳು ಸೋಶಿಯಲ್ ಮೀಡಿಯಾದಲ್ಲಿ ಸಕತ್ ಟ್ರೆಂಡ್ ಆಗುತ್ತಿವೆ. ಯಾವುದೇ ಅಹಿತಕರ ಘಟನೆ ನಡೆಯದಂತೆ ನಗರದಾದ್ಯಂತ 24,000ಕ್ಕೂ ಹೆಚ್ಚು ಪೊಲೀಸರನ್ನು ನಿಯೋಜಿಸಲಾಗಿದೆ. ಕೋಸ್ಟಲ್ ರಸ್ತೆಯಲ್ಲಿ ಗಂಟೆಗೆ 80 ಕಿ.ಮೀ ವೇಗದ ಮಿತಿ ಹಾಗೂ ಟನಲ್‌ನಲ್ಲಿ ವಿಡಿಯೋ ಚಿತ್ರೀಕರಣದ ನಿಷೇಧ ಸೇರಿದಂತೆ ಕಟ್ಟುನಿಟ್ಟಿನ ನಿಯಮಗಳನ್ನು ಜಾರಿಗೆ ತರಲಾಗಿದೆ. ವಿಸರ್ಜನಾ ಮೆರವಣಿಗೆ ಸಾಗುವ ರಸ್ತೆಗಳಲ್ಲಿ ಮಾರ್ಗ ಬದಲಾವಣೆ (ಡೈವರ್ಷನ್) ಮಾಡಲಾಗಿದ್ದು, ಮೆರೈನ್ ಡ್ರೈವ್, ವರ್ಲಿ ಹಾಗೂ ಬಿಕೆಸಿ (BKC) ಪ್ರದೇಶಗಳು ಮಧ್ಯಾಹ್ನದಿಂದ ತಡರಾತ್ರಿಯವರೆಗೆ ಜನಜಂಗುಳಿಯಿಂದ ಭೋರ್ಗರೆಯಲಿವೆ.

ಗಿರ್ಗಾಂವ್ ಚೌಪಾಟಿ, ಮೆರೈನ್ ಡ್ರೈವ್, ವರ್ಲಿ, ದಾದರ್, ಮಹಿಮ್ ಮತ್ತು ಬೈಕುಲ್ಲಾ ಸುತ್ತಮುತ್ತಲಿನ ರಸ್ತೆಗಳನ್ನು ಹಂತ-ಹಂತವಾಗಿ ಮುಚ್ಚುವ ಸಾಧ್ಯತೆಯಿದೆ. ಉತ್ತರಕ್ಕೆ ಸಾಗುವ ವಾಹನಗಳನ್ನು ಪ್ರಿನ್ಸಸ್ ಸ್ಟ್ರೀಟ್, ಮಹಾಪಾಲಿಕಾ ಮಾರ್ಗ ಮತ್ತು ಪಿ ಡಿಮೆಲ್ಲೋ ರಸ್ತೆಗಳ ಮೂಲಕ ಡೈವರ್ಟ್ ಮಾಡಬಹುದು. ಪ್ರವೇಶ ಮತ್ತು ನಿರ್ಗಮನ ನಿಯಂತ್ರಣಗಳೊಂದಿಗೆ ಕೋಸ್ಟಲ್ ರಸ್ತೆಯು ಕೆಲಮಟ್ಟಿಗೆ ಟ್ರಾಫಿಕ್ ಒತ್ತಡವನ್ನು ಕಡಿಮೆ ಮಾಡಲಿದೆ. ಮಧ್ಯಾಹ್ನದಿಂದ ಪ್ರಾರಂಭವಾಗುವ ಮೆರವಣಿಗೆಗಳು ತಡರಾತ್ರಿಯವರೆಗೂ ಮುಂದುವರಿಯುವುದರಿಂದ, ಸಾರ್ವಜನಿಕರು ಮುಂಚಿತವಾಗಿಯೇ ಪ್ರಯಾಣ ಯೋಜನೆ ಮಾಡಿಕೊಳ್ಳುವುದು ಹಾಗೂ ಪರ್ಯಾಯ ಮಾರ್ಗಗಳನ್ನು ಬಳಸುವುದು ಸೂಕ್ತ.

