ನೋಯ್ಡಾ ರಸ್ತೆಯಲ್ಲಿ ನಂಬರ್ ಪ್ಲೇಟ್ ಇಲ್ಲದ 5 ಬಲೆನೋ ಕಾರುಗಳ ಸ್ಟಂಟ್: ವಿಡಿಯೋ ವೈರಲ್, ಪೊಲೀಸರ ತನಿಖೆ ಶುರು!

ಸೆಪ್ಟೆಂಬರ್ 21ರ ತಡರಾತ್ರಿ ನೋಯ್ಡಾದ ರಸ್ತೆಯಲ್ಲಿ ನಂಬರ್ ಪ್ಲೇಟ್‌ ಇಲ್ಲದ ಐದು ಕಪ್ಪು ಬಣ್ಣದ ಮಾರುತಿ ಸುಜುಕಿ ಬಲೆನೋ ಕಾರುಗಳು ಭೀಕರ ಸ್ಟಂಟ್‌ ಮಾಡುವ 20 ಸೆಕೆಂಡ್‌ಗಳ ವಿಡಿಯೋ ವೈರಲ್‌ ಆಗಿದೆ. ಈ ದೃಶ್ಯಾವಳಿ ಬೆನ್ನತ್ತಿರುವ ಪೊಲೀಸರು ತೀವ್ರ ತನಿಖೆ ಆರಂಭಿಸಿದ್ದಾರೆ. ಮಹಾಮಾಯಾ ಫ್ಲೈಓವರ್ ಬಳಿ ದೆಹಲಿ ಕಡೆಯಿಂದ ಬಂದ ಈ ಕಾರುಗಳ ಕಾನ್ವಾಯ್, ಗ್ರೇಟರ್ ನೋಯ್ಡಾ ಕಡೆಗೆ ವೇಗವಾಗಿ ಧಾವಿಸಿ, ಯಮುನಾ ಎಕ್ಸ್‌ಪ್ರೆಸ್‌ವೇ ಮೂಲಕ ಕಾಲ್ಕಿತ್ತಿದೆ. ಸದ್ಯ ಪೊಲೀಸರು ಹಾದಿಯುದ್ದಕ್ಕೂ ಇರುವ ಹಲವು ಸಿಸಿಟಿವಿ ಕ್ಯಾಮೆರಾಗಳ ಫೂಟೇಜ್ ಜಾಲಾಡುತ್ತಿದ್ದಾರೆ.

ನೋಯ್ಡಾ ಪೊಲೀಸರು ಈ ಬಗ್ಗೆ ಪ್ರತಿಕ್ರಿಯಿಸಿದ್ದು, ರಸ್ತೆಯುದ್ದಕ್ಕೂ ಇರುವ ಸಿಸಿಟಿವಿ ದೃಶ್ಯಗಳನ್ನು ಪರಿಶೀಲಿಸಲಾಗುತ್ತಿದ್ದು, ಪ್ರಕರಣ ದಾಖಲಿಸಿಕೊಳ್ಳಲಾಗುತ್ತಿದೆ ಎಂದಿದ್ದಾರೆ. "ರಸ್ತೆಯ ಸಿಸಿಟಿವಿ ಕ್ಯಾಮೆರಾಗಳನ್ನು ತಪಾಸಣೆ ನಡೆಸುತ್ತಿದ್ದು, ತನಿಖೆ ಪ್ರಗತಿಯಲ್ಲಿದೆ. ಈ ಪ್ರಕರಣದ ತನಿಖೆಗಾಗಿ ಪ್ರತ್ಯೇಕ ತಂಡವನ್ನು ರಚಿಸಿದ್ದೇವೆ" ಎಂದು ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಇದರ ಜೊತೆಗೆ, ಎಕ್ಸ್‌ಪ್ರೆಸ್‌ವೇ ಲೂಪ್‌ಗಳಲ್ಲಿರುವ ಎಎನ್‌ಪಿಆರ್‌ ಕ್ಯಾಮೆರಾ ಫೀಡ್‌ಗಳನ್ನು ಪರಿಶೀಲಿಸಿ, ಘಟನಾ ಸ್ಥಳದ ಸುತ್ತಮುತ್ತ ಸಂಚರಿಸಿದ ಕಾರುಗಳು ಮತ್ತು ಅವರ ಸಹಚರರನ್ನು ಪತ್ತೆಹಚ್ಚಲು ತನಿಖಾಧಿಕಾರಿಗಳು ಕಸರತ್ತು ನಡೆಸುತ್ತಿದ್ದಾರೆ.