ಕೋಸ್ಟಲ್ ರಸ್ತೆ ನಿಯಮಗಳು ಮತ್ತು ದಂಡದ ವಿವರ

ಈ ಕೋರಿಡಾರ್‌ನಲ್ಲಿ ವಾಹನಗಳ ವೇಗಕ್ಕೆ ಮಿತಿ ಹೇರಲಾಗಿದೆ—ನೇರ ರಸ್ತೆಯಲ್ಲಿ ಗಂಟೆಗೆ ಗರಿಷ್ಠ 80 ಕಿ.ಮೀ, ಟನಲ್‌ಗಳಲ್ಲಿ 60 ಕಿ.ಮೀ ಮತ್ತು ಮೈಕೈ ತಿರುವುಗಳಲ್ಲಿ 40 ಕಿ.ಮೀ ವೇಗ ಮಿತಿ ನಿಗದಿಪಡಿಸಲಾಗಿದೆ. ಇಲ್ಲಿ ವಿಡಿಯೋ ಅಥವಾ ರೀಲ್ಸ್ ಮಾಡಲು ವಾಹನ ನಿಲ್ಲಿಸುವುದು ಅಥವಾ ಕೆಳಗಿಳಿಯುವುದನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ. ನಿಯಮ ಉಲ್ಲಂಘಿಸುವವರ ವಿರುದ್ಧ ಭಾರತೀಯ ನ್ಯಾಯ ಸಂಹಿತೆಯ ಸೆಕ್ಷನ್ 281 ಮತ್ತು 125 ಹಾಗೂ ಮೋಟಾರು ವಾಹನ ಕಾಯ್ದೆಯ ಸೆಕ್ಷನ್ 184ರ (ಅಪಾಯಕಾರಿ ಚಾಲನೆ) ಅಡಿಯಲ್ಲಿ ಪೊಲೀಸರು ಪ್ರಕರಣ ದಾಖಲಿಸುತ್ತಿದ್ದಾರೆ. ಇತ್ತೀಚೆಗೆ ಟನಲ್‌ನಲ್ಲಿ ರೇಸಿಂಗ್ ಮಾಡುತ್ತಿದ್ದ ವಿಡಿಯೋ ವೈರಲ್ ಆದ ಬೆನ್ನಲ್ಲೇ 11 ಕಾರುಗಳನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ. ಇದರ ಜೊತೆಗೆ ಅನಧಿಕೃತ ಫ್ಲೇಶರ್ ಮತ್ತು ಕಣ್ಣು ಕೊರೈಸುವ ಆಫ್ಟರ್‌ಮಾರ್ಕೆಟ್ ಹೆಡ್‌ಲೈಟ್‌ಗಳನ್ನು ಹೊಂದಿರುವ ವಾಹನಗಳ ವಿರುದ್ಧವೂ ಕಾರ್ಯಾಚರಣೆ ಮುಂದುವರಿದಿದೆ.

ದಕ್ಷಿಣ ಮುಂಬೈನಲ್ಲಿ ಸೂಪರ್‌ಕಾರ್‌ಗಳ ಗದ್ದಲ

ಮೆರೈನ್ ಡ್ರೈವ್‌ನ ಮೈಕೈ ತಿರುವು, ವರ್ಲಿ ಸೀ ಫೇಸ್ ಮತ್ತು ಬಿಕೆಸಿಯ ಮುಖ್ಯ ರಸ್ತೆಗಳಲ್ಲಿ ಈ ಐಷಾರಾಮಿ ಸೂಪರ್‌ಕಾರ್‌ಗಳು ಹೆಚ್ಚಾಗಿ ಕಂಡುಬರುತ್ತವೆ. ಈ ಕಾರುಗಳನ್ನು ವೀಕ್ಷಿಸುವಾಗ ಬ್ಯಾರಿಕೇಡ್‌ಗಳ ಹಿಂಭಾಗದಲ್ಲೇ ನಿಂತು, ಸ್ವಯಂಸೇವಕರು, ಆಂಬ್ಯುಲೆನ್ಸ್ ಮತ್ತು ಡೊಳ್ಳು ಕುಣಿತದ ತಂಡಗಳಿಗೆ ದಾರಿ ಮಾಡಿಕೊಡಿ. ಜನಸಂದಣಿ ಇರುವಲ್ಲಿ ಏಕಾಏಕಿ ವೇಗ ಹೆಚ್ಚಿಸುವುದು (Rev-bombing), ಕರ್ಕಶ ಸೈಲೆನ್ಸರ್ ಸದ್ದು ಮಾಡುವುದು ಮತ್ತು ಅಪಾಯಕಾರಿಯಾಗಿ ಲೇನ್ ಬದಲಾಯಿಸುವುದನ್ನು ತಡೆಯಿರಿ. ಮಾರ್ಪಾಡು ಮಾಡಿದ ಸೈಲೆನ್ಸರ್‌ಗಳು ಹಾಗೂ ಅನಧಿಕೃತ ಲೈಟ್‌ಗಳ ತಪಾಸಣೆ ತೀವ್ರಗೊಳ್ಳಲಿದೆ. ಜೊತೆಗೆ, ಖಾಸಗಿತನ ರಕ್ಷಿಸಲು ವಿಡಿಯೋಗಳಲ್ಲಿ ಕಾರಿನ ನಂಬರ್ ಪ್ಲೇಟ್‌ಗಳನ್ನು ಮರೆಮಾಡುವುದು ಒಳಿತು.

ಮುಂಬೈನಲ್ಲಿ ಈ ಸೂಪರ್‌ಕಾರ್‌ಗಳ ಆನ್‌-ರೋಡ್ ಬೆಲೆ ಮತ್ತು ಇಎಮ್‌ಐ ವಿವರ

ಮುಂಬೈನ ಪ್ರಮುಖ ಸೂಪರ್‌ಕಾರ್‌ಗಳ ಅಂದಾಜು ಆನ್-ರೋಡ್ ಬೆಲೆ ಮತ್ತು ಮಾಸಿಕ ಕಂತಿನ (EMI) ವಿವರ ಇಲ್ಲಿದೆ. (%20 ಡೌನ್ ಪೇಮೆಂಟ್, 5 ವರ್ಷಗಳ ಅವಧಿ ಮತ್ತು ಶೇ. 9 ರಷ್ಟು ಬಡ್ಡಿದರವನ್ನು ಆಧರಿಸಿ ಈ ಇಎಮ್‌ಐ ಲೆಕ್ಕಾಚಾರ ಮಾಡಲಾಗಿದೆ. ಪ್ರಸ್ತುತ ಡೀಲರ್ ದರಗಳು ಮತ್ತು ನಗರದ ತೆರಿಗೆಗಳ ಆಧಾರದ ಮೇಲೆ ಈ ಬೆಲೆಗಳನ್ನು ನೀಡಲಾಗಿದ್ದು, ಆಯ್ಕೆಗಳು ಮತ್ತು ಆಕ್ಸೆಸರಿಗಳಿಗೆ ಅನುಗುಣವಾಗಿ ಒಟ್ಟು ಮೊತ್ತದಲ್ಲಿ ವ್ಯತ್ಯಾಸವಾಗಬಹುದು).

ಮಾದರಿ	ಮುಂಬೈ ಆನ್-ರೋಡ್ ಬೆಲೆ	ಅಂದಾಜು ಮಾಸಿಕ EMI
Lamborghini Urus SE	₹5.4–5.5 ಕೋಟಿ	₹8.9–9.2 ಲಕ್ಷ
Mercedes‑AMG G 63	₹4.1–4.6 ಕೋಟಿ	₹6.8–7.6 ಲಕ್ಷ
Porsche 911 Turbo S	₹4.5–4.6 ಕೋಟಿ	₹9.0–9.6 ಲಕ್ಷ
Ferrari 296 GTB	₹6.3–6.5 ಕೋಟಿ	₹10.2–10.8 ಲಕ್ಷ
Lamborghini Temerario	₹7.1–7.2 ಕೋಟಿ	₹11.5–12.0 ಲಕ್ಷ

ಸೂಪರ್‌ಕಾರ್‌ಗಳ ಅಂದವನ್ನು ಆನಂದಿಸಿ, ಆದರೆ ರಸ್ತೆಯ ಮಧ್ಯೆ ನಿಂತು ವಿಡಿಯೋ ಮಾಡದೆ ಸುರಕ್ಷಿತವಾದ ಕಾಲುದಾರಿಯಿಂದ (ಫುಟ್‌ಪಾತ್) ಚಿತ್ರೀಕರಿಸಿ. ರೀಲ್ಸ್‌ ಅಥವಾ ಕಂಟೆಂಟ್ ಮಾಡಲು ಕೋಸ್ಟಲ್ ರಸ್ತೆ ಅಥವಾ ಟನಲ್‌ಗಳ ಒಳಗಡೆ ವಾಹನಗಳನ್ನು ನಿಲ್ಲಿಸಬೇಡಿ. ಅಪಾಯಕಾರಿ ಸ್ಟಂಟ್‌ಗಳನ್ನು ಉತ್ತೇಜಿಸುವಂತೆ ವಿಡಿಯೋಗಳನ್ನು ಶೇರ್ ಮಾಡಬೇಡಿ ಹಾಗೂ ಅನುಮತಿ ಇಲ್ಲದೆ ಇತರರ ಮುಖ ಅಥವಾ ನಂಬರ್ ಪ್ಲೇಟ್‌ಗಳನ್ನು ತೋರಿಸಬೇಡಿ. ಈ ಸರಳ ನಿಯಮಗಳನ್ನು ಪಾಲಿಸಿದರೆ ಗಣೇಶೋತ್ಸವದ ಸಡಗರವೂ ಹಾಳಾಗುವುದಿಲ್ಲ ಮತ್ತು ದಂಡ (ಚಲನ್) ಕಟ್ಟುವ ಜಂಜಾಟವೂ ಇರುವುದಿಲ್ಲ!