ನಂಬರ್ ಪ್ಲೇಟ್ ಇಲ್ಲದ ಬಲೆನೋ ಕಾರುಗಳ ಹಾವಳಿ: ಘಟನೆಯ ಟೈಮ್‌ಲೈನ್ ಮತ್ತು ಸಂಚಾರ ಮಾರ್ಗ

ಅಧಿಕಾರಿಗಳು ನೀಡಿರುವ ಮಾಹಿತಿ ಪ್ರಕಾರ, ಐದೂ ಕಾರುಗಳು ಮಹಾಮಾಯಾ ಕಡೆಯಿಂದ ಬಂದು ಗ್ರೇಟರ್ ನೋಯ್ಡಾ ಕಡೆಗೆ ಸಾಗಿ, ನಂತರ ಯಮುನಾ ಎಕ್ಸ್‌ಪ್ರೆಸ್‌ವೇಗೆ ಪ್ರವೇಶಿಸಿವೆ. ವೈರಲ್ ವಿಡಿಯೋದಲ್ಲಿ ಕಾರು ಚಲಿಸುತ್ತಿರುವಾಗಲೇ ವ್ಯಕ್ತಿಯೊಬ್ಬ ಕಿಟಕಿಯಿಂದ ಹೊರಗೆ ಬಾಗಿ ವಿಡಿಯೋ ಚಿತ್ರೀಕರಿಸುತ್ತಿರುವುದು ಕಂಡುಬಂದಿದೆ. ಇತ್ತೀಚಿನ ದಿನಗಳಲ್ಲಿ ನೋಯ್ಡಾದಲ್ಲಿ ಇಂತಹ ಸ್ಟಂಟ್ ವಿಡಿಯೋಗಳು ವೈರಲ್ ಆದ ತಕ್ಷಣವೇ ಪೊಲೀಸರು ಕಾರು ಮುಟ್ಟುಗೋಲು ಹಾಕಿಕೊಳ್ಳುವುದು ಮತ್ತು ಭಾರಿ ಮೊತ್ತದ ಇ-ಚಲನ್ ವಿಧಿಸುವ ಮೂಲಕ ಕಠಿಣ ಕ್ರಮ ಕೈಗೊಳ್ಳುತ್ತಿದ್ದಾರೆ.

ದಂಡ ಮತ್ತು ಕಾನೂನು ಕ್ರಮ: ನಂಬರ್ ಪ್ಲೇಟ್ ಇಲ್ಲದಿರುವುದು, ಅಪಾಯಕಾರಿ ಸ್ಟಂಟ್‌ಗೆ ಬೀಳುತ್ತೆ ಭಾರೀ ದಂಡ!

ಉಲ್ಲಂಘನೆ	ಕಾಯ್ದೆ/ನಿಯಮ	ದಂಡ/ಶಿಕ್ಷೆಯ ವಿವರ
ನೋಂದಣಿ/ನಂಬರ್ ಪ್ಲೇಟ್ ಇಲ್ಲದೆ ವಾಹನ ಚಾಲನೆ	ಮೋಟಾರು ವಾಹನ ಕಾಯ್ದೆ ಸೆಕ್ಷನ್ 39/192	ಮೊದಲ ಬಾರಿಗೆ ₹2,000–₹5,000; ಮರುಕಳಿಸಿದರೆ ₹10,000 ವರೆಗೆ ದಂಡ, ಕೋರ್ಟ್ ಜೈಲು ಶಿಕ್ಷೆಯನ್ನೂ ವಿಧಿಸಬಹುದು
ಅಪಾಯಕಾರಿ ಅಥವಾ ಸ್ಟಂಟ್ ಡ್ರೈವಿಂಗ್	ಮೋಟಾರು ವಾಹನ ಕಾಯ್ದೆ ಸೆಕ್ಷನ್ 184	₹1,000–₹5,000 ದಂಡ ಮತ್ತು/ಅಥವಾ 1 ವರ್ಷದವರೆಗೆ ಜೈಲು ಶಿಕ್ಷೆ
ದೋಷಪೂರಿತ/ಅಸ್ಪಷ್ಟ ನಂಬರ್ ಪ್ಲೇಟ್, ಫ್ಯಾನ್ಸಿ ಫಾಂಟ್‌ಗಳು	CMVR 50/51 ಮತ್ತು ಸೆಕ್ಷನ್ 177	ಮೊದಲ ಬಾರಿಗೆ ₹500; ನಂತರ ₹1,500 (ರಾಜ್ಯ ನಿಯಮಗಳಿಗೆ ಅನುಗುಣವಾಗಿ ಬದಲಾಗಬಹುದು)

ಸಾಮಾನ್ಯವಾಗಿ ಹೈವೇಗಳಲ್ಲಿ ಕಣ್ಣಿಡುವ ಆಟೋಮ್ಯಾಟಿಕ್ ನಂಬರ್ ಪ್ಲೇಟ್ ರೆಕಗ್ನಿಷನ್ (ANPR) ಕ್ಯಾಮೆರಾಗಳಿಂದ ತಪ್ಪಿಸಿಕೊಳ್ಳಲು ಇಂತಹ ಗ್ಯಾಂಗ್‌ಗಳು ನಂಬರ್ ಪ್ಲೇಟ್ ಇಲ್ಲದೆ ಕಾರು ಚಲಾಯಿಸುತ್ತವೆ. ಹೈವೇ ವೇಗದಲ್ಲೂ ಎಚ್‌ಎಸ್‌ಆರ್‌ಪಿ ಪ್ಲೇಟ್‌ಗಳನ್ನು ಈ ಕ್ಯಾಮೆರಾಗಳು ಸುಲಭವಾಗಿ ಗುರುತಿಸುತ್ತವೆ. ಆದರೆ, ನಂಬರ್ ಪ್ಲೇಟ್ ಇಲ್ಲದಿದ್ದರೂ ಟೋಲ್ ಹಾಗೂ ನಗರದ ಸಿಸಿಟಿವಿಗಳು, ಲೇನ್ ANPR ಮತ್ತು ಫಾಸ್ಟ್ಯಾಗ್ ವಿಶ್ಲೇಷಣೆಯ ಮೂಲಕ ಈ ಕಾರುಗಳ ಸಂಚಾರ ಸಮಯ ಹಾಗೂ ಮಾರ್ಗವನ್ನು ಪತ್ತೆಹಚ್ಚಲು ಸಾಧ್ಯವಾಗುತ್ತದೆ. ಎಚ್‌ಎಸ್‌ಆರ್‌ಪಿ ಪ್ಲೇಟ್‌ಗಳಿದ್ದರೆ ತನಿಖೆ ಮತ್ತಷ್ಟು ನಿಖರ ಹಾಗೂ ಸುಲಭವಾಗುತ್ತದೆ.

ವಾಹನ ಸವಾರರ ಗಮನಕ್ಕೆ: ನಿಯಮಾನುಸಾರ ಇರಲಿ ನಂಬರ್ ಪ್ಲೇಟ್, ಕವರ್‌ ಅಥವಾ ಫ್ಲಿಪ್ಪರ್‌ಗಳನ್ನು ಬಳಸಬೇಡಿ

CMVR ನಿಯಮ 50/51ರ ಪ್ರಕಾರ ಸರ್ಕಾರ ಮಾನ್ಯತೆ ಮಾಡಿರುವ ಹೈ ಸೆಕ್ಯುರಿಟಿ ರಿಜಿಸ್ಟ್ರೇಷನ್ ಪ್ಲೇಟ್‌ಗಳನ್ನು (HSRP) ಕಡ್ಡಾಯವಾಗಿ ಅಳವಡಿಸಿಕೊಳ್ಳಬೇಕು. ನಂಬರ್ ಪ್ಲೇಟ್‌ಗಳಿಗೆ ಟಿಂಟೆಡ್ ಕವರ್, ರಿಮೋಟ್ ಫ್ಲಿಪ್ಪರ್ ಅಥವಾ ಫ್ಯಾನ್ಸಿ ಅಕ್ಷರಗಳನ್ನು ಬಳಸಬಾರದು. ದೋಷಪೂರಿತ ಪ್ಲೇಟ್‌ಗಳಿಗೆ ವಿವಿಧ ರಾಜ್ಯಗಳಲ್ಲಿ ₹500 ರಿಂದ ₹1,500 ವರೆಗೆ ದಂಡ ವಿಧಿಸಲಾಗುತ್ತದೆ. ಅದೇ ರೀತಿ ನೋಂದಣಿ ಇಲ್ಲದೆ ವಾಹನ ಚಲಾಯಿಸಿದರೆ ₹10,000 ವರೆಗೆ ದಂಡ ತೆರಬೇಕಾಗಬಹುದು. ಅಪಾಯಕಾರಿ ಚಾಲನೆಗೆ ಮೋಟಾರು ವಾಹನ ಕಾಯ್ದೆಯ ಸೆಕ್ಷನ್ 184 ಮತ್ತು ಬಿಎನ್‌ಎಸ್ ಸೆಕ್ಷನ್ 281ರ ಅಡಿಯಲ್ಲಿ ಪ್ರತ್ಯೇಕ ಪ್ರಕರಣ ದಾಖಲಿಸಿ ಕಠಿಣ ಕ್ರಮ ಕೈಗೊಳ್ಳಲಾಗುತ್ತದೆ.